Hosea 9:4 - BAIBLO ALOO NGMAMI KLƆUKLƆU Ɔ

⁴ Israel bi be nyɛe maa ngɔ dã ba ha Yawɛ, nɛ ní nɛ a maa ye ɔ ma ble mɛ kaa ya sisi niye ní. A ma nyɛ maa ye kɛ gbe hwɔ kɛkɛ, pi kaa a maa ngɔ kɛ ya sã bɔ ngɛ Yawɛ we ɔ.

Hosea 9:4 ပူးပေါင်းရင်းမြစ်များ

Hosea 8:13

A gbeɔ lohwehi kɛ sãã bɔ kɛ haa mi, nɛ lo ɔ nɛ a kɛ ba sã bɔ ɔ lɛɛ mɛ nitsɛmɛ a yeɔ. Se imi Yawɛ, ye bua jɔɛ a he. Ma kai a he yayami ɔmɛ, nɛ ma gbla a tue kokooko ngɛ he; ma kpale mɛ kɛ ho Egipt ya!

Yeremia 6:20

Tsopa kɛ e he via nɛ a kɛ jeɔ Sheba kɛ ba haa mi ɔ, mɛni ma pee he? Nu he via nɛ a kɛ jeɔ ma se lokoo kɛ ba haa mi ɔ, i hla we. I be a sami bɔ ɔmɛ ngɔe; bɔ kpa amɛ hu i sume.

Mose V, 26:14

Benɛ i ngɛ kɔmɔ yee ɔ, i yi mi dlami nyɔngma mi kake ɔ eko; benɛ ye he tsɔ we ɔ, i ngɔɛ eko kɛ ji ye we ɔ mi; jehanɛ hu, i kɛ eko sɛ̃ bɔ ha gbogboe ko. Niinɛ, Yawɛ, ye Mawu, i bu mo tue. Mlaahi tsuo nɛ o wo mi nɛ kɔɔ mi dlami nyɔngma mi kake ɔ he ɔ, i ye nɔ.

Yoel 2:14

Alini, Yawɛ, nyɛ Mawu ɔ, ma tsake e susumi ngɛ nyɛ he, nɛ e maa gbaa nyɛ kɛ niba ní babauu. Ke e ba mi ja a, nyɛ maa sã niye ní bɔ ha lɛ, nɛ nyɛ maa ngɔ wai kɛ piɛ he.

Hosea 3:4

Kikɛ nɛ ɔ Israel bi hu maa hi si be babauu nɛ a be matsɛmɛ, loo hɛ mi nyɛɛli. Bɔ sami, kɛ tɛ titimahi a jami se maa po; nɛ amagahi, kɛ níhi nɛ a kɛ klaa a, ekoeko be si hie hu.

Ezekiel 24:17

A ko nu o huu fami he; se fi o yi duku, nɛ o wo tokota. Koo ngɔ nɔ́ kɛ ha o nya nɔ, nɛ koo ye ya nɔ niye ní kɛ tsɔɔ kaa o ngɛ ya nyɛe.”

Yohane 6:51

Imi ji abolo nɛ je hiɔwe nɛ haa nɔ wami. Nɔ nɛ maa ye kikɛmɛ a abolo nɛ ɔ eko ɔ maa hi si kɛ maa ya neneene. Abolo nɛ ma ha lɛ ɔ ji imi nitsɛ ye he lo nɛ i ngɔ kɛ ha, bɔ nɛ pee nɛ je ɔ tsuo yi nɛ na wami.”

Malaki 2:13

Nɔ́ kake hu nɛ nyɛ peeɔ ji kaa nyɛ nyaa awe, nyɛ woɔ yana, nɛ nyɛ foɔ vo nyu kɛ pueɔ Yawɛ bɔ sami la tɛ ɔ nɔ; ejakaa nike ní nɛ nyɛ kɛ baa Yawɛ hɛ mi ɔ, e he we hu.

Amos 5:22

Nyɛ sami bɔ ɔmɛ, kɛ niye ní bɔ ɔmɛ ɔ, i be ngɔe. Lohwehi nɛ nyɛ je blɔ lɛ mɛ nɛ a wo zɔ nɛ nyɛ maa ngɔ kɛ ba sã tue mi jɔmi bɔ ha mi ɔ, i be hee.

Yoel 1:13

Nyɛ osɔfohi nɛ nyɛ sɔmɔɔ ngɛ bɔ sami la tɛ ɔ he, nyɛɛ ha kpekpe ya bo, nɛ nyɛɛ wo yana! Nyɛɛ ya Mawu we ɔ mi, nɛ nyɛ ya ye kɔmɔ nyɔnyɔɔnyɔ tsuo. Ejakaa niye ní be ɔ, wai hu be nɛ nyɛɛ kɛ maa sã bɔ ha nyɛ Mawu ɔ.

Ezekiel 24:22

Kɛkɛ ɔ, nyɛ maa pee kaa bɔ nɛ i pee nɛ ɔ: nyɛ be nɔ́ ngɔe kɛ ha nyɛ nya nɔ, nɛ nyɛ be ya nɔ ní hu yee.

Yesaya 66:3

“Ma mi bi ɔmɛ peeɔ nɔ́ nɛ mɛ nitsɛmɛ a suɔ. E si we mɛ kpu kaa a maa ngɔ na, loo nɔmlɔ adesa kɛ sã bɔ. Slɔɔto ko be mi ke a ngɔ to kɛ sã bɔ, loo a ku gbe kuɛ kɛ pee. Slɔɔto be mi ke a ngɔ ngma kɛ ba sã niye ní bɔ, aloo a ngɔ kpotoo muɔ kɛ ba. Tsopa kɛ e he via a ngɛ sãe jio, amaga nɛ a ngɛ jae jio, slɔɔto ko kulaa be mi ha mɛ. Musu ní nɛ ɔmɛ a he a nyaa.

