Mateo 13:44 - BAIBLO ALOO NGMAMI KLƆUKLƆU Ɔ

⁴⁴ “Hiɔwe matsɛ yemi ɔ ngɛ kaa kikɛ nɛ ɔ: Nyumu ko ya na juetli ngɛ zugba ko mi. Benɛ e na juetli ɔ, e ngɔ laa ekohu. Bua jɔmi sɔuu nɛ e na he je ɔ, e ho nɛ e ya jua níhi tsuo nɛ e ngɛ ɔ, nɛ e kɛ he jamɛ a ngmɔ ɔ.

Somi He Ɔ

⁴⁴ “Jeha nɛ ɔ hu, hiɔwe matsɛ yemi ɔ ngɛ kaa juetli nɛ a kɛ laa ngɛ ngmɔ mi, nɛ benɛ nɔ ko ya na a, e ngɔ laa, nɛ lɔ ɔ he bua jɔmi nɛ e na a he je ɔ e ho nɛ e ya jua nihi tsuo nɛ e ngɛ ɔ, nɛ e kɛ he jamɛ a ngmɔ ɔ.”

Mateo 13:44 ပူးပေါင်းရင်းမြစ်များ

Kolosebi 2:3

Nile, kɛ juɛmi nɛ mi kuɔ ɔ, Kristo mi a naa ngɛ.

Luka 14:33

Yesu gbe nya ke, “Jã kɛ̃, ke nɔ ko suɔ kaa e pee ye kaselɔ ɔ, ja e si níhi tsuo nɛ e ngɛ ɔ.

Mateo 6:21

Ejakaa he nɛ o juetli ngɛ ɔ, lejɛ ɔ o tsui hu maa hi.

Mateo 19:29

Nɔ tsuaa nɔ nɛ ma si wehi, loo nyɛminyumuhi, loo nyɛmiyihi, loo e tsɛ, loo e nyɛ, loo bimɛ, loo zugba ngɛ ye he ɔ, a maa to lɛ nane mi totoe lafa, nɛ a ma ha lɛ neneene wami.

Abɛ Womi 16:16

Ke o le ní ɔ, e hi hluu pe sika tsu; juɛmi hi pe sika hiɔ.

Abɛ Womi 23:23

Anɔkuale yemi, nile, tsɔsemi, kɛ sane se kɔmi a he jua wa saminya; e sa kaa a di se nɛ a ko ngmɛɛ he.

Kpojemi 3:18

Lɔ ɔ he ɔ, i ngɛ mo ga woe nɛ o ba he sika tsu ngɛ ye dɛ; ee, ba he sika tsu ngmingmiingmi ngɛ ye dɛ, konɛ o na ní. He ní hiɔ hu nɛ o wo, nɛ a ko na kaa o hɛɛ o he gu, ejakaa e ngɛ zo. Jehanɛ, he tsopa nɛ o nga ngɔ pue o hɛngmɛ nɔ, konɛ o hyɛ nɔ́.

Mateo 19:27

Kɛkɛ nɛ Petro tu munyu nɛ e de ke, “Hyɛ, wɔɔ lɛɛ wa si nɔ́ tsuaa nɔ́, nɛ wa ba nyɛɛ o se. Mɛni wa ma na mɔ?”

Mateo 19:21

Yesu de lɛ ke, “Ke o ngɛ hlae nɛ o hi kɛ pi si ɔ, yaa nɛ o ya jua níhi nɛ o ngɛ ɔ, nɛ o ngɔ sika a kɛ ha ohiatsɛmɛ, nɛ o ma na juetli ngɛ hiɔwe. Kɛkɛ ɔ, kpale kɛ ba nɛ o ba nyɛɛ ye se.”

Yesaya 55:1

Yawɛ ke, “Kuuwi, nyɛ nihi tsuo nɛ kuma ngɛ nyɛ yee, nyu babaaba ngɛ hiɛ ɔ ha nyɛ! Nyɛ nihi nɛ nyɛ be sika hu, nyɛɛ ba; nyɛ ba he niye ní nɛ nyɛɛ ye! Nyɛɛ ba nyɛ ba he dã, kɛ na nyɔ nyu e hia we sika; a jua we!

Romabi 15:4

Nɔ́ tsuaa nɔ́ nɛ ngɛ ngmami ɔmɛ a mi ɔ, a ngma konɛ a kɛ tsɔɔ wɔ ní. Kɛkɛ ɔ, ngmami ɔmɛ ma ha wa maa to wa tsui si; nɛ a maa wo wɔ he wami nɛ wa na hɛ kɛ nɔ fɔmi.

Mateo 13:24

Yesu bu mɛ abɛ kpa ko hu ke, “Hiɔwe matsɛ yemi ɔ ngɛ kaa kikɛ nɛ ɔ. Nyumu ko du wu kpakpa ngɛ e ngmɔ mi.

Hebribi 10:34

Niinɛ, nyɛ mi mi sã nyɛ ngɛ nihi nɛ a wo mɛ tsu ɔ a he; nɛ benɛ a ngɛ nyɛ níhi tsuo kpɔe ngɛ nyɛ dɛ pani nya a, nyɛɛ kɛ bua jɔmi ngmɛɛ he ha mɛ faa. Ejakaa nyɛ le kaa nɔ́ nɛ nyɛ nine su nɔ ɔ hi kulaa pe lɔ ɔmɛ, nɛ e ngɛ kɛ yaa neneene hulɔ.

Yohane 6:35

Yesu de mɛ ke, “Imi ji abolo nɛ haa nɔ wami ɔ nɛ. Ke nɔ ko ba ye ngɔ ɔ, hwɔ be lɛ yee gblegbleegble; nɛ nɔ nɛ he mi ye ɔ, kuma be lɛ yee gblegbleegble.

Abɛ Womi 17:16

Mɛni se kuasia ma na ke e maa hɛɛ sika kɛ ya he nile, be mi nɛ e be juɛmi?

Kolosebi 3:16

Nyɛ ha nɛ Kristo sɛ gbi ɔ nɛ hyi nyɛ fuu. Nyɛɛ tsɔɔ nyɛ he ní, nɛ nyɛɛ wo nyɛ sibi ga kɛ juɛmi nɛ mi kuɔ. Nyɛ la La womi ɔ mi lahi, yi jemi lahi, kɛ mumi mi lahi kɛ je nyɛ tsui mi nɛ nyɛ kɛ na Mawu si.

Abɛ Womi 18:1

Nihi nɛ suɔ mɛ nitsɛmɛ a he ɔ, a kɛ nɔ kpa pee we nɔ́ ko. Nɔ́ ko nɛ nihi tsuo le kaa e hi ɔ, mɛɛ lɛɛ a deɔ ke e hí.

Hiob 28:13

A nɛ nile ngɛ nimli a kpɛti. Nɔ ko nɔ ko li bɔ nɛ e he jua wa ha.

Mateo 13:46

Benɛ e ya na adiagba saminyayoo kake nɛ he jua wa a, e ho nɛ e ya jua níhi tsuo nɛ e ngɛ ɔ, nɛ e kɛ he.

Mateo 13:47

“Hiɔwe matsɛ yemi ɔ ngɛ kaa kikɛ nɛ ɔ hulɔ. Wo hɛli komɛ fɔ ya ngɛ wo mi, nɛ a gbe lo slɔɔtohi babauu.