Mose V, 17:12 - BAIBLO ALOO NGMAMI KLƆUKLƆU Ɔ

¹² Se nɔ nɛ ma tsɔ atuã kɛ si kojolɔ, loo osɔfo ɔ nɛ ngɛ sɔmɔe jamɛ a be ɔ mi ɔ, nyɛɛ gbe lɛ; kikɛmɛ a blɔ nɛ ɔ nɔ nyɛɛ gu kɛ je yayami kɛ je Israel ma a mi.

Mose V, 17:12 ပူးပေါင်းရင်းမြစ်များ

Mose V, 13:5

Se gbalɔ, loo nlami sisi tsɔɔlɔ ko nɛ maa wo nyɛ yi mi ke nyɛɛ te si kɛ si Yawɛ, nyɛ Mawu ɔ nɛ je nyɛ kɛ je Egipt zugba a nɔ, he nɛ nyɛ ye nyɔguɛ ngɛ ɔ, nyɛɛ gbe lɛ. Kikɛmɛ a nɔmlɔ ɔ, e ji nɔmlɔ yayami nɛ ngɛ nyɛ kae kaa e maa mlɔɔ nyɛ kɛ je si himi kpakpa nɛ Yawɛ fa nyɛ ke nyɛɛ hi ɔ he. Nyɛɛ gbe lɛ, konɛ nɔ́ yayami nɛ ɔ ko hi nyɛ kpɛti hu.

Mose IV, 15:30

“Se ke nɔ ko je blɔ pee yayami ko ɔ, zugba a nɔ fɔmi bi ji lɛ jio, nubwɔ ji lɛ jio, nɔ ɔ bɔ Yawɛ ahlua; a je lɛ kɛ je e ma mi bi ɔmɛ a kpɛti.

1 Timoteo 5:20

Nihi nɛ peeɔ yayami ɔ, ka a hɛ mi ngɛ asafo ɔ tsuo hɛ mi, kɛkɛ ɔ, ni nɛmɛ nɛ piɛ ɔ maa ye gbeye.

1 Tesalonikabi 4:8

Lɔ ɔ he ɔ, nɔ tsuaa nɔ nɛ bui tsɔɔmi nɛ ɔ, pi nɔmlɔ adesa nɛ e bui, se mohu Mawu, nɔ nɛ ha nyɛ e Mumi Klɔuklɔu ɔ.

Hosea 4:4

Yawɛ ke, “Nɔ ko kó pia ma a ke ma a lɛ tɔ̃; nɛ nɔ ko kó ka a hɛ mi hulɔ; nyɛ osɔfo ɔmɛ mohu lɛ i kɛ nyɛ ná.

Ezra 10:8

Ligbi etɛ se, ke nɔ ko bɛ́ kaa bɔ nɛ ma tsɔli ɔmɛ, kɛ ma nimeli ɔmɛ fa ke a pee ɔ, á kpɔ e níhi tsuo ngɛ e dɛ; lɛ nitsɛ lɛɛ a ko bu lɛ ngɔ si e ma mi bi ɔmɛ a nɔ hu.

Mose V, 18:7

E ma nyɛ ma ba ja nɛ e sɔmɔ Yawɛ, e Mawu ɔ ngɛ lejɛ ɔ kaa bɔ nɛ Levi bi kpa amɛ nɛ ngɛ lejɛ ɔ peeɔ ɔ pɛpɛɛpɛ.

Mose V, 18:5

Levi bi ɔmɛ a wɛtso ɔ lɛ Yawɛ hla ngɛ wɛtso ɔmɛ tsuo a mi nɛ a sɔmɔ lɛ daa kaa osɔfohi.

Mose V, 17:7

Odase yeli ɔmɛ nɛ a fiaa lɛ tɛ ɔ kekle, konɛ ma a tsuo nɛ fiaa nɔ ɔ tɛ ɔ; nyɛɛ pee ja kɛ je nɔ́ yayami nɛ ɔ kɛ je nyɛ kpɛti.

Mose V, 10:8

Benɛ a ngɛ yoku ɔ he ɔ, Yawɛ hla Levi wɛtso ɔ mi nyumuhi, konɛ a hyɛ somi daka a nɔ, nɛ a sɔmɔ kaa osɔfohi, nɛ́ a ngɔ Yawɛ biɛ kɛ gbaa ma a. A blɔ nya ní tsumihi ji enɛ ɔmɛ kɛ mwɔɔ.

1 Tesalonikabi 4:2

Ejakaa mlaa nɛ wa wo nyɛ ngɛ Nyɔmtsɛ Yesu biɛ mi ɔ, nyɛ le.

Yohane 20:23

Ke nyɛ ngɔ nɔ ko he yayami kɛ pa lɛ ɔ, a kɛ pa; nɛ ke nyɛ ngɔ nɔ ko he yayami kɛ to ɔ, a ngɔ to.”

