Kronika II, 29:5 - BAIBLO ALOO NGMAMI KLƆUKLƆU Ɔ

⁵ nɛ e kɛ mɛ ba tu munyu ngɛ lejɛ ɔ. E de mɛ ke, “Nyɛ Levi bi, nyɛɛ bu mi tue! Nyɛɛ tsukɔ nyɛ he, nɛ nyɛɛ tsukɔ Yawɛ, nyɛ nɛmɛ a Mawu ɔ we ɔ hu he. Nyɛ je nɔ́ tsuaa nɔ́ nɛ bleɔ Yawɛ we ɔ kɛ je hiɛ ɔ.

Kronika II, 29:5 ပူးပေါင်းရင်းမြစ်များ

Kronika I, 15:12

David de Levi bi ɔmɛ ke, “Nyɛ ji Levi weku ɔmɛ a nyatsɛmɛ. Nyɛɛ tsu nyɛ he, nɛ nyɛɛ tsu nyɛ nyɛmimɛ Levi bi kpa amɛ hu a he, konɛ nyɛ ya ngɔ Yawɛ Israel Mawu ɔ somi daka a kɛ ba he nɛ i dla to lɛ ɔ.

Kronika II, 29:34

Akɛnɛ osɔfo ɔmɛ a he pi bɔ nɛ a ma nyɛ maa gbe lohwe nɛ ɔmɛ tsuo he je ɔ, a nyɛmimɛ Levi bi ɔmɛ ba piɛ a he kɛ tsu ní ɔ kɛ ya si a gbe nya. Jamɛ a be ɔ mi ɔ, osɔfo ɔmɛ babauu pee a he klɔuklɔu. (Levi bi ɔmɛ bɔɔ mɔde kaa a maa pee a he klɔuklɔu pe osɔfo ɔmɛ po).

Kronika II, 29:4

E kpee osɔfo ɔmɛ, kɛ Levi bi ɔmɛ kɛ ba kue ɔ mi ngɛ Yawɛ we ɔ beleku je,

Kronika II, 35:6

Nyɛɛ gbe jijɔhi, kɛ to akpakpohi nɛ a kɛ maa ye Hetsɔmi ɔ. Jehanɛ, nyɛɛ pee nyɛ he klɔuklɔu, nɛ nyɛ dla kɛ ha bɔ ɔmɛ a sami. Nyɛɛ pee enɛ ɔ, bɔ nɛ pee nɛ nyɛ nyɛmimɛ Israel bi ɔmɛ nɛ a ye mlaa amɛ nɛ Yawɛ wo kɛ gu Mose nɔ ɔ a nɔ.”

Nehemia 12:30

Osɔfo ɔmɛ, kɛ Levi bi ɔmɛ pee kusumi kɛ julaa mɛ nitsɛmɛ a he. A julaa ma a, kɛ agbo ɔmɛ, kɛ ma gbogbo ɔ hulɔ.

Nehemia 13:9

I fa ke a sá tsu ɔmɛ a mi saminya, nɛ a ngɔ níhi nɛ a kɛ tsuɔ ní ngɛ Mawu we ɔ, kɛ ngma bɔ ɔmɛ, kɛ mimɛ ɔ kɛ ya to a hi hehi.

La 93:5

Yawɛ, o mlaa amɛ ngɛ kɛ yaa neneene; klɔuklɔu peemi sa o we ɔ daa.

Mose II, 19:10

Nɛ Yawɛ de Mose ke, “Yaa nɛ o ya tsukɔ ma a he mwɔnɛ ɔ kɛ hwɔɔ. Ha nɛ a fɔ a tadehi a he,

Mose II, 19:15

E de ma a ke, “Nyɛ dla nyɛ he ha hiɛmɛ nɛ ɔ ligbi nɛ ji etɛ ɔ; nɔ ko nɔ ko kó ta yo he.”

Ezekiel 36:25

Ma ngɔ nyu klɔuklɔu kɛ fĩa nyɛ nɔ, nɛ nyɛ he ma tsɔ. Ma tsu nyɛ he kɛ je amagahi, kɛ mu níhi tsuo nɛ nyɛ kɛ ble nyɛ he ɔ a mi.

Ezekiel 8:3

E je nɔ́ ko kpo kaa nine kɛ nu ye yi bwɔmi. Kɛkɛ nɛ ngɛ nina a mi ɔ, Mawu mumi ɔ wo mi kɛ gu kɔɔhiɔ mi kɛ ya su Yerusalem. E ngɔ mi kɛ ya ma Yawɛ we ɔ we omleyi je agbo ɔ mi. Amaga ko nɛ Mawu hiee wawɛɛ ɔ maa si ngɛ lejɛ ɔ.

Ezekiel 8:6

Mawu de mi ke, “Nɔmlɔ adesa, tse o na ní hiemi ní nguanguahi nɛ Israel bi ɔmɛ peeɔ ngɛ hiɛ ɔ; a peeɔ enɛ ɔmɛ konɛ ma je ye he klɔuklɔu ɔ kɛ ya se lokoo? Se o maa na ní hiemi ní nguangua kpahi pe enɛ ɔ.”

Yoel 2:16

Nyɛ bua ma a nya; nyɛ ha nɛ a ba pee kpe klɔuklɔu. Nyɛɛ kpee nikɔtɔma amɛ kɛ ba; nyɛ bua jokuɛwi kɛ bimwɔwi ɔmɛ tsuo a nya. Ayɛflo kɛ e huno po, a je kpo ngɛ a tsu mi kɛ ba.

2 Korintobi 6:16

Mɛni kake peemi ngɛ Mawu sɔlemi we ɔ kɛ amagahi a kpɛti? Ejakaa wɔɔ lɛɛ Mawu hɛ kalɔ ɔ sɔlemi we ji wɔ! Mawu de ke, “I kɛ ye ma a maa hi si; ma pee a Mawu, nɛ mɛ hu a maa pee ye ma.”

2 Korintobi 7:1

Siwohi nɛ wa na kɛ je Mawu dɛ mi ji nɛ ɔmɛ nɛ. Lɔ ɔ he ɔ, ye nyɛmimɛ nyɛ ha wa je níhi tsuo nɛ woɔ wa nɔmlɔ tso, kɛ mumi he mu kɛ ya se, konɛ wa he nɛ tsɔ kulaa kɛ hi si ngɛ Mawu gbeye yemi nya.