Mose V, 1:17 - BAIBLO ALOO NGMAMI KLƆUKLƆU Ɔ

¹⁷ Nyɛ ko hyɛ nɔ hɛ mi ngɛ sane yemi mi; nyɛɛ bu nɔ tsuaa nɔ tue pɛpɛɛpɛ. Nyɛ ko ye nɔmlɔ adesa hɛ mi gbeye; ejakaa Mawu ji nɔ nɛ buáá sane he. Se ke sane ko pa nyɛ ɔ, lɛɛ nyɛ kɛ ba ye hɛ mi, konɛ imi nitsɛ ma hyɛ mi.’

Mose V, 1:17 ပူးပေါင်းရင်းမြစ်များ

Mose I, 18:25

Dɛbi, e ko ba mi kaa o maa pee nɔ́ nɛ ɔ, kaa o maa gbe dali kɛ nimli yayamihi kɛ bla. Ke o pee ja a, kɛkɛ o gbla dali kɛ nimli yayamihi tsuo a tue kɛ bla. Dɛbi, e ko ba mi ja; je ɔ tsuo kojolɔ ɔ, e sa kaa e yeɔ dami sane.”

Samuel II, 14:14

Gbenɔ fɔɔ si kɛ ha wɔ tsuo; wa ngɛ kaa nyu nɛ a kpa pue si nɛ be hie muɔmi hu. Mawu lɛɛ e kpataa we susuma hɛ mi; se mohu e toɔ ga, konɛ nɔ ko nɛ a je lɛ we ɔ, e ko ba pee nɔmlɔ nɛ tlɔ nga pɛsɛpɛsɛ.

Kronika II, 19:5

E to kojoli ngɛ Yuda mahi tsuo nɛ a fia gbogbo ngɔ wo a he ɔ a mi,

Kronika II, 19:6

nɛ e de mɛ ke, “Nyɛɛ hyɛ saminya loko nyɛɛ bu nɔ ko fɔ, loo bemi. Tsa pi nɔmlɔ adesa nɛ nyɛ ngɛ ní ɔ tsue ha, se mohu Mawu. Ke nyɛ maa buá sane ko he ɔ, Yawɛ maa piɛ nyɛ he.

Hiob 31:34

I yi nihi babauu a hɛ mi gbeye. Ke ye weku li muɔ mi ɔ, e pee we mi nɔ́ ko nɛ lɔ ɔ he ɔ, ma pee dii nɛ ma ko je kpo.

La 82:2

“Kɛ yaa si mɛni be lɛ nyɛ maa hyɛ nimli a hɛ mi kɛ kojo? Kɛ yaa si mɛni be lɛ nyɛ ma fi nimli yayamihi a se?

Mose II, 18:18

Pɔ maa tɔ o kɛ ma a tsuo; ejakaa ma a tlomi ɔ jiɔ tsɔ, nɛ mo nɔ kake o be nyɛe tloomi.

Mose II, 18:22

Ha nɛ mɛɛ a pee kojoli ngɛ ma a mi. Sanehi nɛ a he wa pe mɛ ɔ, ha a kɛ ba o hɛ mi; se sane tsɔwitsɔwihi lɛɛ mɛ nitsɛmɛ a ye. Ke o pee jã a, lɛɛ a maa kpee mo kɛ tloo ma a tlomi ɔ, nɛ pɔ be mo tɔe tsɔ.

Mose II, 18:26

Mɛ ji ni nɛmɛ nɛ kojoɔ ma a sanehi daa be tsuaa be. Mɛ nitsɛmɛ nɛ a buá sane tsɔwitsɔwihi a he; se sanehi nɛ a he wa lɛɛ a kɛ baa Mose ngɔ.

Abɛ Womi 18:5

Nɔ nɛ sane be mi ɔ, e sɛ kaa a hyɛɔ e hɛ mi nɛ a plɛɔ nɔ nɛ nɔ́ da mohu sane hɛ mi ngɔ buɔ si ngɛ kojomi he.

