Efesobi 1:6 - BAIBLO ALOO NGMAMI KLƆUKLƆU Ɔ

⁶ E sa kaa wa je Mawu yi kaa e gu e dloomi nɛ hɛ mi ngɛ nyami ɔ nɔ ngɔ e bi nɛ e suɔ ɔ ngɔ ke wɔ yaka gu!

Somi He Ɔ

⁶ konɛ a kɛ je e dloomi hɛ mi nyami ɔ yi, nɔ́ nɛ e kɛ dloo wɔ ngɛ nɔ nɛ a suɔ lɛ ɔ mi ɔ.

Efesobi 1:6 ပူးပေါင်းရင်းမြစ်များ

La 22:20

Mo je mi kɛ je klaate nya. Mo he ye yi wami kɛ je gbe nɛ ɔmɛ a dɛ mi.

La 60:5

Ngɔɔ o he wami kpetekpleenyɛ ɔ kɛ he wa yi wami. Bu wa kue fami ɔ tue, konɛ ma nɛ mo nitsɛ o suɔ ɔ yi nɛ na wami.

Abɛ Womi 16:4

Nɔ́ tsuaa nɔ́ nɛ Yawɛ pee ɔ, nɔ́ ko he kɛ̃ lɛ e pee ngɛ; yayami peeli tete po, a ngɛ kɛ ha hɛ mi kpatami.

Yesaya 42:1

Yawɛ ke, “Ye tsɔlɔ, nɔ nɛ i kplɛɛ we nɔ́ ngɛ e he ɔ, lɛ ji nɛ ɔ nɛ. Nɔ nɛ i hla nɛ i suɔ e sane ɔ, lɛ ji nɛ ɔ nɛ. I ngɔ ye mumi ɔ kɛ wo e mi, nɛ e maa ye dami sane kɛ kojo je ma amɛ tsuo.

Yesaya 43:21

Mɛ ji ye ma nɛ imi nitsɛ i bɔ ha ye he, konɛ a la kɛ je ye yi!”

Yesaya 61:11

Bɔ nɛ tso tsɛ̃ɔ kɛ jee zu mi, ee, bɔ nɛ wu puɛɔ ngɛ ngmɔ mi ɔ, ja Nyɔmtsɛ Yawɛ ma he e ma a yi wami, nɛ je ma amɛ tsuo maa na, nɛ a ma je e yi.

Yesaya 61:3

Kɛkɛ ɔ, nihi nɛ ngɛ kɔmɔ yee ngɛ Zion ɔ, e ma bu mɛ jlasi nɛ a kɛ mɔmɔ pee, se pi la zu; a bua maa jɔ; a ma kpa kɔmɔ yemi, nɛ a ma la yi jemi la. A maa bɔ kaa tso nguaa nɛ Yawɛ nitsɛ ma. Mɛ tsuo a maa pee nɔ́ nɛ da, nɛ a maa wo Yawɛ hɛ mi nyami.

Yeremia 23:6

E yi nɔ ɔ, a ma he Yuda yi wami, nɛ tue mi jɔmi maa ba Israel. A ma tsɛ lɛ ke ‘Yawɛ ji wa yi wami hemi.’ ”

Yeremia 33:9

Yerusalem ma ha nɛ ma na biɛ, yi jemi, kɛ hɛ mi nyami ngɛ je ma amɛ tsuo a kpɛti, ke je ma amɛ nu ní kpakpahi tsuo nɛ i pee ha ma a. Ke je ma amɛ nu ní nɛ ɔmɛ a he, nɛ a na bɔ nɛ kplɔkɔtɔ, kɛ he jɔmi ba ma a mi ɔ, a tsui maa po nɛ a he maa do blibliibli.”

Mose III, 15:15

Osɔfo ɔ maa ngɔ kake kɛ sã yayami pami bɔ, nɛ e maa ngɔ kake hu kɛ sã sami bɔ kɛ kpata Yawɛ ha lɛ ngɛ nyu yaya nɛ be ngɛ e he ɔ he.

Zakaria 13:7

Yawɛ Tabohiatsɛ ɔ ke, “Klaate, tee si ngɔ wo ye huɛ to hyɛlɔ nɛ ngɛ ní tsue ha mi ɔ! Moo fia lɛ nɔ konɛ to ɔmɛ nɛ a gbɛ fĩa. I kɛ tsɔwitsɔwi nɛ ɔmɛ maa to ní.

Mateo 17:5

Benɛ e ngɛ munyu ɔ tue kɛ mwɔɔ ɔ, bɔku hleii ko ba ha a nɔ, nɛ gbi je bɔku ɔ mi de ke, “Ye Bi nɛ i suɔ lɛ, nɛ i naa e he tsui ji nɛ ɔ nɛ! Nyɛɛ bu lɛ tue.”

Mateo 20:9

Kɛkɛ nɛ nihi nɛ a bɔ mɛ apaa gbɔkuɛ ngmlɛ enuɔ ɔ ba, nɛ a ti nɔ tsuaa nɔ na sika hiɔ yi kake.

Mateo 3:17

Kɛkɛ nɛ gbi ko je hiɔwe de ke, “Imi nitsɛ ye bi nɛ i suɔ ji nɛ ɔ nɛ! Ee, i ngɛ e he bua jɔmi saminya.”

Luka 2:14

“Hɛ mi nyami ha Mawu ngɛ hiɔwe lokoo, nɛ he jɔmi nɛ ba zugba a nɔ ha nihi nɛ e naa a he tsui ɔ!”

