Nehemia 8:10 - BAIBLO ALOO NGMAMI KLƆUKLƆU Ɔ

¹⁰ Mohu nyɛɛ ya nyɛ we ɔmɛ a mi, nɛ nyɛ ya ye ní kpakpa, nɛ nyɛɛ nu wai ngɔngɔɛ. Nyɛ nyɛmimɛ ɔmɛ nɛ a be eko ɔ, nyɛ ha mɛ eko. Mwɔnɛ ligbi nɛ ɔ ji ligbi klɔuklɔu ha Yawɛ nyɛ Mawu ɔ, lɔ ɔ he ɔ, nyɛ ko pee mɔbɔmɔbɔ. Bua jɔmi nɛ Yawɛ ngɛ nyɛ hae ɔ ma ha nɛ nyɛ ma na he wami.”

Nehemia 8:10 ပူးပေါင်းရင်းမြစ်များ

Matsɛmɛ I, 8:66

Ligbi nɛ ji kpaanyɔ ɔ, Salomo ha ma a nane. Mɛ tsuo a je e yi saminya, nɛ a ho a wehi a mi ya kɛ bua jɔmi ngɛ ní kpakpahi tsuo nɛ Yawɛ pee ha e tsɔlɔ, David, kɛ e ma, Israel ɔ he.

Kronika I, 16:27

Hɛ mi nyami, kɛ agboje bɔle lɛ kɛ kpe; he wami kɛ bua jɔmi hyi e we ɔ.

Nehemia 8:11

Levi bi ɔmɛ kpa ní ɔmɛ tsuo a nɔ kɛ wo mɛ bua, nɛ a de mɛ ke a ko pee a ní mɔbɔmɔbɔ ngɛ ligbi klɔuklɔu kaa kikɛ nɛ ɔ nɔ.

Nehemia 8:12

Kɛkɛ nɛ ma a tsuo ho a we ɔmɛ a mi ya. A ya ngmɛ okplɔɔ nɛ a kɛ a sibi ye ní kɛ bua jɔmi, ejakaa a nu nɔ́ nɛ a kane ha mɛ ɔ sisi saminya.

Ester 9:19

Enɛ ɔ he je ɔ, Yuda bi nɛ ngɛ ma wawi a mi ɔ yeɔ nyɔhiɔ nɛ a tsɛɛ Adar a we ligbi nɛ ji nyɔngma kɛ eywiɛ ɔ kaa a nyami ligbi, nɛ a bua jɔɔ a he. A yeɔ ní nɛ a nuɔ ní, nɛ a kee a sibi niye ní.

Ester 9:22

Ligbi nɛ ɔmɛ a nɔ nɛ Yuda bi ɔmɛ kpata a he nyɛli ɔmɛ a hɛ mi ɔ nɛ. Jinɛ nyɔhiɔ nɛ ɔ maa pee aywilɛho kɛ kɔmɔ yemi be, se e ba plɛ pee bua jɔmi kɛ nyami be mohu. Bɔ nɛ a tsɔɔ mɛ ke a ye nyami ligbi nɛ ɔmɛ ji a tsɛ nihi ní yemi, nɛ a nya; a ke a sibi, kɛ ohiatsɛmɛ niye ní, kɛ ohiatsɛmɛ hu ní kpakpahi.

La 149:2

Israel, nya o bɔlɔ ɔ he. Zion bi, nyɛ nya nyɛ matsɛ ɔ he.

La 89:17

Mo lɛ o haa nɛ a yeɔ kunimi nguahi. Mo lɛ o naa wɔ mɔbɔ loko wa yeɔ manye.

Abɛ Womi 17:22

Ke nɔ ko bua jɔ e he be tsuaa be ɔ, e ngɛ kaa tsopa nɛ haa nɔ he wami. Se daa nɛ ke nɔ pee vii ɔ, e ngɛ lɛ nitsɛ e he gbee.

Fiɛlɔ 11:2

Ngɔɔ o ní kpakpahi ngɔ to hehi munomuno; ejakaa o li matahu ko nɛ ma ba po mo ngɛ je mi.

Fiɛlɔ 2:24

Lɛɛ nɔ́ nɛ sa adesa peemi ji kaa e ye ní, nɛ e nu ní, nɛ e na bua jɔmi kɛ je e dengme gbomi ɔ mi. Se kɛ̃ ɔ, i na kaa enɛ ɔ hu je Mawu ngɔ.

Fiɛlɔ 3:13

E sa kaa nɔ tsuaa nɔ nɛ ye ní, nɛ e nu ní; nɛ e na bua jɔmi kɛ je níhi nɛ e gbo a he dengme ɔ mi. Mawu nike ní ji lɔ ɔ nɛ.

