Matsɛmɛ I, 9:7 - BAIBLO ALOO NGMAMI KLƆUKLƆU Ɔ

⁷ lɛɛ ma je ye ma, Israel kɛ je zugba a nɛ i ha mɛ ɔ nɔ. We nɛ ɔ hu nɛ i pee klɔuklɔu nɛ a ja mi ngɛ mi ɔ, ma je ye nine ngɛ he. Je ma amɛ tsuo pɛpɛɛpɛ maa wo Israel la, nɛ a maa ye e he fɛu.

Matsɛmɛ I, 9:7 ပူးပေါင်းရင်းမြစ်များ

Yeremia 24:9

Ma ngɔ haomi nɛ nya wa wawɛɛ nitsɛ kɛ ba a nɔ, nɛ nɔ́ nɛ ɔ ma ha nɛ je ma amɛ tsuo maa nu sawale. A maa ye a he fɛu, a maa bɔ mɛ ahlua, nɛ a maa wo mɛ la ngɛ he tsuaa he nɛ ma fie mɛ kɛ ya a.

La 44:14

O ha wa plɛ pee abɛ bumi nɔ́ ha je ma amɛ; Wa pee muɔ nɔ́ ha mɛ.

Mose V, 28:37

Ma amɛ, he nɛ Yawɛ maa ngɔ nyɛ kɛ ya a, a mi bi ɔmɛ maa ye gbeye ngɛ nyakpɛ nɔ́ nɛ ba nyɛ nɔ nɛ ɔ he; a maa muɔ nyɛ, nɛ a maa ye nyɛ he fɛu.

Mose V, 4:26

I tsɛ hiɔwe kɛ zugba odase kaa ke nyɛ bui mi tue ɔ, nyɛ hɛ mi ma kpata ngɛ zugba a nɔ. Lɛɛ zugba a nɛ nyɛ yaa ngɔ ngɛ Yordan pa a se ɔ, nyɛ se be kɛe ngɛ nɔ. A ma kpata nyɛ hɛ mi pɛsɛpɛsɛ.

Luka 21:24

A kɛ klaate maa gbe ni komɛ. A maa nuu ni komɛ hu nyɔguɛ kɛ ya je ma amɛ tsuo a mi, nɛ ma je li ɔmɛ maa ngɔ Yerusalem, nɛ a maa ye ma a nɔ hluu kɛ yaa si mɛ hu a be maa su.

Matsɛmɛ II, 25:21

Babilonia matsɛ ɔ fia mɛ ní nɛ e gbe ngɛ Ribla, ngɛ Hamat zugba a nɔ. Bɔ nɛ a pee kɛ ngɔ Yuda bi ɔmɛ nyɔguɛ kɛ je a zugba a nɔ ji nɛ ɔ nɛ.

Matsɛmɛ II, 25:9

E ya sã Yawɛ we ɔ, kɛ matsɛ we ɔ, kɛ nimli nguahi tsuo nɛ ngɛ Yerusalem ɔ a wehi,

Mika 3:12

Lɔ ɔ he ɔ, nyɛ he ɔ, a maa pee Zion kaa ngmɔ nɛ a hu. Yerusalem maa pee ma doku, nɛ yo ɔ nɔ he nɛ Yawɛ we ɔ maa si ngɛ ɔ maa hɛ, nɛ e maa pee pú.

Yoel 2:17

Osɔfo ɔmɛ nɛ sɔmɔɔ Yawɛ ngɛ e we ɔ mi sinya a nya, kɛ bɔ sami la tɛ ɔ he ɔ, a wo yana, nɛ a fa kue ke, “Yawɛ, naa o ma a mɔbɔ. Ko ha nɛ je ma kpa amɛ nɛ a bɔ wɔ ahlua, nɛ a ye wa he fɛu, nɛ a bi wɔ ke, ‘Jije nyɛ Mawu ɔ ngɛ?’ ”

Yeremia 26:6

Lɔ ɔ he ɔ, i ngɛ nyɛ dee ke, ke nyɛ wa tue kɛ mwɔɔ ɔ, lɛɛ ma pee we nɛ ɔ kaa bɔ nɛ i pee Shilo ɔ. Nɛ ma ha nɛ ma nɛ ɔ ma plɛ pee gbiɛmi nɔ́ ko kɛ ha je ma amɛ tsuo.”

