Mose II, 6:7 - BAIBLO ALOO NGMAMI KLƆUKLƆU Ɔ

⁷ Ma ngɔ nyɛ kɛ pee imi nitsɛ ye ma, nɛ ma pee nyɛ Mawu; nɛ nyɛ maa le kaa imi ji Yawɛ Mawu, nɔ nɛ je Egipt bi ɔmɛ a tlomi ɔmɛ kɛ je nyɛ nɔ ɔ.

Mose II, 6:7 ပူးပေါင်းရင်းမြစ်များ

Mose V, 29:13

Nyɛ ngɛ enɛ ɔ pee konɛ Yawɛ kɛ nyɛ nɛ da si kaa lɛ nitsɛ e ma, nɛ e pee nyɛ Mawu, kaa bɔ nɛ e wo nyɛɛ kɛ nyɛ nɛmɛ Abraham, Isak, kɛ Yakob si ɔ.

Mose V, 7:6

Nyɛɛ pee ja, ejakaa Yawɛ, nyɛ Mawu ɔ hla nyɛ kɛ je nihi tsuo nɛ ngɛ je ɔ mi ɔ a kpɛti, bɔ nɛ pee nɛ nyɛɛ pee lɛ nitsɛ e ma pɔtɛɛ.

Mose V, 4:20

Se nyɛɛ lɛɛ, Yawɛ kpɔ̃ nyɛ kɛ je Egipt yi mi wami wawɛɛ ɔ sisi. E je nyɛ konɛ e pee nyɛ lɛ nitsɛ e ma kulaa, kaa bɔ nɛ nyɛ ji mwɔnɛ nɛ ɔ.

Kpojemi 21:7

Nihi tsuo nɛ maa ye kunimi ɔ ma na nike ní nɛ ɔ kɛ maa je ye dɛ mi; ma pee a Mawu, nɛ mɛ hu a maa pee ye ma.

Mose V, 26:18

Mwɔnɛ ligbi nɛ ɔ, Yawɛ hu he mo atuu kaa lɛ nitsɛ e ma, kaa bɔ nɛ e wo si ɔ. E ngɛ mo fae ke o ye e mlaa amɛ tsuo a nɔ.

Mose V, 14:2

Yawɛ, nyɛ Mawu ɔ níhi ji nyɛ. E hla nyɛ kɛ je je ma amɛ tsuo nɛ ngɛ zugba a nɔ ɔ a mi kɛ pee lɛ nitsɛ e ma.

Kpojemi 21:3

I nu nɛ gbi ko pɛ wawɛɛ kɛ je matsɛ sɛ ɔ he kɛ de ke, “Jehanɛ ɔ lɛɛ Mawu hi he ji nimli a kpɛti! E kɛ mɛ maa hi si, nɛ a maa pee e ma. Mawu nitsɛ kɛ mɛ maa hi si, nɛ e maa pee a Mawu.

1 Petro 2:10

Sa a, pi Mawu e ma ji nyɛ; se amlɔ nɛ ɔ, e ma ji nyɛ. Sa a, Mawu nɛ́ nyɛ mɔbɔ; se amlɔ nɛ ɔ, e na nyɛ mɔbɔ.

Hebribi 11:16

Mohu ɔ, ma ko nɛ hi kulaa pe lɔ ɔ, nɛ ji ma nɛ ngɛ hiɔwe ji nɔ́ nɛ a ngɛ hlae. Lɔ ɔ he ɔ, e pee we Mawu zo kaa a ma tsɛ lɛ ke a Mawu; ejakaa e dla ma ko ngɔ to mɛ.

Romabi 8:31

Lɛɛ kɛ wa ma de kɛɛ ngɛ ní nɛ ɔmɛ a he mɔ? Ke Mawu ngɛ wa se ɔ, mɛnɔ maa te si ngɔ wo wɔ?

Mateo 22:32

‘Imi ji Abraham Mawu, kɛ Isak Mawu, kɛ Yakob Mawu.’ Mawu ɔ, hɛ kali a Mawu ji lɛ, pi ni gbogboehi a Mawu.”