Fiɛlɔ 5:18

Hyɛ, nɔ́ nɛ i na kaa e hi, nɛ e sa kɛkɛ ji kaa nɔmlɔ nɛ ye ní, nɛ e nu ní, nɛ e na bua jɔmi. Wami be bɔɔ nɛ Mawu ha nɔmlɔ ngɛ je nɛ ɔ mi ɔ, dengme tsuo nɛ e gbo ɔ, e ye e mi ngɔɔmi; e blɔ fa mi nɔ́ ji lɔ ɔ nɛ.

Fiɛlɔ 9:7

Yaa nɛ o ya ye ní, nɛ o na bua jɔmi. Yaa nu wai, nɛ o tsui nɛ nɔ o mi; o ní tsumi ɔ sa Mawu hɛ mi momo.

Lahi 5:1

Ye nyɛmiyo; ye we ayɛflo nɛ i suɔ mo saminya, i ba ye we abɔɔ ɔ mi. I ngɛ ye tsopa kɛ e he via, kɛ mimɛ nya buae. I ngɛ ye hwo kɛ hwo gbaku yee. I ngɛ ye wai kɛ nyɔ nyu nue. Huɛmɛ, nyɛɛ ye ní nɛ nyɛɛ nu ní. Nyɛ suɔmi ɔ nɛ de nyɛ kaa dã!

Yesaya 49:5

Loko a fɔ mi ɔ, Yawɛ nitsɛ hla mi, nɛ e pee mi e tsɔlɔ, konɛ ma ya kpale e ma a kɛ ba e ngɔ; ma kpale Israel ma a nɛ gbɛ fĩa a kɛ ba ha lɛ. Yawɛ woɔ ye hɛ mi nyami, lɛ ji nɔ nɛ haa mi he wami.

Yesaya 61:10

Yerusalem ngɛ nyae ngɛ nɔ́ nɛ Yawɛ Mawu pee ha lɛ ɔ he. Yerusalem pee kaa ayɛflo nɛ wo june, loo ayɛflo huno nɛ ngɔ mɔmɔ kɛ dla e he kɛ yaa yo kpeemi. Niinɛ, Mawu he Yerusalem yi wami, nɛ e ye kunimi ha lɛ.

Yoel 2:23

“Nyɛ Zion bi, nyɛ nya nɛ nyɛ bua nɛ jɔ ngɛ nɔ́ nɛ Yawɛ, nyɛ Mawu ɔ pee ha nyɛ ɔ he. E ha gbo nyu nɛ ha nyɛ babauu; gbiɛ nyu hu nɛ ha nyɛ bɔ nɛ sa, kaa kekle ko ɔ.

Zakaria 14:21

Buɛhi tsuo nɛ ngɛ Yerusalem, kɛ Yuda zugba a nɔ ɔ maa pee klɔuklɔu ha Yawɛ Tabohiatsɛ ɔ. Nihi nɛ ma ba sã bɔ ɔ, ma ba ngɔ buɛ nɛ ɔmɛ, nɛ a maa hoo lohwe nɛ a kɛ sã bɔ ɔ ngɛ mi. Jamɛ a be ɔ, jua yelɔ ko jua yelɔ ko be Yawɛ, Tabohiatsɛ ɔ we ɔ mi hie hu.

Luka 11:41

Mohu ɔ, nyɛɛ ngɔ níhi nɛ ngɛ nyɛ kplu ɔmɛ, kɛ nyɛ kã amɛ a mi ngɔ ha ohiatsɛmɛ, nɛ nɔ́ tsuaa nɔ́ nɛ nyɛ ngɛ ɔ he ma tsɔ ha nyɛ.

2 Korintobi 8:2

Wa nyɛmimɛ ɔmɛ nɛ ngɛ Makedonia nɛ heɔ Kristo yeɔ ɔ ba na amanehlu wawɛɛ; se be tsuaa be ɔ, a bua jɔ. Jehanɛ hu, nɔ́ ko be a dɛ, se kɛ̃ ɔ, a ha nɔ́ faa kɛ je a tsui mi.

Filipibi 3:4

Imi lɛ i ko ngɔ ye hɛ kɛ fɔ jamɛ a níhi a nɔ. Ke nɔ ko susu kaa e maa ngɔ e hɛ kɛ fɔ he lo nya ní peemi níhi a nɔ ɔ, imi mohu i ko pee pe ja po.

Kpojemi 11:10

Nihi tsuo ngɛ je nɛ ɔ mi ɔ ma nya kaa nimli enyɔ nɛ ɔmɛ gbo. A tsui maa nɔ a mi, nɛ a maa ke a sibi ní, ejakaa jamɛ a gbali enyɔ ɔmɛ ngɔ haomi babauu kɛ ba je ɔ mi.

Samuel I, 25:8

Bi o nihewi ɔmɛ, nɛ a ma de mo. Lɔ ɔ he ɔ, akɛnɛ nyami ligbi nɔ wa ba ngɛ he je ɔ, mo he wɔ atuu. I kpa mo pɛɛ, nɔ́ tsuaa nɔ́ nɛ ngɛ o dɛ ɔ, mo ha o tsɔli ɔmɛ, kɛ o binyumu David hu eko.”