Abɛ Womi 24:23

Ní leli a munyu komɛ hu ji nɛ ɔmɛ nɛ. Ke a ngɛ kojoe ɔ, e sɛ kaa a hyɛɔ nɔ hɛ mi.

Abɛ Womi 28:21

Nɔ hɛ mi hyɛmi hí. Abolo bɔbɔyoo ko nɛ o kɛ maa wo nɔ ko nya mi ɔ ma ha nɛ nɔ ɔ maa pee nɔ́ nɛ dɛ amlɔ.

Abɛ Womi 29:25

Ke o ngɛ nɔmlɔ adesa gbeye yee ɔ, o naa haomi; se ke o ngɔ o hɛ kɛ fɔ Yawɛ nɔ ɔ, nɔ́ ko nɔ́ ko be o he sae.

Yeremia 1:17

Yeremia, moo mia! Yaa nɛ o ya de mɛ nɔ́ tsuaa nɔ́ nɛ i fa mo ke o de ɔ. Koo ye gbeye; ke pi ja a, ke o ya da a hɛ mi ɔ, ma ha nɛ sawale nɛ nya wa maa nu mo.

Mose III, 19:15

“Nyɛɛ ye dami sane ngɛ kojomi mi; nyɛ ko hyɛ nɔ ko hɛ mi, ohiatsɛ ji lɛ jio, niatsɛ ji lɛ jio.

Malaki 2:9

Enɛ ɔ he je ɔ, imi hu ma ha nɛ Israel bi ɔmɛ maa hie nyɛ, ejakaa nyɛ pee we ye suɔmi nya ní; mlaa a hu, nihi a hɛ mi lɛ nyɛ hyɛɛ kɛ tsɔɔ.”

Mateo 22:16

Kɛkɛ nɛ a tsɔ a kaseli ɔmɛ a ti ni komɛ, kɛ Herode we bi komɛ kɛ ba e ngɔ. A ba de lɛ ke, “Tsɔɔlɔ, wa le kaa anɔkualetsɛ ji mo. Bɔ nɛ Mawu suɔ kaa adesa nɛ hi si ɔ, o tsɔɔ pɛpɛɛpɛ nɛ o yi nɔ ko nɔ ko gbeye; ejakaa o hyɛ we nimli a hɛ mi.

Marko 12:14

Benɛ a ba a, a de lɛ ke, “Tsɔɔlɔ, wa le kaa o yeɔ anɔkuale, nɛ o yi nɔ hɛ mi munyu tumi gbeye, ejakaa o hyɛ we nɔ hɛ mi; mohu, bɔ nɛ Mawu suɔ kaa adesa nɛ ba e je mi ɔ, lɔ ɔ pɛ o tsɔɔ ngɛ anɔkuale mi. Anɛ e da blɔ kaa a tsuɔ tó haa Kaisare ɔ, aloo e dɛ? Wa ha, loo wa ko ha?”

Luka 20:21

Slaali ɔmɛ ba de Yesu ke, “Tsɔɔlɔ, wa le kaa munyu nɛ jeɔ o nya, kɛ ní nɛ o tsɔɔ ɔ, anɔkuale sɔuu. Wa le kaa o hyɛ we nimli a hɛ mi, se mohu o tsɔɔ mɛ Mawu yi mi tomi kɛ ha nɔmlɔ adesa.

Romabi 2:11

Ejakaa Mawu hyɛ we nɔ hɛ mi.

Efesobi 6:9

Nyɔmtsɛmɛ, nyɛɛ kɛ nyɛ nyɔguɛ ɔmɛ nɛ hi si ja nɔuu kɛ̃ nɛ nyɛɛ jɔɔ a susuma he gbeye womi. Nyɛ kai kaa nyɛɛ kɛ nyɛ nyɔguɛ ɔmɛ tsuo ɔ, Nyɔmtsɛ kake lɛ nyɛ ngɛ ngɛ hiɔwe, nɛ e hyɛ we nɔ hɛ mi.