Kronika II, 36:19

E sã Yawɛ we ɔ, kɛ Yerusalem ma a kɛ e mi mɔ ɔmɛ; e kpata ní kpakpahi tsuo a hɛ mi, nɛ e ku Yerusalem gbogbo ɔ ngɔ pue si.

Kronika II, 7:20

lɛɛ ma je ye ma, Israel kɛ maa je zugba a nɛ i ha mɛ ɔ nɔ. We nɛ ɔ nɛ i pee lɛ klɔuklɔu nɛ a ja mi ngɛ mi ɔ, ma je ye nine ngɛ he. Je ma amɛ tsuo pɛpɛɛpɛ maa ye e he fɛu, nɛ a maa hie lɛ.

Mateo 24:2

Se Yesu de mɛ ke, “Tse nyɛ ngɛ ní nɛ ɔmɛ tsuo hyɛe? Niinɛ, i ngɛ nyɛ dee ke, a maa ku tsu nɛ ɔmɛ tsuo pue si nɛ a be tɛ kake po sie ngɛ eko nɔ.”

Ezekiel 24:21

ma ngɔ sɛ gbi nɛ ɔ kɛ ha Israel ma a, nɛ ma de mɛ ke, bɔ nɛ imi Nyɔmtsɛ Yawɛ, i de ji nɛ ɔ nɛ: Ma ble ye he klɔuklɔu ɔ, he nɛ nyɛ fĩaa ngɔ fɔɔ nɔ ke nyɛ naa he wami kɛ jeɔ ɔ. We ɔ peeɔ nyɛ fɛu saminya, nɛ nyɛ suɔ kɛ nyɛ tsui tsuo kaa nyɛ maa ya lejɛ ɔ. Ma ha nyɛ bimɛ, yi ɔmɛ kɛ nyumu ɔmɛ tsuo nɛ nyɛ si ngɛ Yerusalem ɔ maa nɔ ngɛ klaate nya.

Yeremia 52:13

E sã Yawɛ we ɔ, matsɛ we ɔ, kɛ ni nguahi tsuo nɛ ngɛ Yerusalem ɔ a wehi,

Yeremia 26:18

“Yuda matsɛ, Hezekia yi nɔ ɔ, gbalɔ Mika nɛ je Moreshet ɔ de Yuda ma a tsuo ke, ‘A ma hu Zion kaa a huɔ ngmɔ. Yerusalem ma hyi tɔ kɛ ní kokoehi nɛ a bua nya glekugleku, nɛ yoku ɔ nɔ he nɛ we ɔ maa si ngɛ ɔ ma plɛ pee hue.’

Yesaya 65:15

Nyɛ biɛ maa pee nɔ nɛ a kɛ gbiɛɔ ha ye ma nɛ i hla a; ejakaa imi Nyɔmtsɛ Yawɛ nitsɛ, ma kpata nyɛ hɛ mi; se ni nɛmɛ nɛ jaa mi ɔ lɛɛ ma wo mɛ biɛ he.

Matsɛmɛ I, 9:3

Yawɛ de lɛ ke, “I nu o kue fami ɔ. I pee we nɛ o po nɛ a ja mi ngɛ mi nɛ ɔ klɔuklɔu kɛ yaa neneene. Ma hyɛ we ɔ nɔ, nɛ ma bu he daa.

Mateo 23:38

Lɔ ɔ he ɔ, a maa je o sɔlemi we ɔ he, nɛ e maa fɔ si gu.

Samuel I, 15:11

“I pia ye he kaa i wo Saul matsɛ; ejakaa e je ye se nɛ e yi ye mlaa amɛ a nɔ.” Nɔ́ nɛ ɔ dɔ Samuel, nɛ e fa kue ha Yawɛ nyɔ ɔ mi tsuo.

