Daniel 8:23 - BAIBLO ALOO NGMAMI KLƆUKLƆU Ɔ

²³ “Ke matsɛ yemi nɛ ɔmɛ a nyagbe be ɔ su ta, nɛ a yayami ɔ mi ba wa bɔ nɛ e sa kaa a gbla a tue ɔ, matsɛ ko ma ba te si. Matsɛ nɛ ɔ maa pee yiwutsotsɛ kɛ nɔ sisilɔ nɛ maa wa tue.

Daniel 8:23 ပူးပေါင်းရင်းမြစ်များ

Kpojemi 19:20

A nu lohwe awi yelɔ ɔ, kɛ lakpa gbalɔ ɔ nɛ pee nyakpɛ níhi ngɛ e hɛ mi ɔ tsuo. E pee nyakpɛ ní ɔmɛ kɛ sisi nihi nɛ a kɛ lohwe ɔ kadi mɛ ɔ, kɛ ni nɛmɛ nɛ jaa lohwe ɔ we amaga a. A hɛ lohwe ɔ, kɛ lakpa gbalɔ ɔ tsuo ngɔ fɔ taku kɛ e mi la nɛ ngɛ tsoe gegeege ɔ mi hɛ ngmengmle.

1 Timoteo 4:1

Mawu mumi ɔ deɔ paa ke, nyagbe ligbi ɔmɛ a mi ɔ, ni komɛ ma kua Kristo, nɔ nɛ a he ye ɔ, nɛ a ma ya nyɛɛ mumi yayamihi mohu a se; a maa bu lakpa munyuhi, kɛ tsɔɔmi yayamihi tue.

Daniel 7:20

Jehanɛ, i bi koli nyɔngma amɛ nɛ ngɛ lohwe ɔ yi mi ɔ a he sane. Koli kaketsɛ ɔ nɛ ba pee se, nɛ ha nɛ koli etɛ ɔmɛ hia pue si ɔ, lɛ hu i bi he sane. Koli nɛ ɔ ngɛ hɛngmɛhi, kɛ nya nɛ e ngɛ munyu tue putɛputɛɛ. E he ngɛ gbeye pe koli ɔmɛ tsuo.

Daniel 7:11

Benɛ i ngɛ nɔ́ nɛ ɔ hyɛe ɔ, i nu nɛ koli nyafii ɔ ngɛ munyu tue putɛputɛɛ kɛ mwɔɔ. Tlukaa a, a gbe lohwe eywiɛne ɔ; a tsɔtslɔɔ e mi, nɛ a sake lɛ ngɔ fɔ la a mi.

Daniel 7:8

Benɛ i ngɛ koli ɔmɛ hyɛe kɛ mwɔɔ ɔ, tlukaa a, koli wayo ko ba hia kpo ngɛ koli ɔmɛ a kpɛti. Koli wayo nɛ ɔ hia kolihi nɛ ngɛ lejɛ ɔ momo ɔ etɛ kɛ pue si. Nɔmlɔ adesa hɛngmɛhi ngɛ koli wayo nɛ ɔ he, kɛ nya hu nɛ ngɛ munyu tue putɛputɛɛ.

Daniel 7:25

E maa tu munyu ngɔ si Hiɔwe No ɔ, nɛ e maa wa ni klɔuklɔu ɔmɛ yi mi. E ma hla kaa e tsake a Mawu jami mlaa amɛ, kɛ a nyami be ɔmɛ; nɛ a maa ngɔ ni klɔuklɔu ɔmɛ kɛ wo e dɛ jeha etɛ kɛ fa.

Daniel 8:25

E maa to ga kɛ sisi nihi babauu. E ma wo e he nɔ, nɛ e ma kpata nihi babauu a hɛ mi be mi nɛ a hɛ be a he nɔ. Ganɔhi a ganɔ ɔ nitsɛ po, e maa te si ngɔ wo lɛ. Se a ma kpata e hɛ mi; nɛ tsa pi nɔmlɔ adesa he wami nɛ ma tsu nɔ́ nɛ ɔ.

Ezekiel 38:16

O ma ba tua ye ma Israel ɔ kaa ahumi nɛ ngɛ fiae huu kɛ nyɛɛ zugba a nɔ tsuo. Ke be ɔ su ɔ, ma ha o ma ba tua ye zugba a nɔ bi ɔmɛ, bɔ nɛ pee nɛ je ma amɛ nɛ a na nɔ nɛ i ji, konɛ kɛ gu nɔ́ nɛ ma pee nɛ ɔ nɔ ɔ, a na kaa nɔ klɔuklɔu ji mi.

