Enɛ ɔ se ɔ, Matsɛ Salomo de osɔfo Abiatar ke, “Moo ho mo nitsɛ o ma mi ya ngɛ Anatot. Jinɛ e sa kaa a gbe mo, se i be hae nɛ a gbe mo piɔ; ejakaa benɛ o kɛ tsaatsɛ David ngɛ ɔ, mo lɛ o hyɛɛ Yawɛ Mawu somi daka a nɔ. Jehanɛ se hu, amanehlu slɔɔtohi tsuo nɛ tsaatsɛ na a, o kɛ lɛ nɛ na.”
“Efɔd ɔ lɛɛ níhi nɛ a maa ngɔ kɛ pee lɛ ji nɛ ɔmɛ nɛ: sika tsu kpa, kpa bluu, kpa tsu, kpa nɛ hɛɛ alamua tu su, kɛ kpa kpakpa nɛ a tslɔ, nɛ a kadi ní wo mi.
Osɔfo Ahiya hɛɛ efɔd ɔ. Ahiya ji Ikabod nyɛminyumu Ahitub binyumu. Ahitub ji Finehas bibi, kɛ Eli nɛ ji Yawɛ osɔfo ɔ nɛ hi Shilo ɔ bibimibi. Se ma a li kaa Yonatan je a he.
Kɛkɛ nɛ David kɛ e we bi ɔmɛ pue nɔ kɛ ho Keila ya, nɛ a ya tua Filisti bi ɔmɛ. A gbe Filisti bi ɔmɛ a ti nihi babauu nitsɛ, nɛ a nuu a nahi hu kɛ je. Bɔ nɛ David pee kɛ he Keila bi ɔmɛ a yi wami ji nɛ ɔ nɛ.
A ya bɔ Saul amaniɛ ke David ho Keila ya. Nɛ Saul de ke, “Mawu je lɛ ngɔ wo ye dɛ mi pɛ; ejakaa nɛ e ná ba sɛ ma nɛ a wo nya agbo kɛ e se dade mi nɛ ɔ, e sá lɛ nitsɛ e yi.”