Malaki 2:10 - BAIBLO ALOO NGMAMI KLƆUKLƆU Ɔ

¹⁰ Anɛ pi tsɛ kake too nɛ wɔ tsuo wa ngɛ lo? Anɛ pi Mawu kake too ɔ nɛ bɔ wɔ tsuo lo? Mɛni he je mɔ nɛ wa yi wa nyɛmimɛ anɔkuale ɔ? Somi ɔ nɛ Mawu kɛ wa nɛmɛ ɔmɛ so ɔ, mɛni he je wa yi nɔ ɔ?

Malaki 2:10 ပူးပေါင်းရင်းမြစ်များ

Nehemia 13:29

Ye Mawu, mo kai bɔ nɛ jamɛ a ni ɔmɛ ble osɔfo yemi, kɛ somi nɛ o kɛ osɔfo ɔmɛ, kɛ Levi bi ɔmɛ so ɔ hulɔ.

Hiob 31:15

Mawu ɔ nɛ bɔ mi ɔ, lɛ kɛ̃ lɛ e bɔ ye tsɔli nyumu ɔmɛ, kɛ ye mawayi ɔmɛ.

La 100:3

Nyɛ na nyɛɛ le kaa Yawɛ ji Mawu. Lɛ nɛ e bɔ wɔ; e níhi ji wɔ. E ma ji wɔ; wa ngɛ kaa tohi nɛ e ngɛ lɛe.

Mose II, 19:4

“Nyɛ nitsɛmɛ nyɛ na nɔ́ nɛ i pee Egipt bi ɔmɛ, kɛ bɔ nɛ i kɛ he wami je nyɛ kɛ je Egipt kaa nɔ́ nɛ kɔle pɛli nɔ nɛ nyɛ hii si ngɛ, nɛ i ngɔ nyɛ kɛ ba imi nitsɛ ye ngɔ.

Mose II, 19:5

Lɔ ɔ he ɔ, ke nyɛ maa bu ye gbi tue, nɛ nyɛ maa ye ye somi ɔ nɔ ɔ, lɛɛ nyɛ maa pee imi nitsɛ ye ma titli pe ma amɛ kulaa; ejakaa je ɔ tsuo ye nɔ́ ji mɛ.

Mose II, 24:3

Mose ba nɛ e ba bɔ ma a nɔ́ tsuaa nɔ́ nɛ Yawɛ de lɛ ɔ, kɛ mlaa amɛ tsuo nɛ e wo ɔ. Ma a tsuo nya sɔ nɛ a de ke, “Nɔ́ tsuaa nɔ́ nɛ Yawɛ de wɔ ke waa pee ɔ, wa maa pee.”

Mose II, 24:7

Kɛkɛ nɛ e ngɔ somi womi ɔ, nɛ e kane kɛ ha ma a tsuo. Ma a he nɔ nɛ a de ke, “Wa maa bu Yawɛ tue; nɛ nɔ́ tsuaa nɔ́ nɛ e fa wɔ ke wa pee ɔ, wa maa pee.”

Yesaya 43:1

Se jehanɛ lɛɛ Israel, Yawɛ nɛ bɔ mo ɔ ngɛ mo dee ke, “Koo ye gbeye. Imi nitsɛ ma he o yi wami. O biɛ i ngɔ kɛ tsɛ mo ɔ nɛ; ye nɔ́ ji mo.

Yesaya 43:15

Imi ji Yawɛ Mawu klɔuklɔu ɔ nɛ. Israel, imi ji o bɔlɔ, kɛ o matsɛ.”

Yesaya 43:7

Imi nitsɛ ye ma ji mɛ; nɛ i bɔ mɛ, konɛ a wo ye hɛ mi nyami.’ ”

Yesaya 44:2

Imi ji Yawɛ nɛ bɔ mo ɔ nɛ; kɛ je be nɛ a fɔ mo kɛ ba su amlɔ nɛ ɔ, imi lɛ i baa o yi. Koo ye gbeye, ye tsɔlɔ ji mo, ye ma nɛ i hla nɛ i suɔ mo.

