1 Yohane 5:14 - BAIBLO ALOO NGMAMI KLƆUKLƆU Ɔ

¹⁴ Wa yi gbeye ngɛ Mawu hɛ mi, ejakaa wa le kaa ke waa kɛ juɛmi kpakpa bi lɛ nɔ́ ko ɔ, e buɔ wɔ tue.

Somi He Ɔ

¹⁴ Nɛ enɛ ɔ ji ka nɛ wa ngɛ ngɛ e hɛ mi ɔ, kaa, ke wa ba nɔ́ ko ngɛ e suɔmi nya a, e buɔ wɔ tue.

1 Yohane 5:14 ပူးပေါင်းရင်းမြစ်များ

Matsɛmɛ I, 3:12

nɔ́ nɛ o bi ɔ, ma pee ha mo. Ma ha mo nile, kɛ nɔ́ sisi numi babauu bɔ nɛ nɔ ko hí si hyɛ nɛ e kɛ mo sɔ, nɛ o se hu nɔ ko nɔ ko ba be nae nɛ e kɛ mo maa sɔ.

Hiob 34:28

A ha nɛ ohiatsɛmɛ kpa ngmlaa kɛ ba Mawu yemi kɛ buami, nɛ Mawu nu nɔ́ nali ɔmɛ a kue fami ɔ.

La 145:19

Nihi nɛ yee lɛ gbeye ɔ, e peeɔ a hiami ní kɛ haa mɛ. E buu a kue fami ɔmɛ hu tue, nɛ e heɔ a yi wami.

La 31:22

Ye tsui po, nɛ i susu kaa e je e juɛmi kɛ je ye nɔ. Se benɛ i fa kue ha lɛ ɔ, e bu mi tue.

La 34:17

Ke dali fa kue ha Yawɛ ɔ, e nuɔ, nɛ e jeɔ mɛ kɛ jeɔ a haomihi tsuo a mi.

La 69:33

Ejakaa Yawɛ buɔ dɛgutsɛmɛ tue, nɛ lɛ nitsɛ e nihi nɛ a wo mɛ tsu ɔ, e hɛ ji a nɔ.

Abɛ Womi 10:24

Nɔ́ nɛ yayami peelɔ ngɛ gbeye yee ɔ, lɔ ɔ ji nɔ́ nɛ maa ba e nɔ. Nɔ nɛ peeɔ kpakpa lɛɛ nɔ́ nɛ e ngɛ hlae ɔ, lɔ ɔ a ma ha lɛ.

Abɛ Womi 15:29

Yawɛ kɛ yayami peeli a kpɛti kɛ; se e buɔ dali a kue fami tue.

Yeremia 33:3

“Tsɛ mi, nɛ ma he mo nɔ; ma sɛɛ mo ní nguanguahi a he sane, kɛ nyakpɛ níhi nɛ o li.

Mateo 21:22

Ke nyɛ ngɛ hemi kɛ yemi ɔ, nɔ́ tsuaa nɔ́ nɛ nyɛ maa fa kue ngɛ he ɔ, nyɛ nine maa su nɔ.”

Yohane 11:42

I le kaa o buɔ mi tue be tsuaa be; se i ngɛ enɛ ɔ dee ngɛ nihi nɛ pueɔ si nɛ ɔ a he, bɔ nɛ pee nɛ a he ye kaa mo nɛ o tsɔ mi.”

Yohane 14:13

Ke nyɛ kpa nɔ́ ko he pɛɛ ngɛ ye biɛ mi ɔ, ma pee; kɛkɛ ɔ, kɛ gu Bi ɔ nɔ ɔ, a maa wo Tsɛ ɔ hɛ mi nyami.

Yohane 15:7

Ke nyɛ mɛtɛ ye he, nɛ nyɛ he ye munyu ɔmɛ ye ɔ, nɔ́ tsuaa nɔ́ nɛ nyɛ suɔ ɔ, ke nyɛ bi ɔ, a ma ha nyɛ.

Yohane 16:24

Kɛ ba si piɔ ɔ, nyɛ bi we nɔ́ ko hyɛ ngɛ ye biɛ mi. Nyɛ bi, nɛ a maa pee ha nyɛ; kɛkɛ ɔ, nyɛ ma na bua jɔmi babauu.

Yohane 9:31

Wa le kaa Mawu bui yayami peeli tue, se nɔ nɛ yeɔ lɛ gbeye, nɛ e peeɔ Mawu suɔmi nya ní ɔ, Mawu buɔ lɛ tue.

Efesobi 3:12

Akɛnɛ wa heɔ Kristo Yesu yeɔ, nɛ wa ngɔ wa hɛ ngɔ fɔ e nɔ he je ɔ, wa yi gbeye kaa wa maa ya Mawu hɛ mi.

Hebribi 10:35

Lɔ ɔ he ɔ, nyɛ kɔni mi ko jɔ̃ ngɛ nɔ́ nɛ nyɛ ngɔ nyɛ hɛ ngɔ fɔ nɔ ɔ he, ejakaa nyɛ nine maa su hiɔwo agbo ko nɔ.

Hebribi 3:14

Ejakaa wa hɛ nɛ wa kɛ fɔ Kristo nɔ kɛ je sisije ɔ, ke wa hɛɛ mi kpɛii hluu kɛ ya si nyagbe ɔ, lɛɛ wa peeɔ nihi nɛ a kɛ Kristo pee kake.

Hebribi 3:6

Se Kristo lɛɛ e ye anɔkuale ngɛ Mawu we ɔ kaa Mawu bi. Ke waa kɛ kã kɛ gɛjɛmi hɛɛ hɛ kɛ nɔ fɔmi ɔ mi kpɛii ɔ, wa peeɔ Mawu we bi.

Yakobo 4:3

Ke nyɛ kpa pɛɛ hu, nyɛ nine sui nɔ, ejakaa nyɛ yi mi tomi ɔmɛ hí; níhi nɛ ma ha nyɛ bua jɔmi pɛ he pɛɛ nɛ nyɛ kpaa.

Yakobo 5:16

Lɔ ɔ he ɔ, nyɛɛ jaje nyɛ he yayami ɔmɛ kɛ tsɔɔ nyɛ sibi; nyɛɛ sɔle ha nyɛ sibi konɛ a tsa nyɛ. Ke nɔ nɛ peeɔ nɔ́ nɛ da fa kue ha Mawu ɔ, e tsuɔ ní saminya.

1 Yohane 2:28

Ye bimɛ tsɔwi, nyɛɛ ya nɔ nɛ nyɛɛ hi Kristo mi, bɔ nɛ pee nɛ ke e je e he kpo ɔ, wa nɔ gbagba nɛ te. Kɛkɛ ɔ, ligbi ɔ nɛ e maa ba a, zo be wɔ gbee ngɛ e hɛ mi.