Kronika I, 26:29 - BAIBLO ALOO NGMAMI KLƆUKLƆU Ɔ

²⁹ A hla Kenania kɛ e bimɛ ɔmɛ kɛ je Izhar nina a kpɛti, nɛ a pee mɛ Israel ma a nɔ hyɛli kɛ kojoli.

Kronika I, 26:29 ပူးပေါင်းရင်းမြစ်များ

Nehemia 11:16

Shabetai kɛ Yozabad ji Levi bi nɛ hyɛɛ Mawu we ɔ kpo nɔ je ní tsumi ɔ nɔ.

Kronika I, 23:4

David dla ní tsumi nɛ ɔmɛ ngɔ ha mɛ: nihi akpe nyingmi enyɔ kɛ eywiɛ maa hyɛ Yawɛ we ɔ mami ní tsumi ɔ nɔ, akpe ekpa ma tsu ma ní nɛ a maa kojo,

Kronika II, 34:13

Levi bi kpa komɛ hu hyɛɛ tlomi tlooli, kɛ ní tsuli kpahi a nɔ. A ti ni komɛ hu ji womi ngmali, ma ní tsuli, kɛ agbo nya buli.

Kronika I, 26:23

A dla ní tsumi ɔmɛ ekomɛ ngɔ ha Amram, Izhar, Hebron kɛ Uziel nina a hulɔ.

Kronika I, 23:12

Kohat ngɛ binyumuhi eywiɛ. A biɛhi ji Amram, Izhar, Hebron, kɛ Uziel.

Mose IV, 3:27

Wekuhi nɛ peeɔ Kohat we puɔ nya ji Amram, Izhar, kɛ Hebron, kɛ Uziel.

Kronika I, 26:28

Nɔ́ tsuaa nɔ́ nɛ a gbaa nɔ kɛ to konɛ a kɛ tsu ní ngɛ Yawɛ we ɔ, Shelomit kɛ e we mi bi ɔmɛ ji ni nɛmɛ nɛ a hyɛɛ nɔ. Ní ɔmɛ ekomɛ ji nike ní nɛ gbalɔ Samuel, Matsɛ Saul, Kish bi ɔ, Ner bi Abner, kɛ Zeruya bi Yoab ngɔ kɛ ba.

Mose V, 17:8

“E ma nyɛ maa ba mi kaa sane komɛ a yemi kɛ he buámi nya maa wa tsɔ ha ma amɛ eko mi kojoli, kaa weto ní blɔ nya he pleemi sane komɛ kikɛ, loo kaa a plaa nɔ ko, loo sane komɛ nɛ a ngɛ mi hlae, konɛ a na kaa pe a je blɔ gbe nɔ ko nɛ e gbo ɔ, loo a li be nɛ a fia lɛ nɔ́ nɛ e gbo. Ke e ba lɛ ja a, nyɛɛ ya he kake ɔ nɛ Yawɛ, nyɛ Mawu ɔ to nɛ a ja lɛ ngɛ ɔ.

Mose V, 17:9

Nyɛɛ ngɔ nyɛ sane ɔ kɛ ya pue osɔfo ɔmɛ nɛ ji Levi bi ɔmɛ, kɛ kojolɔ nɛ ngɛ ní tsue jamɛ a be ɔ mi ɔ a hɛ mi, konɛ a buá he.

Kronika I, 27:8

Asafo kuu enuɔne ɔ nyatsɛ ji Izhar nina Shamhut. E we bi akpe nyingmi enyɔ kɛ eywiɛ tsuɔ ní ngɛ nyɔhiɔ enuɔne ɔ mi daa jeha.