2 Korintobi 7:9 - BAIBLO ALOO NGMAMI KLƆUKLƆU Ɔ

⁹ Se amlɔ nɛ ɔ lɛɛ ye bua jɔ ye he kaa i ngma womi ɔ. Ye bua jɔɛ ye he kaa i ha nɛ nyɛ hao, se mohu ye bua jɔ kaa lɔ ɔ ha nɛ nyɛ tsake nyɛ blɔhi. Ejakaa e hao nyɛ bɔ nɛ sa Mawu hɛ mi. Lɔ ɔ he ɔ, wɔɔ lɛɛ wa pee we nyɛ nɔ́ ko yeyee.

Somi He Ɔ

⁹ Se jehanɛ ɔ, ye bua jɔ, pi ngɛ dɔmi nɛ e dɔ nyɛ ɔ he, se mohu akɛnɛ e dɔ nyɛ nɛ e ha nyɛ pia nyɛ he ɔ he je. Ejakaa e dɔ nyɛ bɔ nɛ sa Mawu hɛ mi konɛ e ko je wɔ nɛ nɔ́ ko laa nyɛ.

2 Korintobi 7:9 ပူးပေါင်းရင်းမြစ်များ

La 38:18

I ngɛ jajee kaa i pee yayami; ye he yayami ɔmɛ ngɛ mi dɔe.

Fiɛlɔ 7:3

Kɔmɔ yemi hi pe muɔmi. Ke o hɛ mi pee mɔbɔmɔbɔ ɔ, o leɔ ní.

Zakaria 12:10

“David nina, kɛ ni kpahi nɛ ngɛ Yerusalem ɔ, ma ngɔ mumi nɛ naa mɔbɔ, kɛ mumi nɛ faa kue ngɔ wo a mi tɔ. Kɛkɛ ɔ, ke a na nɔ nɛ a gbɔ lɛ nɔ́ ɔ, a maa nyɛ ya ha lɛ kaa bɔ nɛ a nyɛɛ ya ha bi kake too. A ma nya awe kaa nihi nyaa awe ha a bitɛte.

Mateo 3:8

Nyɛɛ pee níhi nɛ tsɔɔ kaa nyɛ tsake nyɛ tsui.

Luka 15:10

I ngɛ nyɛ dee ke, jã nɔuu lɛ Mawu bɔfohi ma nya, ke yayami peelɔ kake tsake e tsui ɔ.”

Luka 15:32

Se e sa kaa wa nya, nɛ wa na bua jɔmi, ejakaa o nyɛmi nɛ ɔ gbo, se e kpale ba wami mi ekohu; e laa, se a na lɛ.’ ”

Luka 15:7

I ngɛ nyɛ dee ke, jã nɔuu lɛ bua jɔmi maa ba hiɔwe, ke yayami peelɔ kake tsake e tsui, pe dali nyingmi nɛɛ kɛ nɛɛ kɛ se, nɛ mɛɛ tsui tsakemi he hia we mɛ.

Ni Tsumi 20:21

I tu munyu kɛ tsɔɔ Yuda bi, kɛ ma je li tsuo ke a kpa yayami peemi, nɛ a ba Mawu ngɔ, nɛ a he wa Nyɔmtsɛ Yesu Kristo nɛ a ye.

2 Korintobi 1:12

Nɔ́ kake nɛ wa fĩaa ngɔ fɔɔ nɔ, nɛ wa he nile hu yeɔ he odase ji kaa wa baa wa je mi saminya ngɛ he tsuaa he, titli ngɛ waa kɛ nyɛ wa bɔmi mi kaa bɔ nɛ Mawu ngɛ hlae ɔ. Wa yeɔ anɔkuale nɛ mu ko mu ko be wa he. Pi wɔ nitsɛmɛ wa nile nɛ waa kɛ peeɔ enɛ ɔ, se mohu Mawu dloomi ɔ nya.

2 Korintobi 2:16

Nihi nɛ ngɛ blɔ nɔ kɛ yaa hɛ mi kpatami mi ɔ, Kristo sɛ gbi ɔ ji gbenɔ ha mɛ. Se ni nɛmɛ nɛ ngɛ blɔ nɔ kɛ yaa neneene wami mi ɔ lɛɛ sɛ gbi ɔ ji wami ha mɛ. Ní tsumi kaa kikɛ nɛ ɔ, mɛnɔ ma nyɛ?

2 Korintobi 7:8

Jamɛ a womi ɔ nɛ i ngma nyɛ ɔ ha nɛ nyɛ hao mohu lɛɛ, se i pia we ye he kaa i ngma. I pia ye he kaa womi ɔ ha nɛ nyɛ hao, pohu be kpiti ko kɛkɛ.