Mose I, 17:8 - BAIBLO ALOO NGMAMI KLƆUKLƆU Ɔ

⁸ Zugba nɛ o ba to nubwɔ ngɛ nɔ nɛ ɔ, ma ngɔ kɛ ha mo, kɛ o nina. Kanaan zugba a tsuo maa pee o nina nɔ́ kɛ maa ya neneene, nɛ ma pee a Mawu.”

Mose I, 17:8 ပူးပေါင်းရင်းမြစ်များ

Mose III, 26:12

I kɛ nyɛ maa hi si. Ma pee nyɛ Mawu, nɛ nyɛ hu nyɛ maa pee ye ma.

La 105:11

E ke, “Ma ngɔ Kanaan zugba a kɛ ha mo, nɛ zugba a ma ba pee o weto ní.”

Mose II, 6:7

Ma ngɔ nyɛ kɛ pee imi nitsɛ ye ma, nɛ ma pee nyɛ Mawu; nɛ nyɛ maa le kaa imi ji Yawɛ Mawu, nɔ nɛ je Egipt bi ɔmɛ a tlomi ɔmɛ kɛ je nyɛ nɔ ɔ.

Mose I, 12:7

Yawɛ je e he kpo kɛ tsɔɔ Abram nɛ e de lɛ ke, “Zugba a nɛ ma ngɔ kɛ ha o nina a ji nɛ ɔ nɛ.” Lɔ ɔ he ɔ, Abram ma bɔ sami la tɛ ngɛ lejɛ ɔ kɛ ha Yawɛ, nɔ nɛ ba je e he kpo kɛ tsɔɔ lɛ ɔ.

Mose V, 29:13

Nyɛ ngɛ enɛ ɔ pee konɛ Yawɛ kɛ nyɛ nɛ da si kaa lɛ nitsɛ e ma, nɛ e pee nyɛ Mawu, kaa bɔ nɛ e wo nyɛɛ kɛ nyɛ nɛmɛ Abraham, Isak, kɛ Yakob si ɔ.

Mose V, 26:18

Mwɔnɛ ligbi nɛ ɔ, Yawɛ hu he mo atuu kaa lɛ nitsɛ e ma, kaa bɔ nɛ e wo si ɔ. E ngɛ mo fae ke o ye e mlaa amɛ tsuo a nɔ.

Mose V, 14:2

Yawɛ, nyɛ Mawu ɔ níhi ji nyɛ. E hla nyɛ kɛ je je ma amɛ tsuo nɛ ngɛ zugba a nɔ ɔ a mi kɛ pee lɛ nitsɛ e ma.

Mose I, 13:15

Zugba a nɛ o ngɛ hyɛe ɔ, ma ngɔ lɛ tsuo kɛ ha mo, kɛ o nina, nɛ e maa pee nyɛ nɔ kɛ maa ya neneene.

La 105:9

Somi nɛ e kɛ Abraham so ɔ, e kaiɔ; kita nɛ e ka Isak hu e maa ye nɔ.

Mose V, 4:37

Akɛnɛ e suɔ nyɛ nɛmɛ ɔmɛ he je ɔ, e hla nyɛ, nɛ lɛ nitsɛ e kɛ e he wami kpetekpleenyɛ ɔ je nyɛ kɛ je Egipt.

Mose I, 28:4

Mawu Ope ɔ nɛ gbaa mo, kɛ o nina kaa bɔ nɛ e gbaa Abraham ɔ, konɛ zugba nɛ ɔ nɛ o ba to nubwɔ ngɛ nɔ ɔ, e ba pee o nɔ́, ejakaa Mawu kɛ zugba a ha Abraham.”

Mose I, 13:17

Yaa nɛ o ya kpa zugba a tsuo nɔ, ejakaa ma ngɔ kɛ wo o dɛ mi.”

Samuel II, 23:5

Kikɛ nɛ ɔ Mawu maa gbaa ye weku kɛ nina. Mawu kɛ mi so neneene somi, somi nɛ a be mi poe gblegbleegble. Nɔ́ nɛ i ngɛ hlae ɔ pɛ ji nɛ ɔ nɛ; e maa pee ye kunimi yemi, nɛ Yawɛ ma ha nɛ e ba mi.

Mose V, 32:8

Nɔ nɛ ngɛ hiɔwe lokoo ɔ, nɔ nɛ dla zugba a ha je ma amɛ, nɛ e to ma tsuaa ma hi he ɔ, lɛ nɛ e ha je ma tsuaa je ma e mawu.

Mose IV, 25:13

E maa pee lɛ, kɛ e nina tsuo a nɔ́, nɛ a maa da nɔ kɛ ye osɔfo kɛ maa ya neneene. Ejakaa e kplɛɛ we nɛ nihi kɛ mi nɛ plee nɔ́ he, nɛ nɔ́ nɛ ɔ ha nɛ a kɛ Israel ma a he yayami pa mɛ.”

