Matsɛmɛ II, 17:16 - BAIBLO ALOO NGMAMI KLƆUKLƆU Ɔ

¹⁶ Mlaahi nɛ Yawɛ, a Mawu ɔ wo mɛ ɔ, a yi ekoeko nɔ; se mohu a ngɔ dade nɛ a sle kɛ pee na bi enyɔ kɛ ha a he. A pee Ashera, nɛ a ja hiɔwe níhi tsuo; a ja Baal hulɔ.

Matsɛmɛ II, 17:16 ပူးပေါင်းရင်းမြစ်များ

Matsɛmɛ I, 16:31

E pi ha Ahab kaa e maa pee yayami kaa bɔ nɛ Yeroboam pee ɔ kɛkɛ, se e ya nɔ pee yayami kɛ be nɔ. E ya ngɔ Sidon matsɛ, Etbaal biyo Yezebel, nɛ e ya ja Baal.

Matsɛmɛ I, 14:23

Mɛ hu a po piɛhi, nɛ a puɛ amagahi ngɛ ma a mi, ngɛ yokuhi a nɔ, kɛ tsohi nɛ bɔ kusuu a sisi; amaga amɛ ekomɛ daa si ha a yo mawu ɔ nɛ a tsɛɛ lɛ Ashera a.

Matsɛmɛ I, 14:15

Yawɛ maa gbla Israel tue, nɛ Israel ma mimiɛ kaa ngɔwu ngɛ pa mi. Yawɛ maa hia Israel ma a kɛ je zugba kpakpa nɛ ɔ nɛ e ngɔ kɛ ha a nɛmɛ ɔmɛ ɔ nɔ, nɛ e maa gbɛ mɛ ngɔ fĩa kɛ yaa si Yufrate pa a se. Yawɛ maa pee enɛ ɔ, ejakaa a ya puɛ amagahi ngɔ ha a yo mawu Ashera a, nɛ a kɛ nɔ́ nɛ ɔ wo lɛ, Yawɛ ɔ mi mi la.

Matsɛmɛ I, 12:28

Matsɛ Yeroboam susu nɔ́ nɛ ɔ he saminya. Lɔ ɔ se ɔ, e kɛ sika tsu puɛ na bi enyɔ, nɛ e de ma a ke, “Bɔ nɛ nyɛ nyɛɛ kɛ ya Yerusalem ɔ ba hiɛ! Israel ma, nyɛ mawu ɔmɛ nɛ je nyɛ kɛ je Egipt zugba a nɔ ɔ, mɛ ji nɛ ɔmɛ nɛ!”

Mose V, 4:19

Nyɛ ko ha níhi nɛ nyɛ ngɛ hyɛe ngɛ hiɔwe ɔ, pu, nyɔhiɔ, kɛ dodoehi babauu nɛ ha si ngɛ hiɔwe nɛ ɔ nɛ gbla nyɛ juɛmi kɛ ya ja mɛ, nɛ nyɛ sɔmɔ mɛ. Ejakaa Yawɛ, nyɛ Mawu ɔ ngɔ mɛ ngɔ ha ma amɛ tsuo nɛ ngɛ je ɔ mi ɔ.

Matsɛmɛ II, 21:3

Jami hehi nɛ e tsɛ Hezekia gbɛ ɔ, e kpale dla mɛ ekohu. E ma bɔ sami la tɛhi kɛ ha Baal, nɛ e puɛ amaga kɛ ha yo mawu ɔ nɛ a tsɛɛ Ashera a kaa bɔ nɛ Israel matsɛ, Ahab pee ɔ. E ja dodoehi hulɔ.

Matsɛmɛ II, 11:18

Lɔ ɔ se ɔ, ma mi bi ɔmɛ tsuo ya sɛ Baal jami he ɔ, nɛ a gbɛ lɛ kɛ pue si. A ku bɔ sami la tɛ ɔmɛ, kɛ amaga amɛ dukuduku, nɛ a gbe Baal osɔfo ɔ nɛ a tsɛɛ lɛ Matan ɔ ngɛ bɔ sami la tɛ ɔmɛ a hɛ mi. Osɔfo Yehoyada ngɔ buli ya to Yawɛ we ɔ.

Matsɛmɛ I, 22:53

E sɔmɔ Baal, e ja lɛ; nɛ e wo Yawɛ, Israel Mawu ɔ mi mi la kaa bɔ nɛ e tsɛ pee ɔ pɛpɛɛpɛ.

Matsɛmɛ I, 16:33

Jehanɛ, e puɛ amaga kɛ ha yo mawu ɔ nɛ a tsɛɛ Ashera a. Ahab pee yayami kɛ wo Yawɛ, Israel Mawu ɔ mi mi la pe Israel matsɛmɛ ɔmɛ tsuo nɛ nyɛɛ e hɛ mi ɔ.

Matsɛmɛ I, 15:13

E na, Maaka po e kpa lɛ manyɛ yemi, ejakaa e puɛ amaga ko nɛ a hiee kɛ ha yo mawu ɔ nɛ a tsɛɛ Ashera a. Asa ywia amaga nɛ ɔ, nɛ e sã lɛ ngɛ Kidron pa a nya.

