1 Tesalonikabi 2:12 - BAIBLO ALOO NGMAMI KLƆUKLƆU Ɔ

¹² Wa wo nyɛ he wami; wa wo nyɛ bua, nɛ wa wo nyɛ ga kaa nyɛɛ ba nyɛ je mi bɔ nɛ sa Mawu hɛ mi. Lɛ nɛ e tsɛ nyɛ ke nyɛɛ ba lɛ nitsɛ e matsɛ yemi ɔ, kɛ e nyami ɔ mi.

Somi He Ɔ

¹² Wa wo nyɛ he wami, wa wo nyɛ bua, nɛ wa su nyɛ kaa nyɛɛ nyɛɛ bɔ nɛ sa Mawu nɛ tsɛ nyɛ kɛ ba lɛ nitsɛ e matsɛ yemi kɛ e hɛ mi nyami ɔ mi ɔ hɛ mi.

1 Tesalonikabi 2:12 ပူးပေါင်းရင်းမြစ်များ

Efesobi 4:1

Lɔ ɔ he ɔ, imi nɛ a wo mi tsu ngɛ Nyɔmtsɛ ɔ nɛ i ngɛ sɔmɔe ɔ he ɔ, i kpa nyɛ pɛɛ nɛ nyɛɛ ba nyɛ je mi saminya, bɔ nɛ maa sa ní tsumi nɛ Mawu tsɛ nyɛ ke nyɛ ba tsu ɔ.

1 Yohane 2:6

Nɔ nɛ deɔ ke e ngɛ Mawu mi ɔ, e ba e je mi kaa bɔ nɛ Yesu Kristo ba e je mi ɔ.

1 Tesalonikabi 4:12

Ke nyɛ pee jã a, nihi nɛ li Kristo lolo ɔ maa bu nyɛ, nɛ nyɛ be nyɛ he ngɔe kɛ fɔ nɔ ko nɔ.

1 Petro 5:10

Se ke nyɛ na amanehlu be bɔɔ se ɔ, Mawu nɛ dlooɔ wɔ níhi tsuo ɔ, lɛ nitsɛ e maa pee nɔ́ tsuaa nɔ́ nɛ he hia ha nyɛ. E maa waje nyɛ; e maa wo nyɛ he wami, nɛ e ma ha nɛ nyɛ ma fi si kaa nyɛ le lɛ daa. Lɛ nɛ e tsɛ nyɛ, konɛ nyɛɛ kɛ lɛ ba hi e hɛ mi nyami nɛ ngɛ kɛ yaa neneene ɔ mi; ejakaa nyɛɛ kɛ Kristo ba pee kake.

1 Tesalonikabi 5:24

Nɔ nɛ tsɛ nyɛ ɔ, anɔkualetsɛ ji lɛ; nɛ e maa pee hulɔ.

Kolosebi 1:10

Kɛkɛ ɔ, nyɛ maa ba nyɛ je mi bɔ nɛ maa sa Nyɔmtsɛ ɔ hɛ mi. Nyɛ ma tsu ní kpakpa sɔuu, nɛ nyɛ maa le Mawu saminya pe bɔ nɛ nyɛ le lɛ daa.

Efesobi 5:8

Jinɛ sa a, nyɛ nitsɛmɛ nyɛ ngɛ diblii mi, se nɛ nyɛ ngɔ nyɛ he ba mɛtɛ Nyɔmtsɛ, he ɔ, nyɛ ba plɛ la. Lɔ ɔ he ɔ, nyɛɛ ba nyɛ je mi kaa nihi nɛ kɛ la ngɛ nyɛɛe.

1 Petro 2:9

Se nyɛɛ lɛɛ, wɛtso nɛ Mawu hla ji nyɛ, odehe osɔfohi, je ma klɔuklɔu, kɛ Mawu nitsɛ e ma. E hla nyɛ nɛ e tsɛ nyɛ kɛ je diblii mi kɛ ba lɛ nitsɛ e la nɛ ngɛ nyakpɛ ɔ he, konɛ nyɛ ba fiɛ nyakpɛ níhi nɛ e tsu ɔ.

1 Tesalonikabi 4:1

Nyagbe ɔ, nyɛmimɛ, nyɛ kase kɛ je wa ngɔ bɔ nɛ nyɛ maa ba nyɛ je mi nɛ e sa Mawu hɛ mi; nɛ jã nyɛ ngɛ pee ɔ nɛ. Se kɛ̃, ngɛ Nyɔmtsɛ Yesu biɛ mi ɔ, wa ngɛ nyɛ pɛɛ kpae, nɛ wa ngɛ nyɛ ga woe kaa nyɛɛ pee kɛ ya nɔ pe jã po.

Kolosebi 2:6

Akɛnɛ nyɛ he Kristo Yesu kaa nyɛ Nyɔmtsɛ ɔ, nyɛɛ ya nɔ nyɛɛ kɛ lɛ nɛ pee kake.