Yohane 12:48

Nɔ tsuaa nɔ nɛ kua mi, nɛ e ngɔɛ munyu nɛ i fiɛ ɔ hulɔ ɔ, nɔ ko ngɛ nɛ maa kojo lɛ. Nyagbe ligbi ɔ, munyu ɔmɛ nɛ i tu ɔ maa kojo lɛ.

Luka 10:16

Yesu de e kaseli ɔmɛ ke, “Nɔ tsuaa nɔ nɛ maa bu nyɛ tue ɔ, imi tue e bu ɔ nɛ; nɔ nɛ ma kua nyɛ ɔ, imi e kua a nɛ. Nɔ tsuaa nɔ nɛ ma kua mi ɔ, e kua nɔ nɛ tsɔ mi ɔ.”

Mateo 10:14

Ke we, loo ma ko mi bi he we nyɛ atuu, nɛ nyɛ sɛ gbi ɔ hu, a bui tue ɔ, nyɛ blɛ nyɛ nane si zu ngɔ pue lejɛ ɔ, nɛ nyɛɛ je.

Abɛ Womi 21:11

Ke a gbla he nɔ wolɔ tue ɔ, kuasia po kaseɔ ní kɛ jeɔ mi. Nɛ ke a tsɔɔ nɔ nɛ ngɛ juɛmi ní ɔ, e leɔ.

La 19:13

Yawɛ, moo bu ye he, nɛ ma ko jé ye hɛ mi paa kɛ pee yayami; ko ha nɛ jamɛ a yayami ɔmɛ nɛ a ye ye nɔ. Ja jã loko ye he ma tsɔ kɛ pi si, nɛ i be ye he ngɔe kɛ wo yayami nguahi a mi.

Mose V, 18:20

Se ke gbalɔ ko te si nɛ e gba ngɛ ye biɛ mi, nɛ pi imi nɛ i fa lɛ ɔ, á gbe lɛ; á gbe gbalɔ saisaa nɛ gbaa ngɛ mawu kpahi a biɛ mi ɔ jã kɛ̃.’

Mose V, 13:11

Ke e ba mi ja a, Israel ma a tsuo maa nu sane ɔ he; a maa ye gbeye, nɛ nɔ ko nɔ ko be nɔ́ yayami kaa kikɛ nɛ ɔ pee hu.

Mose V, 1:43

Bɔ nɛ i de nyɛ ji nɛ ɔ nɛ; se nyɛ bui tue. Nyɛ tsɔ Yawɛ hɛ mi atuã; nyɛ si nyɛ gugue, nɛ nyɛ kuɔ kɛ ho yo ɔ nɔ ya.

Mose V, 17:13

Enɛ ɔ ma ha ma a tsuo maa nu sane nɛ ɔ he, nɛ a maa ye gbeye; kɛkɛ ɔ, nɔ ko nɔ ko be nlae kaa e maa pee ja hu.

Manyadali 20:13

Nyɛ je Gibea nyumuhi yakayaka nimli ɔmɛ ha wɔ nɛ waa gbe mɛ kɛ kpa musu ngɛ Israel.” Se Benyamin bi ɔmɛ bui a nyɛmimɛ Israel bi ɔmɛ tue.

Samuel I, 3:13

I de lɛ momo ke ma gbla e we ɔ tue kɛ maa ya neneene, ejakaa e le kaa e bimɛ ɔmɛ ngɛ musu bɔe kɛ ngɛ Mawu sie, se e kua we nɔ́ ha mɛ.

Zakaria 3:7

bɔ nɛ Yawɛ Tabohiatsɛ ɔ de ji nɛ ɔ nɛ: “Ke o maa ye mlaa amɛ a nɔ, nɛ o maa hɛɛ ye blɔ nya tomi ɔmɛ a mi ɔ, ma ha nɛ o ye ye we ɔ, kɛ e he kue ɔmɛ a nɔ. Ma ha mo blɔ he ngɛ nihi nɛ daa si ngɛ ye hɛ mi ɔ a kpɛti.

Mose IV, 15:31

Akɛnɛ e bui Yawɛ munyu ɔ tue, nɛ e ya tɔ e mlaa a nɔ he je ɔ, a je lɛ we pɛsɛpɛsɛ; e musu nɛ tloo lɛ.”

Mose V, 13:6

“O nyɛminyumu nɛ ji o nyɛ muklii mi bi, loo o binyumu, loo o biyo, loo o yo nɛ o suɔ lɛ, loo o huɛ nɛ nyu bi ngɛ nyɛ kpɛti po ma nyɛ maa mlɔɔ mo nɛ o ma ya ja mawu kpahi nɛ mo, loo o nɛmɛ ja we hyɛ.

Yoshua 1:18

Nɔ tsuaa nɔ nɛ ma tsɔ o hɛ mi atuã, nɛ e be mo tue bue ɔ, a gbe lɛ. Moo lɛɛ o he nɛ wa, nɛ o pee kã saminya kɛkɛ.”