Mose IV, 11:1 - BAIBLO ALOO NGMAMI KLƆUKLƆU Ɔ

¹ Ma a tu munyu huitihuiti ngɛ a haomihi a he. Benɛ Yawɛ nu ɔ, e mi mi fu, nɛ e ha la tso ngɛ ni ɔmɛ a kpɛti; nɛ la a kpata níhi a hɛ mi ngɛ a sito he ɔ kasa fa kake.

Mose IV, 11:1 ပူးပေါင်းရင်းမြစ်များ

Mose I, 38:10

Se nɔ́ nɛ e pee nɛ ɔ sɛ́ Yawɛ hɛ mi; lɔ ɔ he ɔ, Yawɛ gbe lɛ hulɔ.

Samuel II, 11:27

Benɛ e nyɛ ya ha lɛ gbe nya a, David tsɔ ya ngɔ lɛ kɛ ba e we ɔ mi, nɛ e ba pee e yo; nɛ e fɔ binyumu ha lɛ. Se nɔ́ nɛ David pee nɛ ɔ ngɔɛ Yawɛ nya.

Matsɛmɛ II, 1:12

Eliya he nɔ ke, “Ke Mawu nɔmlɔ ji mi ɔ, lɛɛ la nɛ e je hiɔwe ba sã mo kɛ o we bihi nyingmi enuɔ ɔmɛ!” Kɛkɛ nɛ Mawu la a je hiɔwe ba sã asafoatsɛ ɔ kɛ e we bihi nyingmi enuɔ ɔmɛ.

Hiob 1:16

Benɛ e ngɛ munyu ɔ tue kɛ mwɔɔ ɔ, tsɔlɔ kpa ba nɛ e ba de ke, “Oslabai gba pue to ɔmɛ kɛ to hyɛli ɔmɛ a nɔ, nɛ e gbe mɛ tsuo. Imi nɔ kake too lɛ i je mi, nɛ i ba konɛ ma ba bɔ mo amaniɛ.”

La 106:18

La je ngɛ ni ɔmɛ a kpɛti, nɛ e sã yiwutsotsɛmɛ ɔmɛ.

La 78:21

Benɛ Yawɛ nu nɔ́ nɛ ɔ, e mi mi fu wawɛɛ nitsɛ. E ngɔ la kɛ gbla e ma a tue; e mi mi fumi ɔ nya bɛ si kulaa.

La 78:63

La kpata nihewi ɔmɛ a hɛ mi, nɛ yihewi ɔmɛ nɛ nyumuhi nɛ a gba.

Mose II, 16:7

Mɔtu ɔ, nyɛ maa na Yawɛ hɛ mi nyami ɔ; ejakaa e nu nyɛ munyu huitihuiti nɛ nyɛ tu kɛ si lɛ ɔ. Wɔɔ lɛɛ wa pi ni komɛ nɛ ke nyɛ hɔɔ nya si wo wa he nɛ e peeɔ nɔ́ ko.”

Mose II, 16:9

Mose de Aaron ke, “De Israel ma a kulaa ke a hɛ mɛ kɛ su Yawɛ he, ejakaa e nu a munyu huitihuiti ɔmɛ.”

Yesaya 10:17

Mawu nɛ ji la kɛ ha Israel ɔ ma mle. Mawu klɔuklɔu ha Israel ɔ ma mle kɛ la, nɛ ligbi kake too mi ɔ, e maa sã nɔ́ tsuaa nɔ́; e maa sã mio ɔmɛ, kɛ mio tso ɔmɛ tsuo.

Yesaya 30:33

Blema lokoo ɔ, a tsua muɔ ko nɛ a maa sã Asiria matsɛ ɔ ngɛ mi. Muɔ ɔ mi kuɔ, nɛ e bli, nɛ a to lɛ́ babauu kɛ wo mi. Yawɛ mumi ɔ nɛ ngɛ kaa la nɛ ngɛ tsoe plamplam ɔ maa sã lɛ.

