Marko 10:24 - BAIBLO ALOO NGMAMI KLƆUKLƆU Ɔ

²⁴ Nɛ e de kikɛ nɛ ɔ, e kaseli ɔmɛ a he mi po. Se Yesu ya nɔ nɛ e de mɛ ke “Ye bimɛ, tse nyɛ na bɔ nɛ e wa ha nɔ ko nɛ ngɔɔ e hɛ ngɔ fɔɔ sika nɔ kaa e maa sɛ Mawu matsɛ yemi ɔ mi.

Somi He Ɔ

²⁴ Kaseli ɔmɛ a he mi po ngɛ e munyu ɔmɛ a he. Se Yesu tsa nɔ nɛ e de mɛ ke: “Bimɛ, tse nyɛ na bɔ nɛ e wa ha nihi nɛ ngɔɔ a hɛ ngɔ fɔɔ a nihi a nɔ ɔ kaa a maa sɛ Mawu matsɛ yemi ɔ mi!

Marko 10:24 ပူးပေါင်းရင်းမြစ်များ

La 17:14

Jé mi kɛ je nihi nɛ ná je nɛ ɔ mi níhi tsuo nɛ a ngɛ hlae ɔ a dɛ mi. Ngɔɔ haomihi nɛ o ngɔ to ha mɛ ɔ kɛ gbla a tue. Ha nɛ a bimɛ ba na haomi ɔ bɔ nɛ sa, nɛ eko nɛ piɛ ha a bibimɛ.

La 52:7

“Hyɛ, nyumu nɛ ɔ ngɔɛ e hɛ kɛ fɔɛ Mawu nɔ kaa e he bulɔ, mohu ɔ, ní babauu nɛ e na a nɔ e ngɔ e hɛ kɛ fɔ, nɛ yi wu tso níhi nɛ e pee ɔ nɛ wo lɛ he wami.”

La 62:10

Nyɛ ko ngɔ nyɛ hɛ kɛ fɔ amimi yemi nɔ; nyɛ ko hyɛ blɔ kaa nyɛ ma na nɔ́ kpakpa ko kɛ je ojo fiami mi. Ke nyɛ ba na ní babauu po, nyɛ ko ngɔ nyɛ hɛ kɛ fɔ nɔ.

Abɛ Womi 11:28

Nihi nɛ ngɔɔ a hɛ kɛ fɔɔ ní nami nɔ ɔ, a hɛ mi ma kpata. Ni nɛmɛ nɛ peeɔ nɔ́ nɛ da a, mɛɛ lɛɛ a maa bɔ kaa ba mumu.

Abɛ Womi 18:11

Niatsɛmɛ susuɔ kaa ke a na ní ɔ, e haa mɛ bua jɔmi, kaa bɔ nɛ ke a fia gbogbo kɛ wo ma he nɛ ma mi bi ɔmɛ naa he jɔmi ɔ.

Abɛ Womi 23:5

Hɛngmɛfia pɛ sika a ma nyɛ laa mo; e maa pee kɔɔhiɔ nɛ e maa laa tlukaa kaa kɔle tee kɛ yaa hiɔwe.

Yeremia 9:23

Yawɛ ke, “Ní lelɔ nɛ ko fĩa kɛ fɔ e nile nɔ, nɔ nɛ ngɛ he wami ɔ, e ko fĩa kɛ fɔ e he wami nɔ, niatsɛ nɛ ko fĩa kɛ fɔ e níhi a nɔ.

Habakuk 2:9

Mo nɛ o kɛ yi wu tso kpɔ nihi a níhi kɛ ha o weku li, nɛ o hla kaa haomi kɛ nyagba kó ba o we mi ɔ, musu tloo mo!

Zefania 1:18

Ligbi ɔ nɛ Yawɛ ma je e mi mi fumi ɔ kpo ɔ, nɔ́ ko nɔ́ ko be nyɛe ma he ma a yi wami: sika hiɔ jio, sika tsu jio. E kɛ e mi mi fumi ɔ ma kpata je ɔ tsuo hɛ mi kaa bɔ nɛ la sãã nɔ́ ɔ. E maa gbe níhi tsuo ngɛ je ɔ mi si kake too.

