Daniel 9:7 - BAIBLO ALOO NGMAMI KLƆUKLƆU Ɔ

⁷ Nyɔmtsɛ, dalɔ ji mo. Wɔɔ lɛɛ zo kpɔtɔɔ gbe wɔ kaa bɔ nɛ o ngɛ wɔ hyɛe mwɔnɛ nɛ ɔ; ejakaa wɔ tsuo pɛpɛɛpɛ, Yuda bi, Yerusalem bi, kɛ Israel ma a tsuo nɛ o gbɛ ngɔ fĩa je ma amɛ a nɔ ɔ, wa ti ni nɛmɛ nɛ ngɛ kpo nya, kɛ ni nɛmɛ nɛ ngɛ lokoo ɔ, wa pee yayami kɛ si mo.

Daniel 9:7 ပူးပေါင်းရင်းမြစ်များ

Ezra 9:13

Níhi nɛ ba wa nɔ ɔ ji yayami nɛ wa pee, kɛ tɔmihi nɛ wa tɔ̃ ɔ a he tue gblami. Se kɛ̃ ɔ, wa na kaa o na wɔ mɔbɔ; o gbla we wa tue bɔ nɛ sa wɔ, nɛ o ha wa ti ni komɛ ngɛ je mi kɛ mwɔɔ.

Ezra 9:15

Yawɛ, Israel Mawu, moo lɛɛ dalɔ ji mo, se kɛ̃, o ha wa yi na wami kɛ ba si mwɔnɛ ɔ. Wa ngɛ jajee ngɛ o hɛ mi kaa wa yeɔ fɔ, nɛ e sɛ́ kulaa kaa waa ba o hɛ mi.”

Nehemia 9:33

O ye dami sane kaa o gbla wa tue, ejakaa o ye anɔkuale, be nɛ wɔɔ lɛɛ wa pee yayami.

La 119:137

Yawɛ, dalɔ ji mo, nɛ o mlaa amɛ hu da pɛpɛɛpɛ!

La 44:15

Daa nɛ, ke ye he nyɛli na mi kikɛ nɛ ɔ, yaka jɛmi tɛ̃ a nya mi; ye he guɛ sɔuu a hii gbee, nɛ zo gbeɔ mi kpɔtɔɔ.

La 51:14

Mawu, koo bu mi fɔ kaa muɔ si puelɔ, konɛ ma la kɛ bua jɔmi kɛ je o yi.

La 51:4

Mo, o nɔ nɛ i tɔ̃, mo pɛ nɛ i pee yayami nɛ ɔ kɛ si. Lɔ ɔ he ɔ, fɔ nɛ o bu mi ɔ, e sa mi. Piami ko piami ko be o he.

Yesaya 11:11

Jamɛ a ligbi ɔ, Nyɔmtsɛ ɔ ma tsu ní kɛ he wami; e maa kpale e ma mi bi ɔmɛ nɛ piɛ ngɛ zugba nɛ ɔmɛ a nɔ ɔ kɛ maa ba we ekohu. A maa je Asiria, Egipt, Patros, Sudan, Elam, Babilonia, Hamat, kɛ mahi nɛ ngɛ wo nya a kɛ ba.

Yesaya 45:16

Amaga puɛli a hɛ mi ma pue si; zo maa gbe mɛ tsuo kpɔtɔɔ.

Yeremia 12:1

Yawɛ, ke i ke i kɛ mo ma hla níhi a nya a, mo lɛ o nɔ́ da. Se kɛ̃ ɔ, i kɛ sane nɛ ɔ maa fɔ o hɛ mi. Mɛni he je lɛ nimli yayamihi yaa nɔ ɔ? Mɛni he je lɛ yiwutsotsɛmɛ a he mi jɔɔ mɛ ɔ?

Yeremia 23:6

E yi nɔ ɔ, a ma he Yuda yi wami, nɛ tue mi jɔmi maa ba Israel. A ma tsɛ lɛ ke ‘Yawɛ ji wa yi wami hemi.’ ”

Yeremia 24:9

Ma ngɔ haomi nɛ nya wa wawɛɛ nitsɛ kɛ ba a nɔ, nɛ nɔ́ nɛ ɔ ma ha nɛ je ma amɛ tsuo maa nu sawale. A maa ye a he fɛu, a maa bɔ mɛ ahlua, nɛ a maa wo mɛ la ngɛ he tsuaa he nɛ ma fie mɛ kɛ ya a.

Yeremia 3:25

Nyɛ ha nɛ waa kɛ zo nɛ pee wa heha nɔ́ kɛ hwɔ si, ejakaa wa pee yayami kɛ si Yawɛ, wa Mawu ɔ. Wa nɛmɛ ɔmɛ pee a nɔ́, nɛ wɔ hu kɛ je wa jokuɛwi a si kɛ ba si mwɔnɛ ɔ, wa kpa we. Wa yi Yawɛ, wa Mawu ɔ mlaa amɛ a nɔ.”

