Ezra 10:3 - BAIBLO ALOO NGMAMI KLƆUKLƆU Ɔ

³ Lɔ ɔ he ɔ, jehanɛ, nyɛ ha wa ka wa Mawu ɔ kita kaa wa maa wo kikɛmɛ a yi nɛ ɔmɛ, kɛ a bimɛ ɔmɛ tsuo pɛpɛɛpɛ blɔ. Nɔ́ nɛ mo, ye nyɔmtsɛ, kɛ nihi tsuo nɛ yeɔ Mawu mlaa a gbeye ma de ɔ, wa maa pee. Ee, wa maa ye Mawu mlaa a nɔ.

Ezra 10:3 ပူးပေါင်းရင်းမြစ်များ

Matsɛmɛ II, 11:17

Yehoyada ha Matsɛ Yoash, kɛ ma a kɛ Yawɛ so kaa a maa pee Yawɛ ma. Jehanɛ, e ha nɛ matsɛ ɔ kɛ ma a hu so.

Kronika II, 29:10

“Amlɔ nɛ ɔ, i to ye yi mi kaa i kɛ Yawɛ, Israel Mawu ɔ maa so, konɛ e mi mi nɛ fu wɔ wawɛɛ ɔ se nɛ po.

Kronika II, 30:12

Yuda hu, Mawu ngɛ ní tsue ngɛ lejɛ ɔ; Mawu ha nɛ Yuda ma kpekpemi ɔ tsuo a nya sɔ. A to a yi mi kaa a maa bu Yawɛ tue; nɛ nɔ́ nɛ matsɛ ɔ, kɛ ganɔ ɔmɛ fa mɛ ke a pee ɔ, a maa pee.

Kronika II, 34:21

“Nyɛɛ ya nɛ nyɛ ya bi Yawɛ ga womi ha imi, kɛ nihi tsuo nɛ piɛ ngɛ Israel, kɛ Yuda a. Nyɛ ya bi lɛ womi nɛ a ya na nɛ ɔ mi munyu ɔmɛ a he sane. Yawɛ mi mi fu wɔ wawɛɛ nitsɛ, ejakaa wa nɛmɛ ɔmɛ yi Yawɛ mlaa a nɔ; níhi nɛ a ngma ngɛ womi nɛ ɔ mi ke a pee ɔ, a pee we fɛɛ.”

Kronika II, 34:27

nɛ o tsake o tsui, nɛ o ba o he si ngɛ ye hɛ mi. Benɛ o nu bɔ nɛ i to nɛ ma gbla Yerusalem, kɛ Yerusalem ma mi bi ɔmɛ a tue ha a, o hía o he tade ɔmɛ, nɛ o wo ya. I nu o kue fami ɔ.

Ezra 10:11

Lɔ ɔ he ɔ, nyɛɛ jaje nyɛ he yayami ɔmɛ kɛ ha Yawɛ, nyɛ nɛmɛ a Mawu ɔ, nɛ nyɛɛ pee nɔ́ nɛ sa e hɛ mi. Nyɛ tsɔ nyɛ he kɛ je nibwɔ ɔmɛ nɛ ngɛ wa zugba a nɔ ɔ a he; nyɛɛ ngmɛɛ nyɛ ma se yi ɔmɛ a he.”

Ezra 10:44

Nimli nɛ ɔmɛ tsuo ngɔ ma se yihi. A wo a yi ɔmɛ, kɛ a bimɛ ɔmɛ tsuo blɔ.

Ezra 10:9

Ligbi etɛne ɔ pɛpɛɛpɛ ɔ, Yuda, kɛ Benyamin bi tsuo ba bua a he nya ngɛ Yerusalem. Nyɔhiɔ nɛɛne ɔ we ligbi nyingmi enyɔ ji jamɛ a ligbi ɔ nɛ. Ma a tsuo ba pue si ngɛ magbɛ mi ngɛ Mawu we ɔ hɛ mi, nɛ a he ngɛ doe blibliibli ngɛ sane nɛ ɔ, kɛ jehanɛ hiɔmi nɛ ngɛ nɛe wawɛɛ ɔ he.

