2 Tesalonikabi 2:2 - BAIBLO ALOO NGMAMI KLƆUKLƆU Ɔ

² ke nyɛ nu kaa mumi mi sɛ gbi ko je kpo, aloo munyu ko ngɛ pɛe, aloo kaa a ngɛ dee ke womi ko je wa ngɔ kaa Nyɔmtsɛ ɔ ligbi ɔ ba momo ɔ, nyɛ juɛmi mi ko pee nyɛ enyɔɔnyɔ, nɛ nyɛ ko hao hulɔ.

Somi He Ɔ

² kaa nyɛ ko ha nɛ a kɛ mumi ko loo munyu ko loo womi ko nɛ a ma de ke e je wa ngɔ ɔ nɛ puɛ nyɛ juɛmi kaa Nyɔmtsɛ ɔ Ligbi ɔ ba momo.

2 Tesalonikabi 2:2 ပူးပေါင်းရင်းမြစ်များ

Marko 13:7

Ke nyɛ nu tahi, kɛ ta sanehi a he ɔ, nyɛ ko hao. Ja ní nɛ ɔmɛ ba mi, se kɛ̃ ɔ, nyagbe be ɔ sui lolo.

2 Tesalonikabi 3:17

Imi Paulo nitsɛ, ye nine nya womi ji nɛ ɔ nɛ. Womi tsuaa womi nɛ ma ngma a, bɔ nɛ i gbeɔ nya ji nɛ ɔ nɛ. Kikɛ nɛ ɔ i ngmaa womi. I biɔ nyɛ saminya.

Luka 21:9

Ke nyɛ nu nɛ a ngɛ ta hwue, aloo a tsɔ atuã ngɛ he ko ɔ, nyɛ ko ye gbeye; ja kikɛmɛ a ní nɛ ɔmɛ ba mi lolo. Se kɛ̃ ɔ, nyagbe ɔ sui lolo.”

1 Tesalonikabi 4:15

Nɔ́ nɛ Nyɔmtsɛ ɔ nitsɛ de ɔ, lɔ ɔ wa ngɛ nyɛ dee nɛ ɔ nɛ. Ligbi ɔ nɛ Nyɔmtsɛ ɔ maa ba a, wɔ nihi nɛ wa hɛ ngɛ, nɛ wa maa hi wami mi kɛ mwɔɔ ɔ, wa be ni nɛmɛ nɛ gbo ɔ a hlami sɛe kɛ ya kpee lɛ.

1 Korintobi 1:8

Mawu nitsɛ maa hɛɛ nyɛ kɛ maa ya nyagbe, konɛ ligbi ɔ nɛ wa Nyɔmtsɛ Yesu Kristo maa ba a, piami ko piami ko kó hi nyɛ he.

Yohane 14:1

Yesu de e kaseli ɔmɛ ke, “Nyɛ ko ye nyɛ tsui. Nyɛɛ lɛɛ nyɛ he Mawu nyɛɛ ye; nɛ imi hu nyɛ he mi nyɛɛ ye.

Luka 21:19

Nyɛɛ hɛɛ nyɛ hemi kɛ yemi ɔ mi kpɛii, nɛ nyɛ ma na neneene wami.

Mateo 24:24

Ejakaa lakpa kristohi, kɛ lakpa gbali maa te si. A maa pee okadi nguahi, kɛ nyakpɛ níhi kɛ mlɔɔ nihi nɛ Mawu hla a tete.

Mika 2:11

“Gbalɔ nɛ ma nɛ ɔ suɔ ji lakpatsɛ kɛ nɔ sisilɔ; nɔ nɛ ma de mɛ ke, ‘Ma gba nɛ wai kɛ da nɛ nya wa nɛ ba ha nyɛ.’

Yesaya 7:2

Benɛ Yuda matsɛ ɔ nu kaa Siria ta a ba sɛ Israel zugba a mi momo ɔ, e kɛ e ma mi bi ɔmɛ tsuo ye gbeye wawɛɛ nitsɛ, nɛ a he do blibliibli kaa tsohi nɛ ngɛ mimiɛe ngɛ kɔɔhiɔ nya.

Kpojemi 19:20

A nu lohwe awi yelɔ ɔ, kɛ lakpa gbalɔ ɔ nɛ pee nyakpɛ níhi ngɛ e hɛ mi ɔ tsuo. E pee nyakpɛ ní ɔmɛ kɛ sisi nihi nɛ a kɛ lohwe ɔ kadi mɛ ɔ, kɛ ni nɛmɛ nɛ jaa lohwe ɔ we amaga a. A hɛ lohwe ɔ, kɛ lakpa gbalɔ ɔ tsuo ngɔ fɔ taku kɛ e mi la nɛ ngɛ tsoe gegeege ɔ mi hɛ ngmengmle.

1 Tesalonikabi 3:3

bɔ nɛ pee nɛ amanehlu nɛ ngɛ bae ɔ ko wo nyɛ ti nɔ ko he gbeye. Nyɛ nitsɛmɛ nyɛ le kaa nɔ́ nɛ Mawu to kɛ ha wɔ ji lɔ ɔ nɛ.

Efesobi 5:6

Nyɛ ko ha nɛ nɔ ko nɛ pee nyɛ kuasia; ejakaa nihi nɛ gboɔ tue, nɛ a peeɔ yayamihi kaa kikɛ nɛ ɔ, Mawu kɛ mi mi la gblaa a tue wawɛɛ.

Yesaya 26:3

Nɔ nɛ ngɔɔ e hɛ kɛ fɔɔ o nɔ, nɛ e heɔ mo yeɔ ɔ, o haa lɛ tue mi jɔmi.

2 Tesalonikabi 2:15

Lɔ ɔ he ɔ, nyɛmimɛ, nyɛɛ da si kpɛii! Anɔkuale ɔ nɛ wa tsɔɔ nyɛ ɔ, níhi nɛ wa de nyɛ, kɛ ní nɛmɛ nɛ wa ngma nyɛ ɔ, nyɛɛ pɛtɛ he wawɛɛ.

1 Tesalonikabi 5:2

Ejakaa nyɛ nitsɛmɛ nyɛ le tsɔ kaa Nyɔmtsɛ ɔ maa ba tlukaa kaa bɔ nɛ julɔ baa nyɔ mi.

Yohane 14:27

“I ngɛ nyɛ sie kɛ he jɔmi. Imi nitsɛ ye he jɔmi i ngɛ sie ha nyɛ. Pi bɔ nɛ je ɔ haa a nɛ i kɛ ngɛ nyɛ hae ɔ. Nyɛ ko ye nyɛ tsui; nɛ nyɛ ko je fɔ̃ hulɔ.

1 Korintobi 7:26

Amlɔ nɛ ɔ, he hiami be ɔ je sisi momo. Lɔ ɔ he ɔ, i susuu kaa mo nɔ, bɔ nɛ o ngɛ ɔ, o hi si jã kɛkɛ.

1 Korintobi 14:32

Nɔ nɛ a dloo lɛ Mawu sɛ gbi ɔ fiɛmi ɔ, e hia kaa e hyɛ e munyu tumi saminya, nɛ e le he nɛ sa kaa e tu munyu kɛ ya si.