Daniel 4:3 - BAIBLO ALOO NGMAMI KLƆUKLƆU Ɔ

³ “Mawu okadi, ɔmɛ kle! E nyakpɛ ní ɔmɛ a he ngɛ gbeye! Mawu matsɛ yemi ɔ ngɛ kɛ yaa neneene! Mawu maa ye matsɛ daa.

Daniel 4:3 ပူးပေါင်းရင်းမြစ်များ

La 145:13

O matsɛ yemi ɔ ngɛ daa, nɛ o nɔ yemi ɔ ngɛ kɛ yaa neneene. Yawɛ yeɔ e siwo nɔ pɛpɛɛpɛ, nɛ nɔ́ tsuaa nɔ́ nɛ e peeɔ ɔ hi saminya.

Daniel 2:44

Matsɛmɛ nɛ ɔmɛ a yi nɔ ɔ, Mawu nɛ ngɛ hiɔwe ɔ maa to matsɛ yemi ko sisi, nɛ e se be poe gblegbleegble. Matsɛ yemi nɛ ɔ, nɔ ko nɔ ko be nyɛe maa ye e nɔ; e ma kpata matsɛ yemi kpa amɛ tsuo a hɛ mi, nɛ e maa hi si kɛ maa ya neneene.

Yesaya 25:1

Yawɛ, mo ji ye Mawu; ma wo o hɛ mi nyami, nɛ ma je o biɛ ɔ yi; ejakaa o tsu nyakpɛ níhi. O yi mi tomi ɔmɛ nɛ o to blema lokoo ɔ, o ye a nɔ pɛpɛɛpɛ.

Daniel 7:14

A ngɔ he wami, hɛ mi nyami, kɛ matsɛ yemi ngɔ wo e dɛ, konɛ je ma amɛ, kɛ nihi nɛ tuɔ gbi slɔɔtoslɔɔto ɔmɛ nɛ a sɔmɔ lɛ. E he wami ɔ maa hi si kɛ maa ya neneene, nɛ e matsɛ yemi ɔ se be poe gblegbleegble.

Kpojemi 11:15

Jehanɛ ɔ, bɔfo kpaagone ɔ kpa e titimati ɔ, nɛ i nu gbihi nɛ ngɛ pɛe wawɛɛ ngɛ hiɔwe ke, “Amlɔ nɛ ɔ, wa Nyɔmtsɛ ɔ kɛ e Kristo ɔ nɛ a ngɛ je ɔ nɔ yee. Nɛ a maa ye matsɛ kɛ maa ya neneene!”

Hebribi 1:8

Bi ɔ lɛɛ Mawu de ngɛ e he ke, “Mawu ji mo; o maa ye matsɛ kɛ maa ya neneene! Nɛ dami sane yemi maa pee o matsɛ tso.

1 Timoteo 1:17

Mawu kake too, Neneene Matsɛ, nɔ nɛ ngɛ daa nɛ a nɛ lɛ ɔ, a je e yi, nɛ a wo e hɛ mi nyami kɛ ya neneene! Amen.

Daniel 7:27

A maa ngɔ matsɛ yemihi tsuo nɛ ngɛ je ɔ mi ɔ a he wami, kɛ agboje ngɔ ha Hiɔwe No ɔ we ni klɔuklɔu ɔmɛ a ma a. A matsɛ yemi ɔ se be poe gblegbleegble, nɛ je nɛ ɔ mi matsɛmɛ ɔmɛ tsuo ma sɔmɔ mɛ, nɛ a maa bu mɛ tue.”

1 Petro 4:11

Ke nɔ ko ngɛ fiɛe ɔ, e fiɛ Mawu sɛ gbi ɔ; ke nɔ ko ngɛ sɔmɔe ɔ, e ngɔ he wami nɛ Mawu ha lɛ ɔ kɛ sɔmɔ. Nɔ́ tsuaa nɔ́ nɛ nyɛ ngɛ pee ɔ, e ha nɛ nihi nɛ a je Mawu yi kɛ gu Yesu Kristo nɔ. Mawu nɔ́ ji hɛ mi nyami, kɛ he wami kɛ yaa neneene. Amen.

Hebribi 2:4

Mawu nitsɛ pee okadi kɛ nyakpɛ ní slɔɔtohi babauu kɛ ye yi wami hemi nɛ ɔ he odase. Jehanɛ hu, e dla Mumi Klɔuklɔu nike ní ɔmɛ ngɔ ha kaa bɔ nɛ lɛ nitsɛ e suɔ kɛ ma nɔ mi.

