Mose V, 5:33 - BAIBLO ALOO NGMAMI KLƆUKLƆU Ɔ

³³ Nyɛɛ ye nɔ́ nɛ Yawɛ fa nyɛ ɔ tsuo nɔ pɛpɛɛpɛ, konɛ nyɛɛ hi je mi, nɛ níhi a mi nɛ hi ha nyɛ; lɔ ɔ loko nyɛ se maa kɛ ngɛ zugba a nɛ nyɛ yaa ngɔ ɔ nɔ.

Mose V, 5:33 ပူးပေါင်းရင်းမြစ်များ

Yeremia 7:23

Mlaa nɛ i wo mɛ ji a bu mi, konɛ ma pee a Mawu, nɛ a pee ye ma. I de mɛ ke mlaa nɛ i wo mɛ ɔ, a ye nɔ, konɛ e hi ha mɛ.

Mose V, 4:40

Nyɛɛ ye e mlaa amɛ tsuo nɛ i ngɛ nyɛ woe mwɔnɛ ɔ a nɔ, konɛ e hi ha nyɛɛ kɛ nyɛ nina. Ke nyɛ ye a nɔ ɔ, nyɛ maa hi zugba nɛ Yawɛ, nyɛ Mawu ɔ kɛ ngɛ nyɛ hae ɔ nɔ daa.”

Luka 1:6

Mɛ ni enyɔ ɔmɛ tsuo a peeɔ nɔ́ nɛ da ngɛ Mawu hɛ mi, nɛ a yeɔ e mlaa amɛ, kɛ e fami ɔmɛ a nɔ́ sisiisi.

Mose V, 10:12

“Jehanɛ, Israel bi, nyɛɛ bu nɔ́ nɛ Yawɛ, nyɛ Mawu ɔ ngɛ hlae kaa nyɛɛ pee ɔ tue. Nyɛ ja Yawɛ, nyɛ Mawu ɔ, nɛ nyɛɛ ye e mlaa amɛ tsuo a nɔ pɛpɛɛpɛ. Nyɛɛ suɔ lɛ, nɛ nyɛ sɔmɔ lɛ kɛ nyɛ tsui tsuo, kɛ nyɛ klaa tsuo.

1 Timoteo 4:8

Nɔmlɔ tso ɔ he mi kami ɔ, se nami bɔɔ kɛkɛ lɛ ngɛ he, se mumi mi nɔ́ ɔ lɛɛ kaa bɔ nɛ a wo si ɔ, e he ngɛ se nami babauu ngɛ je nɛ ɔ mi, kɛ nɔ́ nɛ maa ba a mi tete.

Romabi 2:7

Nihi nɛ toɔ a tsui si kɛ peeɔ kpakpa daa, nɛ a kɛ hlaa hɛ mi nyami, kɛ bu ha a he konɛ a ko gbo ɔ, Mawu ma ha mɛ neneene wami.

La 119:6

Ke i hyɛ saminya, nɛ i ye o mlaa amɛ tsuo a nɔ ɔ, lɛɛ zo be mi gbee.

Mose V, 5:29

I ná nɛ ma a na juɛmi daa kikɛ nɛ ɔ, nɛ a wo ye hɛ mi nyami be tsuaa be, nɛ a ye ye mlaa amɛ tsuo a nɔ, konɛ nɔ́ tsuaa nɔ́ nɛ hi ha mɛ kɛ a nina kɛ ya neneene!’

Efesobi 6:3

konɛ e hi ha mo, nɛ o se nɛ kɛ ngɛ je mi.”

Mose II, 20:12

“Moo bu o tsɛ kɛ o nyɛ, konɛ o se nɛ kɛ ngɛ zugba nɛ Yawɛ, o Mawu ɔ ngɔ ha mo ɔ nɔ.

Mose V, 4:1

Jehanɛ Mose de Israel ma a ke, “Nyɛɛ bu mlaa amɛ nɛ ma tsɔɔ nyɛ ɔ tue, nɛ nyɛɛ ye a nɔ, konɛ nyɛ yi nɛ na wami, nɛ́ nyɛ ya ngɔ zugba a nɛ Yawɛ, nyɛ nɛmɛ a Mawu ɔ kɛ ngɛ nyɛ hae ɔ.

Mose V, 6:1

“Mlaahi nɛ Yawɛ, nyɛ Mawu ɔ fa mi ke ma tsɔɔ nyɛ ji nɛ ɔmɛ nɛ. Nyɛɛ ye a nɔ ngɛ zugba a nɛ nyɛ yaa ngɔ nɛ nyɛɛ hi nɔ ɔ nɔ.

Mose V, 6:3

Israel ma, nyɛɛ bu tue, nɛ nyɛɛ ye mlaa amɛ a nɔ. Lɔ ɔ loko níhi a mi maa hi ha nyɛ, nɛ nyɛ maa pee ma ngua, nɛ nyɛ maa hi zugba kpakpa nɛ baa ní ɔ nɔ, kaa bɔ nɛ Yawɛ, wa nɛmɛ a Mawu ɔ wo si ɔ.

Mose V, 11:9

Ke nyɛ pee ja a, nyɛ se maa kɛ ngɛ zugba kpakpa nɛ baa ní saminya nɛ Yawɛ wo si ke e ma ngɔ ha nyɛ nɛmɛ ɔmɛ kɛ a nina a nɔ.

Mose V, 12:25

Ke nyɛ ye mlaa nɛ ɔ nɔ ɔ, Yawɛ bua maa jɔ, nɛ nɔ́ tsuaa nɔ́ maa hi ha nyɛɛ kɛ nyɛ nina tsuo.

