Habakuk 2:3 - BAIBLO ALOO NGMAMI KLƆUKLƆU Ɔ

³ Ngmaa kɛ to; ejakaa be nɛ a ma tsu nɔ́ nɛ ɔ sui lolo. Se kɛ̃ ɔ, be ɔ ma, nɛ e be kɛe, nɛ nɔ́ nɛ ma je ngɔ tsɔɔ mo ɔ maa ba mi kokooko. E maa pee kaa nɔ́ nɛ e ma blɛuu tsɔ, se kɛ̃ ɔ, hyɛ́ blɔ. Ejakaa e maa ba mi kokooko, nɛ e be kɛe.

Habakuk 2:3 ပူးပေါင်းရင်းမြစ်များ

Matsɛmɛ II, 6:33

Benɛ e kɛ mɛ ngɛ munyu tue, nɛ e nya na we nɛ e nɔ si ɔ, matsɛ ɔ ba hia kpo; nɛ e de ke, “Haomi nɛ ɔ, Yawɛ ngɔ e je! Lɛɛ mɛni he i pa ngɛ Yawɛ mlɛe ma pee mɔ?”

La 102:13

O maa te si, nɛ o maa na Zion mɔbɔ. Be ɔ su nɛ o maa na lɛ mɔbɔ; be ɔ nɛ a to ɔ su.

La 27:14

Ngɔɔ o hɛ kɛ fɔ Yawɛ nɔ. Na tsui; o kɔni mi ko jɔ̃, nɛ e maa wo mo he wami. Ee, ngɔɔ o hɛ kɛ fɔ Yawɛ nɔ.

Mose II, 12:41

Nɛ jeha lafa eywiɛ kɛ nyingmi etɛ ɔ nyagbe ligbi ɔ tutuutu ɔ, Yawɛ tabo ɔmɛ tsuo je Egipt zugba a nɔ.

Yesaya 30:18

Se kɛ̃ ɔ, Yawɛ ngɛ mlɛe kaa e maa na nyɛ mɔbɔ; ejakaa nɔ́ nɛ da pɛ e peeɔ daa. Nihi nɛ ngɔɔ a hɛ ngɔ fɔɔ Yawɛ nɔ ɔ, a naa bua jɔmi.

Yesaya 7:4

De lɛ ke e ko ye Matsɛ Rezin, kɛ Siria bi ɔmɛ, kɛ Matsɛ Peka gbeye. A mi mi fumi ɔ ngɛ kaa la tso enyɔ nɛ a ngɛ tsoe tikɔɔ kɛkɛ.

Yesaya 8:17

Yawɛ ngɔ e hɛ mi ngɔ laa e ma a, se imi lɛɛ i heɔ yeɔ, nɛ i ngɔ ye hɛ ngɔ fɔ e nɔ.

Yeremia 27:7

Je ma amɛ tsuo ma sɔmɔ lɛ, kɛ e bi, kɛ e bibi hluu kɛ yaa si be maa su nɛ lɛ nitsɛ e ma a hɛ mi ma kpata. Jamɛ a be ɔ mi ɔ, lɛ hu e ma ba sɔmɔ je mahi nɛ a he wa, kɛ matsɛmɛ nguanguahi.

Ezekiel 12:25

Ejakaa imi Yawɛ nitsɛ, i kɛ mɛ maa tu munyu, nɛ nɔ́ nɛ ma de ɔ maa ba mi pɛpɛɛpɛ. A be be ɔ tsɛ̃e kɛ ya se hu. Nyɛ ma tue gboli, nyɛ yi nɔ nɛ ɔ nɔuu lɛ nɔ́ nɛ i de nɛ ɔ maa ba mi. Imi, Nyɔmtsɛ Yawɛ lɛ i de.”

Ezekiel 30:9

“Ke be ɔ nɛ ma kpata Egipt hɛ mi ɔ su ɔ, ma tsɔ nihi nɛ a he sɔɔ kɛ gu wo ɔ nɔ kɛ ya wo Sudan bi ɔmɛ nɛ a hɛ be a he nɔ ɔ he gbeye, konɛ sawale nɛ nu mɛ. Jamɛ a be ɔ su ta!”

Daniel 10:14

I ba, konɛ ma ba tsɔɔ mo nɔ́ nɛ maa ba o ma a nɔ hwɔɔ se, ejakaa nina a kɔɔ hwɔɔ se níhi a he.”

Daniel 11:27

Lɔ ɔ se ɔ, matsɛmɛ enyɔ nɛ ɔmɛ maa hi si ngɛ okplɔɔ kake he, nɛ a maa ye ní. A ma susu ní yayahi a he, nɛ a maa ye a sibi lakpa. Se nɔ́ nɛ a ngɛ hlae ɔ, a nine be nɔ sue; ejakaa be nɛ a to ɔ, be ɔ sui lolo.

Daniel 11:35

A maa gbe ní leli nɛ ɔmɛ a ti ni komɛ. Se se nami mohu maa je mi kɛ ba, ejakaa a maa tsukɔ ma a he. Nɔ́ nɛ ɔ maa ya nɔ hluu kɛ yaa si nyagbe be ɔ nɛ Mawu to ɔ maa ba.