Yohane 10:17

“Tsɛ ɔ suɔ mi, ejakaa i suɔ kaa ma ngɔ ye wami kɛ fɔ si, konɛ ma kpale ngɔ.

Yohane 3:35

Tsɛ ɔ suɔ e Bi ɔ, nɛ e tu nihi tsuo ngɔ wo e dɛ mi.

Romabi 8:1

Amlɔ nɛ ɔ, nihi nɛ ngɛ Kristo Yesu mi ɔ, fɔ bumi ko be ha mɛ hu.

2 Korintobi 4:15

Nyɛ he nɛ a ngɛ enɛ ɔ tsuo pee ngɛ. Nɛ ke Mawu dloomi nya a, a ba he nihi fuu a yi wami ɔ, jã kɛ̃ sina sɔlemi ɔ maa hiɛ kɛ wo Mawu hɛ mi nyami.

2 Korintobi 5:21

Kristo pee we yayami, se wa he ɔ, Mawu bu lɛ yayami peelɔ. Lɔ ɔ he ɔ, nɛ wa ba pee Kristo se nyɛɛli ɔ, wa peeɔ níhi nɛ da ngɛ Mawu hɛ mi.

Efesobi 1:12

Lɔ ɔ he ɔ, wɔ nɛ wa ji kekleekle nihi nɛ wa ngɔ wa hɛ ngɔ fɔ Kristo nɔ ɔ, nyɛ ha wa je Mawu yi kaa e hɛ mi ngɛ nyami.

Efesobi 1:14

Si nɛ Mawu wo e ni ɔmɛ ɔ, mumi ɔ e kɛ ma nɔ mi kaa wa nine maa su nɔ. Nɛ enɛ ɔ woɔ wɔ he wami kaa Mawu ma ha e we bi maa ye a he kulaa. Nyɛ ha wa je e yi kɛ wo e hɛ mi nyami.

Efesobi 1:18

I kpaa Mawu pɛɛ nɛ e bli nyɛ mumi mi hɛngmɛ. Kɛkɛ ɔ, níhi nɛ Mawu wo si kaa e ma ha nyɛ benɛ e tsɛ nyɛ, nɛ nyɛ ngɔ nyɛ hɛ ngɔ fɔ nɔ ɔ, nyɛ maa na. Nyɛ maa le hu kaa níhi nɛ Mawu wo si kaa e ma ha e ni klɔuklɔu ɔmɛ ɔ, a hɛ mi ngɛ nyami babauu.

Efesobi 2:7

E pee enɛ ɔ, konɛ e kɛ tsɔɔ yi nɔhi tsuo nɛ maa ba hwɔɔ se ɔ kaa Kristo Yesu he ɔ, e suɔ wɔ saminya, nɛ e dloo wɔ babauu.

Filipibi 1:11

Kristo Yesu nitsɛ ma ha nyɛ ma na subai nɛ hi saminya ngɛ nyɛ wami si himi mi, konɛ a wo Mawu hɛ mi nyami, nɛ a je e yi.

Filipibi 3:9

I kɛ lɛ pee kake kulaa. Jehanɛ lɛɛ pi mlaa nɔ nɛ i yeɔ nɔ nɛ a maa da kɛ wo mi nguɔ hu; mohu ɔ, Kristo nɛ i he ye ɔ. Amlɔ nɛ ɔ, Mawu maa wo mi nguɔ ejakaa i he Kristo ye.

Filipibi 4:19

Ye Mawu ɔ ma ha nyɛ níhi tsuo nɛ hia nyɛ ɔ kɛ maa je e ní babauu nɛ hɛ mi ngɛ nyami ɔ mi kɛ gu Kristo Yesu nɔ.

Kolosebi 1:13

E kpɔ wɔ kɛ je diblii he wami ɔ sisi, nɛ e kɛ wɔ ba e Bi nɛ e suɔ lɛ saminya a matsɛ yemi ɔ mi.

1 Petro 2:5

Nyɛɛ ba kaa tɛhi nɛ a hɛ ngɛ, nɛ nyɛ ha nɛ a fia nyɛ kɛ ma si kaa mumi mi we. Nyɛ maa pee osɔfo klɔuklɔuhi, nɛ kɛ gu Yesu Kristo nɔ ɔ, nyɛ maa sã mumi mi bɔ nɛ maa sa Mawu hɛ mi.

1 Petro 2:9

Se nyɛɛ lɛɛ, wɛtso nɛ Mawu hla ji nyɛ, odehe osɔfohi, je ma klɔuklɔu, kɛ Mawu nitsɛ e ma. E hla nyɛ nɛ e tsɛ nyɛ kɛ je diblii mi kɛ ba lɛ nitsɛ e la nɛ ngɛ nyakpɛ ɔ he, konɛ nyɛ ba fiɛ nyakpɛ níhi nɛ e tsu ɔ.

1 Petro 4:11

Ke nɔ ko ngɛ fiɛe ɔ, e fiɛ Mawu sɛ gbi ɔ; ke nɔ ko ngɛ sɔmɔe ɔ, e ngɔ he wami nɛ Mawu ha lɛ ɔ kɛ sɔmɔ. Nɔ́ tsuaa nɔ́ nɛ nyɛ ngɛ pee ɔ, e ha nɛ nihi nɛ a je Mawu yi kɛ gu Yesu Kristo nɔ. Mawu nɔ́ ji hɛ mi nyami, kɛ he wami kɛ yaa neneene. Amen.