Filipibi 2:12 - BAIBLO ALOO NGMAMI KLƆUKLƆU Ɔ

¹² Ye nyɛmimɛ nɛ i suɔ! E he hia wawɛɛ kaa amlɔ nɛ ɔ tete nɛ i be nyɛ ngɔ ɔ, nyɛɛ bu mi tue wawɛɛ pe kekle ɔ po. Nyɛɛ kɛ gbeye yemi, kɛ he domi blibliibli nɛ tsu ní wawɛɛ, konɛ a he nyɛ yi wami.

Somi He Ɔ

¹² Lɔ ɔ he ɔ, mamimɛ, kaa bɔ nɛ nyɛ buɔ tue daa nɛ ɔ, pi benɛ i kɛ nyɛ ngɛ ɔ kɛkɛ, se mohu titli ɔ, jehanɛ nɛ i be nyɛ ngɔ nɛ ɔ hu ɔ, nyɛɛ kɛ gbeye yemi kɛ he domi nɛ tsu nyɛ nitsɛmɛ nyɛ yi wami hemi ɔ he ni,

Filipibi 2:12 ပူးပေါင်းရင်းမြစ်များ

Ezra 10:3

Lɔ ɔ he ɔ, jehanɛ, nyɛ ha wa ka wa Mawu ɔ kita kaa wa maa wo kikɛmɛ a yi nɛ ɔmɛ, kɛ a bimɛ ɔmɛ tsuo pɛpɛɛpɛ blɔ. Nɔ́ nɛ mo, ye nyɔmtsɛ, kɛ nihi tsuo nɛ yeɔ Mawu mlaa a gbeye ma de ɔ, wa maa pee. Ee, wa maa ye Mawu mlaa a nɔ.

La 119:120

O he sawale nu mi, nɛ ye he ngɛ doe blibliibli; ejakaa o kojomi ɔmɛ ngɛ gbeye.

La 2:11

Nyɛ sɔmɔ Yawɛ kɛ gbeye yemi.

Abɛ Womi 10:16

Nɔ nɛ peeɔ kpakpa a, e yi ma na wami. Se nɔ nɛ peeɔ yayami ɔ, yayami ɔ kɛ̃ a kɛ maa wo lɛ hiɔ.

Abɛ Womi 13:4

Hejɔtsɛ ma hla kaa e na nɔ́ ko, se e nine be nɔ sue. Se nɔ nɛ tsuɔ ní lɛɛ nɔ́ tsuaa nɔ́ nɛ e ngɛ hlae ɔ, e naa.

Yesaya 66:2

Ye nine nya níhi ji ni nɛ ɔmɛ tsuo, lɔ ɔ he ɔ, ye níhi ji mɛ tsuo. Nihi nɛ baa a he si, nɛ a naa a he yayami nɛ a tsakeɔ a tsui, nihi nɛ yeɔ mi gbeye, nɛ a buɔ mi tue ɔ, mɛ ji nihi nɛ i suɔ.

Yesaya 66:5

Nyɛ ni nɛmɛ nɛ nyɛ yeɔ Yawɛ gbeye, nɛ nyɛ buɔ lɛ, nyɛ ta tue, “Akɛnɛ nyɛ yeɔ mi anɔkuale ɔ, nyɛ ma mi bi ɔmɛ ekomɛ nyɛɔ nyɛ, nɛ a kɛ nyɛ pee we nɔ́ ko nɔ́ ko, se nyɛ he fɛu mohu a yeɔ. A deɔ ke, ‘Yawɛ nɛ je e he wami kpo nɛ e he nyɛ yi wami, konɛ waa na bɔ nɛ nyɛ ma nya ha.’ Se mɛ nitsɛmɛ a hɛ mi si mohu a ma pue!

Mateo 11:12

Kɛ je be mi nɛ Yohane nɔ sɔlelɔ ɔ bɔni fiɛmi kɛ ba si mwɔnɛ ligbi nɛ ɔ, hiɔwe matsɛ yemi ɔ na nɔ́ wawɛɛ nitsɛ; nɛ yiwutsotsɛmɛ hlaa kaa a maa ngɔ pani nya.

Mateo 11:29

Nyɛɛ ngɔ ye kuɛpã tso ɔ ngɔɔ tloo, nɛ nyɛɛ kase mi; ejakaa ye he jɔ, nɛ i baa ye he si kɛ jee ye tsui mi. Ke nyɛ pee ja a, nyɛ ma na he jɔmi;

Ni Tsumi 16:29

Pamitsɛmɛ a nɔ hyɛlɔ ɔ de kɛ ngmlaa ke a ba ha lɛ kane; nɛ e sa fo kɛ sɛ tsu ɔ mi, nɛ e ya kpla si ngɛ Paulo kɛ Sila a nane nya kɛ he domi blibliibli.

