Mose IV, 16:38 - BAIBLO ALOO NGMAMI KLƆUKLƆU Ɔ

³⁸ Benɛ a ngɔ ngɛyu ɔmɛ kɛ ya Yawɛ bɔ sami la tɛ ɔ he pɛ kɛkɛ nɛ a pee ní klɔuklɔuhi. Lɔ ɔ he ɔ, nimli nɛ ɔmɛ nɛ a gbe mɛ ngɛ a he yayami he ɔ, mo de Eleazar nɛ e ya je a ngɛyu ɔmɛ nɛ a fiaa nɔ tɛtlɛɛ, nɛ a kɛ ha bɔ sami la tɛ ɔ he. Nɔ́ nɛ ɔ maa pee kɔkɔ bɔmi nɔ́ kɛ ha Israel ma a.”

Mose IV, 16:38 ပူးပေါင်းရင်းမြစ်များ

2 Petro 2:6

Mawu gbla Sodom kɛ Gomora ma amɛ a tue. E ngɔ la kɛ kpata ma nɛ ɔmɛ a hɛ mi ngɔ to okadi kɛ tsɔɔ nɔ́ nɛ maa ba yayami peeli a nɔ.

Ezekiel 14:8

Ye hɛ maa dɔ kɛ wo jamɛ a nɔ ɔ wawɛɛ; ma ngɔ lɛ kɛ pee okadi gbeyegbeye, kɛ abɛ nɛ a maa bu. Ma kpata e hɛ mi kɛ je je ma amɛ a mi, konɛ nyɛɛ le kaa imi ji Yawɛ.

Abɛ Womi 20:2

Ke matsɛ mi mi fu ɔ, ye lɛ gbeye kaa bɔ nɛ o maa ye jata nɛ ngɛ huae gbeye. Nɔ nɛ woɔ matsɛ mi mi la a, lɛ nitsɛ e wami e kɛ ngɛ fiɛe ɔ nɛ.

Mose IV, 26:10

Zugba mi gba enyɔ ngɛ a sisi, nɛ e mii a kɛ Kora tsuo; nɛ a gbo. Nyumuhi lafa enyɔ kɛ nyingmi enuɔ ɔmɛ lɛɛ la sã mɛ, nɛ a plɛ pee kɔkɔ bɔmi okadi kɛ ha ma a.

Habakuk 2:10

Gahi nɛ o to nɛ ɔ kɛ zo mohu ba o weku li a nɔ. Nɛ́ o kpata je mahi babauu a hɛ mi ɔ, mo nitsɛ o hɛ mi nɛ o kpata a nɛ.

Matsɛmɛ I, 2:23

Jehanɛ Matsɛ Salomo ka Yawɛ kita nɛ e de ke, “I na Mawu kaa ke Adoniya kɛ e wami ha we ngɛ munyu nɛ e tu nɛ ɔ he fii, Mawu nɛ gbe mi!

Mose IV, 17:10

Lɔ ɔ se ɔ, Yawɛ de Mose ke, “Kpale Aaron dɛma tso ɔ ya fɔ daka a nɛ somi womi ɔ ngɛ mi ɔ hɛ mi ekohu, nɛ e hi lejɛ ɔ kaa kɔkɔ bɔmi nɔ́ kɛ ha atuã tsɔli ɔmɛ bɔ nɛ pee nɛ a munyu huitihuiti ɔmɛ nɛ a tuɔ kɛ siɔ mi ɔ se nɛ po. Ke pi ja a, a ma gbo.”

1 Korintobi 10:11

Níhi nɛ ba a nɔ ɔ peeɔ okadi kɛ ha ni kpahi. A ngma ní nɛ ɔmɛ kɛ ngɛ wɔ kɔkɔ bɔe, ejakaa be nɛ wa ngɛ mi nɛ ɔ kɛ nyagbe be ɔ kɛ we kulaa.

Abɛ Womi 8:36

Se nɔ nɛ hla we mi ɔ, lɛ nitsɛ e he awi lɛ e ngɛ yee. Nihi tsuo nɛ nyɛɔ mi ɔ, a suɔ gbenɔ.”

Abɛ Womi 1:18

Se nimli kaa kikɛ nɛ ɔmɛ lɛɛ mɛ nitsɛmɛ a he klama a tsɔ ɔ nɛ; mɛ nitsɛmɛ lɛ a maa du klama a, nɛ a ma gbo.

Mose IV, 16:40

kaa bɔ nɛ Yawɛ fa Eleazar kɛ gu Mose nɔ ke e pee ɔ. Nɔ́ nɛ ɔ ba pee kɔkɔ bɔmi nɔ́ ko kɛ ha Israel bi ɔmɛ, kaa nɔ ko nɛ pi osɔfo ji lɛ, nɛ e pi Aaron weku ɔ mi no hulɔ ɔ, e be he blɔ nɛ e sãã tsopa kɛ e he via ngɛ bɔ sami la tɛ ɔ nɔ kɛ haa Yawɛ. Ke nɔ ko pee ja a, a ma kpata e hɛ mi kaa bɔ nɛ a pee Kora kɛ e se nyɛɛli ɔmɛ ɔ.

Mose IV, 16:37

“De osɔfo Aaron bi Eleazar nɛ e ya je ngɛyu ɔmɛ kɛ je la a mi, nɛ e gbɛ la a kɛ ya se lokoo; ejakaa ngɛyu ɔmɛ a he tsɔ.

Mose IV, 16:39

Kɛkɛ nɛ osɔfo Eleazar ya kukuɔ akɔblee ngɛyu ɔmɛ, nɛ e ha a fia a nɔ tɛtlɛɛ, nɛ a kɛ pee bɔ sami la tɛ ɔ he hami nɔ́,

Yeremia 44:7

“Lɔ ɔ he ɔ, imi Yawɛ Tabohiatsɛ, Israel Mawu ɔ, i ngɛ bie ke mɛni he je nyɛ ngɛ nyɛ nitsɛmɛ nyɛ he yayami nguaa kaa kikɛ nɛ ɔ pee? Anɛ nyɛ suɔ kaa nyɛ tsuo nyɛ hɛ mi nɛ kpata, nyumuhi, yihi, jokuɛwi, kɛ bimwɔwi, nɛ nyɛ ti nɔ ko nɔ ko nɛ ko piɛ ngɛ Yuda lo?