La 69:11

Ke i ha kpekpe ya bo ɔ, kɛkɛ i plɛ pee blakpa fiami nɔ́ ha mɛ.

Yeremia 25:9

‘Ma tsɔ nɛ a ya kpee omleyi je ma amɛ tsuo, kɛ Babilonia matsɛ Nebukadnezar, ye tsɔlɔ ɔ kɛ ba. Ma ngɔ mɛ kɛ ba, nɛ a kɛ Yuda zugba a, kɛ ma mi bi ɔmɛ, kɛ je mahi tsuo nɛ bɔle mɛ ɔ ma ba hwu ta. Ma kpata zugba nɛ ɔ, kɛ mahi nɛ bɔle lɛ ɔ a hɛ mi pɛsɛpɛsɛ; a ma plɛ pee gbeye nɔ́, muɔ nɔ́, kɛ he fɛu yemi nɔ́ kɛ ya neneene. Imi, Yawɛ lɛ i de.

Yeremia 44:8

Nyɛ ngɛ amagahi sɔmɔe, nɛ nyɛ ngɛ tsopa kɛ e he via sãe ha mawu kpahi ngɛ Egipt hiɛmɛ nɛ ɔ, he nɛ nyɛ ba nɛ nyɛ ba hi ɔ. Mɛni he je lɛ nyɛ ngɛ ní nɛ ɔmɛ pee kɛ ngɛ ye mi mi la woe ɔ? Anɛ nyɛ ngɛ ní nɛ ɔmɛ pee nɛ nyɛ kɛ kpata nyɛ nitsɛmɛ nyɛ hɛ mi, konɛ je ma amɛ tsuo nɛ a hie nyɛ, nɛ a ngɔ nyɛ biɛ kɛ pee gbiɛmi nɔ́ lo?

Yoshua 23:16

Ke nyɛ yi somi nɛ Yawɛ, nyɛ Mawu ɔ kɛ nyɛ so ɔ nɔ, nɛ nyɛ ya sɔmɔ mawu kpahi, nɛ nyɛ ja mɛ ɔ, lɔ ɔ lɛɛ e kɛ abofu maa gbla nyɛ tue, nɛ e be kɛe kulaa nɛ nyɛ ti nɔ ko nɔ ko be piɛe ngɛ zugba kpakpa nɛ ɔ nɛ e ngɔ ha nyɛ ɔ nɔ.”

La 44:15

Daa nɛ, ke ye he nyɛli na mi kikɛ nɛ ɔ, yaka jɛmi tɛ̃ a nya mi; ye he guɛ sɔuu a hii gbee, nɛ zo gbeɔ mi kpɔtɔɔ.

Kɔmɔ Yemi 1:8

Yerusalem pee yayami wawɛɛ kɛ pue e hɛ mi si. E pee kaa nɔ ko nɛ hɛɛ e he gu; nihi tsuo nɛ peeɔ e he akɔtaa a bui lɛ hu. Ee, e ngɛ kɛmɛe, nɛ e ngɛ e hɛ mi laae.

Kɔmɔ Yemi 2:17

Nɔ́ ko nɛ Yawɛ de ke e maa pee ɔ, amlɔ nɛ ɔ, e pee. Yawɛ kpata wa hɛ mi pɛsɛpɛsɛ kaa bɔ nɛ e de to be ko ke e maa pee ɔ. E ha nɛ wa he nyɛli ɔmɛ ye wa nɔ, nɛ a bua jɔ a he kaa wa hɛ mi kpata.

Ezekiel 5:15

“Ke ye mi mi fu, nɛ ye hɛ dɔ, nɛ i gbla nyɛ tue kikɛ ɔ, je ma amɛ nɛ bɔle nyɛ ɔ tsuo maa ye gbeye; a maa hie nyɛ, nɛ a maa ye nyɛ he fɛu.

Hosea 9:3

Israel be zugba nɛ ɔ nɔ hie daa. A maa kpale kɛ ho Egipt ya, nɛ niye ní nɛ he tsɔ we ɔ, lɔ ɔ a ma ya ye ngɛ Asiria.