Mateo 6:13 - BAIBLO ALOO NGMAMI KLƆUKLƆU Ɔ

¹³ Nɛ o kɛ wɔ ko ya ka mi; se mohu, je wɔ kɛ je nɔ yayami ɔ dɛ mi.’

Somi He Ɔ

¹³ Nɛ o kɛ wɔ ko ya kami mi se je wɔ kɛ je nɔ yayami ɔ dɛ mi.’

Mateo 6:13 ပူးပေါင်းရင်းမြစ်များ

1 Korintobi 10:13

Kahi nɛ baa nyɛ nɔ ɔ, ekoeko be nɛ bɛ adesa nɔ hyɛ. Se Mawu yeɔ e siwo nɔ, nɛ e be hae nɛ a ka nyɛ pe bɔ nɛ nyɛ ma nyɛ. Ke ka ba nyɛ nɔ ɔ, Mawu ma ha nyɛ he wami nɛ nyɛ kɛ da nya, konɛ nyɛɛ je mi.

Yohane 17:15

I kpa we pɛɛ ke o je mɛ kɛ je je ɔ mi; se mohu i ngɛ pɛɛ kpae nɛ o bu a he kɛ je nɔ yayami ɔ dɛ mi.

Mateo 26:41

Nyɛɛ fɔ nyɔ nɛ nyɛɛ sɔle, konɛ nyɛ ko sɛ ka mi. Mumi ɔ lɛɛ e suɔ kaa e maa pee jã, se he lo ɔ gbede.”

Kpojemi 19:1

Enɛ ɔ se ɔ, i nu nɛ nɔ́ ko ngɛ pɛe ngɛ hiɔwe boboobo kaa nihi babauu a gbi ke, “A je Mawu yi! Mawu ji wa yi wami helɔ! E je agbo, nɛ e ngɛ he wami!

2 Tesalonikabi 3:3

Se Nyɔmtsɛ ɔ yeɔ anɔkuale. E maa wo nyɛ he wami, nɛ e maa bu nyɛ he, nɛ dikalɔ ɔ be nyɛe maa pee nyɛ nɔ́ ko.

Mateo 6:10

O Matsɛ yemi ɔ nɛ ba; a pee nɔ́ nɛ o suɔ ngɛ zugba a nɔ kaa bɔ nɛ a peeɔ ngɛ hiɔwe ɔ.

Yeremia 15:21

Ma je mo kɛ je yiwutsotsɛmɛ, kɛ nimli yayamihi a dɛ mi. Imi, Yawɛ lɛ i de.”

2 Petro 2:9

Lɔ ɔ he ɔ, Nyɔmtsɛ ɔ le bɔ nɛ e peeɔ nɛ e jeɔ nimli kpakpahi kɛ jeɔ ka mi. E le bɔ nɛ e peeɔ kɛ hii nimli yayamihi a tue gblae hluu kɛ yaa su kojomi ligbi ɔ tɔɔ.

1 Tesalonikabi 1:10

Mawu Bi Yesu ɔ nɛ Mawu tle lɛ si kɛ je gbeje ɔ, a tsɔɔ kaa nyɛ ngɛ lɛ blɔ hyɛe kaa e maa je hiɔwe kɛ ba ekohu. Lɛ ji nɔ nɛ ma je wɔ kɛ je tue gblami nɛ ma a mi.

La 47:7

Ejakaa Mawu ji matsɛ nɛ yeɔ je ɔ tsuo nɔ. Nyɛ la yi jemi la ha lɛ.

Kronika I, 29:11

O kle, o ngɛ he wami, kɛ hɛ mi nyami; o yeɔ kunimi, nɛ o yeɔ matsɛ. Nɔ́ tsuaa nɔ́ nɛ ngɛ hiɔwe kɛ zugba a, o nɔ́. Matsɛ ji mo, nɛ o yeɔ nɔ́ tsuaa nɔ́ nɔ.

Kpojemi 21:4

Mawu ma tsu a hɛ mi vo nyu tsuo. Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu. Ejakaa ní momo ɔmɛ a se po.”

La 10:16

Yawɛ ji matsɛ kɛ je neneene kɛ yaa neneene. Je ma amɛ gbo ta e zugba a nɔ.

Kpojemi 3:10

I wo mo mlaa ke o to o tsui si ngɛ nɔ́ nami mi; nɛ o ye nɔ. Enɛ ɔ he je ɔ, amanehlu nguaa a nɛ ma je ɔ tsuo nɔ ɔ, ke be ɔ su ɔ, imi hu ma ha nɛ o maa ye o he. Ee, a kɛ amanehlu nɛ ɔ maa ka nihi tsuo ngɛ je ɔ mi.

1 Yohane 3:8

Nɔ nɛ peeɔ yayami lɛɛ Abosiami bi ji lɛ, ejakaa kɛ je sisije tɔɔ nɛ Abosiami bɔni yayami peemi. Enɛ ɔ he tutuutu nɛ Mawu Bi ɔ ba a nɛ, konɛ níhi nɛ Abosiami tsu ɔ, e ba kpata lɛ tsuo hɛ mi.

