Nehemia 9:30 - BAIBLO ALOO NGMAMI KLƆUKLƆU Ɔ

³⁰ O to o tsui si, nɛ o bɔ mɛ kɔkɔ jeha babauu. O ngɔ o mumi ɔ ngɔ wo o gbali ɔmɛ a mi, konɛ a tu munyu ngɔ tsɔɔ mɛ; se o ma a wa tue. Lɔ ɔ he ɔ, o ngmɛɛ a he ha ma kpahi nɛ a ye a nɔ.

Nehemia 9:30 ပူးပေါင်းရင်းမြစ်များ

Matsɛmɛ II, 18:11

Asiria matsɛ ɔ nuu Israel bi ɔmɛ nyɔguɛ kɛ ho Asiria ya. E ngɔ ni komɛ ya to Hala, e ngɔ ni komɛ ya to Habor pa a nya ngɛ Gozan zugba a nɔ, nɛ e ngɔ ni komɛ hu ya to Media bi ɔmɛ a ma amɛ a mi.

Matsɛmɛ II, 21:10

Yawɛ tu munyu kɛ gu e tsɔli nɛ ji gbali ɔmɛ a nɔ, nɛ e de ke,

Kronika II, 24:19

Yawɛ tsɔ gbali kɛ ba a ngɔ, konɛ a ba kpale mɛ kɛ ba lɛ Yawɛ ɔ ngɔ ekohu; se ma a bui mɛ tue.

Ezra 9:10

“Mawu, jehanɛ lɛɛ ní nɛ ɔmɛ tsuo a se ɔ, mɛni ma kpale de? Mlaahi nɛ o wo wɔ ɔ, wa tɔ̃ lɛ tsuo.

Nehemia 9:20

O ha nɛ o mumi kpakpa a tsɔɔ mɛ ní, nɛ o ha mɛ a nya mi ngma, kɛ nyu nɛ a nu.

Nehemia 9:26

“Se enɛ ɔmɛ tsuo a se ɔ, o ma a tsɔ o hɛ mi atuã, nɛ a bui mo tue; a sake o mlaa a ngɔ fɔ a tue se. A gbe gbali ɔmɛ nɛ ka a hɛ mi, nɛ de mɛ ke a kpale kɛ ba o ngɔ ɔ; kɛ nɔ a bɔ musu babauu.

Nehemia 9:29

O wo mɛ ga ke a ye o mlaa amɛ a nɔ, se a ya wo a he nɔ mohu, nɛ a yi mlaa amɛ a nɔ. A ye o mlaa amɛ a nɔ jinɛ a yi ko na wami. Se akɛnɛ a kuɛ wa, nɛ a bui nɔ́ ko nɔ́ ko he je ɔ, a kua mlaa amɛ a nɔ yemi.

La 86:15

Se mo Nyɔmtsɛ ɔ, Mawu mɔbɔ nalɔ, kɛ Mawu nɛ suɔ nɔ ji mo. O toɔ o tsui si ha wɔ; o dlooɔ nɔ, nɛ o yeɔ nɔ anɔkuale daa.

La 95:10

I ná yi nɔ bi nɛ ɔmɛ a he abofu jeha nyingmi eywiɛ sɔuu. I de ke, ‘Nimli nɛ ɔmɛ je ye se; a kua ye mlaa amɛ a nɔ yemi’

Yesaya 28:10

E ngɛ mɔde bɔe kaa e maa tsɔɔ wɔ ní nyaa, ngmami okadi kakaaka, zã kakaaka, kɛ munyu tso ɔ hu kakaaka.”

Yesaya 42:24

Mɛnɔ lɛ ngɔ Yakob kɛ ha nɛ a ha e níhi, nɛ mɛnɔ ha nɛ a fia lɛ ojo ɔ? Yawɛ nitsɛ, nɔ nɛ wa pee yayami kɛ si ɔ, lɛ ji nɔ nɛ ha enɛ ɔmɛ tsuo ba! Wa bɛ wa je mi bɔ nɛ e ngɛ hlae, nɛ mlaa amɛ nɛ e wo wɔ ɔ hu wa yi a nɔ.

Yesaya 48:9

“Bɔ nɛ pee nɛ a je ye biɛ yi he je ɔ, i tsi ye mi mi la a nya; i tsi nya, konɛ ma ko kpata nyɛ hɛ mi.

Yesaya 63:10

Se mɛɛ lɛɛ a tsɔ atuã; a ha nɛ aywilɛho nu mɛ. Yawɛ ba plɛ pee a he nyɛlɔ, nɛ e kɛ mɛ hwu.

Yeremia 25:4

Daa nɛ ɔ, Yawɛ tsɔɔ e tsɔli gbali ɔmɛ kɛ baa nyɛ ngɔ. Se nyɛ bui mɛ tue, nɛ sɛ gbi nɛ a kɛ ba a hu nyɛ bui.

Yeremia 44:22

Mwɔnɛ ligbi nɛ ɔ, nyɛ zugba a hɛ mi kpata, nɛ nɔ ko nɔ ko be nɔ. Nyɛ zugba a plɛ pee nɔ́ ko nɛ a hiee, nɛ nihi kɛ e biɛ gbiɛɛ nɔ; ejakaa nyɛ yi wu tso ní peemi ɔmɛ, kɛ nyɛ yayami ɔmɛ ba ti Yawɛ.

Yeremia 44:4

Daa nɛ ɔ, i tsɔɔ ye tsɔli gbali ɔmɛ kɛ baa nyɛ ngɔ, nɛ a ba deɔ nyɛ ke nyɛ ko pee nɔ́ nɛ ɔ, ejakaa i hie.