Yesaya 57:6

Nyɛ ya ngɔɔ dongo tɛhi kɛ jeɔ kɔ̃ mi, nɛ nyɛ jaa mɛ. Nyɛ ngɔɔ wai kɛ sãã bɔ kɛ haa tɛhi; nɛ nyɛ ngɔɔ ngma hu kɛ sãã bɔ ha mɛ ja nɔuu. Ní nɛ ɔmɛ tsuo nɛ nyɛ peeɔ ɔ, anɛ nyɛ susuu kaa ye bua maa jɔ he?

Mose IV, 28:2

“Mo fa Israel bi ɔmɛ ke, ‘Ye nike ní nɛ ji ye niye ní bɔ nɛ o kɛ la sãã, nɛ jeɔ via ha mi ɔ, nyɛ hɛ nɛ hi nɔ nɛ nyɛɛ ngɔ kɛ ba ha mi ngɛ be nɛ sa mi.’

Mose III, 21:21

Osɔfo Aaron nina ko nɛ kpa ngɛ e he be he blɔ kaa e ngɔɔ niye ní bɔ kɛ ba haa Yawɛ.

Mose III, 21:17

e de Aaron ke, “Ngɛ yi nɔ ɔmɛ tsuo a mi ɔ, o nina ko nɛ kpa ngɛ e he ko hla kaa e maa ngɔ Yawɛ niye ní bɔ kɛ ba ha mi.

Mose III, 21:8

Ma a nɛ bu osɔfo kaa nɔ klɔuklɔu, ejakaa lɛ nɛ e ngɔɔ niye ní bɔ ɔmɛ kɛ ba haa mi ɔ nɛ. Imi ji Yawɛ; i ngɛ klɔuklɔu, nɛ i peeɔ ye ma a klɔuklɔu.

Mose III, 21:6

Osɔfo tsuaa osɔfo nɛ pee e he klɔuklɔu, nɛ e ko pue ye hɛ mi si; ejakaa lɛ nɛ sãã niye ní bɔ ɔ haa imi Yawɛ, lɔ ɔ he ɔ, e sa nɛ e pee e he klɔuklɔu.

Mose III, 17:11

Muɔ ji nɔ́ nɛ haa he lo tsuaa he lo wami. Lɔ ɔ he nɛ Yawɛ fa ke a ngɔ muɔ kɛ pue bɔ sami la tɛ ɔ nɔ nɛ a kɛ kpa musu ɔ nɛ. Muɔ ji nɔ́ nɛ a kɛ kpaa musu, ejakaa wami ngɛ mi.

Mose II, 40:23

nɛ e to abolo klɛdɛɛ ɔ nɛ a kɛ maa Yawɛ hɛ mi ɔ kɛ ma nɔ kaa bɔ nɛ Yawɛ fa lɛ ɔ.

Mose IV, 19:11

“Nɔ tsuaa nɔ nɛ maa ta nɔ gbogboe he ɔ, e ble e he; nɛ e he tsɔ we kɛ yaa si ligbi kpaago.

Mose IV, 4:7

“Okplɔɔ ɔ nɛ a kɛ abolo klɛdɛɛ nɛ a kɛ maa Yawɛ hɛ mi ɔ maa nɔ ɔ, á ngɔ bo bluu kɛ ha nɔ loko a ngɔ plɛɛtehi, kahi nɛ a kɛ tsopa kɛ e he via kɛ bɔhi woɔ a mi ɔ, kɛ kpluhi nɛ a kɛ wai bɔhi woɔ a mi ɔ kɛ ma nɔ.

Mose II, 29:40

Ngɔɔ ngma mamu tsimi kake nɛ o kɛ nu nɛ a si tɔ kake futu mi ɔ kɛ piɛ kekleekle jijɔ ɔ he nɛ o kɛ sã bɔ ɔ, konɛ o ngɔ wai tɔ kake kɛ sã wai bɔ.

Yeremia 16:7

Ke nɔ ko suɔlɔ gbo ɔ, nɔ ko nɔ ko kɛ lɛ be ní yee, nɛ nɔ ko nɔ ko kɛ lɛ be ní nue kɛ wo lɛ bua. Ke nɔ ko tsɛ, loo e nyɛ tete po gbo ɔ, nɔ ko nɔ ko be kɔmɔ yee ha lɛ.

Daniel 1:8

Daniel muɔ e yi mi kpɔ kaa e be matsɛ ɔ niye ní ɔ yee, nɛ wai ɔ hu e be nue, bɔ nɛ pee nɛ e ko ble e he. Lɔ ɔ he ɔ, e kpa Ashpenaz pɛɛ ke e ko nyɛ e nɔ ke e ye níhi nɛ a tsɔɔ kaa a ye ɔ doo.

Yoel 1:9

Niye ní kɛ wai nɛ a kɛ ba sãã bɔɔ se po ngɛ Yawɛ we ɔ mi; lɔ ɔ he ɔ, osɔfo ɔmɛ nɛ sɔmɔɔ ngɛ Yawɛ we ɔ ngɛ kɔmɔ yee.

Hosea 7:16

A je ye se, nɛ mawu nɛ be he wami ko he wami ko ɔ, lɔ ɔ se a ngɛ nyɛɛe. A ngɛ kaa kɛ̃ɛ̃ nɛ kpɛ̃. A ma kpata a ma nimeli ɔmɛ a hɛ mi, ejakaa a tuɔ munyu puu; nɛ Egipt bi kɛ nɔ́ nɛ ɔ maa ye a he fɛu.”