Nehemia 8:6 - BAIBLO ALOO NGMAMI KLƆUKLƆU Ɔ

⁶ Jehanɛ Ezra de ke, “Nyɛ je Yawɛ Mawu kpetekpleenyɛ ɔ yi!” Ma a tsuo wo a nine nɔ nɛ a he nɔ ke, “Amen! Amen”. Kɛkɛ nɛ a kpla si nɛ a kɛ a hɛ mi bu si nɛ a ja Yawɛ.

Nehemia 8:6 ပူးပေါင်းရင်းမြစ်များ

Mose I, 14:22

Abram he nɔ ke, “I na Mawu Hiɔwe No ɔ, nɔ nɛ pee hiɔwe kɛ zugba a,

Mose I, 24:26

Kɛkɛ nɛ nyumu ɔ kpla si nɛ e ja Yawɛ.

Kronika I, 16:36

Nyɛ je Yawɛ yi; nyɛ je Israel Mawu ɔ yi! Nyɛ je e yi mwɔnɛ ɔ, kɛ daa! Kɛkɛ nɛ ma a tsuo he nɔ ke, “Amen”, nɛ a je Yawɛ yi.

Kronika I, 29:10

Kɛkɛ nɛ Matsɛ David je Yawɛ yi ngɛ ma kpekpemi ɔ hɛ mi, nɛ e de ke, “Yawɛ, wa nɛ̃ Yakob Mawu, a je o yi kɛ ya neneene!

Kronika I, 29:20

Jehanɛ, David de ma kpekpemi ɔ ke, “Nyɛ je Yawɛ, nyɛ Mawu ɔ yi!” Kɛkɛ nɛ ma kpekpemi ɔ tsuo je Yawɛ a nɛmɛ a Mawu ɔ yi. A kpla si nɛ a ja Yawɛ, nɛ a wo matsɛ ɔ hu hɛ mi nyami.

Kronika II, 20:18

Kɛkɛ nɛ Matsɛ Yehoshafat kpla si nɛ e kɛ e hɛ mi bu si, nɛ ma a tsuo pee ja, nɛ a kɛ lɛ ja Yawɛ.

Kronika II, 29:10

“Amlɔ nɛ ɔ, i to ye yi mi kaa i kɛ Yawɛ, Israel Mawu ɔ maa so, konɛ e mi mi nɛ fu wɔ wawɛɛ ɔ se nɛ po.

Kronika II, 29:30

Matsɛ ɔ, kɛ ganɔ ɔmɛ fa Levi bi ɔmɛ ke, yi jemi lahi nɛ David, kɛ gbalɔ Asaf po ɔ, a la jamɛ a la amɛ kɛ je Yawɛ yi. Lɔ ɔ he ɔ, be mi nɛ a kpla si nɛ a ngɛ Mawu jae ɔ, nɔ tsuaa nɔ la kɛ bua jɔmi.

Kronika II, 6:4

E de ke, “A je Yawɛ, Israel Mawu ɔ yi; ejakaa si ko nɛ e wo tsaatsɛ David ɔ, e ye nɔ. Yawɛ de David ke,

Nehemia 5:13

Jehanɛ hu i je ye mlɛ mi fimi nɔ́ nɛ i huanya, nɛ i de mɛ ke, “Nɔ tsuaa nɔ nɛ be si womi nɛ ɔ nɔ yee ɔ, bɔ nɛ Mawu ma huanya lɛ kɛ je e we, kɛ e ní tsumi he ji nɛ ɔ nɛ; Mawu ma kpɔ nyɛ we ɔmɛ, kɛ nyɛ nɔ́ tsuaa nɔ́ ngɛ nyɛ dɛ, nɛ nyɛ maa pee pasaa.” Ni ɔmɛ tsuo nɛ kpe ngɛ lejɛ ɔ de ke, “Amen”, nɛ a je Mawu yi. Ma nimeli ɔmɛ ye a siwo ɔ nɔ.

Nehemia 8:7

Jehanɛ, a te da si ngɛ he nɛ a ngɛ ɔ, nɛ Levi bi nɛ ɔmɛ tsɔɔ mɛ mlaa a sisi fitsofitso. Mɛ ji Yeshua, Bani, Sherebia, Yamin, Akub, Shabetai, Hodia, Maaseya, Kelita, Azaria, Yozabad, Hanan, kɛ Peleya.

La 134:2

Nyɛ wo nyɛ nine nɔ ngɛ he klɔuklɔu ɔ, nɛ nyɛ je Yawɛ yi.

La 141:2

Ha nɛ ye kue fami ɔ nɛ je via kaa tsopa kɛ e he via ngɛ o hɛ mi; nɛ ye nine nɛ i wo nɔ kɛ ya hiɔwe ɔ, e pee kaa bɔ nɛ i ngɛ sãe gbɔkuɛ nya si ha mo.

La 28:2

Ke i wo ye nine nɔ kɛ tsɔɔ o we klɔuklɔu ɔ, nɛ i fa kue kɛ bi mo yemi kɛ buami ɔ, moo bu mi tue.

La 41:13

A je Yawɛ, Israel Mawu ɔ yi! A je e yi mwɔnɛ nɛ ɔ; a je e yi daa. Amen!