1 Petro 5:8

Nyɛ hɛ nɛ ka si; nyɛɛ pee klaalo! Nyɛ he nyɛlɔ, Abosiami ɔ ngɛ nyɛɛe kɛ ngɛ yae kɛ ngɛ bae kaa jata nɛ ngɛ huae, nɛ ngɛ nɔ ko hlae nɛ e tsɔtslɔɔ e mi.

La 41:13

A je Yawɛ, Israel Mawu ɔ yi! A je e yi mwɔnɛ nɛ ɔ; a je e yi daa. Amen!

Kronika I, 16:36

Nyɛ je Yawɛ yi; nyɛ je Israel Mawu ɔ yi! Nyɛ je e yi mwɔnɛ ɔ, kɛ daa! Kɛkɛ nɛ ma a tsuo he nɔ ke, “Amen”, nɛ a je Yawɛ yi.

Kronika I, 4:10

Se Yabez fa kue ha Israel Mawu ɔ ke, “Mawu, i kpa mo pɛɛ nɛ o gbaa mi, nɛ o ha mi zugba nɛ kle. O kɛ mi nɛ hi si, nɛ o je ní yayamihi nɛ maa pee haomi kɛ je ye blɔ mi.” Nɛ Mawu ha lɛ nɔ́ nɛ e bi lɛ ɔ.

Mose V, 8:16

Ngɛ nga a nɔ ɔ, e ha nyɛ mana, niye ní nɛ nyɛ nɛmɛ yi hyɛ, nɛ nyɛ ye. E ha nyɛ na hɛdo ní, nɛ e kɛ ka nyɛ hyɛ, konɛ lɔ ɔ se ɔ, e gbaa nyɛ kɛ ní kpakpahi.

Mose II, 15:18

Yawɛ maa ye matsɛ kɛ maa ya neneene.”

Mose I, 22:1

Pee se ɔ, Mawu ka Abraham. Mawu tsɛ Abraham ke, “Abraham!” Nɛ Abraham he nɔ ke, “Ne mi!”

Galatabi 1:4

Yesu Kristo ngɔ e he ngɔ ha ngɛ wa he yayami ɔmɛ a he, konɛ a je wɔ kɛ je yi nɔ nɛ ɔ yi wu tso ní peemi ɔmɛ a mi. Enɛ ɔ ji wa Mawu, kɛ wa Tsɛ ɔ suɔmi nya ní.

2 Korintobi 1:20

Ejakaa níhi tsuo nɛ Mawu woɔ he si ɔ, e yeɔ nɔ kɛ guu Yesu Kristo nɔ. Enɛ ɔ he nɛ wa deɔ “Amen” ngɛ Yesu biɛ mi kɛ woɔ Mawu hɛ mi nyami ɔ nɛ.

La 47:2

Yawɛ, nɔ nɛ ngɛ hiɔwe lokoo ɔ he ngɛ gbeye. Matsɛ kpetekpleenyɛ nɛ yeɔ je ɔ tsuo nɔ ji lɛ.

Mose IV, 5:22

Nyu nɛ ɔ nɛ kɛ gbiɛmi baa nɔ nɔ ɔ, e sɛ o mi mi, nɛ e ha nɛ o mi nɛ fu, nɛ o mi si nɛ nɔ mi.’ Kɛkɛ, yo ɔ ma he nɔ ke, ‘E ba mi! E ba mi!’

Kpojemi 2:10

Koo ye amanehlu nɛ ma o nɔ ɔ gbeye! Hyɛ! Abosiami miɔ nɛ e maa wo nyɛ ti ni komɛ tsu, konɛ a kɛ ka nyɛ; nɛ nyɛ maa na nɔ́ ligbi nyɔngma. Ye mi anɔkuale kɛ yaa si gbenɔ mi tete po, nɛ ma ha mo wami kaa kunimi nɛ o ye ɔ he jlasi.

Kpojemi 1:18

Imi ji hɛ kalɔ ɔ! I gbo, se hyɛ, ye hɛ ngɛ kɛ yaa neneene. I ngɛ gbenɔ kɛ gbeje a nya safe.

Mateo 5:37

Ke nɔ́ ɔ ngɛ mi ɔ, nɔ́ nɛ kɛkɛ nɛ o ma de ji, ‘Ee’; ke e be mi ɔ, de ke, ‘Dɛbi’. Ke nɔ́ kpa ko piɛ he ɔ lɛɛ Abosiami dɛ mi e je.

Daniel 4:25

A maa fie mo kɛ je nimlihi a kpɛti, nɛ o kɛ pu mi lohwehi ma ya hi si. O ma kpe nga kaa na, nɛ bɔ́ maa nɛɛ mo jeha kpaago. Jamɛ a be ɔ mi loko o maa le kaa Mawu nɛ ngɛ hiɔwe lokoo ɔ ngɛ he wami ngɛ nimli adesahi a matsɛ yemi nɔ, nɛ e ngɔɔ kɛ haa nɔ tsuaa nɔ nɛ e suɔ.

