Daniel 7:14 - BAIBLO ALOO NGMAMI KLƆUKLƆU Ɔ

¹⁴ A ngɔ he wami, hɛ mi nyami, kɛ matsɛ yemi ngɔ wo e dɛ, konɛ je ma amɛ, kɛ nihi nɛ tuɔ gbi slɔɔtoslɔɔto ɔmɛ nɛ a sɔmɔ lɛ. E he wami ɔ maa hi si kɛ maa ya neneene, nɛ e matsɛ yemi ɔ se be poe gblegbleegble.

Daniel 7:14 ပူးပေါင်းရင်းမြစ်များ

La 102:22

Jamɛ a be ɔ, je ma amɛ, kɛ matsɛmɛ ɔmɛ tsuo ma ba bua a he nya nɛ a ma ja Yawɛ.

La 103:19

Yawɛ ngɔ e matsɛ sɛ ɔ kɛ ma si ngɛ hiɔwe, nɛ e ngɛ tsɛ yee ngɛ je ɔ tsuo nɔ.

La 145:13

O matsɛ yemi ɔ ngɛ daa, nɛ o nɔ yemi ɔ ngɛ kɛ yaa neneene. Yawɛ yeɔ e siwo nɔ pɛpɛɛpɛ, nɛ nɔ́ tsuaa nɔ́ nɛ e peeɔ ɔ hi saminya.

La 146:10

Yawɛ maa ye tsɛ daa. Zion, o Mawu ɔ maa ye matsɛ kɛ maa ya neneene. Nyɛ je Yawɛ yi!

La 45:6

Matsɛ sɛ klɔuklɔu ɔ maa hi si kɛ maa ya neneene. O matsɛ tso ɔ ji dami sane yemi he okadi.

La 72:11

Matsɛmɛ ɔmɛ tsuo nɛ a ba kpla si ngɛ e hɛ mi, nɛ je ma amɛ tsuo nɛ a sɔmɔ lɛ!

La 72:17

Matsɛ ɔ biɛ nɛ hi si kɛ ya neneene. E biɛ nɛ pɛ be abɔ nɛ pu ngɛ nɛ ɔ. Mawu nɛ gbaa je ma amɛ tsuo, nɛ a ha matsɛ ɔ bua jɔmi.

La 8:6

O pee lɛ níhi tsuo nɛ o bɔ ɔ a nɔ yelɔ. O ngɔ ní nɛ ɔmɛ tsuo ngɔ wo e dɛ mi:

Yesaya 16:5

Jehanɛ David nina ko ma ba ye matsɛ. Anɔkuale yemi kɛ suɔmi e kɛ maa ye ma a nɔ. E maa pee nɔ́ nɛ da; nɛ e maa ye dami sane.

Yesaya 60:12

Je ma, loo nɔ yemi nɛ be mo sɔmɔe ɔ, a ma kpata e hɛ mi pɛsɛpɛsɛ.

Yesaya 9:6

Ejakaa a fɔ bi ha wɔ! A ha wɔ binyumuyo! Lɛ nɛ e ma ba ye wa nɔ. A ma tsɛ lɛ ke, “Nyakpɛ ga wolɔ,” “Mawu he walɔ,” “Tsɛ nɛ ngɛ kɛ yaa neneene,” “Ganɔ nɛ yi nɔ jɔ.”

Yesaya 9:7

E nɔ yemi ɔ ma he si, nɛ e maa bɔ; ma a ma na tue mi jɔmi daa, ejakaa e maa ye tsɛ kaa Matsɛ David nitsɛ se yelɔ. E maa pee kpakpa, nɛ e maa ye dami sane, kɛ maa je be nɛ ɔ mi kɛ yaa su je mi nyagbe. Yawɛ Tabohiatsɛ ɔ kɛ hɛdɔ ma tsu ní nɛ ɔmɛ tsuo.

