Luka 1:8 - BAIBLO ALOO NGMAMI KLƆUKLƆU Ɔ

⁸ Ligbi ko ɔ, Zakaria ya ngɛ osɔfo ní tsumi tsue ngɛ sɔlemi we ɔ. Jamɛ a be ɔ, e su a we osɔfo kuu ɔ nɔ kaa mɛ lɛ a ma sɔmɔ.

Somi He Ɔ

⁸ Bene Zakaria ngɛ ni tsue kaa osɔfo ngɛ Mawu hɛ mi

Luka 1:8 ပူးပေါင်းရင်းမြစ်များ

Kronika I, 24:19

Enɛ ɔ ji ní tsumi nɛ a ha mɛ ɔ he blɔ nya tomi nɛ fɔɔ si, nɛ e nɔ a daa kɛ ya sɔmɔɔ ngɛ Yawɛ we ɔ. A nɛ̃, Aaron ji nɔ nɛ to blɔ nya nɛ ɔ kɛ fɔ si kaa bɔ nɛ Yawɛ, Israel Mawu ɔ fa lɛ ɔ.

Kronika I, 24:2

Nadab kɛ Abihu gbo loko a tsɛ gbo, nɛ a si we bimɛ ngɛ a se. Enɛ ɔ he je ɔ, a nyɛmimɛ Eleazar kɛ Itamar ba pee osɔfohi.

Kronika II, 11:14

Levi bi ɔmɛ je a kɔpe ɔmɛ, kɛ a zugba kpa amɛ a he, nɛ a ba Yuda kɛ Yerusalem, ejakaa Israel matsɛ, Yeroboam kɛ e se yeli ɔmɛ ngmɛ́ mɛ blɔ nɛ a tsu ní kaa Yawɛ we osɔfohi.

Kronika II, 31:19

Osɔfohi nɛ ngɛ mahi nɛ a ngɔ kɛ ha Aaron nina a, kɛ kɔpehi nɛ bɔle jamɛ a ma amɛ a mi ɔ, a hla a ti ni komɛ nɛ a hɛ mi ka si. Mɛ lɛ a dlaa niye ní kɛ haa nyumuhi tsuo ngɛ osɔfohi a weku ɔmɛ a mi, kɛ Levi no tsuaa Levi no nɛ a ngma e biɛ ɔ.

Kronika II, 31:2

Matsɛ Hezekia kpale dla ní tsumi kɛ ha osɔfo ɔmɛ, kɛ Levi bi ɔmɛ, nɔ tsuaa nɔ kɛ e ní tsumi pɔtɛɛ. Ní tsumi slɔɔto ɔmɛ ji nɛ ɔmɛ nɛ: sami bɔ sami, tue mi jɔmi bɔ sami, sɔmɔmi ngɛ Yawɛ we ɔ, kɛ Yawɛ yi jemi kɛ si nami.

Kronika II, 8:14

Blɔ nya nɛ Salomo tsɛ, David to kɛ fɔ si ɔ, Salomo hyɛ jamɛ a blɔ nya tomi ɔ nɔ kɛ dla ní tsumi kɛ ha osɔfo ɔmɛ. E ngɔ Levi bi ɔmɛ a ní tsumi hu ngɔ wo a dɛ; mɛɛ a ní tsumi ji kaa a la kɛ je Yawɛ yi, nɛ a piɛ osɔfo ɔmɛ a he kɛ tsu a daa ligbi ní tsumi ɔmɛ. Jehanɛ, Yawɛ we ɔ agbo nya buli ɔmɛ hu Salomo dla mɛ ngɔ wo kuuhi a mi kɛ ha agbo slɔɔto ɔmɛ a nya bumi kaa bɔ nɛ Mawu nɔmlɔ, David fa ke a pee ɔ.

Ezra 6:18

A to osɔfo ɔmɛ, kɛ Levi bi ɔmɛ ngɛ a we asafo kuu ɔmɛ a nya kɛ ha Mawu we ɔ sɔmɔmi ní tsumi ɔmɛ ngɛ Yerusalem, kaa bɔ nɛ a ngma ngɛ Mose mlaa womi ɔ mi ɔ.

Mose II, 28:1

“Moo tsɔ ya ngɔ o nyɛminyumu Aaron kɛ e binyumu ɔmɛ nɛ ji Nadab, Abihu, Eleazar, kɛ Itamar kɛ ba. Mo ha nɛ a tsɔ a he kɛ je Israel bi kpa amɛ a he, bɔ nɛ pee nɛ a ba sɔmɔ mi kaa osɔfohi.

Mose II, 28:41

Ngɔɔ tade nɛ ɔmɛ kɛ wo o nyɛminyumu Aaron kɛ e binyumu ɔmɛ, nɛ o pɔ mɛ nu, nɛ o wo mɛ osɔfo, nɛ o tsukɔ a he, konɛ a sɔmɔ mi kaa osɔfohi.

Mose II, 29:1

“Enɛ ɔ ji nɔ nɛ ó pee nɛ o kɛ tsukɔ Aaron kɛ e binyumu ɔmɛ a he nɛ a sɔmɔ mi kaa ye we osɔfohi. Ngɔɔ na niheyo kake, kɛ agbosu enyɔ nɛ kpa be a he.

Mose II, 29:44

Ma tsukɔ kpe he bo tsu ɔ, kɛ bɔ sami la tɛ ɔ he. Aaron kɛ e binyumu ɔmɛ hu ma tsukɔ a he, konɛ a sɔmɔ mi kaa osɔfohi.

Mose II, 29:9

Fi mlɛ mi fimi níhi kɛ wo a mlɛ mi, nɛ o bu mɛ pɛɛ. Bɔ nɛ o maa wo Aaron kɛ e binyumu ɔmɛ osɔfo ji nɛ ɔ nɛ. Kɛkɛ ɔ, osɔfo ní tsumi ɔ maa pee a nɔ́; nɛ enɛ ɔ maa pee mlaa nɛ fɔɔ si kɛ yaa neneene.

Mose II, 30:30

Jehanɛ moo pɔ Aaron kɛ e binyumu ɔmɛ nu, nɛ o tsukɔ a he, konɛ a sɔmɔ mi kaa osɔfohi.

Mose IV, 18:7

Se o kɛ o bimɛ ɔmɛ pɛ ji ni nɛmɛ nɛ ngɛ he blɔ kaa nyɛ tsuɔ osɔfo ní tsumihi nɛ kɔɔ bɔ sami la tɛ ɔ, kɛ he klɔuklɔu pe kulaa a a he. Enɛ ɔmɛ ji nyɛ ní tsumi; ejakaa imi lɛ i kɛ osɔfo yemi ní tsumi ɔ ke nyɛ. Nɔ kpa ko nɛ maa hɛ lɛ kɛ su ní klɔuklɔu ɔmɛ a he ɔ, a gbe lɛ.”

Luka 1:5

Benɛ Herode ngɛ matsɛ yee ngɛ Yudea a, osɔfo ko hi si nɛ e biɛ ji Zakaria. Osɔfohi a kuu nɛ a tsɛɛ Abiya a mi no ji lɛ. E yo biɛ ji Elizabet, nɛ lɛ hu Aaron nina ji lɛ.

Luka 1:7

Se a be bi; ejakaa Elizabet ɔ yosa ji lɛ, nɛ mɛ ni enyɔ ɔmɛ tsuo a bwɔ.