Abɛ Womi 30:8

Hyɛ nɛ ma ko ye lakpa. Ko ha nɛ ma ná ní kpɔtɔɔ, nɛ ko ha nɛ ma ye ohia hulɔ; niye ní nɛ maa su mi ɔ, lɔ ɔ pɛ o ha mi.

Mose V, 8:2

Nyɛ kai kaa Yawɛ, nyɛ Mawu ɔ kpaka nyɛ ngɛ blɔ gagaa nɛ ɔ nɔ kɛ gu nga kplanaa a nɔ jeha nyingmi eywiɛ sɔuu. E ha hɛdo níhi kɛ nyɛ kpe kɛ ka nyɛ hyɛ, konɛ e kɛ le nɔ́ nɛ ngɛ nyɛ tsui mi, kaa nyɛ maa ye e mlaa amɛ a nɔ, loo nyɛ be a nɔ yee.

1 Korintobi 14:16

Ke o ngɛ Mawu si nae ngɛ mumi mi kɛkɛ ɔ, nɔ ko nɛ hii si ngɛ lejɛ ɔ, nɛ lɛɛ e li mi eko ɔ, kɛ e maa pee kɛɛ nɛ e ma de “Amen” ngɔ si o sina sɔlemi ɔ nɔ? Blɔ ko blɔ ko be nɛ e kɛ maa le nɔ́ nɛ o ngɛ dee ɔ.

Mateo 28:20

nɛ nyɛɛ tsɔɔ mɛ nɛ a ye níhi tsuo nɛ i fa nyɛ ke nyɛɛ pee ɔ a nɔ. Hyɛ, i kɛ nyɛ maa hi si daa kɛ yaa su je mi nyagbe.”

Daniel 7:18

Se nyagbe ɔ, Hiɔwe No ɔ we ni klɔuklɔu ɔmɛ a nine maa su matsɛ yemi ɔ nɔ, nɛ a maa ye matsɛ kɛ maa ya neneene.”

La 106:48

Nyɛ je Yawɛ, Israel Mawu ɔ yi; nyɛ je e yi kɛ je neneene kɛ ya neneene. Nyɛ ha nɛ ma a tsuo nɛ de ke, “Amen!” Nyɛ je Yawɛ yi.

La 89:52

A je Yawɛ yi daa. Amen! Amen!

La 72:19

A je e biɛ klɔuklɔu ɔ yi kɛ ya neneene! A wo e hɛ mi nyami ngɛ je ɔ mi tsuo! Amen! Amen!

Matsɛmɛ I, 1:36

Yehoyada bi Benaya he nɔ ke, “Yawɛ, o Mawu ɔ gbi ji nɛ ɔ nɛ. Wa maa pee kaa bɔ nɛ o de ɔ.

Kpojemi 19:4

Kɛkɛ nɛ nikɔtɔma nyingmi enyɔ kɛ eywiɛ ɔmɛ, kɛ hɛ kali eywiɛ ɔmɛ ngɔ a hɛ mi ngɔ bu si nɛ a ja Mawu nɛ hii si ngɛ e matsɛ sɛ ɔ nɔ ɔ, nɛ a de ke, “Amen! A je Mawu yi!”

Kpojemi 5:13

Nɛ i nu nɛ nibɔ níhi tsuo ngɛ hiɔwe, zugba a, kɛ zugba a sisi, kɛ wo mi, kɛ níhi tsuo nɛ ngɛ lejɛ ɔ ngɛ dee ke, “Nɔ nɛ hii si ngɛ matsɛ sɛ ɔ nɔ, kɛ To bi ɔ nɛ wa maa ngɔ yi jemi, agboje, kɛ hɛ mi nyami kɛ ha kɛ je neneene kɛ ya neneene.”

Kpojemi 3:14

Bɔfo ɔ nɛ ngɛ asafo ɔ nya ngɛ Laodikea a, ngmaa womi nɛ ɔ ya ha lɛ ke, “Sɛ gbi nɛ je Amen, odase ɔ nɛ yeɔ anɔkuale ɔ ngɔ ji nɛ ɔ nɛ. Lɛ ji níhi tsuo nɛ Mawu bɔ ɔ sisije.

Hebribi 11:36

A ye ni komɛ a he fɛu; a fia ni komɛ kpa, nɛ ni komɛ lɛɛ a bɔ mɛ pã, nɛ a wo mɛ tsu.

1 Timoteo 1:17

Mawu kake too, Neneene Matsɛ, nɔ nɛ ngɛ daa nɛ a nɛ lɛ ɔ, a je e yi, nɛ a wo e hɛ mi nyami kɛ ya neneene! Amen.

Yeremia 28:6

“Saminya! Yawɛ nɛ pee nɔ́ nɛ ɔ. Gbami nɛ o gba a, Yawɛ nɛ ha nɛ e ba mi, konɛ Yawɛ we ɔ juetli tsuo nɛ a muɔ kɛ ho Babilonia ya, kɛ nihi tsuo nɛ a nuu kɛ ho ɔ, e kpale mɛ kɛ ba hiɛ ɔ ekohu.

La 22:28

Yawɛ ji matsɛ; lɛ nɛ e yeɔ je ma amɛ a nɔ.