Yeremia 32:32

ejakaa Yuda ma a, kɛ Yerusalem bi ɔmɛ, a matsɛmɛ ɔmɛ, ma nimeli ɔmɛ, osɔfo ɔmɛ, kɛ gbali ɔmɛ pee yayamihi babauu nɛ a kɛ wo ye mi mi la.

Yeremia 33:16

E yi nɔ ɔ, a ma he Yuda yi wami, nɛ tue mi jɔmi maa ba Israel. Nɛ biɛ nɛ a kɛ ma tsɛ lɛ ji, ‘Yawɛ ji wa dami.’

Yeremia 4:17

A ma sá Yerusalem ma a yi kɛ kpe kaa bɔ nɛ buli buɔ zugba he ɔ; ejakaa ma mi bi ɔmɛ tsɔ Yawɛ hɛ mi atuã. Yawɛ lɛ de.

Yeremia 7:19

Se anɛ imi ye mi mi la a ngɛ woe ɔ lo? Dɛbi! Mɛ nitsɛmɛ a he lɛ a ngɛ pee; a kɛ ma kpata mɛ nitsɛmɛ a hɛ mi.

Ezekiel 16:63

Ma ngɔ o he yayami ɔmɛ tsuo kɛ pa mo; se kɛ̃ ɔ, o ma kai yayami ɔmɛ, nɛ zo maa gbe mo kpɔtɔɔ. Ma ngɔ tɔmi ɔmɛ tsuo kɛ pa mo, nɛ e maa pee mo nyakpɛ; o be nyɛe maa pa o nya mi tete po ngɛ zo ní nɛ o tsu ɔ he.” Nyɔmtsɛ Yawɛ lɛ de.

Ezekiel 36:31

Kɛkɛ ɔ, nyɛ ma kai nyɛ je mi bami yaya amɛ, kɛ zo níhi nɛ nyɛ tsu ɔ, nɛ nyɛ nitsɛmɛ nyɛ he maa nyɛɛ nyɛ ngɛ nyɛ yayami ɔmɛ, kɛ nyɛ ní hiemi ní ɔmɛ a he.

Ezekiel 5:10

Bɔ nɛ e maa ba ji kaa fɔli ngɛ Yerusalem maa ye mɛ nitsɛmɛ a bimɛ, nɛ bimɛ ɔmɛ hu maa ye a fɔli. Ma gbla o tue wawɛɛ; nɛ nihi nɛ a yi ma na wami ɔ, ma gbɛ mɛ ngɔ fĩa je ɔ mi tsuo.

Ezekiel 6:12

Nihi nɛ ngɛ se lokoo ɔ maa nu hiɔ, nɛ a ma gbo; nihi nɛ ngɛ kpo nya a maa nɔ ngɛ ta mi; nihi nɛ maa piɛ ɔ, hwɔ maa gbe mɛ. Bɔ nɛ ye mi mi la nɛ nya wa a ma tsu ní ji nɛ ɔ nɛ.

Daniel 9:14

Mo Yawɛ, wa Mawu, o to o yi mi kaa o maa gbla wa tue, nɛ ja ji bɔ nɛ o pee nɛ ɔ nɛ; ejakaa moo lɛɛ nɔ́ nɛ da lɛ o peeɔ. Se wa bui mo tue.

Daniel 9:18

Ye Mawu lee, wa kpa mo pɛɛ nɛ o bu wɔ tue. Hyɛ haomi mi nɛ wa ngɛ, kɛ bɔ nɛ ma a nɛ a kɛ o biɛ wo lɛ ɔ pee ma doku ha. Wa ngɛ kue fae ha mo, ejakaa mɔbɔ nalɔ ji mo, se pi kaa wa pee nɔ́ nɛ da.

Daniel 9:8

Wa matsɛmɛ ɔmɛ, wa ganɔ ɔmɛ, kɛ wa nɛmɛ ɔmɛ tsu zo ní, nɛ a pee yayami kɛ si mo Nyɔmtsɛ ɔ.

Amos 9:9

“Ma fa he nyɛli ɔmɛ, nɛ ma ha nɛ a ma hoso Israel bi ɔmɛ, nɛ a maa sa a mi ngɛ je ma amɛ a kpɛti kaa bɔ nɛ a kɛ sɔnguɛ saa blɛfo mi nɛ kake po nɔɛ si ngɛ zugba a.

Romabi 6:21

Níhi nɛ nyɛ pee, nɛ jehanɛ lɛɛ a he ngɛ nyɛ zo pee ɔ, mɛni se nyɛ na kɛ je mi? Nɔ́ nɛ jeɔ mi ji gbenɔ!

Mose V, 32:4

“Yawɛ ji nyɛ yi baalɔ nɛ se be; e hi kɛ pi si, nɛ e da ngɛ blɔ tsuaa blɔ nɔ. Nyɛ Mawu ɔ yeɔ e siwo nɔ; yayami ko be e he; nɔ́ nɛ da, kɛ nɔ́ nɛ sa pɛ e peeɔ.

Mose V, 4:27

Yawɛ maa gbɛ nyɛ ngɔ fĩa je ma kpa amɛ a mi, nɛ nyɛ ti nihi bɔɔ pɛ nɛ a yi ma na wami.