Samuel II, 20:19 - BAIBLO ALOO NGMAMI KLƆUKLƆU Ɔ

¹⁹ Wa ma nɛ ɔ, ma nguaa ji lɛ; tue mi jɔmi ngɛ mi, nɛ e ji mahi nɛ yeɔ Israel anɔkuale ɔ a kpɛti kake. Nɛ moo o ngɛ hlae nɛ o kpata ma a hɛ mi! Mɛni he je o ngɛ hlae nɛ o puɛ Yawɛ nitsɛ blɔ fa mi nɔ́ ɔ?”

Samuel II, 20:19 ပူးပေါင်းရင်းမြစ်များ

Samuel I, 26:19

Ye nyɔmtsɛ, moo bu nɔ́ nɛ o tsɔlɔ ma de mo nɛ ɔ tue. Ke Yawɛ lɛ pee loko o ngɛ ye se blɔ hlae ɔ, lɛɛ e ngmɛ mi blɔ nɛ ma sã bɔ kɛ kpata lɛ. Se ke nimli adesahi a ní tsumi ɔ, lɛɛ Yawɛ nɛ e gbiɛ mɛ; ejakaa mwɔnɛ ligbi nɛ ɔ, a fie mi kɛ je Yawɛ zugba a nɔ kɛ ho ma kpa nɔ ya nɛ ma ya ja mawu kpahi ngɛ lejɛ ɔ.

Samuel II, 21:3

David bi Gibeon bi ɔmɛ ke, “Mɛni ma pee ha nyɛ? Mɛni ma ngɔ kɛ kpata nyɛ konɛ nyɛɛ gbaa Yawɛ ma a?”

1 Timoteo 2:2

Nyɛɛ sɔle ha matsɛmɛ, kɛ nihi tsuo nɛ hɛɛ blɔ nya, konɛ wɔ nɛ wa ji Kristo we bi ɔ, waa pee wa he kpoo, nɛ waa hi si ngɛ tue mi jɔmi mi. Waa ye Mawu gbeye saminya, nɛ waa ba wa je mi bɔ nɛ sa.

Samuel II, 17:16

Hushai ya nɔ nɛ e de ke, “Nyɛɛ tsɔ esɔ, nɛ a ya de David ke, nyɔ nɛ ɔ mi ɔ, e ko hwɔ pa pomi he ɔmɛ ngɛ nga a nɔ; se mohu, bɔ tsuaa bɔ nɛ pee ɔ, e po Yordan pa a nɔuu. Ke pi ja a, a ma kpata lɛ matsɛ ɔ nitsɛ, kɛ e we bi ɔmɛ tsuo a hɛ mi.”

2 Korintobi 5:4

Be mi nɛ wa ngɛ bo tsu nɛ ɔ mi kɛ mwɔɔ ɔ, wa he hiaa wɔ, nɛ wa faa huu. Pi kaa wa suɔ kaa waa ngmɛɛ wa zugba nɛ ɔ nɔ bo tsu ɔ he, se mohu kaa waa ngɔ hiɔwe nɔ́ ɔ hu kɛ ha wa he. Kɛkɛ ɔ, nɔ́ nɛ ngɛ wami ɔ ma tsake nɔ́ nɛ gboɔ ɔ.

1 Korintobi 15:54

Ke nɔ́ nɛ puɛɔ ɔ tsake pee nɔ́ nɛ puɛ we, nɛ nɔ́ nɛ gboɔ ɔ tsake pee nɔ́ nɛ gbo we ɔ, lɔ ɔ lɛɛ ngmami ɔ maa ba mi: “A mi gbenɔ kɛ ye kunimi!”

Kɔmɔ Yemi 2:16

O he nyɛli ɔmɛ tsuo ngɛ munyu tue kɛ ngɛ mo sie; a kɛ ninyɛ hyɛɛ mo gãã. A kpɔɔ nya kɛ woɔ mo. A deɔ ke, “E tsɔɔ mo! Mwɔnɛ ji mwɔnɛ! Wa nine su o nɔ jehanɛ!”

Kɔmɔ Yemi 2:5

Nyɔmtsɛ ɔ kpata Israel hɛ mi kaa nɔ́ nɛ e he nyɛlɔ ji lɛ. E ywia e mɔ ɔmɛ, kɛ matsɛ we ɔmɛ ngɔ pue si. E ha nɛ Yuda ma a ngɛ kɔmɔ yee babauu.

Kɔmɔ Yemi 2:2

Nyɔmtsɛ ɔ kpata Israel ma amɛ tsuo a hɛ mi nɛ e nɛ mɔbɔ kulaa. E ngɔ e mi mi la a kɛ ywia Yuda ma a nya mɔ ngua amɛ tsuo ngɔ pue si. E ha zo gbe nɔ yemi ɔ, kɛ e mi matsɛmɛ ɔmɛ.

