Amos 8:3 - BAIBLO ALOO NGMAMI KLƆUKLƆU Ɔ

³ Jamɛ a ligbi ɔ, yi ɔmɛ nɛ a hii lae ngɛ matsɛ we ɔ mi ɔ ma nya awe mohu. A ma sake ni gbogboehi babauu kɛ fɔ he tsuaa he dii, nɛ a be nɔ́ ko nɔ́ ko he nue.”

Amos 8:3 ပူးပေါင်းရင်းမြစ်များ

La 39:9

Ma ma ye nya nɛ ma pee dii, ejakaa mo lɛ o ha nɛ i na nɔ́ kikɛ nɛ ɔ nɛ.

Yesaya 37:36

Jamɛ a nyɔ ɔ mi nɔuu ɔ, Yawɛ bɔfo ko ya gbe ta buli 185,000 ngɛ Asiria ta a mi. E nɔ jena makɛ ɔ, ne mɛ nɛ a gbo kɛ pueɔ si.

Yeremia 22:18

Lɔ ɔ he ɔ, bɔ nɛ Yawɛ ngɛ dee ngɛ Yuda matsɛ, Yehoyakim, Yosia binyumu ɔ he ji nɛ ɔ nɛ: “Ke e gbo ɔ, nɔ ko nɔ ko be kɔmɔ yee ha lɛ; nɔ ko nɔ ko be dee ke, ‘Ye nyɛmi due! Due!’ Nɔ ko nɔ ko be ya foe ha lɛ ke, ‘Ye nyɔmtsɛ! Ye matsɛ!’

Kɔmɔ Yemi 2:10

Yerusalem nimeli ɔmɛ hii si dii ngɛ zugba. A ngɔ bunyuku ngɔ pue a yi mi, nɛ a ha kpekpe ya bo kɛ tsɔɔ kaa a pia a he. Yihewi ɔmɛ ngɔ a hɛ mi kɛ bu si.

Yoel 1:11

Nyɛ ngmɔ huli, nyɛɛ ye kɔmɔ; nyɛ nihi nɛ nyɛ hyɛɛ wai ngmɔhi a nɔ, nyɛ nya awe; ejakaa ngma, akoko, kɛ ngmɔ nɔ ní tsuo hɛ mi kpata.

Yoel 1:13

Nyɛ osɔfohi nɛ nyɛ sɔmɔɔ ngɛ bɔ sami la tɛ ɔ he, nyɛɛ ha kpekpe ya bo, nɛ nyɛɛ wo yana! Nyɛɛ ya Mawu we ɔ mi, nɛ nyɛ ya ye kɔmɔ nyɔnyɔɔnyɔ tsuo. Ejakaa niye ní be ɔ, wai hu be nɛ nyɛɛ kɛ maa sã bɔ ha nyɛ Mawu ɔ.

Yoel 1:5

Nyɛ dã deli, nyɛ hɛ nɛ tsɛ, nɛ nyɛɛ wo yana; nyɛ wai dɔkɔdɔkɔ nuli, nyɛ nya awe; ejakaa a je nɔ́ ngɛ nyɛ nya mi.

Mose III, 10:3

Kɛkɛ nɛ Mose de Aaron ke, “Enɛ ɔ ji nɔ́ nɛ Yawɛ de ɔ nɛ. E ke, ‘Nihi nɛ hɛ mɛ kɛ su ye he ɔ, ma tsɔɔ mɛ bɔ nɛ i ngɛ klɔuklɔu ha, nɛ a maa wo ye hɛ mi nyami ngɛ ma a tsuo hɛ mi.’ ” Se Aaron de we nɔ́ ko.