Ni Tsumi 9:6

Tee si ngɛ zugba, nɛ o ya ma a mi, nɛ a maa tsɔɔ mo nɔ́ nɛ sa kaa o pee!”

Romabi 2:7

Nihi nɛ toɔ a tsui si kɛ peeɔ kpakpa daa, nɛ a kɛ hlaa hɛ mi nyami, kɛ bu ha a he konɛ a ko gbo ɔ, Mawu ma ha mɛ neneene wami.

1 Korintobi 15:58

Lɔ ɔ he ɔ, ye nyɛmimɛ nɛ i suɔ! Nyɛ fi si, nɛ nyɛɛ da si kpɛii. Ní tsumi nɛ nyɛ ngɛ tsue ha Nyɔmtsɛ ɔ, nyɛ tsu nɛ e ya nɔ saminya be tsuaa be. Ejakaa nyɛ nitsɛmɛ nyɛ le kaa dengme nɛ nyɛ ngɛ gboe ha Nyɔmtsɛ ɔ be yaka pee.

1 Korintobi 2:3

Lɔ ɔ he ɔ, be mi nɛ i ba nyɛ ngɔ ɔ, ye nɔmlɔ tso ɔ gbɔjɔ, nɛ sawale ha nɛ ye he ngɛ doe blibliibli.

1 Korintobi 4:14

I ngmɛ́ nyɛ ní nɛ ɔmɛ nɛ ma kɛ pue nyɛ hɛ mi si, se mohu nɛ ma kɛ tu munyu kɛ tsɔɔ nyɛ kaa imi nitsɛ ye bimɛ nɛ i suɔ.

2 Korintobi 7:15

Tito kaiɔ bɔ nɛ nyɛɛ kɛ he si bami, kɛ bu he lɛ atuu, kɛ bɔ nɛ nyɛ tsuo nyɛ pee klaalo nɛ ke e de nyɛ nɔ́ ko nɛ nyɛ peeɔ ɔ. Enɛ ɔ he ɔ, e na suɔmi babauu kɛ ha nyɛ pe kekle ɔ po.

Efesobi 6:5

Nyɛ nyɔguɛhi, nyɛɛ bu nyɛ je nɛ ɔ mi nyɔmtsɛmɛ ɔmɛ kɛ gbeye yemi kɛ he domi, nɛ nyɛ sɔmɔ mɛ kɛ nyɛ tsui tsuo kaa bɔ nɛ nyɛ peeɔ ha Kristo ɔ;

Filipibi 1:27

Lɔ ɔ he ɔ, nɔ́ nɛ hia pe kulaa ji, nyɛɛ ba nyɛ je mi kaa bɔ nɛ sane kpakpa a nɛ kɔɔ Kristo he ɔ tsɔɔ ɔ, konɛ i nyɛ ba na nyɛ jio, i bɛ́ jio, ma nu nyɛ he kaa nyɛ tsuo nyɛɛ kɛ juɛmi kake hɛɛ hemi kɛ yemi ɔ mi kpɛii kɛ ngɛ sane kpakpa a he plee.

Filipibi 1:29

Blɔ nya nɛ a ha nyɛ kaa Kristo we bi ɔ, nyɛɛ lɛɛ pi kaa nyɛ ma he ye kɛkɛ, se mohu kaa e he ɔ, nyɛ maa na amanehlu hulɔ.

Filipibi 1:5

ejakaa nyɛ sa sina kaa nyɛ piɛ ye he wawɛɛ ngɛ sane kpakpa a fiɛmi mi kɛ je sisije kɛ ba si amlɔ nɛ ɔ.

Filipibi 1:6

I heɔ yeɔ kaa Mawu, nɔ nɛ kɛ nyɛ je ní tsumi kpakpa nɛ ɔ sisi ɔ maa piɛ nyɛ he kɛ yaa si nyɛ maa gbe nya ligbi ɔ nɛ Yesu Kristo maa ba a.

Filipibi 2:19

Ke Nyɔmtsɛ ɔ maa suɔ ɔ, e be kɛe kulaa nɛ ma tsɔ Timoteo kɛ ba nyɛ ngɔ. Kɛkɛ ɔ, ke i nu nyɛ he ɔ, ye nɔ gbagba maa te.