Yeremia 51:44

Ma gbla Babilonia mawu ɔ nɛ a tsɛɛ Bel ɔ tue, nɛ ma je e ju ní ɔmɛ kpo; je ma amɛ be lɛ jae hu. “Babilon gbogbo ɔmɛ ku kɛ pueɔ si.

Yeremia 51:34

Babilonia matsɛ, Nebukadnezar poo Yerusalem mi nɛ e ye. E muɔ níhi kɛ je ma a mi, nɛ ma a fɔɔ si kaa buɛ mi gu. E mi ma a kaa bɔ nɛ sinɔ ngua miɔ nɔ́ ɔ. E ye ma a mi ní kpakpa amɛ, nɛ e sake nɔ́ nɛ piɛ ɔ ngɔ pue he.

La 124:3

jinɛ bɔ nɛ a mi mi fu wɔ wawɛɛ nɛ ɔ, a ko mii wɔ hɛ ngmengmle;

Manyadali 5:7

Israel kɔpe ɔmɛ pee ma dokuhi; nɔ ko be a mi loko mo, Debora, o ba kaa Israel ma a a nyɛ.

Mose V, 32:9

Se Yakob nina lɛɛ, Yawɛ hla lɛ kaa lɛ nitsɛ e ma.

Mose IV, 26:10

Zugba mi gba enyɔ ngɛ a sisi, nɛ e mii a kɛ Kora tsuo; nɛ a gbo. Nyumuhi lafa enyɔ kɛ nyingmi enuɔ ɔmɛ lɛɛ la sã mɛ, nɛ a plɛ pee kɔkɔ bɔmi okadi kɛ ha ma a.

Mose IV, 16:32

nɛ e mii mɛ kɛ a we mi bimɛ, kɛ nihi tsuo nɛ nyɛɛ Kora se ɔ, kɛ mɛ hu a níhi tsuo.

Mose I, 18:23

Abraham hɛ lɛ kɛ su Yawɛ he, nɛ e bi lɛ ke, “Anɛ o ma kpata dali kɛ nimli yayamihi tsuo a hɛ mi kɛ bla niinɛ lo?

Mose V, 20:10

“Ke o yaa tua ma ko ɔ, moo ngmɛ jamɛ a ma a mi bi ɔmɛ blɔ nɛ a ha yi.

Samuel II, 14:16

I le sa kaa nɛnɛ maa bu nɔ́ nɛ i ngɛ dee ɔ tue, nɛ nɔmlɔ nɛ ngɛ hlae kaa e kpata i kɛ ye bi tsuo wa hɛ mi, konɛ Mawu weto ní nɛ e laa wɔ ɔ, e ma kpɔ mi kɛ je e dɛ mi.

Samuel II, 20:18

Yo ɔ ya nɔ nɛ e de ke, “A pɔɔ demi blema be ɔ mi ke, ‘Ha nɛ a ya Abel nɛ a ya bi ga womi ngɛ lejɛ ɔ’; ke a pee ja kɛkɛ sane ɔ he jɔ.

Samuel II, 20:20

Yoab he nɔ ke, “Kpaoo! Kpaoo! I bɛ nyɛ ma a puɛmi, aloo e hɛ mi kpatami.

Samuel I, 10:1

Kɛkɛ nɛ Samuel plɛ nu ngɛ tɔ ko mi kɛ pue Saul yi mi. Lɔ ɔ se ɔ, e fua lɛ atuu, nɛ e de lɛ ke, “Yawɛ hla mo kaa e ma Israel ganɔ. O maa ye e ma a nɔ, nɛ o ma kpɔ mɛ kɛ je he nyɛli nɛ bɔle mɛ ɔ a dɛ mi. Okadi nɛ o kɛ maa na kaa Yawɛ nɛ hla mo ke o ba pee e ma, Israel ganɔ ji nɛ ɔ nɛ.

Matsɛmɛ I, 8:53

Mo lɛ o hla mɛ kɛ je je ma amɛ tsuo a kpɛti, nɛ o kɛ mɛ ba pee mo nitsɛ o ma kaa bɔ nɛ o gu o tsɔlɔ, Mose nɔ de mɛ, benɛ o je wa nɛmɛ ɔmɛ kɛ je Egipt ɔ.”

La 33:12

A gbaa ma nɛ a Mawu ji Yawɛ. A gbaa ma nɛ Yawɛ hla kaa lɛ nitsɛ e ma a.

La 78:71

E je lɛ kɛ je to yihi, kɛ a bi tsɔwitsɔwihi a se. E wo lɛ matsɛ ngɛ Israel, konɛ e hyɛ lɛ, Mawu ɔ e ma a nɔ kaa bɔ nɛ to hyɛlɔ tsɔɔ to ɔ.

La 106:5

Ha nɛ ma na bɔ nɛ o ma mi bi ɔmɛ a he mi jɔ mɛ ha, konɛ bua jɔmi nɛ ba ma a mi ɔ, imi hu ma piɛ a he kɛ nya.