La 14:1 - BAIBLO ALOO NGMAMI KLƆUKLƆU Ɔ

¹ Kuasiahi a susumi ji, “Mawu ko be.” Mɛ tsuo a puɛ; ní yayamihi sɔuu lɛ a peeɔ; nɔ ko nɔ ko be nɛ peeɔ nɔ́ nɛ da.

La 14:1 ပူးပေါင်းရင်းမြစ်များ

La 10:4

Yayami peelɔ ɔ he nɔ womi ha we nɛ e hlaa Mawu se blɔ. E susumi tsuo ji “Mawu ko be.”

La 53:1

Kuasia lɛ deɔ ke, “Mawu ko be.” Mɛni he je ɔ mɛ tsuo a puɛ. Yayamihi nɛ a ngɛ pee ɔ ngɛ he mi nyɛɛmi saminya. Nɔ ko nɔ ko be nɛ peeɔ nɔ́ nɛ da.

La 92:6

Nɔ nɛ biɛ be enɛ ɔ lee; kuasia hu be sisi nue.

Mose I, 6:5

Benɛ Yawɛ na kaa nimlihi a yi mi wa, nɛ nɔ́ yaya pɛ a susuɔ daa nɛ ɔ,

Mateo 12:34

Nyɛ sinɔhi a nina! Nyɛ nimli yayamihi! Kɛ nyɛ maa pee kɛ tu munyu kpakpa kɛɛ? Ejakaa nɔ́ nɛ hyi tsui mi tɔ ɔ, lɔ ɔ nya deɔ.

Luka 12:20

Se Mawu de lɛ ke, ‘Kuasia! Nyɔ nɛ ɔ mi nɔuu i ngɛ o wami ɔ hee ngɛ o dɛ. Lɛɛ níhi nɛ o bua nya ngɔ to ɔ, mɛnɔ níhi nɛ a maa pee?’ ”

Mateo 15:19

Ejakaa tsui mi nɛ susumi yayami nɛ ɔmɛ jeɔ: nɔmlɔ gbemi, gba puɛmi, ajuama bɔmi, jumi, lakpa odase yemi, kɛ nɔ biɛ puɛmi.

Abɛ Womi 1:7

Loko o ma na nile ɔ, ja o ye Yawɛ gbeye. Kuasiahi bui nile, nɛ slɔmi gbi hu a sume.

Tito 3:3

Ejakaa sa a, wɔ nitsɛmɛ hu wa je kuasia; wa gbo tue, nɛ wa tla blɔ. Wa ya di akɔnɔ yaya, kɛ he lo mi níhi nɛ haa wɔ bua jɔmi a se. Wa susuu nihi a he yayami, nɛ wa hɛ kɔ̃ɔ̃; nɔ́ peeɔ wɔ tai, nɛ wa nyɛɛ wa sibi.

Efesobi 2:12

Jamɛ a be ɔ, nyɛ li Kristo. Nihi nɛ Mawu hla a, nyɛ be a kpɛti; lɔ ɔ he ɔ, nibwɔhi ji nyɛ. Somi nɛ Mawu kɛ e ni ɔmɛ so, kɛ si nɛ e wo mɛ ɔ, nyɛ piɛ we he. Nyɛ hi si ngɛ je ɔ mi kɛkɛ, nɛ nyɛɛ kɛ nyɛ hɛ fɔ we nɔ́ ko nɔ; Mawu nitsɛ tete nyɛ li lɛ.

Abɛ Womi 27:22

Ke a kongo kuasia kaa bɔ nɛ a gbeeɔ blɛfo ngɛ tso mi po, e biɛmi ɔ be tae.

Abɛ Womi 1:22

“Kuasiahi! Mɛni be nyɛ maa biɛ kɛ yaa si? Fɛu yeli! Mɛni be nyɛ maa ye fɛu kɛ yaa si? Anɛ nyɛ be ní kasee?

