2 Timoteo 3:3 - BAIBLO ALOO NGMAMI KLƆUKLƆU Ɔ

³ Nihi maa pee a ní kaa nɔ́ nɛ pi adesahi kulaa ji mɛ, nihi nɛ mɔbɔ nami ko be a mi, nihi a biɛ puɛli, nihi nɛ peeɔ basabasa nɛ a li zo, awi yeli, kɛ nihi nɛ sume nɔ́ kpakpa.

Somi He Ɔ

³ nihi nɛ plee we nɔ he, somi mi kuli, sieku yeli, nihi nɛ nyɛ we a kɔnɔ nɔ nɛ a ye, nihi nɛ a hɛ jɔɛ, nihi nɛ sume nɔ́ kpakpa,

2 Timoteo 3:3 ပူးပေါင်းရင်းမြစ်များ

Mose I, 49:7

A gbiɛ a mi mi fumi ɔ, Ejakaa e nya wa, nɛ a kɛ peeɔ yi wu tso níhi. Ma gbɛ mɛ ngɔ fĩa Israel zugba a nɔ ngɛ a ma mi bi ɔmɛ a kpɛti.

La 15:4

Nɔ nɛ tuɔ munyu kɛ siɔ yayami peeli, nɛ e woɔ nihi nɛ yeɔ Yawɛ gbeye ɔ a hɛ mi nyami. Nɔ nɛ ke e ka kita, nɛ e kpale we e nya se, ke ji kaa lɔ ɔ maa pee haomi ha lɛ po.

La 22:6

Se imi lɛɛ, pi nɔmlɔ ji mi hu; i ngɛ kaa gɔgɔ. Nihi tsuo pɛpɛɛpɛ hiee mi, nɛ a bɔɔ mi ahlua.

Yesaya 53:3

Wa gbe e he guɛ, nɛ wa kua lɛ. E na nɔ́, nɛ e pi wawɛɛ nitsɛ. Nɔ ko nɔ ko plɛ we nɛ e hyɛ lɛ; wa gbe e he guɛ, nɛ wa bui lɛ saasaa.

Yesaya 60:14

Nihi nɛ wa mo yi mi ɔ a bimɛ ɔmɛ maa ba, nɛ a ma ba kpla si ha mo. Nihi nɛ gbe o he guɛ be ko ɔ, mɛ hu a ma ba kpla si ngɛ o nane nya. Nɛ a ma tsɛ mo ke, ‘Yawɛ ma,’ ‘Zion, Israel Mawu klɔuklɔu ɔ ma.’

Daniel 8:23

“Ke matsɛ yemi nɛ ɔmɛ a nyagbe be ɔ su ta, nɛ a yayami ɔ mi ba wa bɔ nɛ e sa kaa a gbla a tue ɔ, matsɛ ko ma ba te si. Matsɛ nɛ ɔ maa pee yiwutsotsɛ kɛ nɔ sisilɔ nɛ maa wa tue.

Mateo 10:21

“Nyɛmi maa ngɔ e nyɛmi ngɔ ha nɛ a ya gbe lɛ, nɛ tsɛmɛ hu maa ngɔ a bimɛ ngɔ ha ja nɔuu. Bimɛ maa te si ngɔ wo a fɔli, nɛ a ma ha nɛ a gbe mɛ.

Mateo 4:1

Jehanɛ ɔ, Mumi ɔ ngɔ Yesu kɛ ho nga a nɔ ya, konɛ Abosiami ya ka lɛ.

Luka 10:16

Yesu de e kaseli ɔmɛ ke, “Nɔ tsuaa nɔ nɛ maa bu nyɛ tue ɔ, imi tue e bu ɔ nɛ; nɔ nɛ ma kua nyɛ ɔ, imi e kua a nɛ. Nɔ tsuaa nɔ nɛ ma kua mi ɔ, e kua nɔ nɛ tsɔ mi ɔ.”

Luka 16:14

Benɛ Farisi bi ɔmɛ nu ní nɛ ɔmɛ tsuo ɔ, a ye Yesu he fɛu, ejakaa a suɔ sika.

Yohane 6:70

Yesu bi mɛ ke, “Anɛ pi imi nɛ i hla nyɛ ni nyɔngma kɛ enyɔ ɔmɛ lo? Lɛ kɛ pee kɛɛ nɛ nyɛ ti nɔ kake peeɔ Abosiami ɔ?”

Romabi 1:29

A peeɔ yi wu tso ní, kɛ yayami slɔɔtoslɔɔtohi. A jeɔ hunga, a pueɔ muɔ si, a pɛɔ, a sisiɔ nɔ, nɛ a toɔ a sibi a he ga yaya;

Romabi 1:31

a he nile gbo; ke a wo si ɔ, a yi nɔ, nɛ a nɛ́ mɔbɔ.

1 Korintobi 7:5

Nyumu kɛ e yo kó tsi a he nya kaa a kɛ a sibi be bɔmi nae. Lɛɛ ja eko ɔ, mɛ ni enyɔ ɔmɛ tsuo a kplɛɛ kaa a maa pee jã be kuku kɛkɛ, konɛ a na deka kɛ sɔle. Lɔ ɔ se ɔ, á bɔni bɔmi ekohu. Ke pi jã a, a be a he nɔ nyɛe maa ye hu, nɛ Satan maa ka mɛ.

