Mateo 12:28 - BAIBLO ALOO NGMAMI KLƆUKLƆU Ɔ

²⁸ Se imi lɛɛ ke Mawu Mumi ɔ lɛ haa mi he wami nɛ i kɛ hiaa mumi yayami ɔmɛ ɔ, e tsɔɔ kaa Mawu matsɛ yemi ɔ ba na nyɛ momo.

Somi He Ɔ

²⁸ Se ke imi lɛɛ, Mawu Mumi ɔ nya i hiaa mumi yayami ɔmɛ ngɛ ɔ, lɔ ɔ lɛɛ pe Mawu matsɛ yemi ɔ na nyɛ nɛ ɔ nɛ.

Mateo 12:28 ပူးပေါင်းရင်းမြစ်များ

Luka 11:20

Ee, Mawu he wami mohu i kɛ ngɛ mumi yayami ɔmɛ hiae ɔ nɛ; nɛ nɔ́ nɛ ɔ tsɔɔ kaa Mawu bɔni matsɛ yemi ngɛ nyɛ nɔ momo.

Daniel 7:14

A ngɔ he wami, hɛ mi nyami, kɛ matsɛ yemi ngɔ wo e dɛ, konɛ je ma amɛ, kɛ nihi nɛ tuɔ gbi slɔɔtoslɔɔto ɔmɛ nɛ a sɔmɔ lɛ. E he wami ɔ maa hi si kɛ maa ya neneene, nɛ e matsɛ yemi ɔ se be poe gblegbleegble.

Mateo 21:43

Yesu ya nɔ nɛ e de mɛ ke, “Lɔ ɔ he ɔ, i ngɛ nyɛ dee ke, a ma kpɔ Mawu matsɛ yemi ɔ ngɛ nyɛ dɛ, nɛ a kɛ ma ha ma je li a ma ko nɛ maa wo yiblii bɔ nɛ sa.” [

Mateo 6:33

Se nyɛ hla Mawu matsɛ yemi ɔ, kɛ níhi nɛ da ngɛ e hɛ mi ɔ kekle, nɛ a kɛ ní nɛ ɔmɛ tsuo maa piɛ he ngɔ ha nyɛ.

Ni Tsumi 10:38

Nyɛ le Yesu nɛ je Nazaret ɔ he sane, bɔ nɛ Mawu hla lɛ, nɛ e ha nɛ Mumi Klɔuklɔu ɔ he wami ɔ ba e nɔ. Nyɛ le bɔ nɛ e kpa si kɛ ya he tsuaa he kɛ kpakpa peemi. E tsa hiɔtsɛmɛ, nɛ e hia mumi yayamihi hulɔ; ejakaa Mawu kɛ lɛ ngɛ.

Kolosebi 1:13

E kpɔ wɔ kɛ je diblii he wami ɔ sisi, nɛ e kɛ wɔ ba e Bi nɛ e suɔ lɛ saminya a matsɛ yemi ɔ mi.

Romabi 14:17

Ejakaa Mawu matsɛ yemi ɔ, pi nɔ́ nɛ a maa ye, loo nɔ́ nɛ a maa nu; se mohu kaa a pee nɔ́ nɛ da, nɛ a hi si ngɛ he jɔmi mi, nɛ a na bua jɔmi. Mumi Klɔuklɔu ɔ lɛ haa ní nɛ ɔmɛ tsuo.

Luka 16:16

“Mose mlaa a, kɛ níhi nɛ gbali ɔmɛ ngma a tsu ní kɛ ya si Yohane nɔ sɔlelɔ ɔ yi nɔ. Kɛ je jamɛ a be ɔ, sane kpakpa a nɛ kɔɔ Mawu matsɛ yemi ɔ he ɔ, lɔ ɔ nɛ a ngɛ fiɛe. Nɛ nɔ tsuaa nɔ ngɔ e he kɛ ngɛ mi woe kã nya.

Marko 1:15

E ke, “Be ɔ su; Mawu matsɛ yemi ɔ ná nyɛ haa! Nyɛɛ kpale kɛ je nyɛ he yayami ɔmɛ a he, nɛ nyɛ he sane kpakpa a nyɛɛ ye.”

