Hosea 7:14 - BAIBLO ALOO NGMAMI KLƆUKLƆU Ɔ

¹⁴ Ke a ngɛ kue fae ha mi ɔ, e ji a tsui mi; awe sɔuu a hii nyae ngɛ sa mi. Ke a ngɛ sɔlee nɛ ma ha mɛ blɛfo kɛ dã a, a kɛ nɔ́ poɔ a he basabasa kaa wɔ jali. Atuã tsɔli!

Hosea 7:14 ပူးပေါင်းရင်းမြစ်များ

Mose II, 32:6

E nɔ jena makɛ mla a, ma a te si nɛ a sã sami bɔhi, nɛ a kɛ tue mi jɔmi bɔhi hu ba. Ma a pue si, nɛ a ye ní, nɛ a nu ní; nɛ lɔ ɔ se ɔ, a fiɛ yo kɛ nyumu yakayaka fiɛmihi.

Yesaya 29:13

Nyɔmtsɛ ɔ ke, “Ni nɛ ɔmɛ ke a ngɛ mi jae, se sisi numi ko be munyu ɔmɛ nɛ a ngɛ tue ɔ mi, ejakaa a tsui ngɛ he kpa kulaa. Nimli adesahi a mlaahi, kɛ blema sanehi nɛ a kase ngɔ wo a yi mi nɛ a deɔ kɛ a nya kɛkɛ ɔ ji nɔ́ nɛ a tsɛɛ ke jami.

Yesaya 52:5

Jehanɛ, ngɛ Babilonia hu, jamɛ a amimi ɔ nɔuu a ye nyɛ; a pee nyɛ nyɔguɛhi nɛ a wui hiɔ ko ngɛ nyɛ he. Nihi nɛ ye nyɛ nɔ ɔ fĩa, nɛ a jɛ nyɛ saminya kɛ gbe ye he guɛ.

Yesaya 65:14

Ye sɔmɔli ɔmɛ ma la, nɛ a bua maa jɔ a he, se nyɛɛ lɛɛ nyɛ ma kpa huhui, nɛ nyɛ maa ye nyɛ tsui wawɛɛ; nyɛ maa ye kɔmɔ, nɛ nyɛ ma fo ya mɔbɔmɔbɔ.

Yeremia 12:2

O toɔ mɛ si kaa bɔ nɛ a duɔ ní; a tsɛ̃ɛ̃ sipoku, a waa, nɛ a woɔ yiblii. A woɔ o biɛ ta ji nɛ, se a tsui be o he.

Yeremia 3:10

Ní nɛ ɔmɛ tsuo a se ɔ, Yuda, Israel nyɛmiyo yaholɔ ɔ kpale we kɛ bɛ ye ngɔ kɛ e tsui tsuo; e ní peemi níhi tsɔɔ we kaa e tsake. Imi, Yawɛ lɛ i de.”

Kɔmɔ Yemi 2:18

Yerusalem lee, moo fa kue boboobo nɛ o tsɛ Nyɔmtsɛ ɔ! Ha nɛ o vo nyu ɔmɛ nɛ a hi bee kaa pa nyɔ kɛ pia. Koo jɔɔ ya fomi, nɛ ko kpa kɔmɔ yemi hulɔ.

Hosea 13:16

A maa gbla Samaria tue, ejakaa e tsɔ ye hɛ mi atuã. Ta ma kpata ma a mi bi ɔmɛ a hɛ mi; a maa ngɔ a bimwɔwi ɔmɛ ngɔ fiaa si, nɛ a kɛ klaate ma fɛ yihɔyi ɔmɛ a mi mi.”

Hosea 13:6

Se benɛ nyɛ ye ní nɛ nyɛ tɔ saminya a, nyɛ wo nyɛ he nɔ, nɛ nyɛ hɛ je ye nɔ.

Hosea 13:9

“Israel ma, ma kpata nyɛ hɛ mi pɛsɛpɛsɛ! Nɛ, mɛnɔ ma nyɛ ma kpɔ nyɛ?