Zakaria 13:9

Ma ngɔ mi dlami etɛ mi kake nɛ ɔ kɛ wo la mi, nɛ ma tsu a he kaa bɔ nɛ a tsuɔ sika hiɔ he ɔ. Ma tsu a he kaa bɔ nɛ a tsuɔ sika tsu he. Kɛkɛ ɔ, a maa fa kue ma tsɛ mi, nɛ ma he nɔ. Ma de mɛ ke, ‘Ye ma ji nyɛ,’ nɛ a ma de ke, ‘Yawɛ ji wa Mawu.’ ”

Hosea 1:10

Israel bi a he ma ba hiɛ babauu kaa wo nya zia, nɛ nɔ ko be nyɛe maa kane mɛ; nɔ ko nɔ ko be nyɛe maa kale a yibɔ. Amlɔ nɛ ɔ, Mawu ngɛ mɛ dee ke, “Pi ye ma ji nyɛ”; se be ma nɛ e ma de mɛ ke, “Imi Mawu hɛ ngmengmletsɛ ɔ, ye bimɛ ji nyɛ!”

Yeremia 31:33

Se somi he ɔ nɛ i kɛ Israel ma a maa so jehanɛ ɔ, bɔ nɛ lɛɛ e maa hi ji nɛ ɔ nɛ; ma ngɔ ye mlaa kɛ wo a mi, nɛ ma ngma ngɛ a tsui nɔ. Ma pee a Mawu, nɛ a maa pee ye ma.

Yesaya 41:20

Mahi tsuo maa na nyakpɛ nɔ́ nɛ ɔ, nɛ a maa le kaa imi Yawɛ, Israel Nɔ Klɔuklɔu ɔ nɛ i tsu nɔ́ nɛ ɔ nɛ.”

La 81:6

“I je nyɛ tlomi ɔmɛ kɛ je nyɛ nɔ; i ha nɛ nyɛ ngmɛɛ nyɛ kusii ɔmɛ a he.

Mose II, 16:12

“I nu Israel bi ɔmɛ a nya si hɔɔmi ɔ. De mɛ ke gbɔkuɛ nya si nɛ ɔ, nyɛ ma na lo maa ye, nɛ mɔtu ɔ, nyɛ ma na abolo maa ye nɛ nyɛ maa tɔ, kɛkɛ nyɛ maa le kaa imi ji Yawɛ, nyɛ Mawu ɔ nɛ.”

Mose II, 6:6

Lɔ ɔ he ɔ, yaa nɛ o ya de Israel bi ɔmɛ ke, ‘Imi ji Yawɛ; ma je Egipt bi ɔmɛ a tlomi ɔmɛ kɛ je nyɛ nɔ, nɛ ma kpɔ nyɛ kɛ je a nyɔguɛ yemi ɔ sisi. Ma kpã ye nine mi kɛ he wami, nɛ ma ye dami sane ha nyɛ, nɛ ma kɛ kpɔ nyɛ.

Mose II, 2:11

Benɛ Mose ba wa a, e je kpo ligbi ko kɛ ho e nyɛmimɛ Hebri bi ɔmɛ a ngɔ ya, nɛ e ya hyɛ pɔtɔ, kɛ dengme ní tsumi kpakpataa nɛ a ngɛ tsue ɔ. E na Egipt no ko nɛ ngɛ e nyɛmimɛ Hebri bi ɔmɛ a ti nɔ kake gbee.

Mose II, 16:6

Kɛkɛ nɛ Mose kɛ Aaron de Israel bi ɔmɛ tsuo ke, “Gbɔkuɛ nɛ ɔ, nyɛ ma na maa le kaa Yawɛ ji nɔ nɛ jé nyɛ kɛ je Egipt zugba a nɔ ɔ nɛ.

Mose III, 11:44

Imi ji Yawɛ, nyɛ Mawu ɔ nɛ. Nyɛɛ pee nyɛ he klɔuklɔu; ejakaa Nɔ Klɔuklɔu ji mi. Lɔ ɔ he ɔ, lohwehi nɛ sãã si ɔ, nyɛ ko ngɔ ekoeko kɛ ble nyɛ he.