Daniel 2:35

Amlɔ ɔ, dade ɔ, zu ɔ, akɔblee ɔ, sika hiɔ ɔ, kɛ sika tsu ɔ tsuo ywia wɔtsɔwɔtsɔ, nɛ a pee kaa bunyuku nɛ pueɔ si ngɛ ngma mi sami he ngɛ latsa be mi. Kɛkɛ nɛ kɔɔhiɔ ba muɔ mɛ kɛ je, nɛ a nɛ mɛ ngɛ he ko he ko hu. Se tɛ ɔ nɛ ba fia amaga a lɛɛ e ba pee yo agbo nɛ ha je ɔ mi tsuo.

Daniel 2:37

Nɛnɛ, mo ji matsɛ nɛ pe matsɛmɛ ɔmɛ tsuo. Mawu nɛ ngɛ hiɔwe ɔ wo mo matsɛ, nɛ e ha mo he wami, agboje, kɛ hɛ mi nyami.

Daniel 2:44

Matsɛmɛ nɛ ɔmɛ a yi nɔ ɔ, Mawu nɛ ngɛ hiɔwe ɔ maa to matsɛ yemi ko sisi, nɛ e se be poe gblegbleegble. Matsɛ yemi nɛ ɔ, nɔ ko nɔ ko be nyɛe maa ye e nɔ; e ma kpata matsɛ yemi kpa amɛ tsuo a hɛ mi, nɛ e maa hi si kɛ maa ya neneene.

Daniel 3:4

ma fiɛlɔ ko de kɛ ngmlaa ke, “Nyɛ, je ma slɔɔtoslɔɔtohi, kɛ nyɛ nihi nɛ nyɛ tuɔ gbi slɔɔtoslɔɔtohi! Mlaa nɛ matsɛ ɔ wo ji nɛ ɔ nɛ.

Daniel 4:3

“Mawu okadi, ɔmɛ kle! E nyakpɛ ní ɔmɛ a he ngɛ gbeye! Mawu matsɛ yemi ɔ ngɛ kɛ yaa neneene! Mawu maa ye matsɛ daa.

Daniel 6:26

I ngɛ mlaa woe ke nɔ tsuaa nɔ nɛ ye Daniel Mawu ɔ gbeye, nɛ e bu lɛ ngɛ ye matsɛ yemi he ɔ tsuo. “Mawu hɛ kalɔ ji lɛ, nɛ e ngɛ kɛ yaa neneene. E matsɛ yemi ɔ hɛ mi be kpatae kɔkɔɔkɔ, nɛ e he wami ɔ se be poe gblegbleegble.

Daniel 7:18

Se nyagbe ɔ, Hiɔwe No ɔ we ni klɔuklɔu ɔmɛ a nine maa su matsɛ yemi ɔ nɔ, nɛ a maa ye matsɛ kɛ maa ya neneene.”

Daniel 7:27

A maa ngɔ matsɛ yemihi tsuo nɛ ngɛ je ɔ mi ɔ a he wami, kɛ agboje ngɔ ha Hiɔwe No ɔ we ni klɔuklɔu ɔmɛ a ma a. A matsɛ yemi ɔ se be poe gblegbleegble, nɛ je nɛ ɔ mi matsɛmɛ ɔmɛ tsuo ma sɔmɔ mɛ, nɛ a maa bu mɛ tue.”

Obadia 1:21

Yerusalem manye yeli ɔmɛ ma ya tua Edom, nɛ a maa ye ma a nɔ. Nɛ Yawɛ nitsɛ maa pee a matsɛ.” Mawu lɛ de.

Mika 4:7

Akpaketsɛmɛ ɔmɛ, kɛ ni nɛmɛ nɛ ngɛ ma se lokoo ɔ, ma kpale mɛ kɛ ba we ekohu; nɛ ma pee mɛ ma agbo. Ma hi Zion Yo ɔ nɔ kɛ ye matsɛ ngɛ a nɔ, kɛ maa je jamɛ a be ɔ mi, kɛ maa ya neneene.” Yawɛ lɛ de.

Mateo 11:27

“Tsaatsɛ tu níhi tsuo ngɔ wo ye dɛ mi. Nɔ ko nɔ ko li Bi ɔ, ja Tsɛ ɔ pɛ; nɔ ko nɔ ko li Tsɛ ɔ, ja Bi ɔ kɛkɛ, kɛ nihi nɛ Bi ɔ suɔ kaa e maa tsɔɔ mɛ Tsɛ ɔ.

