Matsɛmɛ II, 1:3 - BAIBLO ALOO NGMAMI KLƆUKLƆU Ɔ

³ Se Yawɛ bɔfo ɔ de gbalɔ Eliya nɛ je Tishbe ɔ ke e ya nɛ e kɛ Matsɛ Ahazia tsɔli ɔmɛ ya kpe, nɛ e bi mɛ ke, “Mɛni he je nyɛ yaa bi ní ngɛ Ekron mawu Baalzebub ɔ ngɔ ɔ? Anɛ Mawu be Israel lo?

Matsɛmɛ II, 1:3 ပူးပေါင်းရင်းမြစ်များ

Matsɛmɛ I, 11:33

I ma pee nɔ́ nɛ ɔ, ejakaa Salomo kua mi, nɛ e ya ja Astarte, Sidon yo mawu ɔ; Kemosh, Moab mawu ɔ; kɛ Milkom, Amon mawu ɔ. Salomo gbo tue; e pee yayami, nɛ e yi ye mlaa amɛ, kɛ blɔ nya tomi ɔmɛ a nɔ kaa bɔ nɛ e tsɛ David pee ɔ.

Matsɛmɛ I, 17:1

Gbalɔ ko nɛ a tsɛɛ lɛ Eliya, nɛ je Tishbe ngɛ Gilead ɔ de Matsɛ Ahab ke, “Ina Yawɛ, Israel Mawu ɔ nɛ i jaa lɛ ɔ kaa bɔ́, aloo hiɔmi be nɛe ngɛ hiɛmɛ nɛ ɔ jeha enyɔ, loo etɛ kɛ yaa si be nɛ ma tsɔɔ.”

Matsɛmɛ I, 18:1

Pee se ngɛ jeha etɛne ɔ mi ɔ, Yawɛ de Eliya ke, “Yaa nɛ o kɛ o he ya tsɔɔ Matsɛ Ahab, nɛ ma ha hiɔmi maa nɛ.”

Matsɛmɛ I, 18:36

Gbɔkuɛ bɔ sami be ɔ, gbalɔ Eliya hɛ lɛ kɛ ba bɔ sami la tɛ ɔ he, nɛ e sɔle ke, “Yawɛ, Abraham, Isak, kɛ Yakob a Mawu lee, ha nɛ a le mwɔnɛ ɔ kaa mo ji Israel Mawu, nɛ o tsɔlɔ ji mi, nɛ i pee ní nɛ ɔmɛ tsuo ngɛ o fami nya.

Matsɛmɛ I, 19:5

Eliya hwɔ si ngɛ tso ɔ sisi, nɛ e hwɔ mahe. Tlukaa a, hiɔwe bɔfo ko ba ta e he, nɛ e de lɛ ke, “Wlua mo nɛ o ye ní!”

Matsɛmɛ I, 19:7

Yawɛ bɔfo ɔ kpale ba ba tsɛ̃ɛ̃ lɛ si enyɔne, nɛ e de lɛ ke, “Wlua mo nɛ o ye ní, ejakaa blɔ nɛ ngɛ o hɛ mi ɔ he wa saminya.”

Matsɛmɛ I, 21:17

Kɛkɛ nɛ Yawɛ de gbalɔ Eliya nɛ je Tishbe ɔ ke,

Matsɛmɛ II, 1:2

Ligbi ko ɔ, Israel matsɛ, Ahazia tsɔ́ kɛ je e hiɔwe tsu nɛ ngɛ Samaria a saflɛ mi kɛ ba nɔ si, nɛ e plaa wawɛɛ nitsɛ. Enɛ ɔ he ɔ, e tsɔ nihi ke a ya bi ní ngɛ Baalzebub ngɔ ha lɛ kaa e yi ma na wami lo. Baalzebub ji mawu nɛ ngɛ Filisti bi ɔmɛ a ma nɛ a tsɛɛ Ekron ɔ nɛ.