Mose II, 40:15

Moo pɔ mɛ hu nu kaa bɔ nɛ o pɔ a tsɛ ɔ nu ɔ, konɛ mɛ hu a sɔmɔ mi kaa osɔfohi. Kikɛmɛ a nu pɔmi nɛ ɔ maa pee mɛ kɛ a nina tsuo osɔfohi kɛ maa ya neneene.”

Mose I, 48:4

E de mi ke, ‘Ma ha mo bimɛ babauu, nɛ o nina ma ba pee mahi babauu. Ma ngɔ zugba nɛ ɔ ngɔ ha o nina, nɛ e maa pee a weto ní kɛ maa ya neneene.’ ”

Mose I, 23:4

“Nubwɔ ji mi ngɛ nyɛ kpɛti; nyɛ ha mi nyɛ zugba a eko nɛ ma kɛ pee gɔ, konɛ ma pu ye yo ɔ ngɛ lejɛ ɔ.”

Hebribi 9:15

Nɔ́ nɛ Kristo tsu nɛ ɔ tsɔɔ kaa lɛ Kristo ɔ ji nɔ nɛ ha Mawu kɛ e ma a so somi he ɔ, konɛ nihi nɛ Mawu tsɛ mɛ ɔ, a nine nɛ su neneene gbosi ní nɛ Mawu wo he si ɔ nɔ. Ejakaa benɛ a kɛ kekleekle somi ɔ ngɛ ní tsue ɔ, nɔ ko ba gbo nɛ e kɛ kpɔ nihi tsuo nɛ pee yayami jamɛ a be ɔ.

La 103:17

Se Yawɛ suɔmi nɛ be nyagbe ɔ ngɛ kɛ ha nihi nɛ yeɔ lɛ gbeye. A weku kɛ nina hu Yawɛ maa pee mɛ kpakpa daa,

Mose III, 16:34

Á ye mlaa nɛ ɔmɛ a nɔ kɛ ya neneene. Daa jeha a, a maa pee kusumi nɛ ɔ si kake kɛ kpata Mawu ha Israel bi ɔmɛ ngɛ a he yayami ɔmɛ a he. Mose pee kaa bɔ nɛ Yawɛ fa lɛ ɔ.

Mose II, 21:6

lɛɛ e nyɔmtsɛ ɔ maa ngɔ lɛ kɛ ba Mawu hɛ mi. E kɛ lɛ ma ba da sinya a nya, loo sinya tso ɔ he ngɛ lejɛ ɔ, nɛ e maa ngɔ tue gbumi nɔ́ kɛ gbu e tue ha lɛ. Kɛkɛ e ma tsa nɔ ma sɔmɔ kɛ yaa si lɛ, nyɔguɛ ɔ ma gbo.

Ni Tsumi 7:5

Mawu ha we Abraham nitsɛ zugba a kpɔ nɛ maa su nane ma he kake tete po. Se Mawu wo lɛ si kaa e ma ha nɛ zugba a ma ba pee e kɛ e nina a nɔ́. Benɛ Mawu wo si nɛ ɔ, Abraham be bi po.

Kpojemi 21:7

Nihi tsuo nɛ maa ye kunimi ɔ ma na nike ní nɛ ɔ kɛ maa je ye dɛ mi; ma pee a Mawu, nɛ mɛ hu a maa pee ye ma.

Mose I, 26:24

Jamɛ a nyɔ ɔ mi ɔ, Yawɛ je e he kpo ngɔ tsɔɔ lɛ, nɛ e de lɛ ke, “Imi ji o tsɛ Abraham Mawu ɔ nɛ. Koo ye gbeye, ejakaa i kɛ mo ngɛ. Ma gbaa mo, nɛ ye tsɔlɔ Abraham he je ɔ, ma ha mo nina babauu.”

Mose I, 36:7

Esau je e nyɛmi ɔ he, ejakaa e kɛ Yakob ɔ a weto ní hiɛ babauu pe bɔ nɛ mɛ ni enyɔ ɔmɛ tsuo a ma nyɛ hi he kake; a lohwe ɔmɛ hiɛ babauu, nɛ zugba a he nɛ a ngɛ ɔ kpi mɛ.

Mose I, 37:1

Yakob hi Kanaan zugba a nɛ e tsɛ ba to nubwɔ ngɛ nɔ ɔ nɔ.

Mose II, 13:11

“Ke Yawɛ kɛ nyɛ ba Kanaan zugba a nɔ kaa bɔ nɛ e ka nyɛɛ kɛ nyɛ nɛmɛ ɔmɛ kita ke e maa pee ɔ,

Mose II, 29:45

Ma hi Israel bi ɔmɛ a kpɛti, nɛ ma pee a Mawu.