Yeremia 8:2

A be wu nɛ ɔmɛ a nya buae, nɛ a be mɛ pue hulɔ; wu ɔmɛ maa pee kaa kuku ngɛ zugba a nɔ. A ma ka wu ɔmɛ ngɔ ha pu kɛ nyɔhiɔ kɛ dodoehi. Ní nɛ ɔmɛ ji níhi nɛ ma a suɔ saminya; ma a sɔmɔ mɛ, nɛ a bi ní ngɛ a ngɔ, nɛ a ja mɛ hulɔ.

Matsɛmɛ II, 17:10

A puɛ amagahi kɛ ha yo mawu Ashera a ngɛ yokuhi tsuo a nɔ, kɛ tsohi nɛ bɔ kusuu tsuo a sisi;

Mose II, 32:8

Blɔ nɛ i fa mɛ ke a nyɛɛ nɔ ɔ, a gba kɛ je nɔ momo; a puɛ na bi amaga nɛ a ja lɛ, nɛ a sã bɔ ha lɛ nɛ a de ke, ‘Israel, o mawu ɔ nɛ je mo kɛ je Egipt zugba a nɔ ɔ, lɛ ji nɛ ɔ nɛ!’ ”

Mose II, 32:4

E he tue nya ní ɔmɛ ngɛ a dɛ nɛ e sile, nɛ e plɛ sika tsu nyu ɔ kɛ wo tso nɛ a kpɛ́ mi, nɛ e kɛ pee sika tsu na bi. Kɛkɛ nɛ ma a de ke, “Israel, o mawu ɔ nɛ je mo kɛ je Egipt zugba a nɔ ɔ, lɛ ji nɛ ɔ nɛ!”

Mose V, 16:21

“Ke nyɛ ma bɔ sami la tɛ ha Yawɛ, nyɛ Mawu ɔ, nyɛ ko ngɔ yo Ashera a mawu we amaga nɛ a kɛ tso kpɛ kɛ ma e kasa nya.

Yeremia 19:13

Ma ble wehi tsuo ngɛ Yerusalem kaa bɔ nɛ i pee Tofet ɔ. Yuda matsɛmɛ ɔmɛ a mɔhi, kɛ tsu kpahi nɛ a sãã tsopa kɛ e he via ngɛ a yi mi kɛ haa dodoehi, nɛ a sãã wai bɔ ngɛ lejɛ ɔmɛ kɛ haa mawu kpahi ɔ, ma ble mɛ.”

Yeremia 44:17

Níhi tsuo nɛ wa de ke wa maa pee ɔ, lɔ ɔmɛ wa maa pee. Wa maa sã tsopa kɛ e he via kɛ ha wa yo mawu ɔ nɛ ji hiɔwe manyɛ ɔ, nɛ wa maa sã wai bɔ ha lɛ kaa bɔ nɛ waa kɛ wa nɛmɛ ɔmɛ, wa matsɛ ɔ, kɛ wa ma nimeli ɔmɛ pee be ko ngɛ Yuda ma amɛ a mi, kɛ Yerusalem gbɛjegbɛ ɔmɛ a nɔ ɔ. Jamɛ a be ɔ mi ɔ, wa ngɛ niye ní babauu; wa plɔke, nɛ haomi ko be wa nɔ.

Ezekiel 23:8

Yahomi nɛ e je sisi kɛ je e yihe mi ngɛ Egipt, he nɛ a fiɛ e nyɔ he, nɛ a kɛ lɛ bɔ ajuama nɛ a puɛ lɛ ngɛ ɔ, e kpa we.

Mose III, 26:1

Yawɛ de ke, “Nyɛ ko puɛ amagahi, nɛ nyɛ ko pee tɛ amagahi, loo titimahi kɛ ma si; nyɛ ko ja mɛ hulɔ; ejakaa imi ji Yawɛ, nyɛ Mawu ɔ nɛ.

Matsɛmɛ II, 1:2

Ligbi ko ɔ, Israel matsɛ, Ahazia tsɔ́ kɛ je e hiɔwe tsu nɛ ngɛ Samaria a saflɛ mi kɛ ba nɔ si, nɛ e plaa wawɛɛ nitsɛ. Enɛ ɔ he ɔ, e tsɔ nihi ke a ya bi ní ngɛ Baalzebub ngɔ ha lɛ kaa e yi ma na wami lo. Baalzebub ji mawu nɛ ngɛ Filisti bi ɔmɛ a ma nɛ a tsɛɛ Ekron ɔ nɛ.

Matsɛmɛ II, 16:3

se mohu e ya wo Israel matsɛmɛ ɔmɛ a nane. E ngɔ lɛ nitsɛ e binyumu po kɛ sã sami bɔ kaa bɔ nɛ je ma amɛ nɛ Yawɛ fie kɛ je Israel bi ɔmɛ a blɔ ɔ nɔ ɔ a kusumi yayami ɔmɛ ngɛ ɔ.

Matsɛmɛ II, 18:6

E ngɔ e he ngɔ fɔ Yawɛ nɔ; e ye lɛ anɔkuale, nɛ mlaahi nɛ Yawɛ wo Mose ɔ, e ye lɛ tsuo pɛpɛɛpɛ nɔ.

Yesaya 2:8

Amagahi hyi a zugba a nɔ; nɛ níhi nɛ mɛ nitsɛmɛ a ngɔ a nine kɛ pee ɔ, lɔ ɔmɛ a jaa.