Mose III, 11:45

Imi ji Yawɛ. Imi nɛ I je nyɛ kɛ je Egipt zugba a nɔ, konɛ ma ba pee nyɛ Mawu. Lɔ ɔ he ɔ, nyɛɛ pee nyɛ he klɔuklɔu; ejakaa Nɔ Klɔuklɔu ji mi.

Yesaya 49:23

Matsɛmɛ ma plɛ pee tsɛmɛ kɛ ha mo, nɛ manyɛmɛ ma plɛ pee nyɛmɛ kɛ ha mo. A ma kpla si ha mo, nɛ a maa wo o hɛ mi nyami. A maa ba a he si ha mo, nɛ a maa bu mo. Kɛkɛ ɔ, o maa le kaa imi ji Yawɛ niinɛ. Nihi nɛ ngɔɔ a hɛ ngɔ fɔɔ ye nɔ ɔ, zo be mɛ gbee.”

Yesaya 49:26

Ma ha nihi nɛ ngɛ mo haoe ɔ maa ye mɛ nitsɛmɛ a he lo awi; mɛ nitsɛmɛ a muɔ maa de mɛ kaa wai. Kɛkɛ ɔ, nimli adesahi tsuo maa le kaa imi ji Yawɛ. Imi ji nɔ nɛ heɔ o yi wami, nɛ haa nɛ o yeɔ o he. A ma na le kaa imi ji Israel Mawu kpetekpleenyɛ ɔ nɛ.”

Yesaya 60:16

Je mahi, kɛ matsɛmɛ maa lɛ mo kaa bɔ nɛ binyɛ haa e bi nyɔ ɔ. O maa le jehanɛ kaa imi Yawɛ nɛ i ha o yi na wami. O maa le kaa imi, Israel Mawu kpetekpleenyɛ ɔ nɛ i ha o ye o he.

Yesaya 63:8

Yawɛ ke, “Imi nitsɛ ye ma ji mɛ; a be mi sisie.” Lɔ ɔ he ɔ, e ha a yi na wami

Ezekiel 20:19

Imi ji Yawɛ, nyɛ Mawu ɔ nɛ. Nyɛɛ ye ye mlaa amɛ, kɛ blɔ nya tomi ɔmɛ a nɔ.

Mose I, 26:3

Hii si ngɛ hiɛ ɔ; i kɛ mo maa hi si, nɛ ma gbaa mo. Ma ngɔ zugba nɛ ɔ tsuo kɛ ha mo, kɛ o nina; nɛ si nɛ i wo o tsɛ Abraham ɔ, ma ye nɔ.

Mose I, 28:13

Kɛkɛ nɛ Yawɛ ba da si ngɛ e kasa nya, nɛ e de ke, “Imi ji Yawɛ, o nɛ̃ Abraham kɛ o tsɛ Isak a Mawu ɔ. Zugba a nɛ o hwɔɔ si ngɛ nɔ nɛ ɔ, ma ngɔ kɛ ha mo kɛ o nina.

Mose II, 7:17

Bɔ nɛ Yawɛ de ji nɛ ɔ nɛ: ‘Enɛ ɔ a kɛ maa le kaa imi ji Yawɛ. Ma wo tso nɛ ngɛ ye dɛ mi ɔ kɛ fia Nilo pa a, nɛ nyu ɔ ma plɛ muɔ.

Mose II, 13:3

Mose de ma a ke, “Nyɛ kai kikɛmɛ a ligbi nɛ ɔ nɛ nyɛ hia kɛ je Egipt, kɛ je nyɔguɛ yemi sisi ɔ. Ligbi nɛ ɔ nɛ Yawɛ kɛ he wami kpetekpleenyɛ je nyɛ kɛ je lejɛ ɔ nɛ. Nyɛ ko ye masa ní ngɛ ligbi nɛ ɔ nɔ.

Mose II, 13:14

Hwɔɔ se ke nɔ ko binyumu bi lɛ ke mɛni ji kusumi nɛ ɔ sisi ɔ, e de lɛ ke, ‘Yawɛ kɛ he wami kpetekpleenyɛ je wɔ kɛ je nyɔguɛ yemi sisi ngɛ Egipt.