Ezra 9:4

Nɔ́ nɛ Israel Mawu ɔ de ngɛ yayami nɛ nihi nɛ kpale kɛ je ma se kɛ ba a pee ɔ he ɔ, nihi babauu nu he. A kɛ he domi blibliibli ba bɔle mi kɛ kpe be mi nɛ i pee basaa kɛ hii si ɔ, hluu kɛ ya si gbɔkuɛ nya si bɔ sami be.

Nehemia 10:1

Kekleekle nɔ nɛ ngma e biɛ ji ɔ, Hakalia bi Nehemia, amlaaho ɔ. Nɔ nɛ nyɛɛ e se ji Zedekia. Seraya, Azaria, Yeremia, Pashur, Amaria, Malkiya, Hatush, Shebania, Haluk, Harim, Meremot, Obadia, Daniel, Gineton, Baruk, Meshulam, Abiya, Miyamin, Maazia, Bilgai, kɛ Shemaya. Azania bi Yeshua, Hanadad weku ɔ mi no Binui, Kadmiel, Shebania, Hodia, Kelita, Pelaya, Hanan, Mika, Rehob, Hashabia, Zakur, Sherebia, Shebania, Hodia, Bani, kɛ Beninu.

Nehemia 8:14

A na kaa mlaa a nɛ Yawɛ wo kɛ gu Mose nɔ kɛ ha Israel bi ɔmɛ ɔ tsɔɔ kaa a hi gbahi a sisi kɛ ye nyami be nɛ ɔ.

Nehemia 9:38

Enɛ ɔmɛ tsuo nɛ ba wa nɔ he je ɔ, wɔ Israel ma a, wa ngɛ si woe veveeve ke wa ma sɔmɔ Yawɛ pɛ. Wa ngma nɔ́ nɛ ɔ kɛ wo womi mi, nɛ wa ma nimeli ɔmɛ, Levi bi ɔmɛ, kɛ wa osɔfo ɔmɛ ngma a biɛhi kɛ wo sisi kɛ sɔu nya.

La 119:120

O he sawale nu mi, nɛ ye he ngɛ doe blibliibli; ejakaa o kojomi ɔmɛ ngɛ gbeye.

La 119:59

I susu ye je mi bami he, nɛ i ngɛ si woe ke ma ye o mlaa amɛ a nɔ.

Yesaya 66:2

Ye nine nya níhi ji ni nɛ ɔmɛ tsuo, lɔ ɔ he ɔ, ye níhi ji mɛ tsuo. Nihi nɛ baa a he si, nɛ a naa a he yayami nɛ a tsakeɔ a tsui, nihi nɛ yeɔ mi gbeye, nɛ a buɔ mi tue ɔ, mɛ ji nihi nɛ i suɔ.

Yesaya 8:20

Ke a de nyɛ ja a, nyɛ he nɔ ke, “Nyɛɛ bu nɔ́ nɛ Yawɛ ngɛ nyɛ tsɔɔe ɔ tue! Nyɛ ko bu ní peeli tue. Níhi nɛ a deɔ nyɛ ɔ, a he be se nami.”

Ezekiel 9:4

E de lɛ ke, “Yaa kpa si kɛ gu Yerusalem ma a mi tsuo. Nihi nɛ ngɛ haoe, nɛ a ngɛ kɔmɔ yee ngɛ ní hiemi níhi nɛ a ngɛ pee ɔ a he ɔ, pee okadi ngɛ a hɛ nya.”

Mose V, 29:12

Nyɛ ba hiɛmɛ nɛ ɔ, konɛ nyɛɛ fua ngɔ fɔ somi nɛ Yawɛ, nyɛ Mawu ɔ kɛ nyɛ ngɛ soe ɔ nɔ, nɛ nyɛɛ pɛtɛ níhi nɛ sa nɛ nyɛ tsu ngɛ mi ɔ a he.

Yoshua 9:6

A ba na Yoshua kɛ Israel bi ɔmɛ ngɛ ma sito he ɔ ngɛ Gilgal, nɛ a de mɛ ke, “Wa je he kɛ. Wa suɔ nɛ waa kɛ nyɛ nɛ so.”