Kolosebi 2:16 - BAIBLO ALOO NGMAMI KLƆUKLƆU Ɔ

¹⁶ Lɔ ɔ he ɔ, nyɛ ko ha nɔ ko nɛ wo nyɛ mlaa ngɛ nɔ́ nɛ nyɛ maa ye, kɛ nɔ́ nɛ nyɛ maa nu he, aloo ngɛ nyami be, Nyɔhiɔhe nyami be, kɛ Hejɔɔmi ligbi he.

Somi He Ɔ

¹⁶ Lɔ ɔ he ɔ nyɛ ko ha nɛ nɔ ko nɛ kojo nyɛ ngɛ ni yeni, loo ni numi, loo nyami ligbi, loo hluami he, loo Hejɔɔmi Ligbihi a blɔfami,

Kolosebi 2:16 ပူးပေါင်းရင်းမြစ်များ

Matsɛmɛ II, 4:23

E huno ɔ bi lɛ ke, “Mɛni he je o yaa Mawu nɔmlɔ ɔ ngɔ mwɔnɛ ɔ? Tsa pi Nyɔhiɔhe nyami be, aloo Hejɔɔmi ligbi ji mwɔnɛ ɔ.” E he nɔ ke, “E pee we nɔ́ ko!”

Kronika I, 23:31

kɛ be tsuaa be nɛ a maa sã sami bɔ ha Yawɛ ɔ, Hejɔɔmi ligbi jio, Nyɔhiɔhe nyami be jio, nyami be kpa amɛ jio. Ke be su kɛ ha ní tsumi nɛ ɔmɛ a tsumi ɔ, Levi bi abɔ nɛ hia kaa a ya tsu ní ɔ, yaa nɛ a ya tsuɔ ngɛ mlaa a nya.

Kronika II, 31:3

Matsɛ ɔ nitsɛ ha lohwehi nɛ a kɛ sã sami bɔhi daa mɔtu kɛ gbɔkuɛ. E ha lohwehi nɛ a kɛ sã bɔ Hejɔɔmi ligbi, Nyɔhiɔhe nyami be, kɛ nyami be kpahi kaa bɔ nɛ Yawɛ mlaa a tsɔɔ ɔ.

Nehemia 10:31

Ke nibwɔhi ba jua niye ní, loo nɔ́ kpa ko ha wɔ ngɛ Hejɔɔmi ligbi ɔ nɔ, loo nyami be kpa ko mi ɔ, wa be hee. Daa jeha kpaago ɔ, wa be ngmɔ hue. Jehanɛ hu, hiɔhi nɛ nihi hɛɛ wɔ ɔ tsuo wa be jee hu; wa maa ngɔ kɛ ke mɛ.

Nehemia 10:33

Wɔ tsuo wa maa ngɔ ní nɛ ɔmɛ kɛ ba nɛ a kɛ sɔmɔ ngɛ Yawɛ we ɔ: abolo klɔuklɔu ɔ, niye ní bɔ nɛ a sãã daa ligbi ɔ, lohwehi nɛ a kɛ sãã bɔ daa ligbi ɔ, bɔ klɔuklɔu ɔmɛ nɛ a sãã Hejɔɔmi ligbi ɔmɛ ɔ, kɛ Nyɔhiɔhe nyami be ɔ, kɛ nyami be kpa amɛ a nɔ ɔ. Wa ma ha níhi nɛ a kɛ sãã bɔ klɔuklɔu kpa amɛ hulɔ kaa yayami pami bɔ nɛ a kɛ kpataa Yawɛ ha Israel kikɛ nɛ ɔ, kɛ nɔ́ ko saisaa nɛ he hia nɛ a kɛ ma sɔmɔ ngɛ wa Mawu ɔ we ɔ.

Nehemia 8:9

Benɛ ma a tsuo nu mlaa a mi munyu ɔmɛ ɔ, a wo yana. Se Nehemia, amlaalo ɔ, kɛ osɔfo Ezra, mlaa tsɔɔlɔ ɔ, kɛ Levi bi ɔmɛ nɛ ngɛ mlaa a sisi tsɔɔe ɔ de ma a tsuo ke, “Mwɔnɛ ligbi nɛ ɔ ji ligbi klɔuklɔu ha Yawɛ, nyɛ Mawu ɔ. Lɔ ɔ he ɔ, nyɛ ko ye kɔmɔ, nɛ nyɛ ko wo yana.