Amos 4:10

“I ha nɛ gbenɔ hiɔ ba sɛ nyɛ kpɛti kaa nɔ́ nɛ i kɛ ba Egipt zugba a nɔ be ko ɔ. I ha nɛ nyɛ nihewi ɔmɛ gbo ngɛ ta mi, nɛ nyɛ he nyɛli ɔmɛ ha nyɛ ta okpɔngɔ ɔmɛ. I ha nɛ nyɛ ni gbogboe ɔmɛ je fu wo nyɛ ngɛ nyɛ sito he ɔ. Se loloolo ɔ, nyɛ kpale we kɛ bɛ ye ngɔ.

Amos 5:16

Nyɛ yayami ɔmɛ a he je ɔ, bɔ nɛ Nyɔmtsɛ Yawɛ Tabohiatsɛ Mawu ɔ ngɛ dee ji nɛ ɔ nɛ: “A maa wo yana ngɛ kpe he ɔmɛ, kɛ gbɛjegbɛ ɔmɛ a nɔ, nɛ nihi maa hi dee ke, ‘Ao! Ao!’ A ma tsɛ ngmɔ huli po kɛ ba, nɛ a ma ba ye kɔmɔ ha nyɛ; a ma tsɛ nihi nɛ laa kɔmɔ yemi la kɛ ba, nɛ a ba nya awe.

Amos 5:23

Nyɛɛ jɔɔ mi haomi kɛ la nɛ nyɛ laa kɛ ngmlaa boboobo ɔ; nyɛ kpa saku ɔmɛ hu, i hla we nɛ ma nu a gbi.

Amos 6:4

Nyɛ nihi nɛ nyɛ jualeɔ nyɛ se ngɛ sa tso kpakpahi nɛ a he jua wa a nɔ, nɛ nyɛ yeɔ jijɔ, kɛ na kpakpahi a lo, musu tloo nyɛ!

Amos 6:5

Nyɛ suɔ kaa nyɛ maa po lahi kaa bɔ nɛ David pee ɔ, nɛ nyɛɛ fia la amɛ ngɛ kpa sakuhi a nɔ.

Amos 6:8

Yawɛ Tabohiatsɛ Mawu ɔ ka e he kita ke, “Israel bi ɔmɛ a he nɔ womi ɔ, i hiee; a mɔ nguangua amɛ hu, i sume. Ma ngɔ a matsɛ ma a, kɛ e mi níhi tsuo kɛ ha a he nyɛli.”

Amos 8:10

Jehanɛ se hu, be mi nɛ nyɛ ngɛ ní yee, nɛ nyɛ ngɛ nyae ɔ, ma ha nɛ nyɛ ma bɔni kɔmɔ yemi jamɛ a be ɔ mi nɔuu; ma tsake nyɛ bua jɔmi la amɛ kɛ pee kɔmɔ yemi lahi. Ma ha nɛ nyɛ ma sã nyɛ yi nɔ, nɛ nyɛ ma bu kpekpe ya bo. Ma ha nɛ nyɛ maa ye kɔmɔ kaa nɔ ko nɛ e bi kake too pɛ ɔ gbo; nɔ tsuaa nɔ maa pee mɔbɔmɔbɔ jamɛ a ligbi ɔ.

Nahum 3:3

Ta buli nɛ hi okpɔngɔhi a nɔ ba tua ma a; klaate ɔmɛ ngɛ la pãe nylamnylam! Nɛ akplɔ ɔmɛ ngɛ kpɛe plamplam! A bua ni gbogboe ɔmɛ a nya glekuuglekuu; nihi nɛ gbo ɔ hiɛ babauu; a li a yibɔ; a ngɛ mɛ tɛe, nɛ a ngɛ a nɔ nɔe ngɛ a blɔ mi!

Zefania 1:7

Ligbi ɔ nɛ Yawɛ maa gbla ma a tue ɔ su ta. Lɔ ɔ he ɔ, nyɛɛ pee dii ngɛ e hɛ mi. Yawɛ miɔ nɛ e maa gu Yuda he nyɛli ɔmɛ a nɔ nɛ e kɛ kpata Yuda ma a hɛ mi, kaa bɔ nɛ a gbeɔ lohwehi kɛ sãã bɔ ɔ.