Yesaya 51:2

Nyɛ susu nyɛ nɛ̃, Abraham, kɛ Sara hu nɛ fɔ nyɛ ɔ a he. Benɛ i tsɛ Abraham ɔ, e be bi ko kulaa, se i gbaa lɛ, nɛ i ha lɛ bimɛ; nɛ i ha e nina hiɛ babauu.

Yesaya 63:16

Mo ji wa tsɛ. Wa nɛmɛ Abraham, kɛ Yakob li wɔ, se mo Yawɛ, wa tsɛ, mo ji wa kpɔlɔ kɛ je blema lokoo.

Yesaya 64:7

Nɔ ko nɔ ko be nɛ faa kue ha mo; nɛ nɔ ko nɔ ko ba bi we yemi kɛ buami kɛ ji o ngɔ. O ngɔ o hɛ mi kɛ laa wɔ. Wa yayami ɔmɛ ha nɛ o kua wɔ.

Yesaya 64:8

Se kɛ ɔ, Yawɛ, mo ji wa tsɛ. Wa ngɛ kaa zu, nɛ moo lɛɛ o ngɛ kaa buɛ puɛlɔ; mo lɛ o bɔ wɔ.

Yeremia 31:9

Ma kpale mɛ kɛ ba kɛ a hɛ mi ya, kɛ kue fami. Ma kpaka mɛ kɛ nyɛɛ pahi a tue ngɛ blɔ tlɔmɔɔ nɔ, konɛ a ko tɛ nɔ. I ngɛ kaa tsɛ kɛ ha Israel, nɛ Efraim ji ye kekleekle bi.”

Ezekiel 33:24

“Nɔmlɔ adesa, nihi nɛ ngɛ ma doku ɔmɛ a mi ngɛ Israel zugba a nɔ ɔ deɔ mi ke, ‘Abraham ɔ nɛ a ngɔ zugba a tsuo ngɔ ha lɛ ɔ, nɔ kake too ji lɛ, se wɔɔ lɛɛ wa he hiɛ; lɔ ɔ he ɔ, zugba a, wɔ a kɛ ha kaa wa weto ní.’

Malaki 1:6

Bɔ nɛ Yawɛ Tabohiatsɛ ɔ ngɛ osɔfo ɔmɛ dee ji nɛ ɔ nɛ: “Bi buu e tsɛ, nɛ tsɔlɔ hu buu e nyɔmtsɛ. Ke tsɛ ji mi ɔ, mɛni he je nyɛ bui mi mɔ? Nɛ ke nyɔmtsɛ ji mi ɔ, mɛni he je nyɛ yi mi gbeye? Nyɛ gbeɔ ye he guɛ, se kɛ̃ ɔ, nyɛ biɔ ke, ‘Kɛ wa plɛ kɛ gbe o he guɛ kɛɛ?’

Malaki 2:11

Si nɛ Yuda bi ɔmɛ wo Mawu ɔ, a yi nɔ; mohu ɔ, a tsu musu ní ngɛ Yerusalem, kɛ zugba a tsuo nɔ. A ble Yawɛ we ɔ nɛ e suɔ saminya a. Nyumu ɔmɛ ngɔ yihi nɛ jaa ma se mawuhi.

Malaki 2:8

“Se, nyɛ osɔfohi! Amlɔ nɛ ɔ, nyɛ gba kɛ je blɔ nɛ da a nɔ. Nyɛ ní tsɔɔmi ɔ ha nɛ nihi fuu a nane kpata. Somi ɔ nɛ i kɛ nyɛ so ɔ, nyɛ yi nɔ.

Mateo 10:21

“Nyɛmi maa ngɔ e nyɛmi ngɔ ha nɛ a ya gbe lɛ, nɛ tsɛmɛ hu maa ngɔ a bimɛ ngɔ ha ja nɔuu. Bimɛ maa te si ngɔ wo a fɔli, nɛ a ma ha nɛ a gbe mɛ.

