Mose II, 29:9 - BAIBLO ALOO NGMAMI KLƆUKLƆU Ɔ

⁹ Fi mlɛ mi fimi níhi kɛ wo a mlɛ mi, nɛ o bu mɛ pɛɛ. Bɔ nɛ o maa wo Aaron kɛ e binyumu ɔmɛ osɔfo ji nɛ ɔ nɛ. Kɛkɛ ɔ, osɔfo ní tsumi ɔ maa pee a nɔ́; nɛ enɛ ɔ maa pee mlaa nɛ fɔɔ si kɛ yaa neneene.

Mose II, 29:9 ပူးပေါင်းရင်းမြစ်များ

Mose IV, 18:7

Se o kɛ o bimɛ ɔmɛ pɛ ji ni nɛmɛ nɛ ngɛ he blɔ kaa nyɛ tsuɔ osɔfo ní tsumihi nɛ kɔɔ bɔ sami la tɛ ɔ, kɛ he klɔuklɔu pe kulaa a a he. Enɛ ɔmɛ ji nyɛ ní tsumi; ejakaa imi lɛ i kɛ osɔfo yemi ní tsumi ɔ ke nyɛ. Nɔ kpa ko nɛ maa hɛ lɛ kɛ su ní klɔuklɔu ɔmɛ a he ɔ, a gbe lɛ.”

Mose V, 18:5

Levi bi ɔmɛ a wɛtso ɔ lɛ Yawɛ hla ngɛ wɛtso ɔmɛ tsuo a mi nɛ a sɔmɔ lɛ daa kaa osɔfohi.

Mose IV, 25:13

E maa pee lɛ, kɛ e nina tsuo a nɔ́, nɛ a maa da nɔ kɛ ye osɔfo kɛ maa ya neneene. Ejakaa e kplɛɛ we nɛ nihi kɛ mi nɛ plee nɔ́ he, nɛ nɔ́ nɛ ɔ ha nɛ a kɛ Israel ma a he yayami pa mɛ.”

Mose IV, 16:40

kaa bɔ nɛ Yawɛ fa Eleazar kɛ gu Mose nɔ ke e pee ɔ. Nɔ́ nɛ ɔ ba pee kɔkɔ bɔmi nɔ́ ko kɛ ha Israel bi ɔmɛ, kaa nɔ ko nɛ pi osɔfo ji lɛ, nɛ e pi Aaron weku ɔ mi no hulɔ ɔ, e be he blɔ nɛ e sãã tsopa kɛ e he via ngɛ bɔ sami la tɛ ɔ nɔ kɛ haa Yawɛ. Ke nɔ ko pee ja a, a ma kpata e hɛ mi kaa bɔ nɛ a pee Kora kɛ e se nyɛɛli ɔmɛ ɔ.

Mose IV, 16:35

Kɛkɛ nɛ la je Yawɛ ngɔ ba sã nimli lafa enyɔ kɛ nyingmi enuɔ ɔmɛ nɛ a ngɔ tsopa kɛ e he via a kɛ ba a.

Mose IV, 16:10

Mawu ha mo, kɛ o nyɛmimɛ Levi bi ɔmɛ tsuo kikɛmɛ a blɔ nya nɛ ɔ. Nɛ jehanɛ lɛɛ nyɛ pa ngɛ osɔfo yemi ɔ hu hlae lo.

Mose IV, 3:10

Ngɔɔ osɔfo ní tsumi ɔ ngɔ wo Aaron, kɛ e binyumu ɔmɛ pɛ a dɛ mi; nɔ kpa ko nɛ maa hɛ lɛ kɛ su ní tsumi nɛ ɔ he ɔ, a gbe lɛ.”

Mose III, 8:33

Nyɛɛ hi kpe he bo tsu ɔ sinya a nya ligbi kpaago. Nyɛ ko je lejɛ ɔ kɛ yaa su ligbi nɛ nyɛ maa gbe osɔfo womi kusumi ɔ nya. Ejakaa ligbi kpaago nɛ a kɛ maa wo nyɛ osɔfo.

Mose II, 40:15

Moo pɔ mɛ hu nu kaa bɔ nɛ o pɔ a tsɛ ɔ nu ɔ, konɛ mɛ hu a sɔmɔ mi kaa osɔfohi. Kikɛmɛ a nu pɔmi nɛ ɔ maa pee mɛ kɛ a nina tsuo osɔfohi kɛ maa ya neneene.”

Hebribi 5:10

Nɛ Mawu wo lɛ osɔfo nɔkɔtɔma pe kulaa kaa Melkizedek pɛ.

Mose II, 32:29

Mose de mɛ ke, “Mwɔnɛ ligbi nɛ ɔ, nyɛ je nyɛ he ngɔ to kaa Yawɛ sɔmɔli, ejakaa nyɛ ti nɔ tsuaa nɔ gbe lɛ nitsɛ e binyumu, kɛ lɛ nitsɛ e nyɛminyumu. Lɔ ɔ he ɔ, Yawɛ hu maa gbaa nyɛ.”

Mose II, 28:1

“Moo tsɔ ya ngɔ o nyɛminyumu Aaron kɛ e binyumu ɔmɛ nɛ ji Nadab, Abihu, Eleazar, kɛ Itamar kɛ ba. Mo ha nɛ a tsɔ a he kɛ je Israel bi kpa amɛ a he, bɔ nɛ pee nɛ a ba sɔmɔ mi kaa osɔfohi.

Mose II, 27:21

Aaron kɛ kane ɔ nɛ ma kpe he bo tsu ɔ mi, ngɛ tsu mi pomi bo ɔ nɛ haa somi daka a hɛ mi ɔ hɛ mi. Aaron kɛ e binyumu ɔmɛ nɛ a hyɛ kane ɔ nɔ ngɛ ye hɛ mi daa kɛ je gbɔkuɛ kɛ yaa si mɔtu. Enɛ ɔ maa pee mlaa nɛ fɔɔ si kɛ yaa neneene kɛ ha Israel bi ɔmɛ, kɛ a nina tsuo.

Mose III, 8:1

Yawɛ de Mose ke,

Mose III, 8:13

Enɛ ɔ se ɔ, Mose ngɔ Aaron binyumu ɔmɛ kɛ ba, nɛ e ngɔ hiɔwe tadehi kɛ wo mɛ, nɛ e kɛ mlɛ mi fimi níhi fi a mlɛ mi ha mɛ, nɛ e bu mɛ pɛɛ kaa bɔ nɛ Yawɛ fa lɛ ɔ.

Samuel I, 2:30

Imi Yawɛ, Israel Mawu ɔ, i wo si be ko ke o kɛ o weku li ma sɔmɔ mi kaa osɔfohi kɛ maa ya neneene. Se jehanɛ ɔ, i ngɛ dee ke i kpale ye nya se! Mohu ɔ, nihi nɛ woɔ ye hɛ mi nyami ɔ, ma wo a hɛ mi nyami; nɛ nihi nɛ hiee mi ɔ, imi hu ma hie mɛ.

Manyadali 17:5

Kikɛmɛ a Mika nɛ ɔ ngɛ lɛ nitsɛ e jami he kɛ e mi amagahi nɛ a kpɛ́. E pee efɔd, nɛ e wo e binyumu ɔmɛ a ti nɔ kake osɔfo.