La 63:4

Ma na mo si ye wami be ɔ tsuo; ma wo ye nine nɔ, nɛ ma fa kue ha mo.

La 95:3

Ejakaa Yawɛ ɔ, Mawu kpetekpleenyɛ ji lɛ; lɛ ji mawu ɔmɛ tsuo a matsɛ nguaa.

Mose II, 12:27

nyɛ de mɛ ke, ‘Yawɛ Hetsɔmi ɔ bɔ sami ɔ ji nɛ ɔ nɛ; ejakaa e tsɔ Israel bi ɔmɛ a he ngɛ Egipt. E gbe Egipt bi ɔmɛ, se wɔɔ lɛɛ e ha wa yi na wami.’ ” Kɛkɛ nɛ ni ɔmɛ ma a yi si nɛ a ja Mawu.

Mose II, 4:31

Ma a he ye. Benɛ a nu kaa Yawɛ ba na Israel bi ɔmɛ a nɔ́ nami ɔ, nɛ e ma nɛ e ba pee he nɔ́ ko ha mɛ ɔ, a kpla si nɛ a ja Mawu.

Yeremia 28:6

“Saminya! Yawɛ nɛ pee nɔ́ nɛ ɔ. Gbami nɛ o gba a, Yawɛ nɛ ha nɛ e ba mi, konɛ Yawɛ we ɔ juetli tsuo nɛ a muɔ kɛ ho Babilonia ya, kɛ nihi tsuo nɛ a nuu kɛ ho ɔ, e kpale mɛ kɛ ba hiɛ ɔ ekohu.

Kɔmɔ Yemi 3:41

Nyɛ ha nɛ wa wo wa nine nɔ nɛ waa fa kue kɛ je wa tsui mi tɔɔ kɛ ha Mawu nɛ ngɛ hiɔwe ɔ ke,

Mose III, 9:24

Tlukaa a, Yawɛ ha nɛ la ba, nɛ e ba sã sami bɔ ɔ, kɛ zɔ ɔ nɛ ngɛ bɔ sami la tɛ ɔ nɔ ɔ. Benɛ ni ɔmɛ tsuo na nɔ́ nɛ ɔ, a he ose, nɛ a kɛ a hɛ mi bu si.

Mateo 26:39

E ya e hɛ mi bɔɔ, nɛ e ya kpla si, nɛ e ngɔ e hɛ mi ngɔ bu si, nɛ e sɔle ke, “Tsaatsɛ, ke e maa hi ɔ, je amanehlu kplu nɛ ɔ kɛ je ye he kɛ ya se! Se kɛ̃ ɔ, a pee bɔ nɛ mo o suɔ; pi nɔ́ nɛ i suɔ.”

Mateo 6:13

Nɛ o kɛ wɔ ko ya ka mi; se mohu, je wɔ kɛ je nɔ yayami ɔ dɛ mi.’

1 Korintobi 14:16

Ke o ngɛ Mawu si nae ngɛ mumi mi kɛkɛ ɔ, nɔ ko nɛ hii si ngɛ lejɛ ɔ, nɛ lɛɛ e li mi eko ɔ, kɛ e maa pee kɛɛ nɛ e ma de “Amen” ngɔ si o sina sɔlemi ɔ nɔ? Blɔ ko blɔ ko be nɛ e kɛ maa le nɔ́ nɛ o ngɛ dee ɔ.

Efesobi 1:3

Sina ha Mawu, wa Nyɔmtsɛ Yesu Kristo Mawu ɔ, kɛ e Tsɛ ɔ! Ejakaa nɛ wa ngɛ Kristo mi ɔ, Mawu dloo wɔ mumi mi ní kpakpahi tsuo nɛ ngɛ hiɔwe ɔ.

1 Timoteo 2:8

He tsuaa he nɛ asafo ɔ ma bua a he nya ngɛ kɛ ja Mawu ɔ, nyumuhi nɛ a sɔle. E hia kaa a pee Kristo se nyɛɛli nɛ ngɔ a he kɛ ha Mawu kulaa. Ke a ngɛ sɔlee ɔ, a wo a nine nɔ, nɛ mi mi la kó hi mi; nɛ a ko hla kaa a maa sã nya ngɛ nɔ́ ko he.

1 Petro 1:3

Nyɛ ha wa je Mawu, wa Nyɔmtsɛ Yesu Kristo Tsɛ ɔ yi. E na wɔ mɔbɔ babauu kaa e tle Yesu Kristo si kɛ je gbeje, nɛ e kɛ ha wɔ wami he; ejakaa suɔmi nɛ e kɛ suɔ wɔ ɔ be nyagbe. Nɔ́ nɛ ɔ haa wɔ hɛ kɛ nɔ fɔmi nɛ mi wa.

Kpojemi 7:11

Bɔfo ɔmɛ tsuo daa si kɛ bɔle matsɛ sɛ ɔ, kɛ nikɔtɔma amɛ, kɛ hɛ kali eywiɛ ɔmɛ. Kɛkɛ nɛ a ngɔ a hɛ mi ngɔ bu si ngɛ matsɛ sɛ ɔ hɛ mi, nɛ a ja Mawu,