Yesaya 33:14

Yayami peeli nɛ ngɛ Zion ɔ nu sawale, nɛ a he ngɛ doe blibliibli. Nɔ́ nɛ a ngɛ a he bie ji, “La nɛ ngɛ ní puɛe nɛ ɔ, wa ti mɛnɔ ma nyɛ nya maa da? La nɛ ngɛ tsoe nɛ gbo we gblegbleegble nɛ ɔ nɛ, wa ti mɛnɔ ma nyɛ nya maa da?”

Kɔmɔ Yemi 3:39

Nimli adesahi kɛkɛ ji wɔ. Ke wa pee yayami nɛ a gbla wa tue ɔ, mɛni he je wa hii wa nya jee ɔ?

Ezekiel 20:36

Ma kojo nyɛ nɛ ma bu nyɛ fɔ kaa bɔ nɛ i pee nyɛ nɛmɛ ɔmɛ ngɛ Sinai nga a nɔ ɔ.” Nyɔmtsɛ Yawɛ lɛ de.

Mose III, 10:2

Tlukaa a, la je Yawɛ ngɔ ba sã mɛ, nɛ a gbo ngɛ lejɛ ɔ.

Nahum 1:5

Yoku mimiɛɔ ngɛ Yawɛ hɛ mi; nɛ yokuhi sileɔ ngɛ e hɛ mi. Ke Yawɛ je e he kpo ɔ, zugba a mimiɛɔ; nɛ je ɔ, kɛ e mi nimli ɔmɛ tsuo a he doɔ blibliibli.

Habakuk 3:5

E haa nɛ hiɔhi baa, nɛ gbenɔ nyɛɛɔ se.

Mose IV, 10:33

Kɛkɛ nɛ ma a hia kɛ je Yawɛ yo ɔ he, nɛ a nyɛɛ ligbi etɛ. Yawɛ somi daka a nyɛɛ a hɛ mi kɛ hla sito he ha mɛ.

Mose IV, 11:18

Jehanɛ, mo de ma a ke, ‘Nyɛɛ tsukɔ nyɛ he kɛ ha hwɔɔ; ejakaa nyɛ maa ye de lo. Benɛ de lo jlo nyɛ, nɛ nyɛ fo he ya, nɛ nyɛ de ke nyɛ he mi jɔ nyɛ ngɛ Egipt zugba a nɔ mohu ɔ, Yawɛ nu. Lɔ ɔ he ɔ, Yawɛ ma ha nyɛ de lo nɛ nyɛɛ ye.

Mose IV, 12:2

A bi ke, “Anɛ Mose nɔ kake too nɔ Yawɛ gu kɛ tu munyu lo? Anɛ wɔɔ lɛɛ e gui wa nɔ kɛ tu we munyu lo?” Yawɛ nu nɔ́ nɛ a de ɔ.

Mose IV, 14:2

Israel ma mluku ɔ tsuo hɔɔ nya si ngɔ wo Mose kɛ Aaron a he, nɛ a de ke, “Wa ná nɛ jinɛ wa gbo ngɛ Egipt zugba a nɔ, loo ngɛ nga nɛ ɔ nɔ po!

Mose IV, 14:22

nihi tsuo nɛ na ye hɛ mi nyami, kɛ okadihi nɛ i pee ngɛ Egipt kɛ nga a nɔ, se kɛ̃ a ka mi si nyɔngma sɔuu, nɛ a bui ye gbi tue ɔ,

Mose IV, 14:27

“Mɛni be ma yiwutsotsɛmɛ nɛ ɔmɛ maa hɔɔ nya si kɛ wo mi kɛ yaa si? Munyu huitihuiti nɛ Israel ma a ngɛ tue kɛ ngɛ mi sie ɔ, i nu.

