1 Petro 2:19 - BAIBLO ALOO NGMAMI KLƆUKLƆU Ɔ

¹⁹ Ke o na amanehlu nɛ sɛ́, nɛ o le kaa lɔ ɔ ji Mawu suɔmi nya ní ɔ, Mawu maa gbaa mo.

Somi He Ɔ

¹⁹ Ejakaa enɛ ɔ ji dloomi ke Mawu he nilemi he je nɛ nɔ ko nyɛɔ nidɔ ni nya daa, nɛ e naa amanehlu nɛ sɛ ɔ.

1 Petro 2:19 ပူးပေါင်းရင်းမြစ်များ

1 Petro 2:20

Ke o pee nɔ́ nɛ dɛ, nɛ a ngɛ mo kpa fiae ngɛ he, nɛ o to o tsui si ɔ, mɛni se nami ngɛ he? Se ke o pee kpakpa, nɛ o ngɛ he amanehlu nae, nɛ o to o tsui si ɔ, Mawu maa gbaa mo.

1 Korintobi 15:10

Se Mawu dloomi lɛ pee mi nɔ́ nɛ i ji mwɔnɛ nɛ ɔ, nɛ dloomi nɛ e dloo mi ɔ pee we yaka. Ee, i tsu ní wawɛɛ pe bɔfo kpa amɛ tsuo kulaa, se pi imi; Mawu dloomi ɔ mohu lɛ tsu ní ɔ.

Luka 6:32

“Ke nyɛ suɔ nihi nɛ suɔ nyɛ pɛ ɔ, mɛni lɛ nyɛ pee nɛ bɛ hyɛ nɛ sa kaa a jeɔ nyɛ yi? Nihi nɛ li Mawu tete po suɔ nihi nɛ suɔ mɛ!

Romabi 13:5

Enɛ ɔ he je ɔ, e sa kaa nyɛɛ ba nyɛ he si ha nɔ yeli; pi kaa nyɛ tue kɛkɛ nɛ Mawu maa gbla ke nyɛ pee we ja, se nyɛ he nile hu maa bu nyɛ fɔ.

Yohane 15:21

Ye he ɔ, a maa pee nyɛ ní nɛ ɔmɛ tsuo, ejakaa nɔ nɛ tsɔ mi ɔ, a li lɛ.

2 Timoteo 1:12

nɛ lɔ ɔ he nɛ i ngɛ nɔ́ nae nɛ ɔ nɛ; se kɛ̃ ɔ, ye nine mi wui nyu; ejakaa nɔ nɛ i he ye ɔ, i le lɛ. I heɔ yeɔ kaa sane kpakpa a fiɛmi ɔ nɛ e tu ngɔ wo ye dɛ mi ɔ, e maa bu he kɛ yaa su nyagbe ligbi ɔ.

2 Korintobi 8:1

Nyɛmimɛ! Wa ngɛ hlae nɛ nyɛɛ le nɔ́ nɛ Mawu dloomi ɔ tsu ngɛ asafo ɔmɛ a mi ngɛ Makedonia.

2 Korintobi 1:12

Nɔ́ kake nɛ wa fĩaa ngɔ fɔɔ nɔ, nɛ wa he nile hu yeɔ he odase ji kaa wa baa wa je mi saminya ngɛ he tsuaa he, titli ngɛ waa kɛ nyɛ wa bɔmi mi kaa bɔ nɛ Mawu ngɛ hlae ɔ. Wa yeɔ anɔkuale nɛ mu ko mu ko be wa he. Pi wɔ nitsɛmɛ wa nile nɛ waa kɛ peeɔ enɛ ɔ, se mohu Mawu dloomi ɔ nya.

La 119:86

A ngɛ lakpa toe kɛ ngɛ mi yi mi wae gu. Se o mlaa amɛ maa si kpɛii, lɔ ɔ he ɔ, ba he mi!

La 69:4

Nihi nɛ ye he ngɛ mɛ tsɛ̃e yaka gu ɔ, a he hiɛ babauu pe ye yi bwɔmi. Ye he nyɛli lakpatsɛmɛ nɛ ngɛ ye hɛ mi hlae nɛ a kpata a, yiwutsotsɛmɛ kpanakuhi ji mɛ. Anɛ níhi nɛ pi ojo nɛ i ye kɛ na a, lɔ ɔmɛ hu ma ngɔ kɛ ha lo?

La 38:19

Ye he nyɛli ɔmɛ ngɛ kpakpataa, nɛ a he wa. Nihi nɛ nyɛɔ mi yaka gu ɔ, a he hiɛ babauu.

La 35:19

Ko ha nɛ ye he nyɛli lakpatsɛmɛ ɔmɛ nɛ a nya. Nihi nɛ nyɛɔ mi yaka gu ɔ, ko ha nɛ a kpɛ mi.

Hiob 21:27

Hyɛ, i le nyɛ juɛmi ɔmɛ! Ga nɛ nyɛ to nɛ nyɛɛ kɛ maa wa mi yi mi ɔ, i le.

Ni Tsumi 11:23

Benɛ e ya su lejɛ ɔ, nɛ e na bɔ nɛ Mawu gbaa ni ɔmɛ ɔ, e bua jɔ e he, nɛ e tu munyu tsɔɔ mɛ tsuo ke a ye Nyɔmtsɛ ɔ anɔkuale kɛ a tsui tsuo.

Hebribi 10:2

Nihi nɛ jaa Mawu ɔ, kaa a je a he yayami ɔmɛ niinɛ ɔ, a he nile be mɛ fɔ bue ngɛ a he yayami he hu, nɛ e be hiae kaa a sã bɔ hu.

1 Petro 4:15

Nyɛ ti nɔ ko nɔ ko kó na amanehlu kaa nɔmlɔ gbelɔ, aloo julɔ, aloo yayami peelɔ, aloo nɔ ko nɛ e kɛ e he woɔ ni kpahi a sanehi a mi.