Yeremia 44:5

Se nyɛ bui tue. Nyɛ yaa nɔ nɛ nyɛ sãã tsopa kɛ e he via kɛ haa mawu kpahi, nɛ nyɛ kpale we kɛ ji nyɛ blɔ yayami ɔmɛ a nɔ.

Yeremia 7:25

Kɛ je ligbi ɔ nɛ nyɛ nɛmɛ ɔmɛ je Egipt hluu kɛ ba si mwɔnɛ ligbi nɛ ɔ, i tsɔɔ ye tsɔli gbali ɔmɛ kɛ baa nyɛ ngɔ daa be tsuaa be.

Kɔmɔ Yemi 2:17

Nɔ́ ko nɛ Yawɛ de ke e maa pee ɔ, amlɔ nɛ ɔ, e pee. Yawɛ kpata wa hɛ mi pɛsɛpɛsɛ kaa bɔ nɛ e de to be ko ke e maa pee ɔ. E ha nɛ wa he nyɛli ɔmɛ ye wa nɔ, nɛ a bua jɔ a he kaa wa hɛ mi kpata.

Daniel 9:6

O tsɔli ɔmɛ, nɛ ji gbali ɔmɛ nɛ o tu munyu kɛ gu a nɔ kɛ tsɔɔ wa matsɛmɛ ɔmɛ, wa ganɔ ɔmɛ, wa nɛmɛ ɔmɛ, kɛ wa ma a tsuo ɔ, wa bui mɛ tue fɛɛ.

Zakaria 7:12

A kplii a tsui konɛ a ko nu mlaahi, kɛ níhi nɛ i ha gbali ɔmɛ nɛ sɛ a hlami ɔ tsɔɔ mɛ ɔ. Enɛ ɔ he ɔ, imi Yawɛ Tabohiatsɛ ɔ, ye mi mi fu mɛ wawɛɛ nitsɛ.

Zakaria 7:13

Akɛnɛ ke i de nɔ́ ko nɛ a bui tue he je ɔ, ke a fa kue ɔ, i he we nɔ.

Mose IV, 11:26

Ma nimeli nyingmi kpaago ɔmɛ nɛ a ngma a biɛ ɔ, a ti ni enyɔ tlɔ sito he ɔ, nɛ mɛɛ a na we nɛ a ya bo tsu ɔ mi. Nɔ kake biɛ ji Eldad, nɛ nɔ kake hu biɛ ji Medad. Benɛ a ngɛ lejɛ ɔ, mumi ɔ ba a nɔ, nɛ mɛ hu a bɔni ngmlaa kpami kaa gbali.

Ni Tsumi 13:18

E to e tsui si ha mɛ, nɛ e hyɛ a nɔ ngɛ nga a nɔ maa pee jeha nyingmi eywiɛ.

Ni Tsumi 28:25

Se nɔ́ kake too nɛ Paulo de, nɛ lɔ ɔ kɛ nya sami wawɛɛ ba ni ɔmɛ a kpɛti, nɛ́ kpe ɔ kɛ gbɛ ji, “Nɔ́ nɛ Mumi Klɔuklɔu ɔ de nyɛ nɛmɛ ɔmɛ kɛ gu gbalɔ Yesaya nɔ ɔ ngɛ mi jã niinɛ!

Ni Tsumi 7:51

Stefano ya nɔ nɛ e de ke, “Nyɛ kuɛ wa kaa amaga jali, nɛ nyɛ tsui, kɛ nyɛ tue wa kaa nɔ́ ko! Nyɛ ngɛ kaa nyɛ nɛmɛ ɔmɛ pɛ! Nyɛ hu nyɛ kplɛɛ we nɛ Mumi Klɔuklɔu ɔ nɛ tsu nyɛ he ní.

Romabi 2:4

O bui nɔ́! Mɛni he je ɔ, Mawu mi mi jɔ, e naa nɔ he tsui, nɛ e toɔ e tsui si. Blɔɔ o li kaa Mawu mi mi jɔ ha mo konɛ o tsake o tsui lo?

1 Petro 1:11

A bɔ mɔde kaa a maa na be nɛ nɔ́ nɛ ɔ maa ba mi, kɛ bɔ nɛ e ma plɛ kɛ ba ha. Be ɔ nɛ Kristo mumi ɔ nɛ ngɛ a mi ɔ ngɛ tsɔɔe ji lɔ ɔ nɛ. Mumi ɔ de to ke Kristo maa na amanehlu, nɛ lɔ ɔ se ɔ, e hɛ mi maa ba nyami.

2 Petro 1:21

Ejakaa gbami sɛ gbi ko bɛ hyɛ nɛ adesa po de kɛkɛ ngɛ lɛ nitsɛ e suɔmi nya. Se mohu Mumi Klɔuklɔu ɔ lɛ baa nihi a nɔ nɛ a tuɔ munyu kɛ jeɔ Mawu ngɔ.

2 Petro 3:9

Nɔ́ nɛ Nyɔmtsɛ ɔ wo si ke e maa pee ɔ, pi tsle nɛ e ngɛ toe ngɛ he kaa bɔ nɛ ni komɛ ngɛ susue ɔ; e tsui si kɛkɛ lɛ e ngɛ toe ha nyɛ. Ejakaa e sume nɛ nɔ ko nɔ ko hɛ mi nɛ kpata, se mohu nɔ tsuaa nɔ nɛ tsake e tsui.