Mose II, 32:13

Mo kai o tsɔli Abraham, Isak, kɛ Yakob. Mo kai mo nitsɛ o kita nɛ o ka ke, ‘Ma ha nɛ nyɛ nina maa hiɛ babauu kaa hiɔwe dodoehi, nɛ ma ngɔ zugba nɛ ɔ tsuo nɛ i wo nyɛ e he si ɔ kɛ ha mɛ, nɛ e maa pee a nɔ kɛ ya neneene ɔ.’ ”

Mose V, 9:5

Pi kaa nyɛ hi, loo nyɛ peeɔ nɔ́ nɛ da he je nɛ Yawɛ ha nyɛ yaa ngɔ a zugba a. Mohu ɔ, a yi mi nɛ wa a he je nɛ Yawɛ, nyɛ Mawu ɔ ngɛ mɛ fiee ha nyɛ ɔ nɛ. Jehanɛ hu, Yawɛ pee ja, bɔ nɛ pee nɛ e ye si nɛ e wo nyɛ nɛmɛ, Abraham, Isak, kɛ Yakob ɔ nɔ.

Yeremia 25:5

A de nyɛ ke nyɛɛ kpale kɛ je nyɛ blɔ yayami ɔmɛ a nɔ, nɛ nyɛ kpa yayami peemi, konɛ zugba a nɛ Yawɛ ngɔ ha nyɛɛ kɛ nyɛ nɛmɛ ɔmɛ blema kaa nyɛ weto ní ɔ, nyɛɛ hi nɔ daa.

Yeremia 31:1

Yawɛ ke, “Be ma nɛ ma ba pee Israel wɛtso ɔmɛ tsuo a Mawu, nɛ mɛ hu a maa pee ye ma.

Mose I, 35:27

Yakob ba e tsɛ Isak ngɔ ngɛ Mamre, he nɛ Abraham kɛ Isak ba to nubwɔ ngɛ ɔ. Mamre biɛ kpa ji Kiriat Arba, aloo Hebron.

Mose II, 6:4

Jehanɛ se hu, i kɛ mɛ so kaa Kanaan zugba a nɛ a ya to nubwɔ ngɛ nɔ ɔ, ma ngɔ kɛ ha mɛ.

Mose III, 14:34

mlaa nɛ ɔmɛ nɛ kɔɔ wehi nɛ a he fu ja a he. Ke Israel bi ɔmɛ ya su zugba a nɛ Yawɛ ngɔ ha mɛ kaa a weto ní ɔ nɔ ɔ, mlaa nɛ sa kaa a ye nɔ ji nɛ ɔ nɛ.

Mose IV, 10:29

Kɛkɛ nɛ Mose de e ngatsɛ Yetro, Midian no ɔ bi Hobab ke, “Wa ngɛ hiae kɛ yaa he nɛ Yawɛ de to ke e ma ha wɔ ɔ. Yawɛ nitsɛ wo Israel ní kpakpahi a he si. Lɔ ɔ he ɔ, ha waa ho nɛ waa kɛ mo ya ye wa kplɔkɔtɔ ɔ.”

Mose IV, 27:12

Yawɛ de Mose ke, “Yaa nɛ o ya kuɔ Abarim yo ɔ, nɛ o kɛ o hɛngmɛ nɛ hyɛ zugba a nɛ i ngɔ kɛ ha Israel ma a.

Mose V, 32:49

“Yaa Abarim yo ɔmɛ a nɔ ngɛ Moab zugba a mi, ngɛ Yeriko ma a hanɔ; kuɔɔ Nebo yo ɔ, nɛ o hyɛ Kanaan zugba a nɛ i ngɔ kɛ ngɛ Israel ma a hae ɔ.

Mose V, 34:4

Jehanɛ, Yawɛ de Mose ke, “Zugba a nɛ i wo Abraham, Isak, kɛ Yakob si ke ma ngɔ ha a nina a ji nɛ ɔ nɛ. I ha nɛ o na zugba a kɛ o hɛngmɛ lɛɛ, se be o lejɛ ɔ yae.”

Yoshua 1:2

ke, “Ye tsɔlɔ Mose gbo; lɔ ɔ he ɔ, o kɛ Israel ma a tsuo nyɛ dla nɛ nyɛ ya po Yordan pa a kɛ ya zugba a nɛ i ngɔ ha mɛ ɔ nɔ.

Kronika I, 16:18

Yawɛ de lɛ ke, “I kɛ Kanaan zugba a ma ha mo; e maa pee o weto ní.”

Ezekiel 11:20

bɔ nɛ pee nɛ a ye ye mlaa amɛ, kɛ ye blɔ nya tomi ɔmɛ a nɔ pɛpɛɛpɛ. Kɛkɛ ɔ, a ma plɛ pee ye ma, nɛ imi hu ma pee a Mawu.

Ezekiel 33:24

“Nɔmlɔ adesa, nihi nɛ ngɛ ma doku ɔmɛ a mi ngɛ Israel zugba a nɔ ɔ deɔ mi ke, ‘Abraham ɔ nɛ a ngɔ zugba a tsuo ngɔ ha lɛ ɔ, nɔ kake too ji lɛ, se wɔɔ lɛɛ wa he hiɛ; lɔ ɔ he ɔ, zugba a, wɔ a kɛ ha kaa wa weto ní.’

Zakaria 8:8

Ma ya kpale mɛ kɛ ba Yerusalem, nɛ a maa pee ye ma, nɛ imi hu ma pee a Mawu. Ma ye mɛ anɔkuale, nɛ ma pee nɔ́ nɛ da.”