Mose V, 33:2 - BAIBLO ALOO NGMAMI KLƆUKLƆU Ɔ

² Yawɛ kple si kɛ je Sinai yo ɔ nɔ kaa pu nɛ gba ngɛ Edom yo ɔ nɔ, nɛ e tso ha e ma a kɛ je Paran yo ɔ he. Mawu bɔfohi akpe nyɔngma piɛ e he; a ngɛ kaa la nɛ ngɛ tsoe plamplam ngɛ e hiɔ nɔ.

Mose V, 33:2 ပူးပေါင်းရင်းမြစ်များ

Matsɛmɛ I, 11:18

A je Midian kɛ ho Paran ya; nɛ benɛ a ya su lejɛ ɔ, nyumuhi kpa komɛ ba piɛ a he. Nɛ́ a je lejɛ ɔ, a pue nɔ kɛ ho Egipt ya, nɛ a ya na Egipt matsɛ ɔ. Farao ɔ ha Hadad zugba, kɛ we, kɛ niye ní.

La 50:2

Mawu hɛ mi nyami ɔ ngɛ kpɛe saminyayoo; Zion, ma nɛ ngɛ fɛu kɛ pi si ɔ mi e ngɛ kpɛe kɛ ngɛ jee.

La 68:17

Nyɔmtsɛ ɔ kple si kɛ je Sinai yo ɔ nɔ kɛ ba e he klɔuklɔu ɔ. E kɛ e ta zugba lɛ babauu nitsɛ lɛ ba.

La 68:18

O kuɔ yo gagaa a, nɛ o kpaka nihi nɛ a nuu mɛ ta nyɔguɛ kɛ nyɛɛ o se yuu. O he nike ní kɛ je nimli adesahi tsuo a dɛ; o he ngɛ atuã tsɔli tete po a dɛ, konɛ mo Yawɛ ɔ o hi a kpɛti ngɛ lejɛ ɔ.

Mose II, 23:20

“Hyɛ, i ngɛ bɔfo ko tsɔe kɛ nyɛɛ o hɛ mi, nɛ e bu o he ngɛ blɔ ɔ nɔ hluu kɛ yaa si he nɛ i dla ngɔ to mo ɔ.

Daniel 4:13

“Benɛ i ngɛ nina a he susue ɔ, i na Mawu bɔfo ko nɛ kple si kɛ je hiɔwe kɛ ma. E nɔ tsɔ, nɛ kikɛ nɛ ɔ e hɛngmɛ ngɛ si poe.

Habakuk 3:3

Mawu je Edom kɛ ma ekohu; Mawu Klɔuklɔu ɔ ngɛ si kplee ngɛ Paran yo ɔmɛ a nɔ kɛ ma. E hɛ mi nyami ɔ ha hiɔwe ɔ tsuo; nɛ a ngɛ e yi jee ngɛ je ɔ mi he tsuaa he.

Mose IV, 10:12

Kɛkɛ nɛ Israel bi ɔmɛ hia kɛ je Sinai nga a nɔ, nɛ a tsa a nyɛɛmi ɔ nɔ hluu kɛ ya si bɔku ɔ ya da si ngɛ Paran nga a nɔ.

Ni Tsumi 7:53

Nyɛ ná Mawu mlaa a kɛ gu Mawu bɔfo ɔmɛ a nɔ, se nyɛ yi nɔ.”

2 Korintobi 3:7

Mlaa a nɛ a kpɛ́ ngɛ tɛhi a nɔ nɛ kɛ gbenɔ ba a, benɛ a ngɔ ha a, Mawu hɛ mi nyami ɔ je kpo. Hɛ mi nyami ɔ ha nɛ Mose hɛ mi ngɛ kpɛe. Ke jamɛ a be ɔ mi po nɛ hɛ mi nyami ɔ miɔ nɛ e maa ta a, e ha nɛ Mose hɛ mi ngɛ kpɛe bɔ nɛ Israel bi ɔmɛ nyɛ we Mose hɛ mi hyɛmi ɔ,

2 Korintobi 3:9

Ke hɛ mi nyami kaa kikɛ nɛ ɔ je kpo somi momo be ɔ mi ɔ, somi he be nɛ ɔ mi lɛɛ hɛ mi nyami ɔ ma kpɛ kɛ be nɔ pe kekle ɔ po.

