Tuka Jesus inina yanka. Unkan wośnapi kagapi itancan kin heciya; Wakantanka ni un kin on wacajeciciyate, Messiya Wakantanka Cinhintku kin he niye hecinhan, unkokiyaka miye.
Unkan ohnihde wakan kin waayupte c̣a heciya; Woniya Wakan kin en niu kta, qa Iyotan Wankantu towaśake kin aohanziniye kta, qa hecen taku wakan wan yaton kte cin he Wakantanka Cinhintku kin eciyapi kta.
Unkan Wicoie kin he wic̣a. ceḣpi kagapi, qa unkiyepi kin en ounyan; qa wootanin tawa kin wanunyakapi, wootanin kin he Atkuku eciyatanhan iśnana icaga tawa kin he iyececa; wowaonśida wowicake ko ojudan.
Tuka dena e owapi, heon Jesus he Messiya Wakantanka Cinhintku kin hee e wicayadapi kta; qa wicayadapi kin on, iye caje kin eciyatanhan, wiconi duhapi kta.
Wowicake, wowicake eciyatanhan heciciyapi, Anpetu wan u qon wanna hi, wicaśta ṭa tona Wakantanka Cinhintku ho kin naḣon kta; qa tona naḣon kinhan hena ni kta.
He wicaśta wokcan kin heca, qa Wakantanka wokonze on konza, wicaceḣpi eciyatanhan iye tancan aicage kte cin he etanhan Meesiya, iye oiyotanke kin akan iyotanke kta e icaḣye kta he sdonya.
Abraham, qa Isaak, qa Jakob Wakantanka tawapi; hunkake wicunyanpi Wakantanka tawapi kin he Cinhintku Jesus wanna hdutan; he niyepi e wicayaqupi, qa Pilate itokam yakipajinpi, he iye kiyuśke kte ḣinca tuka.
Unkan he taku aiepica śni, Wakantanka awacinpi kin he wowiyukcan tanka; Wakan tanka wicaceḣpi en ihdutanin qon, Woniya kin on yaowotanna kagapi, maḣpiya ohnihde kin wanyakapi, Ikcewicaśta kin ekta oyakapi, wicoicage kin en wicadapi, qa wowitan kin ekta wankan ehdakupi.
Taku wanunyakapi qa naunḣonpi kin he unkoniciyakapi, hecen niye unyecicapi kta; unkan awicakehan Ateyapi kin kici okiciciya unyakonpi, qa nakun iye Cinhintku Jesus Messiya kici.
Tuwe Jesus he Messiya kin ee e wicada kin he Wakantanka eciyatanhan tonpi; qa tuwe waicaḣye cin waśtedake cinhan, he tuwe iye eciyatanhan teca ni en tonpi kin he nakun waśtedaka ece.
Unkan Wakantanka Cinhintku kin he hi, qa wicoksape unqupi, on tuwe wicake cin iyeunkiyapi kta e sdonunyanpi; unkan tuwe wicake cin he en unyakonpi, iye Cinhintku Jesus Messiya hee. Wowicake Wakantanka qa owihanke wanin wiconi kin hee.