Mateo 22:16

Kɛkɛ nɛ a tsɔ a kaseli ɔmɛ a ti ni komɛ, kɛ Herode we bi komɛ kɛ ba e ngɔ. A ba de lɛ ke, “Tsɔɔlɔ, wa le kaa anɔkualetsɛ ji mo. Bɔ nɛ Mawu suɔ kaa adesa nɛ hi si ɔ, o tsɔɔ pɛpɛɛpɛ nɛ o yi nɔ ko nɔ ko gbeye; ejakaa o hyɛ we nimli a hɛ mi.

Mateo 3:9

Nyɛ ko susu kaa ke nyɛ de kɛkɛ ke nyɛ nɛ̃ ji Abraham ɔ, nɛ tue gblami ko be nyɛ nɔ bae. I ngɛ nyɛ dee ke, Mawu ma nyɛ ngɔ tɛ nɛ ɔmɛ kɛ pee Abraham nina!

Luka 1:73

E ka wa nɛ̃ Abraham kita, nɛ e wo si ke e ma kpɔ wɔ kɛ je wa he nyɛli ɔmɛ a dɛ mi, konɛ wa sɔmɔ lɛ ngɛ he jɔmi mi,

Luka 3:8

Ke nyɛ tsake nyɛ tsui niinɛ ɔ, lɛɛ nyɛɛ pee níhi nɛ tsɔɔ kaa nyɛ tsake nyɛ tsui. Nyɛ ko susu kaa ke nyɛ de ke nyɛ nɛ̃ ji Abraham ɔ kɛkɛ tue gblami ko be nyɛ nɔ bae. I ngɛ nyɛ dee ke Mawu ma nyɛ ngɔ tɛ nɛ ɔmɛ kɛ pee Abraham nina!

Yohane 8:39

A he nɔ ke, “Wɔɔ lɛɛ wa tsɛ ji Abraham.” Yesu de mɛ ke, “Abraham nina ji nyɛ jinɛ nyɛ maa pee níhi nɛ Abraham pee ɔ nɔuu.

Yohane 8:41

Níhi nɛ nyɛ tsɛ peeɔ ɔ, lɔ ɔmɛ ngɛ peeɔ ɔ nɛ.” A he nɔ ke, “Wɔɔ lɛɛ pi ajuama mi bimɛ ji wɔ. Wa ngɛ tsɛ kake. Wa tsɛ ji Mawu.”

Yohane 8:53

Tsaatsɛ Abraham nɛ gbo ɔ, o pe lɛ lo? Jehanɛ ɔ hu, gbali ɔmɛ nɛ gbo ɔ nɛɛ? Kɛ moo lɛɛ o buɔ o he kɛɛ?”

Yohane 8:56

Nyɛ tsɛ Abraham hla nɛ e na ye bami be ɔ kɛ bua jɔmi. E na hulɔ, nɛ e nya.”

Ni Tsumi 17:24

Mawu, nɔ nɛ bɔ je ɔ, kɛ e mi níhi tsuo ɔ, lɛ ji hiɔwe kɛ zugba Nyɔmtsɛ; nɛ e hí sɔlemi tsu nɛ a kɛ nine pee mi.

Ni Tsumi 17:25

Jehanɛ hu nɔ́ ko nɔ́ ko hia we lɛ nɛ wa ma nyɛ ma ha lɛ. Wa nine nya nɔ́ ko hia we lɛ kaa nɔ ko nɛ nɔ́ ko fĩɔ lɛ nɛ adesa ma nyɛ maa pee ha lɛ. Ejakaa lɛ mohu lɛ e haa wɔ wami, kɛ mumi nɛ wa muɔ. Nɔ́ tsuaa nɔ́ nɛ hia wɔ ɔ, lɛ nɛ e haa wɔ.