Mose IV, 14:28

Nyɛ de mɛ ke imi Yawɛ, i ke, ‘Ligbi abɔ nɛ ye hɛ ngɛ nɛ ɔ, ma pee ha nyɛ kaa bɔ nɛ nyɛ bi ɔ.

Mose IV, 16:11

Hyɛ, Yawɛ yi nɔ nɛ o kɛ o se nyɛɛli ɔmɛ tsuo ngɛ soe ɔ nɛ. Jehanɛ, Aaron ɔ lɛɛ mɛni e pee nyɛ loko nyɛ ngɛ nya si hɔɔe kɛ ngɛ lɛ woe ɔ?”

Mose IV, 16:35

Kɛkɛ nɛ la je Yawɛ ngɔ ba sã nimli lafa enyɔ kɛ nyingmi enuɔ ɔmɛ nɛ a ngɔ tsopa kɛ e he via a kɛ ba a.

Mose IV, 17:5

Nɔ nɛ ma hla a, e tso ɔ ma tsɛ̃ mɔmɔ; nɛ nɔ́ nɛ ɔ ma ha nɛ munyu huitihuiti nɛ Israel bi ɔmɛ tuɔ kɛ siɔ nyɛ ngɛ ye he ɔ se maa po.”

Mose IV, 21:5

nɛ a tu munyu kɛ si Mawu kɛ Mose ke, “Mɛni he je nɛ nyɛ kpaka wɔ kɛ je Egipt nɛ wa ba gbo ngɛ nga nɛ ɔ nɔ, he nɛ niye ní, loo nyu ko be ɔ? Kikɛmɛ a niye ní gbogboe nɛ ɔ lɛɛ wa sume oo, wa sume!”

1 Korintobi 10:10

Wa ko tu munyu huitihuiti kaa bɔ nɛ a ti ni komɛ pee, nɛ bɔfo nɔ́ puɛlɔ ɔ kpata a hɛ mi ɔ.

Mose V, 25:18

Akɛnɛ a yi Mawu gbeye he je ɔ, a tua o se ta a, benɛ pɔ tɔ ta buli ɔmɛ, nɛ peepee ta a he ɔ; nɛ a gbe ni nɛmɛ nɛ ngɛ didaae ngɛ se ɔ tsuo.

Mose V, 32:22

Ye mi mi fumi nya maa wa wawɛɛ kaa la nɛ ngɛ tsoe; e maa sã nɔ́ tsuaa nɔ́ ngɛ je ɔ mi kɛ ya su gbeje tɔɔ; e maa sã yo ɔmɛ a sisi tomi ɔmɛ hulɔ.

Mose V, 9:22

“Nyɛ wo Yawɛ, nyɛ Mawu ɔ mi mi la ngɛ Tabera, Masa, kɛ Kibrot hulɔ.

Hebribi 12:29

ejakaa wa Mawu ɔ, la nɛ kpataa nɔ́ hɛ mi pɛsɛpɛsɛ ji lɛ.

Yakobo 5:4

Apaa yeli nɛ hu nyɛ ngmɔ ɔmɛ ha nyɛ ɔ, nyɛ wui mɛ hiɔ. Nyɛɛ hyɛ bɔ nɛ a ngɛ ngmlaa kpae boboobo ha! Ní kpali nɛ bua nyɛ ngmɔ ní nya a a ngmlaa a ya su Nyɔmtsɛ Tabohiatsɛ ɔ tue mi tɔɔ.

Yuda 1:16

Daa nɛ ɔ, nimli nɛ ɔmɛ ngɛ munyu huitihuiti tue kɛ ngɛ bee; nɔ́ muɛ a hɛ gblegbleegble. Mɛ nitsɛmɛ a he akɔnɔ yayahi a se nɛ a dii. A fĩaa; a peeɔ nya puu, nɛ a gbee nihi a yi mi, konɛ a kɛ na ni ɔmɛ a he blɔ.