Hosea 3:1

Yawɛ de mi ekohu ke, “Yaa nɛ o ya hla yo gba puɛlɔ, nɛ o suɔ lɛ, kaa bɔ nɛ imi hu i suɔ ye ma Israel ɔ. Ye ma Israel kua mi; a ya ngɛ mawu kpahi a se nyɛɛe, nɛ a kɛ wai yiblii gbigbli sãã bɔ kɛ haa mɛ lɛɛ, se kɛ̃, i suɔ mɛ.”

Hosea 8:2

A tsɛɔ mi ke a Mawu; a deɔ ke ye ma ji mɛ, nɛ a le mi.

Amos 2:8

Ngɛ nyɛ jami he ɔmɛ tsuo ɔ, bohi nɛ ohiatsɛmɛ kɛ ba toɔ nyɛ awaba a, jamɛ a bo ɔmɛ a nɔ nyɛ hwɔɔ. Dã nɛ nyɛ nuɔ ngɛ imi Mawu, ye we ɔ ji dã nɛ nyɛ heɔ ngɛ nihi nɛ nyɛ bu mɛ fɔ ɔ a dɛ.”

Amos 8:3

Jamɛ a ligbi ɔ, yi ɔmɛ nɛ a hii lae ngɛ matsɛ we ɔ mi ɔ ma nya awe mohu. A ma sake ni gbogboehi babauu kɛ fɔ he tsuaa he dii, nɛ a be nɔ́ ko nɔ́ ko he nue.”

Mika 2:11

“Gbalɔ nɛ ma nɛ ɔ suɔ ji lakpatsɛ kɛ nɔ sisilɔ; nɔ nɛ ma de mɛ ke, ‘Ma gba nɛ wai kɛ da nɛ nya wa nɛ ba ha nyɛ.’

Zakaria 7:5

“Bi ni ɔmɛ tsuo, kɛ osɔfo ɔmɛ ke, nɛ a ha hwɔ daa nyɔhiɔ enuɔne ɔ, kɛ kpaanyɔne ɔ jeha nyingmi kpaago ɔ, imi a ha hwɔ ha lo?

Romabi 16:18

Ejakaa nimli kaa kikɛ nɛ ɔ, pi Kristo, wa Nyɔmtsɛ ɔ nɛ a ngɛ sɔmɔe. Se mɛ nitsɛmɛ a muklii mohu he mɔde nɛ a ngɛ bɔe. A kɛ munyu dɔkɔɔ gbeɔ nihi nɛ a juɛmi se ti we ɔ a yi mi, nɛ a sisiɔ mɛ.

Filipibi 3:19

Kikɛmɛ a nimli nɛ ɔmɛ ɔ, a ma kpata a hɛ mi kɛ maa ya neneene. Ejakaa mɛɛ lɛɛ a muklii ji a mawu nɛ a jaa. A nyaa zo níhi a he, nɛ je mi níhi pɛ a he a susuu.

Yakobo 4:3

Ke nyɛ kpa pɛɛ hu, nyɛ nine sui nɔ, ejakaa nyɛ yi mi tomi ɔmɛ hí; níhi nɛ ma ha nyɛ bua jɔmi pɛ he pɛɛ nɛ nyɛ kpaa.

Yakobo 5:1

Jehanɛ nyɛ niatsɛmɛ hu nyɛɛ bu tue! Nyɛɛ wo yana, nɛ nyɛ nya awe; ejakaa aywilɛho sanehi maa ba nyɛ nɔ!

Manyadali 9:27

A ya nga a nɔ nɛ a ya kplɔ wai yiblii ngɛ wai ngmɔ ɔmɛ a mi kɛ ba pee dã; nɛ a fiɛ nɛ a na bua jɔmi saminya. Lɔ ɔ se ɔ, a ya ye ní nɛ a nu dã ngɛ a mawu ɔ we ɔ; nɛ a jɛ Abimelek saminya ngɛ lejɛ ɔ.