Efesobi 5:2

Nyɛ je nyɛ suɔmi kpo ngɔ tsɔɔ nyɛ sibi ngɛ nyɛ ní peemi mi kaa bɔ nɛ Kristo suɔ wɔ nɛ e ba gbo ngɛ wa he ɔ. Ee, Kristo ngɔ e he ngɔ ha kaa nike ní nɛ a kɛ sã bɔ, nɛ he via, nɛ sa Mawu hɛ mi.

Galatabi 5:16

I ngɛ nyɛ dee ke, nyɛ ha nɛ Mawu mumi ɔ nɛ tsɔɔ nyɛ bɔ nɛ nyɛ maa ba nyɛ je mi ha, konɛ nyɛ ko tsu nɔmlɔ tso ɔ suɔmi nya ní.

1 Korintobi 1:9

Mawu, nɔ nɛ kpee nyɛ ke nyɛɛ kɛ e Bi Yesu Kristo, wa Nyɔmtsɛ ɔ ba bɔ huɛ ɔ, anɔkualetsɛ ji lɛ.

Filipibi 1:27

Lɔ ɔ he ɔ, nɔ́ nɛ hia pe kulaa ji, nyɛɛ ba nyɛ je mi kaa bɔ nɛ sane kpakpa a nɛ kɔɔ Kristo he ɔ tsɔɔ ɔ, konɛ i nyɛ ba na nyɛ jio, i bɛ́ jio, ma nu nyɛ he kaa nyɛ tsuo nyɛɛ kɛ juɛmi kake hɛɛ hemi kɛ yemi ɔ mi kpɛii kɛ ngɛ sane kpakpa a he plee.

1 Petro 3:9

Nyɛ ko ngɔ yayami kɛ ma yayami nane mi, aloo jɛmi kɛ ma jɛmi nane mi. Ke nihi pee nyɛ yayami, loo a jɛ nyɛ ɔ, nyɛ de Mawu nɛ e gbaa mɛ mohu. Ejakaa gbaami Mawu wo si ke e maa gbaa nyɛ benɛ e tsɛ nyɛ ɔ nɛ.

2 Timoteo 1:9

Mawu he wa yi wami, nɛ e tsɛ wɔ, konɛ wa ba pee e nihi. Pi nɔ́ kpakpa ko nɛ wa pee he je, se mohu lɛ nitsɛ e yi mi tomi nya nɛ e dloo wɔ. Wa ná kikɛmɛ a dloomi nɛ ɔ kɛ gu Kristo Yesu nɔ blema lokoo loko a bɔ je ɔ.

Romabi 8:28

Wa le kaa nɔ́ tsuaa nɔ́ mi ɔ, Mawu piɛɔ nihi nɛ suɔ lɛ ɔ a he, konɛ e hi ha mɛ. Nimli nɛ ɔmɛ ɔ, Mawu nitsɛ nɛ to e yi mi, nɛ e tsɛ mɛ.

Romabi 8:30

Lɔ ɔ he ɔ, nihi nɛ Mawu hla a, mɛ nɔuu e tsɛ, nihi nɛ e tsɛ ɔ, mɛ nɔuu e wo nguɔ, nɛ nihi nɛ e wo nguɔ ɔ, e wo mɛ nɔuu a hɛ mi nyami.

Mose I, 5:22

Nɛ́ a fɔ Metusela se ɔ, Enok kɛ Mawu hi si saminya jeha 300. E fɔ binyumuhi kɛ biyi kpahi,

2 Korintobi 4:6

Mawu lɛ de ke, “La nɛ tso kɛ je diblii mi.” Lɛ Mawu ɔ nɔuu lɛ haa la kpɛɔ ngɛ wa tsui mi. Nɛ la nɛ ɔ haa wa leɔ Mawu hɛ mi nyami nɛ kpɛɔ ngɛ Kristo hɛ mi ɔ.

2 Tesalonikabi 1:10

ligbi ɔ nɛ e maa ba nɛ e ni klɔuklɔu ɔmɛ ma je e yi, nɛ nihi nɛ heɔ lɛ yeɔ maa wo e hɛ mi nyami ɔ. Nɛ nyɛ hu nyɛ maa piɛ a he, ejakaa sɛ gbi ɔ nɛ wa ngɔ ba ha nyɛ ɔ, nyɛ he ye.

2 Petro 1:3

Mawu ha wɔ níhi tsuo nɛ maa hia wɔ ɔ, konɛ waa ba wa jemi kaa Mawu jali nitsɛnitsɛmɛ. E pee nɔ́ nɛ ɔ, ejakaa wa le lɛ Mawu ɔ nɛ tsɛ wɔ kɛ gu lɛ nitsɛ e nyami, kɛ e mi mi himi ɔ mi ɔ.

3 Yohane 1:6

A ba ye suɔmi nɛ o ngɛ kɛ ha mɛ ɔ he odase ha asafo ɔ ngɛ hiɛ ɔ. I kpa mo pɛɛ nɛ o wo mɛ blɔ saminya bɔ nɛ maa sa Mawu hɛ mi nɛ a kɛ tsa a blɔ hiami ɔ nɔ.

Kronika II, 17:4

E sɔmɔ e tsɛ Mawu ɔ; e ye Mawu mlaa amɛ a nɔ, nɛ e pee we e ní kaa Israel matsɛmɛ ɔmɛ.