Matsɛmɛ II, 1:6

A he nɔ ke, “Nyumu ko kɛ wɔ ba kpe ngɛ blɔ ɔ nɔ, nɛ e de wɔ ke waa kpale wa se nɛ wa ba de mo ke, Yawɛ ke, ‘Mɛni he je o tsɔ ke a ya bi ní ngɛ Ekron mawu Baalzebub ɔ ngɔ ɔ? Anɛ Mawu be Israel lo? Plaami ɔ nɛ o plaa a, o yi be wami nae; o ma gbo!’ ”

Matsɛmɛ II, 1:8

A he nɔ ke, “Bwɔmitsɛ ji lɛ, nɛ e kɛ mlɛ mi fimi nɔ́ nɛ a kɛ lohwe he womi pee fi e mlɛ mi.” Kɛkɛ nɛ matsɛ ɔ de ke, “Lɛ ji Eliya, Tishbe no ɔ!”

Matsɛmɛ II, 5:15

Lɔ ɔ se ɔ, e kɛ e we bi ɔmɛ tsuo kpale kɛ ho Mawu nɔmlɔ ɔ ngɔ ya, nɛ e ya de lɛ ke, “Kpaako loko i na kaa Mawu ko Mawu ko be je ɔ mi he ko he ko kaa ja Israel Mawu ɔ ngɛ hiɛmɛ nɛ ɔ. Lɔ ɔ he ɔ, ye nyɔmtsɛ, i kpa mo pɛɛ, nike ní bɔɔ ko nɛ i hɛɛ kɛ ba ha mo ji nɛ ɔ nɛ.”

Matsɛmɛ II, 5:8

Benɛ Mawu nɔmlɔ Elisha nu sane nɛ ba a, e tsɔ ya de matsɛ ɔ ke, “Mɛni he je o hao kikɛ nɛ ɔ? Ha nɛ nyumu ɔ nɛ ba ye ngɔ, nɛ e maa na kaa gbalɔ ko ngɛ Israel.”

La 76:1

A le Mawu ngɛ Yuda, a woɔ e biɛ ɔ hɛ mi nyami ngɛ Israel.

Yesaya 8:19

Se ni komɛ de nyɛ ke nyɛ ya bi ní ngɛ klaali, kɛ ní peeli nɛ kpaa nyagba, nɛ a tuɔ gugwɔ mi gbi ɔ a ngɔ. A ma de ke, “E pee we nɔ́ ko; e sa kaa a ya bi ní ngɛ mumihi a ngɔ, nɛ a nu nɔ́ ko nɛ kɔɔ hɛ ngmengmletsɛmɛ a he kɛ je kpadehi a ngɔ.”

Yona 2:8

Nihi nɛ jaa amagahi, nɛ ji níhi nɛ a he be se nami ɔ, a ji nihi nɛ je a Mawu ɔ nɛ sa kaa a ja lɛ ɔ se.

Marko 3:22

Mlaa tsɔli komɛ nɛ je Yerusalem kɛ ba a ngɛ dee ke, “Beelzebul ngɛ e mi. Mumi yayami ɔmɛ a tsɛ nɛ ɔ nɛ haa lɛ he wami nɛ e kɛ hiaa mumi yayami ɔ nɛ.”

Ni Tsumi 8:26

Nyɔmtsɛ ɔ bɔfo ko ba de Filipo ke, “Dla o he nɛ o ya leneyi je, nɛ o nyɛɛ blɔ nɛ je Yerusalem kɛ yaa Gaza a nɔ.” (A nyɛɛ we blɔ nɛ ɔ nɔ hu.)

Samuel I, 17:46

Mwɔnɛ ligbi nɛ ɔ, Yawɛ ma je mo ngɔ wo ye dɛ mi; ma gbe mo, nɛ ma po o yi. Nɛ ma ngɔ Filisti ta buli ɔmɛ a gbogboehi kɛ ha lohwe pɛlitsɛmɛ, kɛ pu mi lohwehi nɛ a ye. Nɛ je ɔ tsuo maa le kaa Mawu ko ngɛ Israel,