Galatabi 3:10

Nihi nɛ susuu kaa ja a ye Yuda bi a mlaa a nɔ doo loko a ma he a yi wami ɔ, a gbiɛ mɛ. Ejakaa ngmami ɔ deɔ ke, “Mlaahi tsuo nɛ a ngma ngɛ Mawu mlaa womi ɔ mi ɔ, nɔ nɛ ma tɔ kake ngmelu nɔ ɔ, a gbiɛ lɛ.”

Galatabi 3:19

Lɛɛ jehanɛ ɔ, mɛni ji mlaa a he se nami mɔ? A ha wɔ mlaa a, konɛ wa kɛ le wa tɔmi ɔmɛ hluu kɛ yaa su be nɛ Abraham bi ɔ nɛ a wo lɛ si ngɛ he ɔ maa ba. Jehanɛ hu, hiɔwe bɔfohi lɛ ngɔ mlaa a kɛ ba ha je ɔ kɛ gu adesa nɔ.

Galatabi 4:24

Ní nɛ ɔmɛ daa si ngɛ ní pɔtɛɛ komɛ a nane mi. Yi enyɔ ɔmɛ daa si ha somi enyɔ. A kpɛti nɔ kake ji Hagar. E je Sinai yo ɔ nɔ; nɛ bimɛ nɛ e fɔ ɔ, nyɔguɛhi ji mɛ.

Mose V, 5:22

“Benɛ nyɛ bua nyɛ he nya ngɛ yo ɔ he ɔ, mlaahi nɛ Yawɛ ngɔ ha nyɛ tsuo ji nɛ ɔmɛ nɛ. Benɛ e wo gbi kɛ je la, kɛ bɔku kpii ɔ mi ɔ, jamɛ be ɔ mi nɛ e ha nyɛ mlaa nɛ ɔmɛ, nɛ ekpa ko piɛ we he. Lɔ ɔ se ɔ, e ngma mɛ ngɛ tɛ tɛtlɛɛ enyɔ nɔ, nɛ e ngɔ mɛ ngɔ ha mi.

2 Tesalonikabi 1:7

Nɛ nyɛ ni nɛmɛ nɛ nyɛ ngɛ nɔ́ nae ɔ, e ma ha waa kɛ nyɛ tsuo he jɔmi. E maa pee enɛ ɔ, be mi nɛ Nyɔmtsɛ Yesu maa hia kpo kɛ je hiɔwe kɛ e bɔfo katsɛmɛ ɔmɛ,

Hebribi 12:20

Ejakaa mlaa a nɛ a wo mɛ ke, “Ke lohwe tete nane sa yo ɔ he ɔ, a fia lɛ tɛ nɛ a gbe” ɔ, a be nyɛe nɔ nɛ a ye.

Hebribi 2:2

Sɛ gbi nɛ Mawu bɔfo ɔmɛ kɛ ba a ngɛ mi sisiisi; nɛ nɔ tsuaa nɔ nɛ gbo tue, loo e bui ɔ, a gbla e tue bɔ nɛ sa lɛ.

Yuda 1:14

Henok, Adam nina tutuutu ekpane ɔ, nɔ́ nɛ e gba blema lokoo ngɛ nimli nɛ ɔmɛ a he ji nɛ ɔ nɛ: “Nyɔmtsɛ ɔ ma kɛ e bɔfo klɔuklɔuhi akpeakpe abɔ.

Kpojemi 5:11

Jehanɛ ɔ, ngɛ nina a mi ɔ, i nu bɔfohi babauu akpeakpe abɔ a gbi nɛ bɔle matsɛ sɛ ɔ, kɛ hɛ kali ɔmɛ, kɛ nikɔtɔma amɛ kɛ kpe.