Lɔ ɔ he ɔ, nɔ́ nɛ Nyɔmtsɛ Yawɛ ngɛ dee ji nɛ ɔ nɛ: “I ngɛ sisi tomi ko nɛ he wa nɛ maa si kpɛii fiae ngɛ Zion; nɛ i ngɔ kɔ nya tɛ agbo ko kɛ ma mi. Nɔ́ nɛ a ngma ngɛ nɔ ji nɛ ɔ nɛ: ‘Nɔ nɛ heɔ yeɔ ɔ, e toɔ e tsui si.’
Nyɛ je ma amɛ, nyɛɛ ye gbeye, nɛ nyɛ bua nyɛ he nya! Nyɛ nihi nɛ nyɛ ngɛ tsitsaa hu, nyɛɛ bu tue. Nyɛɛ mia kɛ ha ta, se kɛ̃ ɔ, nyɛɛ ye gbeye! Ee, nyɛɛ mia, se kɛ̃ ɔ, nyɛɛ ye gbeye!
A maa ngɔ matsɛ yemihi tsuo nɛ ngɛ je ɔ mi ɔ a he wami, kɛ agboje ngɔ ha Hiɔwe No ɔ we ni klɔuklɔu ɔmɛ a ma a. A matsɛ yemi ɔ se be poe gblegbleegble, nɛ je nɛ ɔ mi matsɛmɛ ɔmɛ tsuo ma sɔmɔ mɛ, nɛ a maa bu mɛ tue.”
E maa to ga kɛ sisi nihi babauu. E ma wo e he nɔ, nɛ e ma kpata nihi babauu a hɛ mi be mi nɛ a hɛ be a he nɔ. Ganɔhi a ganɔ ɔ nitsɛ po, e maa te si ngɔ wo lɛ. Se a ma kpata e hɛ mi; nɛ tsa pi nɔmlɔ adesa he wami nɛ ma tsu nɔ́ nɛ ɔ.
Jamɛ a be ɔ, ma ha Yerusalem maa pee tɛ nɛ jiɔ ha je ma amɛ tsuo. Ma tsuaa ma nɛ ma wo tɛ nɛ ɔ nɔ ɔ, e maa ye e he awi. Je ma amɛ tsuo ma bla, nɛ a maa te si kɛ wo Yerusalem.
Mawu bɔfo ɔ de mi ke ma ngɔ Yawɛ sɛ gbi nɛ ɔ kɛ ya ha Zerubabel: “Pi o nyɛ́mi, loo o he wami nya; se ye mumi ɔ nɛ ma tsu enɛ ɔ. Yawɛ Tabohiatsɛ ɔ lɛ de.
Ejakaa wa le kaa ke a puɛ zugba nɛ ɔ nɔ bo tsu nɛ wa ngɛ mi nɛ ɔ, Mawu ma ha wɔ we ngɛ hiɔwe. We nɛ ɔ, pi nine nɛ a kɛ ma, nɛ e maa hi si kɛ maa ya neneene.
Ejakaa Kristo ɔ, pi he klɔuklɔu pe kulaa nɛ a kɛ nine pee, nɛ ji nɔ́ nitsɛ ɔ henɔ kɛkɛ ɔ mi nɛ e ya. Mohu ɔ, hiɔwe nitsɛnitsɛ nɛ e ho; nɛ amlɔ nɛ ɔ, e ngɛ lejɛ ɔ ngɛ Mawu hɛ mi ngɛ wa he.
Jehanɛ ɔ, bɔfo kpaagone ɔ kpa e titimati ɔ, nɛ i nu gbihi nɛ ngɛ pɛe wawɛɛ ngɛ hiɔwe ke, “Amlɔ nɛ ɔ, wa Nyɔmtsɛ ɔ kɛ e Kristo ɔ nɛ a ngɛ je ɔ nɔ yee. Nɛ a maa ye matsɛ kɛ maa ya neneene!”
Lohwe ɔ, kɛ matsɛmɛ ɔmɛ ma ya tua To bi ɔ. Se To bi ɔ, kɛ e se nyɛɛli ɔmɛ maa ye a nɔ kunimi. Lɛ ji nyɔmtsɛmɛ a nyɔmtsɛ, kɛ matsɛmɛ a matsɛ, nɛ e se nyɛɛli ɔmɛ ji nihi nɛ Mawu tsɛ, nɛ e hla mɛ ngɔ to, nɛ a yeɔ lɛ anɔkuale.”