La 42:4

Ke i kai bɔ nɛ nyami be ɔmɛ a mi ɔ, i nyɛɛɔ nihi babauu a hɛ kɛ poo si kɛ yaa Mawu we ɔ, nɛ i kɛ ma kpekpemi ɔ tsuo wa hwɔɔ lele, nɛ wa laa sina lahi kɛ jeɔ mo Mawu, o yi ɔ, ye tsui yeɔ wawɛɛ.

La 81:3

Nyɛ kpa titimati wa nyami ligbi ɔmɛ tsuo, be mi nɛ nyɔhiɔ da, kɛ be mi nɛ nyɔhiɔ ɔ wa.

Yesaya 1:13

Se nami ko be he kaa nyɛ maa ngɔ nyɛ bɔ ɔmɛ kɛ ba hu. Nyɛ tsopa kɛ e he via nɛ nyɛ ngɛ sãe ɔ ngɛ fu jee kɛ ngɛ mi woe. I hla we nyɛ Nyɔhiɔhe nyami be ɔmɛ, nyɛ Hejɔɔmi ligbi ɔmɛ, kɛ behi nɛ nyɛ peeɔ kpe kɛ jaa imi, nyɛ Mawu ɔ hu; yayamihi nɛ nyɛ ngɛ pee ɔ puɛ enɛ ɔmɛ tsuo.

Ezekiel 4:14

Kɛkɛ nɛ i de ke, “Kpaoo, Nyɔmtsɛ Yawɛ, i ble we ye he; kɛ je ye jokuɛwi a si hluu kɛ ba su be nɛ ɔ mi tsuo ɔ, nɔ́ ko nɛ lɛ nitsɛ e gbo, loo lohwe ko tsɔtslɔɔ mi ɔ, i yi hyɛ; jehanɛ hu, lo nɛ a hiɔ yɛ ye nya mi hyɛ.”

Ezekiel 45:17

Sami bɔ ɔmɛ, niye ní bɔ ɔmɛ, kɛ wai bɔ ɔmɛ nɛ a kɛ baa Nyɔhiɔhe nyami be, Hejɔɔmi ligbi, kɛ nyami be kpa amɛ tsuo nɛ Israel bi ɔmɛ yeɔ ɔ, ganɔ ɔ blɔ nya ji kaa e ha mɛ. Lɛ nɔuu lɛ e haa bɔ nɛ ɔmɛ nɛ a kɛ peeɔ kusumi kɛ kpataa Yawɛ kɛ haa Israel ma a: yayami pami bɔ, niye ní bɔ, sami bɔ, kɛ tue mi jɔmi bɔ.”

Mose III, 16:31

Jamɛ a ligbi ɔ maa pee Hejɔɔmi ligbi nɛ a be nɔ́ ko nɔ́ ko tsue; nɔ tsuaa nɔ maa ha hwɔ. Mlaa nɛ ɔmɛ fɔɔ si ha mɛ kɛ yaa neneene.

Amos 8:5

Nyɛ biɔ nyɛ sibi ke, “Mɛni be Nyɔhiɔhe nyami be ɔ maa ta nɛ waa jua blɛfo? Mɛni be Hejɔɔmi ligbi ɔ maa be, nɛ wa bɔni ngma juami ekohu?” Nyɛ yaa nɔ nɛ nyɛ deɔ ke, “Wa ma tsake wa sɛni tɛ ɔmɛ, kɛ ní juami ní kpa amɛ, nɛ wa maa sisi ni nɛmɛ nɛ waa kɛ mɛ yeɔ jua a.

Mose IV, 10:10

Jehanɛ, ngɛ nyɛ nyami ligbihi, kɛ ligbi kpahi nɛ a to ɔ, kɛ Nyɔhiɔhe nyami be ɔmɛ hu nyɛ kpa titimati ɔmɛ be mi nɛ nyɛ ngɛ sami bɔ ɔmɛ, kɛ tue mi jɔmi bɔ ɔmɛ sãe. Nɔ́ nɛ ɔ ma ha nɛ nyɛ Mawu ɔ ma kai nyɛ. Imi ji Yawɛ, nyɛ Mawu ɔ nɛ.”