Yeremia 10:10

Se mo Yawɛ, Mawu nitsɛnitsɛ ji mo; mo ji Mawu hɛ kalɔ ɔ nɛ; neneene matsɛ ji mo. Ke o mi mi fu ɔ, zugba mimiɛɔ, nɛ je ma amɛ nyɛ we nya dami.

La 105:27

Mawu ha nɛ a pee okadihi, kɛ nyakpɛ níhi ngɛ Egipt zugba a nɔ.

Daniel 4:17

Mawu bɔfo ɔmɛ nɛ a nɔ tsɔ, nɛ a hɛngmɛhi ngɛ si poe ɔ, bɔ nɛ a de ji nɛ ɔ nɛ. Lɔ ɔ he ɔ, nihi tsuo pɛpɛɛpɛ nɛ a na nɛ a le kaa Mawu nɛ ngɛ hiɔwe lokoo ɔ ngɛ he wami ngɛ nimli adesahi a matsɛ yemi nɔ, nɛ e ngɔɔ kɛ haa nɔ tsuaa nɔ nɛ e suɔ, nɔmlɔ ngua jio, nɔmlɔ wayo jio.’

Yesaya 28:29

Nɔ́ nɛ ɔ hu Yawɛ Tabohiatsɛ ɔ dɛ mi nɛ e je; e woɔ ga nɛ ngɛ nyakpɛ, nɛ e nile hiɛ babauu.

Yesaya 9:7

E nɔ yemi ɔ ma he si, nɛ e maa bɔ; ma a ma na tue mi jɔmi daa, ejakaa e maa ye tsɛ kaa Matsɛ David nitsɛ se yelɔ. E maa pee kpakpa, nɛ e maa ye dami sane, kɛ maa je be nɛ ɔ mi kɛ yaa su je mi nyagbe. Yawɛ Tabohiatsɛ ɔ kɛ hɛdɔ ma tsu ní nɛ ɔmɛ tsuo.

La 104:24

Yawɛ, hyɛ kaa o pee níhi babauu! Nile o kɛ pee lɛ tsuo pɛpɛɛpɛ. O nibɔ níhi hyi je ɔ mi tɔ.

La 92:5

Yawɛ, bɔ nɛ o ní tsumi ɔmɛ kle ɔ, ja nɔuu o juɛmi hu mi kuɔ.

La 86:10

Ejakaa o kle, nɛ o tsuɔ nyakpɛ níhi. Mo nɔ kake too ji Mawu.

La 77:19

O nyɛɛ kɛ gu wo ɔ mi; o po wo nɛ mi kuɔ ɔ kɛ be, se o nane mami he ɔmɛ lɛɛ nɔ ko nɔ ko li.

La 72:18

A je Yawɛ, Israel Mawu ɔ yi; lɛ nɔ kake too lɛ e peeɔ nyakpɛ níhi!

La 66:7

E ngɛ tsɛ yee kɛ he wami kɛ yaa neneene. E hɛngmɛ ngɛ je ma amɛ a he; atuã tsɔli kó wo a he nɔ.

Mose V, 4:34

Anɛ mawu ko ka hyɛ kaa e ma ya je je ma ko kɛ je je ma kpa ko mi kɛ pee lɛ nitsɛ e ma, kaa bɔ nɛ Yawɛ, nyɛ Mawu ɔ pee ha nyɛ ngɛ Egipt ɔ lo? Nyɛ nitsɛmɛ nyɛ na kɛ nyɛ hɛngmɛ, bɔ nɛ e je e he wami, kɛ e nyɛmi kpetekpleenyɛ ɔ kpo; e kɛ gbenɔ hiɔhi, kɛ ta ba; e pee okadihi, kɛ nyakpɛ níhi; nɛ e ha gbeye ní nguanguahi ba.

Romabi 11:33

Niatsɛ mi niatsɛ ji Mawu! Hyɛ bɔ nɛ e nile, kɛ juɛmi hiɛ ha! Mɛnɔ le bɔ nɛ e toɔ e yi mi ha? Blɔ nɔ nɛ e guu kɛ tsuɔ ní ɔ, mɛnɔ le?

Daniel 2:2

Enɛ ɔ he je ɔ, e tsɔ ya kpee womi mi leli ɔmɛ, klaali ɔmɛ, kunya yeli ɔmɛ, kɛ nyɔhiɔ mi hyɛli ɔmɛ kɛ ba, konɛ a ba tsɔɔ lɛ e nlami ɔ sisi. Kɛkɛ nɛ a ba nɛ a ba da si ngɛ matsɛ ɔ hɛ mi,