Mateo 28:18

Yesu hɛ lɛ kɛ su a he, nɛ e de mɛ ke, “A ha mi he blɔ ngɛ níhi tsuo nɛ ngɛ hiɔwe kɛ zugba a nɔ.

Luka 1:33

E maa ye matsɛ ngɛ Israel ma a nɔ kɛ maa ya neneene; e matsɛ yemi ɔ se be poe gblegbleegble!”

Luka 10:22

“Tsaatsɛ ngɔ níhi tsuo ngɔ wo ye dɛ mi. Nɔ ko nɔ ko li Bi ɔ, ja Tsɛ ɔ, nɛ nɔ ko nɔ ko li Tsɛ ɔ, ja Bi ɔ, kɛ ni nɛmɛ nɛ Bi ɔ suɔ kaa e maa tsɔɔ mɛ Tsɛ ɔ.”

Yohane 12:34

Ma kpekpemi ɔ he nɔ ke, “Wa mlaa a de ke Kristo ɔ maa hi si kɛ maa ya neneene. Kɛ pee kɛɛ nɛ moo lɛɛ o deɔ ke a ma wo Nɔmlɔ Bi ɔ nɔ ɔ? Mɛnɔ ji kikɛmɛ a Nɔmlɔ Bi nɛ ɔ?”

Yohane 3:35

Tsɛ ɔ suɔ e Bi ɔ, nɛ e tu nihi tsuo ngɔ wo e dɛ mi.

Hebribi 12:28

Lɔ ɔ he ɔ, nyɛ ha waa na Mawu si, ejakaa e ha wɔ blɔ nya nɛ waa ye tsɛ nɛ be tsakee gblegbleegble. Nyɛ ha waa ngɔ bu, kɛ gbeye yemi kɛ ba ja lɛ kɛ wa tsui tsuo bɔ nɛ maa sa e hɛ mi;

1 Petro 3:22

Yesu Kristo ho hiɔwe ya; e ya hii si ngɛ Mawu hiɔ nɔ, nɛ e ngɛ bɔfohi, kɛ mumi mi níhi tsuo nɛ ngɛ he wami a nɔ yee.

Kpojemi 1:6

e to matsɛ yemi sisi ha wɔ, nɛ e pee wɔ osɔfohi, konɛ wa sɔmɔ e Tsɛ Mawu ɔ, nyɛ ha waa wo e hɛ mi nyami, nɛ e ye matsɛ kɛ ya neneene kɛ neneene. Amen.

Kpojemi 11:15

Jehanɛ ɔ, bɔfo kpaagone ɔ kpa e titimati ɔ, nɛ i nu gbihi nɛ ngɛ pɛe wawɛɛ ngɛ hiɔwe ke, “Amlɔ nɛ ɔ, wa Nyɔmtsɛ ɔ kɛ e Kristo ɔ nɛ a ngɛ je ɔ nɔ yee. Nɛ a maa ye matsɛ kɛ maa ya neneene!”

Kpojemi 17:14

Lohwe ɔ, kɛ matsɛmɛ ɔmɛ ma ya tua To bi ɔ. Se To bi ɔ, kɛ e se nyɛɛli ɔmɛ maa ye a nɔ kunimi. Lɛ ji nyɔmtsɛmɛ a nyɔmtsɛ, kɛ matsɛmɛ a matsɛ, nɛ e se nyɛɛli ɔmɛ ji nihi nɛ Mawu tsɛ, nɛ e hla mɛ ngɔ to, nɛ a yeɔ lɛ anɔkuale.”

Kpojemi 3:21

Ni nɛmɛ nɛ maa ye kunimi ɔ, ma ha mɛ blɔ nɛ a maa hi ye kasa nya ngɛ ye matsɛ sɛ ɔ nɔ kaa bɔ nɛ imi hu i ye kunimi, nɛ amlɔ nɛ ɔ, i hii si ngɛ Tsaatsɛ kasa nya ngɛ e matsɛ sɛ ɔ nɔ ɔ.