Kronika II, 12:3 - BAIBLO ALOO NGMAMI KLƆUKLƆU Ɔ

³ E kɛ ta zugba lɛ akpe kɛ e nya lafa enyɔ, kɛ okpɔngɔ ta buli akpe nyingmi ekpa, kɛ ta buli babauu nɛ a li a nya ba. Ta buli nɛ ɔmɛ a ti ni komɛ ji Libia bi, Suk bi, kɛ Sudan bi.

Kronika II, 12:3 ပူးပေါင်းရင်းမြစ်များ

Samuel II, 10:18

Se Israel bi ɔmɛ wo Siria bi ɔmɛ fo; nɛ David kɛ e we bi ɔmɛ gbe Siria bi ɔmɛ a ta zugba lɛ ta buli lafa kpaago, kɛ okpɔngɔ ta buli akpe nyingmi eywiɛ. A he nyɛli ɔmɛ a we asafoatsɛ Shobak ɔ lɛɛ a plaa lɛ, nɛ e gbo ngɛ ta nga a nɔ.

Matsɛmɛ II, 7:6

Yawɛ ha nɛ Siria bi ɔmɛ nububuubui ko he kaa nɔ́ nɛ tabo agbo ko hia kɛ ma, kɛ okpɔngɔhi, kɛ ta zugba lɛhi; nɛ Siria bi ɔmɛ susu kaa Israel matsɛ ɔ ya bɔ Hit bi a matsɛmɛ ɔmɛ, kɛ Egipt bi ɔmɛ a matsɛmɛ ɔmɛ apaa nɛ a ba tua mɛ.

Kronika II, 14:12

Benɛ Asa kɛ Yuda tabo ɔ ya tua Sudan tabo ɔ, Yawɛ ye Sudan tabo ɔ nɔ kunimi. A tu fo,

Kronika II, 14:8

Matsɛ Asa ngɛ ta buli nɛ je Yuda. A hiɛmi ji akpe lafa etɛ; nɛ a hɛɛɔ tsɛ̃i kɛ akplɔ. E ngɛ ta buli nɛ je Benyamin hulɔ. A hiɛmi ji akpe lafa enyɔ kɛ nyingmi kpaanyɔ; nɛ mɛɛ a hɛɛɔ tsɛ̃i kɛ kɛ̃ɛ̃. Ta buli katsɛmɛ ji kulaa mɛ tsuo pɛpɛɛpɛ.

Kronika II, 14:9

Ligbi ko ɔ, Sudan no ko nɛ a tsɛɛ lɛ Zera ba tua Yuda. E kɛ ta buli ayɔ, kɛ ta zugba lɛ lafa etɛ ba tua ma a, nɛ a ba su Maresha tɔɔ.

Kronika II, 16:8

Tse Sudan bi ɔmɛ, kɛ Libia bi ɔmɛ ngɛ ta buli, ta zugba lɛhi, kɛ okpɔngɔ ta buli babauu? Se akɛnɛ nyɛ ngɔ nyɛ hɛ ngɔ fɔ Yawɛ nɔ he je ɔ, e ha nɛ nyɛ ye a nɔ kunimi.

Yesaya 43:3

Ejakaa imi Yawɛ, o Mawu ɔ, imi Israel Mawu Klɔuklɔu ɔ lɛ he o yi wami ɔ nɛ. Ma ngɔ Egipt ngɔ ha ngɛ o nane mi, konɛ o ye o he. Ma ngmɛɛ Sudan kɛ Seba hu a he.

Ezekiel 30:5

“Gbaa ke ta buli nɛ a bɔ mɛ apaa kɛ je Sudan, Lidia, Libia, Arabia, kɛ Kub ɔ, a ma kpata mɛ tsuo a hɛ mi, nɛ imi nitsɛ ye ni ɔmɛ ekomɛ hu maa nɔ ngɛ ta a mi.”

Daniel 11:43

E maa ngɔ Egipt june tsuo, sika tsu, sika hiɔ, kɛ ní kpakpahi nɛ a he jua wa. Libia kɛ Sudan ma sɔmɔ lɛ.

Nahum 3:9

Tebes nɛ yeɔ Sudan kɛ Egipt tsuo a nɔ; nɛ e he wa kaa nɔ́ ko. Put kɛ Libia piɛ e huɛmɛ ɔmɛ a he kɛ hwu ta a!

Kpojemi 9:16

A tsɔɔ mi okpɔngɔ ta buli ɔmɛ a yibɔ; a hiɛmi ji ayɔ lafa enyɔ.

Manyadali 4:13

Sisera bua e dade ta zugba lɛ lafa nɛɛ ɔ, kɛ e we bi ɔmɛ tsuo a nya, nɛ a hia kɛ je Haroshet ngɛ ma je li ɔmɛ a zugba a nɔ kɛ ho Kishon pa a nya ya.

Manyadali 6:5

Ke a ma a, a hɛɛɔ a lohwehi, kɛ a bo tsuhi kɛ baa, nɛ a he hiɛɛ babauu kaa baalɛhi. A kɛ a we afukpɔngɔ ɔmɛ ɔ, nɔ ko nɔ ko nyɛ we mɛ kanemi; nɛ ke a ba a, a kpataa nɔ́ tsuaa nɔ́ hɛ mi ngɛ zugba a nɔ.

Samuel I, 13:5

Filisti bi ɔmɛ bua a he nya, konɛ a kɛ Israel nɛ hwu; a hɛɛ ta zugba lɛ akpe nyingmi etɛ, okpɔngɔ ta buli akpe ekpa, kɛ tabohi babauu nɛ a li nya. A ya bua a he nya ngɛ Mikmash ngɛ Bet Aven beleku je.