Mateo 19:25

Benɛ kaseli ɔmɛ nu enɛ ɔ, a he mi po, nɛ a bi ke, “Lɛɛ mɛnɔ po yi wami a ma nyɛ he mɔ?”

Marko 1:27

Ni ɔmɛ tsuo nɛ ngɛ kpe he ɔ, a he mi po, nɛ a bɔni a he bimi ke, “Mɛni ji nɛ ɔ? Tsɔɔmi he ko lo? Nɛ he wumi hu ngɛ mi. Nɔmlɔ nɛ ɔ ngɛ he wami nɛ e kɛ ngaa mumi yayamihi a yi nɛ a buɔ lɛ tue!”

Marko 10:23

Yesu hyɛ e kaseli ɔmɛ a hɛ mi kɛ kpe, nɛ e de mɛ ke, “Nyɛ na bɔ nɛ e wa ha niatsɛmɛ kaa a maa ba Mawu matsɛ yemi ɔ mi!”

Luka 16:14

Benɛ Farisi bi ɔmɛ nu ní nɛ ɔmɛ tsuo ɔ, a ye Yesu he fɛu, ejakaa a suɔ sika.

Yohane 13:33

Ye bimɛ, be nɛ i kɛ nyɛ maa hi si kɛ yaa si ɔ pi saasaa. Nyɛ ma hla mi, se kaa bɔ nɛ i de Yuda ma nimeli ɔmɛ ɔ, ‘He nɛ i yaa a, nyɛ be nyɛe maa ba.’

Yohane 21:5

E bi mɛ ke, “Ye bimɛ, nyɛ ná nɔ́ ko lo?” A he nɔ ke, “Dɛbi, wa nɛ́ nɔ́ ko nɔ́ ko.”

Yohane 6:60

Yesu se nyɛɛli ɔmɛ a ti nihi babauu nɛ nu nɔ́ nɛ ɔ, de ke, “Ei! Tsɔɔmi nɛ ɔ he wa lo! Mɛnɔ maa nu sisi.”

Galatabi 4:19

Ye bimɛ nɛ i suɔ, nyɛɛ hyɛ bɔ nɛ i ngɛ haoe ngɛ nyɛ he ekohu kaa yo nɛ nu kɔɔmi, hluu kɛ yaa su be nɛ a maa na subai nɛ ngɛ Kristo mi ɔ ngɛ nyɛ mi.

1 Timoteo 6:17

Niatsɛmɛ nɛ ngɛ nyɛ kpɛti ɔ, nyɛɛ a nɔ nɛ a ko wo a he nɔ. Á ko ngɔ a hɛ ngɔ fɔ ní nɛ a na a nɔ, ejakaa ní nami se maa po. Á ngɔ a hɛ ngɔ fɔ Mawu mohu nɔ. Lɛ nɛ e haa wɔ ní kpakpahi babauu nɛ wa yeɔ faa.

1 Yohane 2:1

Ye bimɛ tsɔwi, i ngɛ nyɛ womi nɛ ɔ ngmae, konɛ nyɛ ko pee yayami. Se ke nɔ ko pee yayami pohu ɔ, wa ngɛ nɔ nɛ daa mi kɛ haa wɔ ngɛ Tsɛ ɔ ngɔ. Lɛ ji Yesu Kristo, nɔ nɛ peeɔ nɔ́ nɛ da a.

1 Yohane 4:4

Bimɛ tsɔwi, nyɛɛ lɛɛ Mawu níhi ji nyɛ, nɛ nyɛ ye lakpa gbali ɔmɛ a nɔ kunimi. Ejakaa mumi nɛ ngɛ nyɛ mi ɔ, e he wa kulaa pe mumi nɛ ngɛ ni nɛmɛ nɛ a kɛ je ɔ ngɛ bɔe ɔ a mi.

1 Yohane 5:21

Ye bimɛ nɛ i suɔ! Nyɛɛ hyɛ nyɛ he nɛ hi ngɛ amagahi a he!

Kpojemi 3:17

O deɔ ke, ‘I na ní kpɔtɔɔ; i plɔke, nɛ nɔ́ ko nɔ́ ko hia we mi!’ Se o li tete kaa o ngɛ dengme mi, nɛ o ní ngɛ mɔbɔ! O li kaa ohiatsɛ ji mo! O li kaa o hɛɛ o he gu, nɛ o hɛngmɛ hu yu!