Kronika II, 5:11 - BAIBLO ALOO NGMAMI KLƆUKLƆU Ɔ

^11-14 Osɔfo ɔmɛ tsuo nɛ ba bua a he nya a tsu a he, tsa pi ngɛ a kuu ɔmɛ a mi kɛkɛ. Levi bi, ni nɛmɛ nɛ ji lali ɔmɛ tsuo bu kploba saminyawiiwi. Mɛ ji Asaf, Heman, kɛ Yedutun, kɛ a bimɛ, kɛ a nyɛmimɛ. Levi bi ɔmɛ ya da si ngɛ bɔ sami la tɛ ɔ beleku je kɛ a dɛ mi ngmlɛhi, bɛhi, kɛ sakuhi. Osɔfohi lafa kɛ nyingmi enyɔ piɛ a he ngɛ lejɛ ɔ, nɛ mɛɛ lɛɛ a ngɛ titimati kpae. Titimati kpali ɔmɛ, ngmlɛ fiali ɔmɛ, kɛ saku fiali ɔmɛ piɛ lali ɔmɛ a he, nɛ mɛ tsuo a nya sɔ kɛ wo la a nɔ. A la kɛ je Yawɛ yi ke, “A je Yawɛ yi, ejakaa e hi, ejakaa e suɔmi ɔ ngɛ kɛ yaa neneene.” Benɛ osɔfo ɔmɛ ngɛ kpo jee ngɛ Yawɛ we ɔ mi ɔ, bɔku ba ha lejɛ ɔ tlukaa. Bɔku nɛ ɔ ngɛ kpɛe kaa Yawɛ hɛ mi nyami; enɛ ɔ he je ɔ, osɔfo ɔmɛ nyɛ we nɛ a kpale kɛ ya lejɛ ɔ nɛ a ya tsu ní.

Kronika II, 5:11 ပူးပေါင်းရင်းမြစ်များ

Hiob 1:5

Ke a gbe ní yemi ɔ tsuo nya kikɛ nɛ ɔ, jena mɔtu ɔ, Hiob maa te si mla nɛ e maa sã sami bɔ kɛ ha e bimɛ ɔmɛ kakaaka, nɛ e kɛ maa pee mɛ klɔuklɔu. Hiob peeɔ nɔ́ nɛ ɔ daa, ejakaa e susuɔ kaa eko ɔ, e bimɛ ɔmɛ pee yayami kaa a jɛ Mawu nɛ a li a he be.

Kronika II, 35:4

Nyɛ ya hi nyɛ blɔ hehi ngɛ Yawɛ we ɔ we puɔ nya we puɔ nya kaa bɔ nɛ Israel matsɛ, David kɛ e bi Salomo dla ní tsumi ɔmɛ ngɔ ha nyɛ ɔ.

Kronika II, 29:5

nɛ e kɛ mɛ ba tu munyu ngɛ lejɛ ɔ. E de mɛ ke, “Nyɛ Levi bi, nyɛɛ bu mi tue! Nyɛɛ tsukɔ nyɛ he, nɛ nyɛɛ tsukɔ Yawɛ, nyɛ nɛmɛ a Mawu ɔ we ɔ hu he. Nyɛ je nɔ́ tsuaa nɔ́ nɛ bleɔ Yawɛ we ɔ kɛ je hiɛ ɔ.

Kronika II, 30:15

Nyɔhiɔ ɔ ligbi nɛ ji nyɔngma kɛ eywiɛ ɔ, a gbe jijɔ ɔmɛ nɛ a kɛ maa sã Hetsɔmi bɔ ɔ. Osɔfohi kɛ Levi bi nɛ a he tsɔ we ɔ, zo gbe mɛ kpɔtɔɔ. Lɔ ɔ he ɔ, a pee a he klɔuklɔu kɛ ha Yawɛ, nɛ a bɔni sami bɔ sami ngɛ Yawɛ we ɔ.

Kronika II, 29:34

Akɛnɛ osɔfo ɔmɛ a he pi bɔ nɛ a ma nyɛ maa gbe lohwe nɛ ɔmɛ tsuo he je ɔ, a nyɛmimɛ Levi bi ɔmɛ ba piɛ a he kɛ tsu ní ɔ kɛ ya si a gbe nya. Jamɛ a be ɔ mi ɔ, osɔfo ɔmɛ babauu pee a he klɔuklɔu. (Levi bi ɔmɛ bɔɔ mɔde kaa a maa pee a he klɔuklɔu pe osɔfo ɔmɛ po).

Kronika II, 29:15

Nyumu nɛ ɔmɛ ya bua a nyɛmimɛ Levi bi ɔmɛ a nya, nɛ mɛ tsuo a tsukɔ a he. Kɛkɛ ɔ, kaa bɔ nɛ matsɛ ɔ fa mɛ ke a pee ngɛ Yawɛ munyu ɔ nya a, a bɔni Yawɛ we ɔ he tsukɔmi.

Mose II, 19:10

Nɛ Yawɛ de Mose ke, “Yaa nɛ o ya tsukɔ ma a he mwɔnɛ ɔ kɛ hwɔɔ. Ha nɛ a fɔ a tadehi a he,

Kronika I, 15:14

Kɛkɛ nɛ osɔfo ɔmɛ, kɛ Levi bi ɔmɛ ya tsu a he, konɛ a ya ngɔ Yawɛ, Israel Mawu ɔ somi daka a kɛ ba.

Kronika II, 35:6

Nyɛɛ gbe jijɔhi, kɛ to akpakpohi nɛ a kɛ maa ye Hetsɔmi ɔ. Jehanɛ, nyɛɛ pee nyɛ he klɔuklɔu, nɛ nyɛ dla kɛ ha bɔ ɔmɛ a sami. Nyɛɛ pee enɛ ɔ, bɔ nɛ pee nɛ nyɛ nyɛmimɛ Israel bi ɔmɛ nɛ a ye mlaa amɛ nɛ Yawɛ wo kɛ gu Mose nɔ ɔ a nɔ.”