Efesobi 4:16 - BAIBLO ALOO NGMAMI KLƆUKLƆU Ɔ

¹⁶ E ngɛ nɔmlɔ tso ɔ he ní ɔmɛ tsuo a nɔ he wami, nɛ e haa nɛ kpɔ nya kpɔ nya amɛ tsuo tsaa a sibi a nya. Nɛ ke he ní ɔmɛ tsuo tsu a blɔ nya ní tsumi pɛpɛɛpɛ bɔ nɛ sa a, nɔmlɔ tso ɔ tsuo waa, nɛ e yiɔ tɔ kɛ suɔmi ní tsumi.

Somi He Ɔ

¹⁶ lɛ e mi nɛ nɔmlɔ tso mluku ɔ tsuo nuu e he siɔ nɔ, nɛ kpɔ nya tsuaa kpɔ nya tsuɔ ni kaa bɔ nɛ a to ha lɛ ɔ, nɛ e haa nɔmlɔ tso ɔ waa nɛ e heɔ si ngɛ suɔmi mi.

Efesobi 4:16 ပူးပေါင်းရင်းမြစ်များ

Yohane 15:5

“Imi ji wai tso ɔ, nɛ nyɛ ji kɔni ɔmɛ. Nɔ tsuaa nɔ nɛ hii ye mi, nɛ imi hu i hii e mi ɔ, e maa wo yiblii babauu, ejakaa ke ye he be mi ɔ, nyɛ be nɔ́ ko nɔ́ ko nyɛe ma tsu.

Romabi 12:4

Wa ti nɔ tsuaa nɔ ngɛ nɔmlɔ tso kake kɛ e he níhi fuu, se e he ní ɔmɛ tsuo tsuɔ ní slɔɔtoslɔɔtohi ngɛ nɔmlɔ tso ɔ he.

1 Korintobi 10:17

Bɔ tsuaa bɔ nɛ wa hiɛmi ngɛ ɔ, wɔ tsuo wa yeɔ abolo kake ɔ eko. Enɛ ɔ tsɔɔ kaa Kristo nɔmlɔ tso ɔ he níhi ji wɔ tsuo.

1 Korintobi 13:13

Amlɔ nɛ ɔ, ní etɛ nɛ ɔmɛ nɛ ngɛ: hemi kɛ yemi, hɛ kɛ nɔ fɔmi, kɛ suɔmi. Se nɔ́ nɛ pe mɛ tsuo ji suɔmi.

1 Korintobi 8:1

Jehanɛ ma suɔ nɛ ma de nɔ́ ko ngɛ kusumi lo nɛ a kɛ haa amaga he. E ngɛ mi niinɛ kaa “wɔ tsuo wa le ní,” kaa bɔ nɛ a deɔ ɔ. Se nile haa nɔ woɔ e he nɔ, nɛ suɔmi lɛɛ e woɔ nɔ he wami.

Galatabi 5:22

Se Mawu mumi ɔ yiblii ji suɔmi, bua jɔmi, he jɔmi, tsui si tomi, mi mi himi, kpakpa peemi, hemi kɛ yemi,

Galatabi 5:6

Ke nɔ ko ngɛ Kristo mi ɔ, a po lɛ jio, a pui lɛ jio, lɔ ɔ tsu we nɔ́ ko. Nɔ́ nɛ he hia wawɛɛ mohu ji hemi kɛ yemi nɛ jeɔ kpo ngɛ suɔmi nɛ wa ngɛ kɛ ha wa nyɛmimɛ ɔ mi ɔ.

Efesobi 1:4

Benɛ a na we nɛ a bɔ je ɔ tete po ɔ, Mawu hla wɔ ngɔ pee lɛ nitsɛ e nihi momo ngɛ Kristo mi. E pee enɛ ɔ, konɛ wa he nɛ tsɔ, nɛ piami ko kó hi wa he ngɛ e hɛ mi. Mawu suɔ wɔ saminya, enɛ ɔ he ɔ,

Efesobi 3:17

I kpaa pɛɛ nɛ nyɛ he ye, nɛ Kristo nɛ hi nyɛ tsui mi, konɛ nɔ́ tsuaa nɔ́ nɛ nyɛ ngɛ pee ɔ, nyɛɛ pee kɛ suɔmi nɛ mi wa.

Efesobi 3:7

Mawu dloo mi nike ní pɔtɛɛ ko kaa sane kpakpa a fiɛlɔ, nɛ ma kɛ sɔmɔ lɛ. E he wami ɔ nɛ e kɛ tsu nɔ́ nɛ ɔ.

Efesobi 4:12

E pee enɛ ɔ, nɛ e kɛ dla ni klɔuklɔu ɔmɛ kɛ ngɔ ha sɔmɔmi ní tsumi ɔ, bɔ nɛ pee nɛ asafo ɔ nɛ ngɛ kaa Kristo nɔmlɔ tso ɔ nɛ ya nɔ.