Filipibi 4:1

Ye nyɛmimɛ, nyɛɛ hyɛ bɔ nɛ i suɔ nyɛ ha! Nyɛɛ hyɛ bɔ nɛ ye hɛ ngɛ jae ngɛ nyɛ he ha! Nyɛ lɛ nyɛ haa mi bua jɔmi; nyɛ ngɛ kaa jlasi ngɛ ye yi! Ye nyɛmimɛ nɛ i suɔ. Kaa nihi nɛ ngɛ Nyɔmtsɛ ɔ mi ɔ, kikɛ nɛ ɔ pɛ ji bɔ nɛ sa nɛ nyɛɛ ba nyɛ je mi.

Filipibi 4:15

Nyɛ Filipi bi, nyɛ nitsɛmɛ nyɛ le kaa sisije ɔ, benɛ a bɔni sane kpakpa fiɛmi, nɛ i pue nɔ kɛ je Makedonia a, asafo ko asafo ko kɛ mi bɔɛ huɛ ngɛ nɔ́ hami kɛ hemi mi, ja nyɛ pɛ ji asafo nɛ ye bua mi.

1 Tesalonikabi 1:3

Wa kaiɔ nyɛ ngɛ wa Tsɛ Mawu hɛ mi bɔ nɛ nyɛ hemi kɛ yemi ɔ jeɔ kpo ngɛ nyɛ ní tsumi mi, bɔ nɛ suɔmi nɛ nyɛ ngɛ ɔ ha nɛ nyɛ tsu ní wawɛɛ, kɛ bɔ nɛ nyɛ ngɔ nyɛ hɛ kɛ fɔ wa Nyɔmtsɛ Yesu Kristo nɔ wawɛɛ nitsɛ.

2 Timoteo 2:10

Enɛ ɔ he je nɛ i toɔ ye tsui si ngɛ nɔ́ tsuaa nɔ́ mi, nɛ i naa nɔ́ ngɛ nihi nɛ Mawu hla a a he, konɛ kɛ gu Kristo Yesu nɔ ɔ, a he mɛ hu a yi wami, nɛ a nine nɛ su hɛ mi nyami nɛ ngɛ kɛ yaa neneene ɔ nɔ.

Hebribi 12:1

Amlɔ nɛ ɔ, nyɛɛ hyɛ nimli kpekpemi nitsɛnitsɛ kaa bɔku nɛ tsu a hemi kɛ yemi he ní nɛ bɔle wɔ kɛ kpe. Lɔ ɔ he ɔ, níhi tsuo nɛ tsiɔ wɔ blɔ, titli ɔ, yayami peemi nɛ gblaa wɔ se ɔ, nyɛ ha waa ngmɛɛ he, konɛ waa kɛ hɛ mi miami nɛ tu fo nɛ fɔɔ si ngɛ wa hɛ mi ɔ.

Hebribi 4:1

Mawu wo si ke e ma ha wa ma ya jɔɔ wa he ngɛ he jɔɔmi he. Siwo nɛ ɔ ngɛ kɛ ha wɔ kɛ mwɔɔ. Lɔ ɔ he ɔ, nyɛ ha waa hyɛ nɛ hi, konɛ e ko ba mi kaa nyɛ ti nɔ ko ya nyɛ we nɛ e su lejɛ ɔ.

Hebribi 4:11

Lɔ ɔ he ɔ, nyɛ ha nɛ waa bɔ mɔde, konɛ wa nine nɛ su he jɔɔmi nɛ ɔ nɔ, nɛ nɔ ko kó gbo tue kaa mɛ, nɛ e ba laa blɔ.

Hebribi 5:9

Benɛ Mawu ha nɛ e hi kɛ pi si ɔ, e ba pee nɔ nɛ haa nihi nɛ buɔ lɛ tue ɔ naa neneene yi wami hemi.

1 Petro 2:11

Nyɛmimɛ nɛ i suɔ! I ngɔ sane nɛ ɔ kɛ ngɛ nyɛ hɛ mi fɔe kaa nibwɔhi, kɛ blɔ hiali ngɛ je nɛ ɔ mi. Nyɛ ko ya di he lo mi níhi a se, ejakaa a kɛ nyɛ klaa ngɛ ta hwue daa.

2 Petro 3:18

Se nyɛɛ ya nɔ nɛ nyɛɛ wa ngɛ dloomi ɔ mi, nɛ nyɛɛ le wa Nyɔmtsɛ, kɛ wa kpɔlɔ Yesu Kristo ɔ saminya. Á wo e hɛ mi nyami kɛ je be nɛ ɔ mi kɛ ya neneene! Amen.