Hiob 22:13

Se kɛ̃ ɔ, o biɔ ke, “Mawu ɔ, mɛni e le? Nɔ nɛ bɔku kpii ha e hɛ mi ɔ, kɛ e maa pee kɛ kojo wɔ kɛɛ?”

Kpojemi 21:8

Se fɔ̃li, nihi nɛ he we yi, nihi nɛ peeɔ níhi nɛ a hiee, nɔmlɔ gbeli, yaholi, nyuali, wɔ jali, kɛ lakpatsɛmɛ tsuo lɛɛ he nɛ fɔɔ si ha mɛ ji taku kɛ e mi la nɛ ngɛ tsoe gegeege ɔ. Lɔ ɔ ji gbenɔ enyɔne ɔ nɛ.”

Tito 1:16

A deɔ ke a le Mawu, se a ní peepee tsɔɔ we jã. Yakayaka nimli, kɛ atuã tsɔli ji mɛ; a tsu we nɔ́ kpakpa ko gblee.

Yesaya 1:4

Musu tloo nyɛ, nyɛ ma nɛ yayami sɔuu nyɛ peeɔ; nyɛ puɛ kulaa kɛ yayami peemi! Nyɛ he yayami ɔmɛ pee tlomi ha nyɛ! Nyɛ kua Yawɛ, Israel Mawu klɔuklɔu ɔ, nɛ nyɛ je e he kɛ ho se ya.

La 107:17

Ni komɛ ya je kuasia, nɛ a blɔ yayami ɔmɛ, kɛ yayamihi nɛ a pee ɔ ha nɛ a na nɔ́.

Hiob 15:16

Nɛ mo, nɔmlɔ adesa nɛ o sa, nɛ se nami be o he ɔ! Mo nɛ o peeɔ yayami kaa bɔ nɛ a nuu nyu kumakuma a, kɛ maa pee kɛɛ nɛ moo o he ma tsɔ ngɛ Mawu hɛ mi?

Samuel I, 25:25

Ye nyɔmtsɛ, i kpa mo pɛɛ, mo ko di Nabal yaka nɔmlɔ nɛ ɔ; ejakaa bɔ nɛ e biɛ ngɛ ɔ, ja nɛ lɛ nɔmlɔ ɔ ngɛ. E biɛ Nabal ɔ sisi ji kuasia; nɛ kuasiahi a sane nɛ e yeɔ. Se imi, o mawayo ɔ, nihewi ɔmɛ nɛ ye nyɔmtsɛ ɔ tsɔ kɛ ba a, i nɛ mɛ.

Abɛ Womi 13:19

Ke o ngɛ nɔ́ ko hlae, nɛ o nine su nɔ ɔ, hyɛ bɔ nɛ o bua jɔɔ ha. Kuasia lɛɛ nɔ́ nɛ e hiɔ ji kaa e kpa yayami peemi.

La 73:3

Ejakaa ye hɛ kɔ he nɔ woli, kɛ yayami peeli a nɔ benɛ i na kaa a ngɛ nɔ yae ngɛ je mi ɔ.

Fiɛlɔ 7:20

Niinɛ, dalɔ ko dalɔ ko be zugba nɛ ɔ nɔ. Nɔ ko nɔ ko be nɛ peeɔ kpakpa daa nɛ ɔ, nɛ lɛɛ e pee we yayami gblegbleegble.

Yeremia 5:12

Yawɛ ma mi bi ɔmɛ sisi mɛ nitsɛmɛ a he, nɛ a de ke, “Yawɛ loo! Mɛni e ma nyɛ maa pee? Haomi ko haomi ko be wa nɔ bae fɛɛ! Ta, loo hwɔ hu be bae.”

Yeremia 6:28

Mɛ tsuo pɛpɛɛpɛ atuã tsɔli, kɛ yakayaka nimli ji mɛ; a tue wa kaa akɔblee kɛ dade. Daa nɛ ɔ, a ngɛ nihi a sisi nyɛɛe kɛ ngɛ bee.