Mateo 21:31

Lɔ ɔ he ɔ, ni enyɔ nɛ ɔmɛ a kpɛti mɛnɔ lɛ pee nɔ́ nɛ a tsɛ ɔ suɔ?” A he nɔ ke, “Nɔkɔtɔma a.” Yesu de mɛ ke, “Niinɛ, i ngɛ nyɛ dee ke, tó tsuli ɔmɛ, kɛ ajuama amɛ sɛ nyɛ hlami kɛ yaa Mawu matsɛ yemi ɔ mi.

Luka 9:2

Kɛkɛ nɛ e tsɔ mɛ ke a ho nɛ a ya fiɛ Mawu matsɛ yemi ɔ he munyu ɔ, nɛ a tsa hiɔtsɛmɛ.

Marko 16:17

Ni nɛmɛ nɛ ma he ye ɔ, a ma ha mɛ he wami nɛ a kɛ maa pee nyakpɛ ní nɛ ɔmɛ: a maa hia mumi yayamihi ngɛ ye biɛ mi; a maa tu munyu ngɛ gbi kpahi a mi;

Daniel 2:44

Matsɛmɛ nɛ ɔmɛ a yi nɔ ɔ, Mawu nɛ ngɛ hiɔwe ɔ maa to matsɛ yemi ko sisi, nɛ e se be poe gblegbleegble. Matsɛ yemi nɛ ɔ, nɔ ko nɔ ko be nyɛe maa ye e nɔ; e ma kpata matsɛ yemi kpa amɛ tsuo a hɛ mi, nɛ e maa hi si kɛ maa ya neneene.

Hebribi 12:28

Lɔ ɔ he ɔ, nyɛ ha waa na Mawu si, ejakaa e ha wɔ blɔ nya nɛ waa ye tsɛ nɛ be tsakee gblegbleegble. Nyɛ ha waa ngɔ bu, kɛ gbeye yemi kɛ ba ja lɛ kɛ wa tsui tsuo bɔ nɛ maa sa e hɛ mi;

Luka 10:11

‘Nyɛ ma nɛ ɔ mi bunyuku tete nɛ ngɛ wa nane he ɔ, wa ngɛ blɛe kɛ ngɛ nyɛ nɔ puee. Se kɛ̃ ɔ, nyɛ na nɛ nyɛɛ le kaa Mawu matsɛ yemi ɔ na nyɛ ta!’

Marko 11:10

A gbaa wa tsɛ David matsɛ yemi nɛ ma a! Mo kpɔ wɔ! Mo Hiɔwe No!”

Mateo 12:18

“Hyɛ, ye tsɔlɔ nɛ i hla a ji nɛ ɔ nɛ; i suɔ lɛ, nɛ i naa e he tsui. Ma ngɔ ye mumi ɔ kɛ wo e mi, nɛ tue gblami nɛ i to ha ma je li ɔmɛ ɔ, e maa fiɛ kɛ tsɔɔ mɛ.

Mateo 4:24

Yesu he sane gbɛ fĩa Siria zugba a tsuo nɔ; nɛ a ngɔ hiɔtsɛmɛ, kɛ nihi nɛ ngɛ haomi slɔɔtohi a mi kɛ ba e ngɔ, nɛ e tsa mɛ: kɔkɔtsɛmɛ, hulemi hiɔtsɛmɛ, kɛ nihi nɛ mumi yayamihi ngɛ a mi.

Mateo 12:29

“Kɛ nɔ ko ma plɛ kɛ sɛ nɔ nɛ he wa we mi nɛ e ya ju kɛɛ? Ja e fi nɔmlɔ nɛ he wa nɛ ɔ kekle, loko e ma nyɛ ya ju ngɛ e we ɔ mi.

1 Yohane 3:8

Nɔ nɛ peeɔ yayami lɛɛ Abosiami bi ji lɛ, ejakaa kɛ je sisije tɔɔ nɛ Abosiami bɔni yayami peemi. Enɛ ɔ he tutuutu nɛ Mawu Bi ɔ ba a nɛ, konɛ níhi nɛ Abosiami tsu ɔ, e ba kpata lɛ tsuo hɛ mi.