Ke i kai bɔ nɛ nyami be ɔmɛ a mi ɔ, i nyɛɛɔ nihi babauu a hɛ kɛ poo si kɛ yaa Mawu we ɔ, nɛ i kɛ ma kpekpemi ɔ tsuo wa hwɔɔ lele, nɛ wa laa sina lahi kɛ jeɔ mo Mawu, o yi ɔ, ye tsui yeɔ wawɛɛ.
Nyɛɛ kɛ nyɛ bimɛ ɔmɛ, nyɛ tsɔli nyumu ɔmɛ, nyɛ mawayi ɔmɛ, kɛ Levi bi ɔmɛ nɛ ngɛ nyɛ ma amɛ a mi ɔ tsuo nyɛ nya ngɛ Yawɛ, nyɛ Mawu ɔ hɛ mi; nyɛ kai kaa Levi bi ɔmɛ lɛɛ a be zugba ko nae kaa mɛ nitsɛmɛ a nɔ́.
Nyɛɛ kɛ nyɛ bimɛ ɔmɛ, nyɛ mawa amɛ, Levi bi ɔmɛ, kɛ yalɔyi ɔmɛ nɛ ngɛ nyɛ ma amɛ a mi ɔ nyɛ bua nɛ jɔ, nɛ nyɛ nya ngɛ Yawɛ, nyɛ Mawu ɔ hɛ mi. Nyɛɛ pee enɛ ɔ ngɛ he kake nɛ Yawɛ, nyɛ Mawu ɔ to nɛ a ja lɛ ngɛ ɔ.
Ligbi nɛ ji kpaanyɔ ɔ, Salomo ha ma a nane. Mɛ tsuo a je e yi saminya, nɛ a ho a wehi a mi ya kɛ bua jɔmi ngɛ ní kpakpahi tsuo nɛ Yawɛ pee ha e tsɔlɔ, David, kɛ e ma, Israel ɔ he.
Matsɛ Hezekia kpale dla ní tsumi kɛ ha osɔfo ɔmɛ, kɛ Levi bi ɔmɛ, nɔ tsuaa nɔ kɛ e ní tsumi pɔtɛɛ. Ní tsumi slɔɔto ɔmɛ ji nɛ ɔmɛ nɛ: sami bɔ sami, tue mi jɔmi bɔ sami, sɔmɔmi ngɛ Yawɛ we ɔ, kɛ Yawɛ yi jemi kɛ si nami.
Matsɛ ɔ, kɛ ganɔ ɔmɛ fa Levi bi ɔmɛ ke, yi jemi lahi nɛ David, kɛ gbalɔ Asaf po ɔ, a la jamɛ a la amɛ kɛ je Yawɛ yi. Lɔ ɔ he ɔ, be mi nɛ a kpla si nɛ a ngɛ Mawu jae ɔ, nɔ tsuaa nɔ la kɛ bua jɔmi.