Mateo 15:11

Pi nɔ́ nɛ yaa nɔ nya mi ɔ nɛ bleɔ nɔ; mohu ɔ, nɔ́ nɛ jee nɔ nya a lɛ bleɔ nɔ.”

Marko 7:19

ejakaa tsa pi e tsui mi nɛ e sɛɔ, se mohu e muklii mi nɔ́ ɔ yaa, nɛ e ya jeɔ lɛ pueɔ he.” Yesu de enɛ ɔ kɛ tsɔɔ kaa ngma tsuaa ngma he tsɔ.

Ni Tsumi 15:20

Mohu ɔ, waa ngma mɛ womi ke a ko ye niye ní nɛ he tsɔ we, a ko ye wɔ nya lo, a hyɛ a he nɔ saminya, nɛ a ko fiɛ nyumu kɛ yo yakayaka fiɛmi. A nyɛ lohwehi nɛ a kika a kuɛ kɛ gbe mɛ, nɛ a ko ye lo nɛ muɔ ngɛ mi kɛ mwɔɔ.

Romabi 14:10

Lɛɛ mɛni he je moo o kojoɔ o nyɛmi? Aloo pohu mɛni he je nɛ o gbeɔ o nyɛmi he guɛ ɔ? Mawu hɛ mi wɔ tsuo wa maa da si ngɛ nɛ e maa kojo wɔ.

Galatabi 4:10

Nyɛ toɔ be titli komɛ, ligbi komɛ, nyɔhiɔ komɛ, kɛ jeha komɛ nɛ nyɛ kɛ peeɔ kusumi.

Kolosebi 2:20

Nɛ Kristo gbo ɔ, nyɛ hu nyɛ gbo, nɛ a kpɔ nyɛ kɛ je mumihi nɛ yeɔ je ɔ nɔ ɔ a dɛ mi. Mɛni he je mɔ nɛ nyɛ peeɔ nyɛ ní kaa nɔ́ nɛ nyɛɛ kɛ je ɔ ngɛ bɔe kɛ mwɔɔ ɔ? Mɛni he je nyɛ haa a pa woɔ nyɛ mlaa ke,

Hebribi 13:9

Nyɛ ko ha ni komɛ nɛ ngɔ tsɔɔmi slɔɔtoslɔɔtohi nɛ kɛ sane kpakpa a kɔ we nɛ je nyɛ kɛ je blɔ kpakpa a nɔ. Mawu dloomi ɔ lɛ woɔ wa mumi mi he wami; se mlaahi nɛ kɔɔ niye ní he ɔ, se nami ko kulaa be he kɛ ha nihi nɛ yeɔ nɔ ɔ.

Hebribi 9:10

ejakaa niye ní, kɛ dã, kɛ he tsumi kusumihi pɛ a he nɛ e kɔɔ. Enɛ ɔmɛ tsuo ɔ, he lo blɔ fa mi níhi nɛ maa hi si kɛ yaa si be nɛ Mawu maa pee níhi tsuo ehe kɛkɛ.

Yakobo 4:11

Ye nyɛmimɛ, nyɛ ko tu nyɛ sibi a he munyu yaya. Nɔ nɛ tuɔ e nyɛmi he nyumu yaya a, mlaa a e ngɛ munyu tue kɛ ngɛ sie ɔ nɛ; nɛ nɔ tsuaa nɔ nɛ kojoɔ e nyɛmi ɔ, e ngɛ mlaa a kojoe. Ke nɔ ko tuɔ munyu kɛ siɔ mlaa a, pi mlaa a nɔ yelɔ ji lɛ, se mohu e peeɔ mlaa a kojolɔ.

Samuel I, 20:18

Yonatan de David ke, “Hwɔɔ ji Nyɔhiɔhe nyami be ɔ nɛ. A ma bi o si, ejakaa o sɛ ɔ maa fɔ si gu.

Samuel I, 20:5

David de Yonatan ke, “Hyɛ, hwɔɔ ji Nyɔhiɔhe nyami be ɔ nɛ, nɛ jinɛ e sa kaa i kɛ matsɛ ya ye ní. Se ha nɛ ma ya laa ye he ngɛ nga a nɔ kɛ yaa si ligbi etɛne ɔ gbɔkuɛ nya si.