1 Korintobi 7:9

Se ke nyɛ nyɛ́ we nyɛ he nɔ nyɛɛ ye ɔ, e hia kaa nyɛɛ sɛ gba si himi mi. Ejakaa lɔ ɔ hi pe nɔ́ nɛ akɔnɔ ma ba hao nyɛ.

1 Tesalonikabi 4:8

Lɔ ɔ he ɔ, nɔ tsuaa nɔ nɛ bui tsɔɔmi nɛ ɔ, pi nɔmlɔ adesa nɛ e bui, se mohu Mawu, nɔ nɛ ha nyɛ e Mumi Klɔuklɔu ɔ.

1 Timoteo 3:11

Sɔmɔli yi ɔmɛ hu ja nɔuu a pee nihi nɛ tsuɔ ní kɛ hɛdɔ, nɛ a ko ye sieku. A pee nihi nɛ a hɛ ka si, nɛ a yeɔ anɔkuale ngɛ nɔ́ tsuaa nɔ́ mi.

Tito 1:8

Asafo nya dalɔ ɔ, e pee nɔ nɛ peeɔ nibwɔ, nɛ e suɔ nɔ́ nɛ hi, nɔ nɛ juɛmi ka si, nɛ e peeɔ nɔ́ nɛ da; nɔ nɛ ngɔ e he ngɔ ha Mawu kulaa, nɛ e yeɔ e he nɔ.

Tito 2:3

Yi nikɔtɔma amɛ hu o kɛ mɛ nɛ tu munyu jã nɔuu, konɛ a ba a je mi saminya kaa nihi nɛ yeɔ Mawu gbeye. A ko pee a he sieku yeli, nɛ a ko ngɔ dã numi ngɔ pee a ní tsumi. Mohu ɔ, a tsɔɔ nɔ́ kpakpa,

Yakobo 2:6

Se nyɛ pueɔ ohiatsɛmɛ ɔmɛ a hɛ mi si. Anɛ pi niatsɛmɛ ɔmɛ nɛ waa nyɛ yi mi ɔ? Anɛ pi mɛ nɛ a ngɔɔ nyɛ kɛ yaa kojomi he ɔ?

2 Petro 2:14

A hɛngmɛ hyɛ we nɔ́ kpa ko kaa ja yihi yaholi pɛ. Pɔ tɔɛ mɛ kɛ yayami peemi. A sisiɔ nihi nɛ gbɔjɔ, nɛ a naa a he blɔ. A kase jiklɔɔ peemi, nɛ a le saminya. Mawu gbiɛ mɛ pɛ!

2 Petro 2:19

A woɔ mɛ si ke a maa ye a he, be mi nɛ mɛ nitsɛmɛ a pee a he nyɔguɛhi kɛ ha níhi nɛ puɛɔ nɔ. Ejakaa nɔ́ tsuaa nɔ́ nɛ yeɔ nɔ ko nɔ ɔ, nɔ ɔ peeɔ nyɔguɛ ha jamɛ a nɔ́ ɔ.

2 Petro 3:3

Kekleekle ɔ, nyɛ na nɛ nyɛɛ le kaa nyagbe ligbi ɔmɛ a mi ɔ, nɔ he fɛu yeli komɛ maa ba, nɛ nɔ́ nɛ a we akɔnɔ de mɛ ke a pee ɔ, lɔ ɔ a maa pee.

Yuda 1:16

Daa nɛ ɔ, nimli nɛ ɔmɛ ngɛ munyu huitihuiti tue kɛ ngɛ bee; nɔ́ muɛ a hɛ gblegbleegble. Mɛ nitsɛmɛ a he akɔnɔ yayahi a se nɛ a dii. A fĩaa; a peeɔ nya puu, nɛ a gbee nihi a yi mi, konɛ a kɛ na ni ɔmɛ a he blɔ.

Yuda 1:18

A de ke, “Nyagbe be ɔ mi ɔ, nihi maa ba nɛ a maa ye nyɛ he fɛu; a maa pee ní yayamihi nɛ mɛ nitsɛmɛ a tsui suɔ.”

Kpojemi 13:15

Mawu ha lohwe awi yelɔ enyɔne ɔ blɔ kaa e mu mumi kɛ wo amaga a mi, konɛ amaga a nɛ na wami, nɛ e tu munyu. Kɛkɛ ɔ, e ma ha nɛ a gbe nihi tsuo nɛ ja we lɛ ɔ.

Kpojemi 13:17

Nɔ ko nɔ ko be nyɛe ma he ní, loo e maa jua ní, kaa ja a kadi lɛ kikɛ nɛ ɔ kɛ kekleekle lohwe awi yelɔ ɔ biɛ, loo yibɔ nɛ daa si ha biɛ ɔ.

Kpojemi 16:6

Ejakaa adesa pue o ni klɔuklɔu ɔmɛ, kɛ gbali ɔmɛ a muɔ si. Enɛ ɔ he je ɔ, o ha mɛ muɔ ke a nu. Ee, nɔ́ pɛ nɛ sa mɛ ji nɛ ɔ nɛ!”

Kpojemi 17:6

I na kaa yo ɔ tɔ dã; ee, e nu ni klɔuklɔu ɔmɛ, kɛ nihi nɛ a gbe mɛ ngɛ Yesu he ɔ a muɔ, nɛ e pee kaa nɔ nɛ tɔ dã. Benɛ i na lɛ ɔ, ye nya kpɛ ye he wawɛɛ.