Mose V, 12:28

Nɔ́ tsuaa nɔ́ nɛ i fa nyɛ ke nyɛɛ pee, nɛ i wo nyɛ mlaa ngɛ he ɔ, nyɛɛ ye nɔ fitsofitso; kɛkɛ ɔ, níhi a mi maa hi ha nyɛ kɛ nyɛ nia tsuo kɛ maa ya neneene; ejakaa ke nyɛ pee ja a, nyɛ ngɛ nɔ́ nɛ da, kɛ nɔ́ nɛ saa Yawɛ, nyɛ Mawu ɔ hɛ mi pee.

Mose V, 22:7

Moo nu bi ɔmɛ, nɛ o ngmɛɛ a nyɛ ɔ he, konɛ níhi a mi nɛ hi ha mo, nɛ o wami se nɛ kɛ, nɛ o plɔke.

Yeremia 42:6

Wa suɔ jio, wa sume jio, wa maa bu Yawɛ, wa Mawu ɔ nɛ wa tsɔ mo e ngɔ ɔ tue, bɔ nɛ pee nɛ e hi ha wɔ. Yawɛ, wa Mawu ɔ, wa maa bu lɛ tue.”

Ezekiel 20:19

Imi ji Yawɛ, nyɛ Mawu ɔ nɛ. Nyɛɛ ye ye mlaa amɛ, kɛ blɔ nya tomi ɔmɛ a nɔ.

Mose V, 5:16

“ ‘Moo bu o tsɛ kɛ o nyɛ, kaa bɔ nɛ imi Yawɛ, o Mawu ɔ fa mo ɔ, konɛ e hi ha mo, nɛ o se nɛ kɛ ngɛ zugba nɛ Yawɛ, o Mawu ɔ ngɛ mo hae ɔ nɔ.

Mose V, 8:1

“Nyɛɛ ye mlaa amɛ tsuo nɛ i ngɛ nyɛ woe mwɔnɛ ɔ a nɔ pɛpɛɛpɛ, konɛ nyɛ yi nɛ na wami, nɛ nyɛ he nɛ hiɛ, nɛ nyɛ ya ngɔ zugba a nɛ Yawɛ wo nyɛ nɛmɛ ɔmɛ si ke e ma ha mɛ ɔ.

Mose V, 29:8

nɛ wa ngɔ a zugba a, nɛ wa dla mi ngɔ ha Ruben wɛtso ɔ, Gad wɛtso ɔ, kɛ Manase wɛtso fa a.

Mose V, 30:16

Ke nyɛ maa ye Yawɛ, nyɛ Mawu ɔ mlaa amɛ nɛ i ngɛ nyɛ woe mwɔnɛ ligbi nɛ ɔ a nɔ, nɛ nyɛ maa suɔ lɛ, nɛ nyɛ maa bu lɛ tue, nɛ nyɛ maa nyɛɛ e blɔ ɔmɛ tsuo a nɔ ɔ, lɛɛ nyɛ yi ma na wami, nɛ nyɛ he maa hiɛ; Yawɛ, nyɛ Mawu ɔ maa gbaa nyɛ ngɛ zugba a nɛ nyɛ yaa ngɔ ɔ nɔ.

Matsɛmɛ I, 3:14

Nɛ ke o maa bu mi tue, nɛ o maa ye ye mlaa amɛ a nɔ kaa bɔ nɛ o tsɛ David pee ɔ, ma ha o wami se maa kɛ.”

Matsɛmɛ II, 17:37

Mlaa slɔɔtohi nɛ i ngma ha nyɛ ɔ, nyɛɛ ye a nɔ daa. Nyɛ ko ja mawu kpahi;

Kronika I, 28:8

“Lɔ ɔ he ɔ, ye nyɛmimɛ, ngɛ wa Mawu ɔ, kɛ Israel ma kpekpemi nɛ ɔ nɛ ji Yawɛ ma a hɛ mi ɔ, i ngɛ nyɛ dee ke nyɛɛ ye mlaa amɛ nɛ Yawɛ, wa Mawu ɔ wo wɔ ɔ a nɔ fitsofitso. Ke nyɛ pee ja a, zugba kpakpa nɛ ɔ maa pee nyɛ nɔ daa, nɛ nyɛ ma si kɛ ha nyɛ bimɛ nɛ maa ba ngɛ nyɛ se ɔ kaa gbosi ní kɛ maa ya neneene.”

La 37:9

Ejakaa a ma kpata yayami peeli a hɛ mi. Se ni nɛmɛ nɛ ngɔɔ a hɛ kɛ fɔɔ Yawɛ nɔ ɔ, mɛɛ lɛɛ a nine maa su zugba a nɔ.

La 37:11

Nihi nɛ a he jɔ ɔ, mɛɛ a maa hi zugba a nɔ ngɛ kplɔkɔtɔ, kɛ tue mi jɔmi mi.

La 37:22

Nihi nɛ Yawɛ gbaa mɛ ɔ, a nine maa su zugba a nɔ. Se ni nɛmɛ nɛ e gbiɛ mɛ ɔ, mɛɛ lɛɛ a ma kpata a hɛ mi.

La 37:29

Nihi nɛ peeɔ nɔ́ nɛ da a, zugba a maa pee a nɔ́ nɛ a maa hi nɔ daa.

La 37:34

Ngɔɔ o hɛ ngɔ fɔ Yawɛ nɔ, nɛ o ye e mlaa amɛ a nɔ; nɛ e ma ha nɛ o nine maa su zugba a nɔ. Ke a ngɛ yayami peeli a hɛ mi kpatae ɔ, o hɛngmɛ kɛkɛ o kɛ maa hyɛ mɛ.

Abɛ Womi 3:1

Ye bi, níhi nɛ i tsɔɔ mo ɔ, o hɛ ko je a nɔ; o hɛ nɛ hi mlaahi nɛ i wo mo ɔ a nɔ be tsuaa be.