Mose V, 10:17

Yawɛ, nyɛ Mawu ɔ ji Mawu nɛ pe mawuhi tsuo kulaa, nɛ e he wami se be. E ji Mawu nɛ kle, nɛ e he wa; nɛ e sa nɛ a ye lɛ gbeye. E hyɛ we nɔ hɛ mi, nɛ e he we nyɔ mi ní.

Mose V, 16:19

A ko ye tue kpɛkpɛɛ sane; nɛ a ko hyɛ nɔ hɛ mi. A ko he nyɔ mi ní; ejakaa nyɔ mi ní hemi yuɔ ní leli po a hɛngmɛ, nɛ e haa a plɛɔ munyu hɛ mi buɔ si.

Mose V, 24:17

“Ko plɛ nubwɔ nɛ ba ngɛ o ma a mi, kɛ awusa a sane hɛ mi kɛ bu si; nɛ ko he yalɔyo he ha nɔ́ kaa awaba tomi nɔ́.

Mose V, 25:1

“Waa ngɔ lɛ kaa Israel bi enyɔ ngɛ pɛe, nɛ a ba kojomi he ɔ, konɛ a hyɛ a sane ɔ mi ha mɛ. Nɔ nɛ nɔ́ dɛ ɔ, á bu lɛ fɔ; nɔ nɛ nɔ́ da a, á wo lɛ nguɔ.

Kolosebi 3:25

Nɔ tsuaa nɔ nɛ peeɔ nɔ́ nɛ dɛ ɔ ma na e yayami ɔ he hiɔwo, ejakaa Mawu hyɛ we nɔ hɛ mi.

1 Tesalonikabi 2:4

Mohu ɔ, wa tuɔ munyu kaa bɔ nɛ Mawu tsɔɔ wɔ ke waa pee ɔ; ejakaa e na wɔ kaa nihi nɛ sa nɛ a tu sane kpakpa a ngɔ wo a dɛ mi. Wa hla we kaa waa sa nimli a hɛ mi, se mohu kaa wa maa sa Mawu pɛ hɛ mi; ejakaa lɛ nɛ e le bɔ nɛ wa tsui mi ngɛ ha.

Yakobo 2:9

Se ke nyɛ hyɛɔ nihi a hɛ mi ɔ, yayami nyɛ ngɛ pee ɔ nɛ, nɛ nyɛ yeɔ fɔ kaa nyɛ tɔ mlaa.

1 Petro 1:17

Ke nyɛ ngɛ kue fae ha Mawu ɔ, nyɛ tsɛɔ lɛ ke Tsaatsɛ. Ee, Mawu hyɛ we nihi a hɛ mi, se mohu e kojoɔ nɔ tsuaa nɔ ngɛ e ní peemi níhi a nya. Lɔ ɔ he ɔ, nyɛɛ ngɔ bu kɛ ha lɛ nyɛ wami be nɛ piɛ ngɛ zugba nɛ ɔ nɔ tsuo.

Samuel I, 16:7

Se Yawɛ de Samuel ke, “Koo hyɛ e kami, loo e he fɛu; i sume lɛ, ejakaa i hyɛ we nɔ́ kaa bɔ nɛ nɔmlɔ hyɛɛ nɔ́ ɔ. Nɔmlɔ lɛɛ nɔ hɛ mi e hyɛɛ; se imi Yawɛ lɛɛ tsui mi i hyɛɛ.”

Samuel I, 2:25

Ke nɔ ko pee e nyɛmi adesa yayami ɔ, Mawu maa da mi ha lɛ; se ke nɔ ko pee yayami kɛ si Yawɛ ɔ, mɛnɔ maa da mi ha lɛ?” Se a bui a tsɛ ɔ munyu ɔmɛ tue; ejakaa Yawɛ to momo kaa e maa gbe mɛ.