Efesobi 4:15

Mohu ɔ, e hia kaa waa kɛ anɔkuale yemi nɛ suɔ wa sibi. Kɛkɛ ɔ, wa maa wa ngɛ mumi mi, nɛ wa maa hi kaa Kristo nɛ lɛ ji asafo ɔ yi ɔ.

Filipibi 1:9

I ngɛ Mawu pɛɛ kpae kaa suɔmi nɛ nyɛ ngɛ kɛ ha nyɛ sibi ɔ mi nɛ wa, nɛ nyɛ ná nile nɛ ma ha nyɛ nɔ́ se kɔmi mumi,

Kolosebi 2:19

Nɛ mɛɛ lɛɛ a mɛtɛ we Kristo nɛ ji yi ɔ he. Nɔmlɔ tso ɔ tsuo ɔ, yi ɔ mi e naa níhi tsuo nɛ hia lɛ ɔ kɛ jeɔ. Niye ní nɛ ɔ guɔ kpɔ ɔmɛ, kɛ pani ɔmɛ a mi, nɛ e haa nɔmlɔ tso ɔ waa bɔ nɛ Mawu to ɔ.

Kolosebi 2:2

I ngɛ enɛ ɔ pee nɛ ma kɛ wo mɛ bua, konɛ suɔmi nɛ ha a pee kake. Kɛkɛ ɔ, a maa nu ní kpakpahi nɛ a mi kuɔ ɔ tsuo a sisi saminya nɛ nɔ jemi be mi, nɛ a maa le Mawu laami sane ɔ. Mawu laami sane ɔ ji Kristo ɔ nɛ.

1 Tesalonikabi 1:3

Wa kaiɔ nyɛ ngɛ wa Tsɛ Mawu hɛ mi bɔ nɛ nyɛ hemi kɛ yemi ɔ jeɔ kpo ngɛ nyɛ ní tsumi mi, bɔ nɛ suɔmi nɛ nyɛ ngɛ ɔ ha nɛ nyɛ tsu ní wawɛɛ, kɛ bɔ nɛ nyɛ ngɔ nyɛ hɛ kɛ fɔ wa Nyɔmtsɛ Yesu Kristo nɔ wawɛɛ nitsɛ.

1 Tesalonikabi 2:13

Nɔ́ kake he hu nɛ wa naa Mawu si ngɛ daa ji nɛ ɔ nɛ. Benɛ wa ngɔ Mawu munyu ɔ ba ha nyɛ ɔ, nyɛ bu tue, nɛ nyɛ he lɛ atuu, pi kaa nɔmlɔ adesa sɛ gbi, se mohu kaa Mawu munyu kaa bɔ nɛ e ngɛ anɔkuale mi ɔ. Niinɛ nyɛ nihi nɛ nyɛ heɔ yeɔ ɔ, Mawu munyu ɔ ngɛ ní tsue ngɛ nyɛ mi.

1 Tesalonikabi 3:12

Nyɔmtsɛ ɔ nɛ ha nyɛ suɔmi ɔ mi nɛ wa, konɛ nyɛɛ suɔ nyɛ sibi, kɛ nimli adesahi tsuo kaa bɔ nɛ wɔ hu wa suɔ nyɛ ɔ.

2 Tesalonikabi 1:3

Wa nyɛmimɛ! E hia kaa waa na Mawu si daa ha nyɛ. E sa kaa waa pee jã, ejakaa nyɛ hemi kɛ yemi ɔ mi ngɛ wae wawɛɛ nitsɛ, nɛ suɔmi nɛ nyɛ ti nɔ tsuaa nɔ ngɛ kɛ ha e nyɛmi ɔ ngɛ nɔ yae bɔ nɛ sa.

1 Timoteo 1:5

Nɔ́ nɛ i ngɛ mo fae ke o pee nɛ ɔ ma ha nɛ waa suɔ wa sibi kɛ tsui nɛ mi tsɔ; wa he nile be wɔ fɔ bue, nɛ wa ma he Kristo maa ye anɔkuale mi.

1 Petro 1:22

Amlɔ nɛ ɔ, anɔkuale tsɔɔmi ɔ nɛ kɔɔ Yesu Kristo he ɔ, nyɛ ye nɔ. Nyɛ tsukɔ nyɛ he, nɛ nyɛ ba na suɔmi kpakpa kɛ ha nyɛ nyɛmimɛ nɛ ngɔ a he ngɔ ha Yesu ɔ. Lɔ ɔ he ɔ, nyɛɛ suɔ nyɛ sibi saminya kɛ nyɛ tsui tsuo.

1 Yohane 4:16

Suɔmi nɛ Mawu ngɛ kɛ ha wɔ ɔ, wɔ nitsɛmɛ wa le, nɛ wa ji he nɔ́. Mawu ɔ, suɔmi ji lɛ, nɛ nɔ tsuaa nɔ nɛ suɔ nɔmlɔ kɛ e tsui tsuo ɔ, e hii Mawu mi, nɛ Mawu hu hii e mi.