Daniel 8:17

Kɛkɛ nɛ Gabriel ba da si ngɛ ye kasa nya. Benɛ e ba a, ye tsui po, nɛ i kɛ ye hɛ mi bu si. Gabriel de mi ke, “Nɔmlɔ adesa, na nɛ o le kaa nina a kɔɔ je mi nyagbe he.”

Daniel 8:19

E de mi ke, “Ke Mawu mi mi fu ɔ, nɔ́ nɛ maa nyɛɛ se ɔ, lɔ ɔ ma tsɔɔ mo nɛ ɔ nɛ. Nina a kɔɔ nyagbe be ɔ he.

Daniel 9:24

“Be nɛ Mawu to nɛ e maa gbla o ma a, kɛ Yerusalem tue kɛ yaa si ji jeha nyingmi kpaago totoe kpaago. Lɔ ɔ se ɔ, atuã tsɔmi, kɛ yayami peemi se maa po. A kɛ a he yayami ɔmɛ maa pa mɛ, nɛ a maa pee nɔ́ nɛ da kɛ maa ya neneene. Jamɛ a be ɔ mi ɔ, nina a, kɛ gbami ɔ maa ba mi, nɛ a maa pee Yawɛ we ɔ klɔuklɔu ekohu.

Mika 7:7

Se imi lɛɛ, ma hyɛ Yawɛ blɔ. I kɛ ye hɛ maa fɔ Mawu nɔ, ejakaa lɛ ji nɔ nɛ ma he ye yi wami. Ye Mawu ɔ maa bu mi tue.

Zefania 3:8

Yawɛ ke, “Lɔ ɔ he ɔ, nyɛɛ mlɛ keii kɛ yaa si ligbi ɔ nɛ ma te si nɛ ma po je ma amɛ a nya. I to ye yi mi kaa ma bua je ma amɛ, kɛ nɔ yemi he ɔmɛ a nya, nɛ ma je ye mi mi la nɛ nya wa a kpo kɛ tsɔɔ mɛ. Ejakaa ye mi mi la nɛ ɔ ma kpata je ɔ tsuo hɛ mi.

Mose IV, 23:19

Mawu ɔ, pi nɔmlɔ ji lɛ nɛ e ngɔɔ nya, pi nɔmlɔ ji lɛ nɛ e tsakeɔ e yi mi tomi. Anɛ ke e de nɔ́ ko ɔ, e pee we lo? Aloo e woɔ si nɛ e yi nɔ lo?

Luka 2:25

Jamɛ a be ɔ mi ɔ, nyumu ko ngɛ Yerusalem nɛ a tsɛɛ lɛ Simeon. Nyumu nɛ ɔ, nɔmlɔ kpakpa ji lɛ; e yeɔ Mawu gbeye, nɛ daa nɛ ɔ, e ngɛ blɔ hyɛe nɛ Mawu ba he Israel yi wami. Mumi Klɔuklɔu ɔ ngɛ e mi.

Ni Tsumi 1:7

Yesu de mɛ ke, “Be nɛ ní nɛ ɔmɛ maa ba mi ɔ, Tsaatsɛ pɛ lɛ to, nɛ e pi nyɛ blɔ nya kaa nyɛ maa le;

Ni Tsumi 17:26

Sisije ɔ, nɔmlɔ kake Mawu bɔ, nɛ kikɛmɛ a nɔ kake nɛ ɔ mi je ɔ mi nimli adesahi tsuo je. Lɛ nitsɛ lɛ e ha nɛ a gbɛ fĩa je ɔ mi he tsuaa he. Be, kɛ he nɛ ní ɔmɛ maa hi, kɛ a huzu nya a, lɛ nitsɛ lɛ e to pɛpɛɛpɛ loko e bɔ je ɔ.

Galatabi 4:2

E jokuɛwi a si ɔ, nihi hyɛɛ e kɛ gbosi ní ɔ tsuo nɔ hluu kɛ ya siɔ be nɛ e tsɛ to ɔ loko a ngɔɔ ní ɔmɛ kɛ woɔ e dɛ.

2 Petro 2:3

Kikɛmɛ a lakpa tsɔɔli nɛ ɔmɛ maa tu nyɛ munyuhi nɛ a po de, konɛ a kɛ sisi nyɛ nɛ a ná nyɛ he se. Se Mawu bu mɛ fɔ momo be saii ji nɛ, nɛ a hɛ mi kpatami be ɔ hu su ta.

2 Petro 3:9

Nɔ́ nɛ Nyɔmtsɛ ɔ wo si ke e maa pee ɔ, pi tsle nɛ e ngɛ toe ngɛ he kaa bɔ nɛ ni komɛ ngɛ susue ɔ; e tsui si kɛkɛ lɛ e ngɛ toe ha nyɛ. Ejakaa e sume nɛ nɔ ko nɔ ko hɛ mi nɛ kpata, se mohu nɔ tsuaa nɔ nɛ tsake e tsui.