Ni Tsumi 17:26

Sisije ɔ, nɔmlɔ kake Mawu bɔ, nɛ kikɛmɛ a nɔ kake nɛ ɔ mi je ɔ mi nimli adesahi tsuo je. Lɛ nitsɛ lɛ e ha nɛ a gbɛ fĩa je ɔ mi he tsuaa he. Be, kɛ he nɛ ní ɔmɛ maa hi, kɛ a huzu nya a, lɛ nitsɛ lɛ e to pɛpɛɛpɛ loko e bɔ je ɔ.

Ni Tsumi 7:2

Stefano he nɔ ke, “Tsaatsɛmɛ kɛ ye nyɛmimɛ, nyɛɛ bu tue. Benɛ wa nɛ̃ Abraham ngɛ Mesopotamia nɛ e na we nɛ e ba hi Haran lolo ɔ, Mawu nɛ hɛ mi ngɛ nyami ɔ je e he kpo tsɔɔ lɛ,

Ni Tsumi 7:26

E nɔ jena a, e ba na Israel bi enyɔ nɛ a ngɛ kunɔ nɔe. E ya kpata mɛ, nɛ e de ke, ‘Tsaatsɛmɛ, nyɛɛ lɛɛ nyɛmimɛ ji nyɛ, mɛni he je nyɛ ngɛ kunɔ nɔe?’

Romabi 4:1

Wa tsɛ Abraham ɔ, kɛ wa ma de ngɛ e he kɛɛ? Kɛ e wami si himi mi sane ngɛ kɛɛ?

Romabi 9:10

Pi enɛ ɔ kɛkɛ, Rebeka bimɛ enyɔ ɔmɛ ɔ, e kɛ wa tsɛ Isak kake ɔ nɔuu nɛ fɔ mɛ.

1 Korintobi 8:6

kɛ̃ ɔ, wɔɔ lɛɛ Mawu kake too nɛ ji Tsɛ ɔ, lɛ pɛ wa ngɛ. Lɛ nɛ bɔ níhi tsuo, nɛ lɛ nɛ ha nɛ wa ngɛ wami mi. Wa ngɛ Nyɔmtsɛ kake hulɔ; lɛ ji Yesu Kristo. E nɔ Mawu gu kɛ bɔ nɔ́ tsuaa nɔ́, nɛ lɛ nɛ ha nɛ wa ngɛ wami mi.

Efesobi 4:25

Lɔ ɔ he ɔ, nyɛ kpa lakpa yemi, nɛ nɔ tsuaa nɔ nɛ tu e nyɛmi anɔkuale sisiisi. Ejakaa wɔ tsuo pɛpɛɛpɛ wa ngɛ kaa Kristo nɔmlɔ tso ɔ he ní munomunohi.

Efesobi 4:6

Mawu kake lɛ ngɛ; lɛ ji adesahi tsuo a tsɛ. E tsuɔ ní kɛ guu adesahi tsuo a nɔ, nɛ e ngɛ adesahi tsuo a mi.

1 Tesalonikabi 4:6

Lɔ ɔ he ɔ, nɔ ko kó ya pee e nyɛmi yayami kaa e ma ya ngɔ e nyɛmi e yo. Wa de nyɛ enɛ ɔ momo, nɛ wa bɔ nyɛ kɔkɔ wawɛɛ kaa nihi nɛ peeɔ jã a, Nyɔmtsɛ ɔ maa gbla a tue.

Hebribi 12:9

Jehanɛ hu, adesa blɔ fa mi ɔ, wa ngɛ tsɛmɛ nɛ tsɔseɔ wɔ, nɛ wa buɔ mɛ. Anɛ e sɛ kaa wa baa wa he si ha Tsɛ ɔ nɛ ngɛ mumihi a nɔ he wami ɔ, konɛ wa yi nɛ na wami lo?

Yoshua 24:3

I ngɔ nyɛ nɛ̃, Abraham kɛ je zugba a nɛ ngɛ Yufrate pa a se ɔ nɔ, nɛ i kpaka lɛ kɛ gu Kanaan zugba a tsuo nɔ, nɛ i ha lɛ nina babauu. I ha lɛ Isak.