Mose II, 14:4

Ma kplii Farao ɔ tsui, nɛ e maa fie a se. Nɛ manye nɛ ma ye ngɛ Farao ɔ, kɛ e ta a tsuo a nɔ ɔ ma ha ye hɛ mi maa ba nyami. Jamɛ a be ɔ, Egipt bi ɔmɛ maa le kaa imi ji Yawɛ.” Nɛ Israel bi ɔmɛ pee ja.

Mose II, 14:18

Nɛ ke i ye Farao ɔ kɛ e ta zugba lɛ ɔmɛ, kɛ e we okpɔngɔ ta buli ɔmɛ nɔ ɔ, Egipt bi ɔmɛ maa le kaa imi ji Yawɛ.”

Mose II, 15:2

Yawɛ ji ye he falɔ kpanaa; lɛ ji nɔ nɛ he ye yi wami. Ma je e yi, ejakaa lɛ ji ye Mawu; ma wo e hɛ mi nyami, ejakaa Tsaatsɛ e Mawu ji lɛ.

Mose II, 15:16

Gbeye kɛ fɔ̃ nu mɛ; Yawɛ, o he wami ɔ ha a nya jɔ kɛ ya si be nɛ mo Yawɛ, o ma a nɛ mo nitsɛ o he ɔ ba be kɛ ho.

Mose IV, 15:41

Imi ji Yawɛ, nyɛ Mawu ɔ nɛ; i je nyɛ kɛ je Egipt zugba a nɔ, konɛ ma ba pee nyɛ Mawu. Imi ji Yawɛ, nyɛ Mawu ɔ nɛ.”

Mose V, 29:5

Jeha nyingmi eywiɛ sɔuu Yawɛ kpaka nyɛ kɛ gu nga kplanaa a nɔ; nyɛ heha ní gba we ngɛ nyɛ he, nɛ nyɛ tokota amɛ hu tsɔ we.

Mose V, 29:12

Nyɛ ba hiɛmɛ nɛ ɔ, konɛ nyɛɛ fua ngɔ fɔ somi nɛ Yawɛ, nyɛ Mawu ɔ kɛ nyɛ ngɛ soe ɔ nɔ, nɛ nyɛɛ pɛtɛ níhi nɛ sa nɛ nyɛ tsu ngɛ mi ɔ a he.

Matsɛmɛ I, 8:60

bɔ nɛ pee nɛ je ma amɛ tsuo nɛ a le kaa Yawɛ pɛ ji Mawu; e se ɔ, mawu kpa ko be hu.

Matsɛmɛ I, 20:28

Gbalɔ ko ba Matsɛ Ahab ngɔ nɛ e ba de lɛ ke, “Bɔ nɛ Yawɛ de ji nɛ ɔ nɛ: ‘Akɛnɛ Siria bi ɔmɛ de ke Yawɛ ɔ, mawu nɛ hii yokuhi a nɔ ji lɛ, se pi mawu nɛ hii nga nɔ ji lɛ he je ɔ, ma ngɔ nimli kpekpemi nɛ ɔmɛ tsuo kɛ wo o dɛ mi, nɛ o kɛ o ma a ma ná maa le kaa imi ji Yawɛ.’ ”

Nehemia 1:10

“Nyɔmtsɛ, o tsɔli ji nɛ ɔmɛ nɛ, nɛ mo nitsɛ o ma ji nɛ ɔ nɛ. O kɛ o he wami nguaa kɛ nyɛmi kpɔ mɛ.

La 100:3

Nyɛ na nyɛɛ le kaa Yawɛ ji Mawu. Lɛ nɛ e bɔ wɔ; e níhi ji wɔ. E ma ji wɔ; wa ngɛ kaa tohi nɛ e ngɛ lɛe.

Yesaya 51:15

“Imi ji Yawɛ, o Mawu ɔ nɛ. Imi nɛ i haa wo gliɔ, nɛ oslɔke ɔmɛ peeɔ hoo. Yawɛ Tabohiatsɛ ji ye biɛ!