Ezekiel 38:8

Jeha komɛ a se ɔ, ma ha e ma ya tua nihi ngɛ Israel yo ɔmɛ a nɔ. A kɛ ta kpata zugba nɛ ɔ hɛ mi be ko, nɛ a si lejɛ ɔ ngɔ fɔ si gu jeha babauu, se jehanɛ lɛɛ a bua nihi a nya ngɛ lejɛ ɔ ngɛ tue mi jɔmi mi.

Daniel 11:24

E ma tua zugba ko nɛ ngɛ ní babauu be mi nɛ a hɛ be a he nɔ; nɛ nɔ́ nɛ e tsɛmɛ, kɛ e nɛmɛ po pee we hyɛ ɔ, lɛɛ e maa pee. Lɔ ɔ se ɔ, e maa dla ta yibu ní, kɛ weto ní nɛ e na ngɛ ta mi ɔ kɛ ha e we bi ɔmɛ. E maa to ga, nɛ e ma ya tua mɔhi, se nɔ́ nɛ ɔ se be kɛe.

Daniel 11:21

Bɔfo ɔ ya nɔ nɛ e de ke, “Nɔ nɛ ma ba ye tsɛ ngɛ e se ɔ maa pee nɔ ko nɛ bu be e he, nɛ́ e sɛ́ kaa e yeɔ matsɛ. Nɔmlɔ nɛ ɔ maa ba tlukaa, nɛ e kɛ sisimi, kɛ nya mi ngɔngɔɛ munyu tumi ma kpɔ matsɛ yemi ɔ.

Daniel 10:14

I ba, konɛ ma ba tsɔɔ mo nɔ́ nɛ maa ba o ma a nɔ hwɔɔ se, ejakaa nina a kɔɔ hwɔɔ se níhi a he.”

Mose I, 15:16

Yi nɔ eywiɛ se ɔ, o nina maa kpale kɛ ba hiɛmɛ nɛ ɔ ekohu; ejakaa i be Amor bi ɔmɛ fiee kɛ je zugba a nɔ kɛ yaa si jamɛ a be ɔ mi. Jamɛ a be ɔ mi ɔ, a yi mi wami ɔ nya maa wa, nɛ ma gbla a tue.”

1 Tesalonikabi 2:16

Ma je li tete po a ke wa ko fiɛ ha mɛ, konɛ a ko he a yi wami. Lɔ ɔ he ɔ, yayami ɔ, pe a ngɛ pee kɛ ngɛ nɔ toe babauu daa ligbi. Se jehanɛ lɛɛ Mawu kɛ e mi mi fumi ɔ kple a nɔ!

Mateo 23:32

Lɔ ɔ he ɔ, nyɛɛ ya nɔ! Ní tsumi nɛ nyɛ nɛmɛ ɔmɛ je sisi ɔ, nyɛ tsu kɛ gbe nya!

Mose V, 28:50

Ma nɛ ɔ yi mi maa wa; a be nɔkɔtɔma bue, nɛ jokuɛyo hu a be lɛ mɔbɔ nae.

Mose IV, 24:24

Lɛhi maa je Kipro wo nya kɛ ba, nɛ a maa hao Asiria, kɛ Eber. Nɛ mɛ nitsɛmɛ hu a hɛ mi ma kpata!”

Abɛ Womi 1:6

konɛ a nyɛ nɛ a nu abɛhi, kɛ ní leli a munyuhi nɛ a mi kuɔ ɔ a sisi saminya.

Daniel 8:22

Jehanɛ, koli eywiɛ ɔmɛ nɛ ba benɛ kaketsɛ ɔ ku ɔ daa si ha matsɛmɛ eywiɛ komɛ nɛ maa je Hela nɔ yemi ɔ mi kɛ ba. Se a ti nɔ ko nɔ ko kɛ kekleekle nɔ ɔ be sɔe.

Daniel 8:24

E ma kpata níhi a hɛ mi basabasa, nɛ e maa ye manye ngɛ nɔ́ tsuaa nɔ́ peemi mi. Je ma nguanguahi, kɛ ni klɔuklɔu ɔmɛ a nitsɛ e ma a hu, e ma kpata a hɛ mi. He wami nɛ e kɛ ma tsu ní nɛ ɔmɛ ɔ, pi lɛ nitsɛ e he wami.